Ɔhyia Kɛ Ɛsukoa Nyamenle Anwo Debie

Amaa wɔayɛ Nyamenle agɔnwo la, ɔhyia kɛ ɛsukoa ɔ nwo debie. Asoo ɛ gɔnwo mɔ ze wɔ duma na bɛfa bɛfɛlɛ wɔ ɔ? Ɛhɛe. Nyamenle noko kpondɛ kɛ ɛnwu ye duma na ɛfa ɛfɛlɛ ye. Nyamenle duma a le Gyihova. (Edwɛndolɛ 83:18 NW; Mateyu 6:9) Eza ɔwɔ kɛ ɛsukoa mɔɔ ɔkulo nee mɔɔ ɔngulo la. Ɔwɔ kɛ ɛnwu ɔ gɔnwo mɔ nee ye agbɔvolɛ. Ɔdie mekɛ na wɔahola wɔanwu awie. Baebolo ne se nrɛlɛbɛ wɔ nu kɛ ɛbanyia mekɛ wɔazukoa Gyihova anwo debie.​—Ɛfɛsɛsema 5:15, 16.

Nyamenle agɔnwo mɔ yɛ mɔɔ sɔ ɔ nye la. Dwenle ɛ gɔnwo mɔ anwo nea. Saa ɛnyɛ bɛ boɛ na ɛyɛ ninyɛne mɔɔ bɛngulo la a, asoo bɛbahɔ zo bɛayɛ ɛ gɔnwo mɔ? Kyɛkyɛ! Zɔhane ala a saa ɛkulo kɛ ɛyɛ Nyamenle agɔnwo a, ɔwɔ kɛ ɛyɛ mɔɔ sɔ ɔ nye la a.​—Dwɔn 4:24.

Tɛ ɛzonlenlɛ ne amuala a maa bɛyɛ Nyamenle agɔnwo a. Gyisɛse mɔɔ le Nyamenle agɔnwo kpalɛ la, hanle ndenle nwiɔ anwo edwɛkɛ. Adenle ne ko le tɛtɛlɛ na menli dɔɔnwo a lua zo a. Zɔhane adenle ne kɔ ɛzɛkyelɛ nu. Adenle ɛhendeɛ ne le ɛdenraa na menli ekyi bie a lua zo a. Zɔhane adenle ne kɔ dahuu ngoane nu. Ɛhye kile kɛ saa ɛkulo kɛ ɛyɛ Nyamenle agɔnwo a, ɔwɔ kɛ ɛsukoa nɔhalɛ adenle ne mɔɔ bɛdua zo bɛsonle ye la.​—Mateyu 7:13, 14.