Mɔɔ Tɔ Zo Nwiɔ Kɔmaa Kɔlentema

2 Ɔluakɛ meyɛ me adwenle kɛ menrɛva nyanelilɛ menrɛra bɛ nwo lɔ bieko. 2 Ɔluakɛ saa memaa bɛdi nyane a, nwane a kɛmaa me nye kɛlie a? Kyesɛ bɛdabɛ mɔɔ memaanle bɛlile nyane la ala. 3 Mengɛlɛle bɛ kɛ mɔɔ menyɛle la, amaa saa meba a meanli bɛdabɛ mɔɔ ɔwɔ kɛ medi bɛ nwo fɛlɛko la anwo nyane, ɔluakɛ melɛ anwodozo kɛ debie mɔɔ maa me nye die la maa bɛdabɛ noko bɛ nye die. 4 Menvale nyanelilɛ nee ahonle nu abodelɛ yɛɛ ɛzunlɛ dɔɔnwo a mengɛlɛle bɛ a, tɛ kɛ memaa bɛali nyane la ati ɔ,+ emomu amaa bɛanwu ɛlɔlɛ kpole mɔɔ melɛ memaa bɛ la.

5 Na saa awie ɛmaa nyanelilɛ ɛra a,+ ɛnee tɛ me ngome a yemaa meli nyane a, emomu wɔ adenle bie azo bɛ muala—noko mengulo kɛ meka ɛhye anwo edwɛkɛ dɔɔnwo. 6 Ahwibɛnyunlu ɛhye mɔɔ menli dɔɔnwo ɛva ɛmaa sonla zɔhane la ɛyɛ boɛ; 7 emomu ɔwɔ kɛ bɛfa bɛkyɛ ye bɔkɔɔ na bɛkyekye ɔ rɛle,+ amaa nyanelilɛ somasoma ne ambo ɔ nwo zo.+ 8 Zɔhane ati metu bɛ folɛ kɛ bɛmaa ɔnwu ye kɛ amgba bɛkulo ye.+ 9 Ɔluakɛ ɛhye ati noko a mengɛlɛle bɛ a: amaa meanwu ye saa bɛyɛ tieyɛ wɔ ninyɛne kɔsɔɔti anu a. 10 Saa bɛfa debie biala bɛkyɛ awie a ɛnee medame noko meva mehyɛ ye. Nɔhalɛ nu, debie biala mɔɔ meva mehyɛ la, (saa meva debie mehyɛ a) bɛdabɛ ti a menyɛle ye zɔhane wɔ Kelaese anyunlu a, 11 amaa Seetan asa anga yɛ*+ ɔluakɛ yɛze ye ndenle* ne mɔ.+

12 Mekɛ mɔɔ mendwule Tulowase+ kɛ mekabɔ Kelaese anwo edwɛkpa ne nolo na bɛbukele anlenkɛ bie bɛmaanle me wɔ Awulae anu la, 13 me nwo andɛ me kpalɛ ɔluakɛ meannwu me diema Taetɛse.+ Yemɔti me nee bɛ lile nrɛlaleɛ na menvile ɛkɛ ne mengɔle Masidonea.+

14 Noko yɛyɛ Nyamenle mo kɛ dahuu ɔdi yɛ nyunlu wɔ yɛ nee Kelaese konimlilɛ ɛlɔnwɔne ne anu na ɔdua yɛ nwo zo ɔmaa bɛte ɔ nwo edwɛkɛ ne evuanlɛ wɔ ɛleka biala a! 15 Ɔluakɛ yɛle Kelaese anwo debie evuanlɛ yɛmaa Nyamenle wɔ bɛdabɛ mɔɔ bɛlɛdie bɛ ngoane nee bɛdabɛ mɔɔ bɛlɛkɔ ɛzɛkyelɛ nu la avinli; 16 bɛdabɛ mɔɔ bɛlɛkɔ ɛzɛkyelɛ nu la ɛdeɛ, ɔbɔ nvoanle mɔɔ maa ewule la ɔkɔ ewule nu,+ yɛɛ bɛdabɛ mɔɔ bɛlɛdie bɛ ngoane la ɛdeɛ, ɔbɔ evuanlɛ mɔɔ maa ngoane la ɔkɔ ngoane nu. Na nwane a fɛta bɔkɔɔ kɛ ɔyɛ gyima ɛhye a? 17 Yɛdayɛ ɔ, ɔluakɛ yɛnva Nyamenle edwɛkɛ ne yɛnzi kongo*+ kɛ mɔɔ menli dɔɔnwo yɛ ye la, emomu yɛka nɔhalɛ kɛ Kelaese ɛdoavolɛma wɔ Nyamenle anyunlu, kɛ menli mɔɔ Nyamenle ɛzoa bɛ la.