Nyamenle Ɛlɛto Ɛsalɛ Avɛlɛ Wɔ Kɛ Ɛrayɛ Ɔ Gɔnwo

Nyamenle kpondɛ kɛ ɛyɛ ɔ gɔnwo. Asoo wɔzuzu nwolɛ ɛlɛ kɛ ɛbahola wɔayɛ sonla kpole kpalɛ mɔɔ wɔ ewiade ye amuala anu la agɔnwo ɔ? Bɛvɛlɛle Ebileham mɔɔ dɛnlanle aze mekɛ tendenle mɔɔ ɛze ɛhɔ la, Nyamenle agɔnwo. (Gyemise 2:23) Menli gyɛne mɔɔ bɛha bɛ nwo edwɛkɛ wɔ Baebolo ne anu la noko nee Nyamenle vale agɔnwolɛ, na bɛnyianle nyilalɛ dɔɔnwo. Ɛnɛ, menli mɔɔ vi ewiade ye ɛleka biala la ɛrayɛ Nyamenle agɔnwo. Ɛdawɔ noko ɛbahola wɔayɛ Nyamenle agɔnwo.

Nyamenle agɔnwo mɔɔ ɛbayɛ la le kpalɛ tɛla kɛ ɛbayɛ dasanli biala agɔnwo. Nyamenle ɛnye ɔ gɔnwo mɔ mɔɔ di nɔhalɛ maa ye la arɛle ɛndo bɛ sa nu ɛlɛ. (Edwɛndolɛ 18:25) Nyamenle agɔnwo mɔɔ ɛbayɛ la le kpalɛ tɛla anwonyia mɔɔ ɛbanyia la. Saa sukoavolɛ wu a, ye ezukoa ne kɔ menli gyɛne ɛkɛ. Noko akee, bɛdabɛ mɔɔ bɛfa Nyamenle agɔnwolɛ la lɛ anwonyia mɔɔ awie biala ɛngola ɛnlie a.​—Mateyu 6:19.

Wɔannea a menli bie mɔ babɔ mɔdenle kɛ bɛmaa wɔagyakyi Nyamenle anwo debiezukoalɛ. Ɛ gɔnwo mɔ anzɛɛ wɔ mbusuafoɔ bɔbɔ bahola ayɛ zɔ. (Mateyu 10:36, 37) Saa awie mɔ golo ɛ nwo anzɛɛ nwunlonwunla wɔ a, biza ɛ nwo kɛ, ‘Nwane a mekpondɛ kɛ mesɔ ɔ nye a​—sonla anzɛɛ Nyamenle?’ Dwenle ɛhye anwo nea: Saa awie ka kile wɔ kɛ ɛgyakyi aleɛlilɛ a anrɛɛ ɛbadie ye ɔ? Ɔle nɔhalɛ kɛ ɛnrɛyɛ! Ɛhyia aleɛ nwo na wɔahola wɔadɛnla aze. Noko Nyamenle bahola amaa wɔadɛnla aze dahuu! Yemɔti mmamaa awie biala adenle ɔmaa ɛgyakyi kɛzi ɛbahola wɔayɛ Nyamenle agɔnwo la anwo debiezukoalɛ.​—Dwɔn 17:3.