Ɛdendɛlɛ Mɔɔ Bɛngenga

BIE a wɔvɛ kpalɛ wɔ wɔ ɛdendɛlɛ ne anwo. Ɔbayɛ kɛ wɔnyia edwɛkɛ mɔɔ baboa la yɛɛ ndelebɛbo wɔ nu. Ɛbahola wɔamaa ye kpalɛ. Noko saa wɔ tievolɛma adwenle kyɛ nwiɔ a, bɛbadie bie bɛagyakyi bie ɔluakɛ bɛ adwenle ta fi edwɛkɛ ne azo kɔ ninyɛne gyɛne zo​—kɛzi wɔ ɛdendɛlɛ ɛmanlɛ ne baboa ɛ? Saa bɛngola bɛnva bɛ adwenle bɛnzie ɛdendɛlɛ ne azo a, asoo wɔ edwɛkɛ ne baha bɛ ahonle?

Duzu a bahola ava ngyegyelɛ ɛhye ara a? Ninyɛne dɔɔnwo. Fane dɔɔnwo ne ala, saa ɛkenga wɔ ɛdendɛlɛ ne a yɛɛ ɔba ye zɔ a. Eza tendɛvolɛ ne ta nea ye kɛlata ne azo, anzɛɛ ɔyɛ kyengye wɔ ye ɛdendɛ ɛmanlɛ nu a. Noko kɛzi bɛsiezie ɛdendɛlɛ ne la a fa ngyegyelɛ ɛhye mɔ ba a.

Saa ɛdumua ɛkɛlɛ wɔ ɛdendɛlɛ ne amuala na akee ɛbɔ mɔdenle kɛ ɛkakyi ye wɔayɛ ye ɛdendɛlɛ kɛlata a, ɛbanwu kɛ ɔyɛ se kɛ ɛbamaa ɛdendɛlɛ ne mɔɔ ɛngenga a. Duzu ati ɔ? Ɔluakɛ wɔlumua wɔkpa edwɛkɛ agbɔkɛ mɔɔ ɛkulo kɛ ɛfa ɛdi gyima la. Saa ɛfa ɛdendɛlɛ kɛlata ne ɛmaa wɔ ɛdendɛlɛ ne bɔbɔ a, ɛbabɔ mɔdenle kɛ ɛbahakye edwɛkɛ agbɔkɛ mɔɔ ɛlumuale ɛvale ɛlile gyima la. Saa bɛkɛlɛ debie a, ɔmaa edwɛkɛ ne yɛ kyengye yɛɛ kɛzi bɛhyehyɛ ye la yɛ kpomgbondee tɛla kɛzi yɛtendɛ alehyenlɛ biala la. Wɔ ɛdendɛlɛ ɛmanlɛ ne bamaa bɛanwu ye zɔ.

Kɛ ɛbahɛlɛ wɔ edwɛkɛ ne amuala la, sɔ ɛhye mɔ nea: (1) Kpa edwɛkɛtile nee edwɛkɛ ne anu edwɛkɛ titile mɔɔ ɛbava wɔahilehile edwɛkɛtile ne anu la. Saa ɛdendɛlɛ ne anwa a, bie a edwɛkɛ titile nwiɔ ala bayɛ kpalɛ. Saa ɔwale a, bie a nna anzɛɛ nnu. (2) Wɔ edwɛkɛ titile ko biala abo, yɛ ngɛlɛlera titile mɔɔ ɛkpondɛ kɛ ɛfa ɛkilehile nu la nzonlɛ; eza nea wɔ ndonwo ne mɔ nee edwɛkɛ titile mɔɔ ɛbaha la. (3) Dwenle kɛzi ɛbabuke ɛdendɛlɛ ne anye la anwo. Ɛbahola wɔahɛlɛ ɛdendɛmunli ko anzɛɛ nwiɔ bie. Eza suzu wɔ adwulaleɛ ne anwo.

Ɔhyia kɛ ɛsiezie ɛ nwo na wɔamaa ɛdendɛlɛ ne. Noko mmanea kɛzi bɛhɛlɛ edwɛkɛ agbɔkɛ ne mɔ pɛpɛɛpɛ wɔ ɛdendɛlɛ ne anu la kɛ ɛkye wɔagua ɛ ti anu. Saa ɛbamaa ɛdendɛlɛ mɔɔ ɛngenga a, kɛzi ɛbaziezie ɛ nwo wɔamaa adwenle titile ne mɔ ala ali la a hyia a, na tɛ edwɛkɛ agbɔkɛ ne mɔ. Ɔwɔ kɛ ɛneɛnlea adwenle titile mɔɔ wɔ nu la anu kɔkpula kɛ ko biala foa mɔɔ doa ye la azo. Saa wɔhyehyɛ wɔ ɛdendɛlɛ ne kpalɛ wɔmaa yedoɔdoa zo a, ɔnle kɛ ɛhye ɛyɛlɛ yɛ se maa wɔ, yɛɛ ɔwɔ kɛ adwenle titile ne mɔ ba mɔɔ ɛnvɛ nwolɛ a.

Suzu Nvasoɛ Ne Mɔ Anwo. Nvasoɛ kpole mɔɔ wɔ ɛdendɛlɛ mɔɔ bɛngenga azo la a le kɛ ɔmaa ɛtendɛ wɔ adenle mɔɔ ɔbamaa menli ne ade ɔ bo kpalɛ la azo. Wɔ ɛdendɛlɛ bayɛ fɛ yɛɛ tievolɛma anye balie nwo.

Adenle ɛhye mɔɔ bɛdua zo bɛtendɛ la maa ɛkola ɛnea wɔ tievolɛma anyunlu dɔɔnwo na ɛ nee bɛ di adwelie kpalɛ. Kɛmɔ ɛnnea kɛlata zo ɛnga ɛdendɛmunli biala la ati, ɔbamaa wɔ tievolɛma anwu kɛ ɛze mɔɔ ɛlɛka la yɛɛ ɛdie ɛdi bɔkɔɔ. Ɛhye ati, adenle ɛhye mɔɔ bɛdua zo bɛmaa ɛdendɛlɛ la maa ɛfi ahonle nu ɛfa wuluwuluyɛlɛ ɛtendɛ wɔ adawubɔlɛ adenle zo.

Eza ɛdendɛlɛ mɔɔ bɛngenga la ɛmmaa ɛ nwo ɛngyele wɔ. Edwɛkɛ ne ɛnle kyengye mɔɔ ɛngola ɛnyɛ nzenzaleɛ wɔ nu a. Fa ye kɛ wɔ kenle mɔɔ ɛbamaa wɔ ɛdendɛlɛ ne la nwonlomɔ nu, edwɛkɛ bie zile mɔɔ fane wɔ ɛdendɛlɛ ne anwo kpalɛ a. Asoo ɔnrɛyɛ kpalɛ kɛ ɛbava wɔaboka nwo? Anzɛɛ saa bie a ɛlɛtendɛ a, ɛnwu kɛ sukulu ngakula dɔɔnwo wɔ tievolɛma ne anu. Nea kɛzi ɔbayɛ kpalɛ kɛ ɛbahakyi wɔ ndonwo ne nee kɛzi bɛbava bɛali gyima la wɔamaa bɛanwu kɛzi ɔfane bɛ ɛbɛlabɔlɛ nwo a!

Nvasoɛ bieko mɔɔ wɔ ɛdendɛlɛ mɔɔ bɛngenga azo la a le kɛ ɔmaa ɛfa wɔ adwenle ɛdi gyima. Saa wɔ tievolɛma ɛlɛtie wɔ kpalɛ a, ɔmaa ɛdawɔ noko ɛ nye die na ɛbukebuke edwɛkɛ titile bie mɔ anu anzɛɛ ɛnyia mekɛ ɛsi edwɛkɛ titile bie mɔ azo. Saa ɛnwu kɛ wɔ tievolɛma anyelielɛ ne ɛlɛka aze a, ɛbahola wɔayɛ debie wɔali ngyegyelɛ ne anwo gyima. Ɔnrɛmaa ɛnrɛdendɛ ala wɔ mekɛ mɔɔ menli ne adwenle luolua ɛleka bie la.

Koati Nvonleɛ Bie Mɔ. Ɔwɔ kɛ ɛnwu kɛ nvonleɛ bie mɔ noko wɔ ɛdendɛlɛ mɔɔ bɛngenga la anu. Ko a le kɛ ɔbamaa wɔali mekɛ. Saa ɛlɛmaa ɛdendɛlɛ ne na ɛfa edwɛkɛ dɔɔnwo ɛboka nwo a, mekɛ zo ɛlilɛ bayɛ ngyegyelɛ. Saa ɛkɛlɛ mekɛ mɔɔ ɔwɔ kɛ ɛfa ɛdi foa biala anwo gyima la wɔ wɔ ɛdendɛlɛ kɛlata ne azo a, ɔbamaa wɔali ɛhye anwo gyima. Akee di ngyehyɛlɛ ɛhye azo.

Debie bieko mɔɔ gyegye tendɛvolɛma mɔɔ bɛlɛ anwubielɛ la titile a le bɛ nwo mɔɔ bɛdie bɛdi somaa la. Kɛmɔ bɛtendɛ menli nu dahuu la ati, wɔannea a bie mɔ adwenle bayɛ bɛ kɛ bɛbahola bɛanyia edwɛkɛ bie mɔ bɛawula nuhua ɛkɛ ne ala bɛamaa ɔ nee mekɛ ne ayia. Noko ɔwɔ kɛ mɛlɛbɛnwoaze nee nwolɛ adenle mɔɔ yɛnyia kɛ yɛlɛboa wɔ ngilehilelɛ gyima mɔɔ Gyihova mumua ne a le Kilehilevolɛ Kpole ne anu la maa yɛfa asɔneyɛlɛ yɛsuzu yɛ gyima ne anwo na yɛsiezie yɛ nwo kpalɛ.​—Aye. 30:20; Wulo. 12:6-8.

Bie a debie mɔɔ tendɛvolɛma dɔɔnwo mɔɔ bɛnlɛ anwubielɛ dwenle nwolɛ titile wɔ ɛdendɛlɛ mɔɔ bɛngenga anwo la a le kɛ wɔannea a bɛ rɛle bavi mɔɔ bɛkpondɛ kɛ bɛka la. Mmamaa ɛhye twe wɔ sia wɔ agyakɛ ɛhye mɔɔ ɔwɔ kɛ ɛdumua ɛtu na wɔayɛ tendɛvolɛ mɔɔ bɔ mɔdenle la anwo. Siezie ɛ nwo kpalɛ na fa ɛ nye to Gyihova anwo zo kɛ ɔbava ye sunsum ne yeaboa wɔ.​​—Dwɔn 14:26.

Tendɛvolɛma bie mɔ maa kɛzi bɛbaha edwɛkɛ ne pɛpɛɛpɛ la gyegye bɛ somaa. Nɔhalɛ nu, ɛdendɛlɛ mɔɔ bɛngenga nuhua edwɛkɛ ne la anu edwɛkɛ nee kɛzi bɛhɛlɛ aneɛ ne la ɛnrɛyɛ pɛpɛɛpɛ kɛ ɛdendɛlɛ mɔɔ bɛhɛlɛ nuhua edwɛkɛ ne amuala la, noko ɔdaye noko ɔmaa ɛkola ɛkpa edwɛkɛ agbɔkɛ mɔɔ ɛkulo la na ɛmaa ye wɔ adawubɔlɛ adenle zo. Menli ta tie edwɛkɛ mɔɔ ɔ bo ɛdelɛ ɛnyɛ se nee ɛdendɛmunli mɔɔ ɔnle kpomgbondee la. Saa ɛsiezie ɛ nwo kpalɛ a, kɛzi ɛbaha edwɛkɛ ne la mumua ne bara, tɛ kɛ wɔhye wɔgua ɛ ti anu, emomu, kɛmɔ ɛnyianle mekɛ ɛnleɛnleanle nu la ati ɔ. Yɛɛ saa ɛtendɛ kpalɛ alehyenlɛ biala a, ɛdwu bama ne azo a edwɛkɛ ne mumua ne bara.

Edwɛkɛ Mɔɔ Ɛbahola Wɔahɛlɛ. Mekɛ mɔɔ ɛlɛkɔ zo wɔanyia anyuhɔlɛ la, bie a ɛbahola wɔava edwɛkɛ ekyi bie wɔahɛlɛ wɔ ɛdendɛlɛ ne anu edwɛkɛ titile biala. Ɛbahola wɔahɛlɛ ɛhye mɔ nee ngɛlɛlera mɔɔ ɛkpondɛ kɛ ɛfa ɛdi gyima la amuala wɔ kɛlata sinli bie azo na wɔanlea zolɛ ndɛndɛ. Fane dɔɔnwo ne ala saa ɛkɔ daselɛlilɛ a, ɛbahola wɔayɛ ɛdendɛlɛ kɛlata sikalɛ bie wɔ wɔ adwenle nu. Saa wɔyɛ edwɛkɛ bie anwo neɛnleanu mɔɔ ɛfa wɔahɔyɛ sia kɔkpɔla a, ɛbahola wɔahɛlɛ edwɛkɛ ekyi wɔ kɛlata zo wɔawula wɔ Baebolo ne anu. Anzɛɛ ɛbahola wɔagyinla ɛdendɛlɛ kɛlata mɔɔ wɔ “Bible Topics for Discussion” (Baebolo Edwɛkɛ Adile Maa Adawubɔlɛ) anzɛɛ edwɛkɛ mɔɔ wɔ Reasoning From the Scriptures ne anu la azo wɔabɔ wɔ adawu ne.

Noko, saa ɛlɛ gyimalilɛ dɔɔnwo wɔ debiezukoalɛ bo wɔ dapɛne ekyi anu na eza ɛbamaa bagua nu ɛdendɛlɛ a, bie a ɛbanwu kɛ ɛhyia edwɛkɛ dɔɔnwo. Duzu ati ɔ? Amaa wɔava wɔahakyehakye ɛ nwo kolaa na wɔayɛ gyimalilɛ zɔhane mɔ. Yemɔ bɔbɔ, saa ɛlɛmaa ɛdendɛlɛ na ɛka kɛ ɛnea nuhua wɔaha kɛzi wɔhɛlɛ ye la pɛpɛɛpɛ mɔɔ ɛdwu ɛdendɛmunli biala azo a ɛnea nu a, ɛnrɛnyia nvasoɛ mɔɔ wɔ ɛdendɛlɛ mɔɔ bɛngenga nuhua edwɛkɛ ne ɛmanlɛ zo la bie. Saa ɛkɛlɛ edwɛkɛ dɔɔnwo a, yɛ bɛ nzonlɛ amaa wɔahola wɔanlea edwɛkɛ ekyi nee ngɛlɛlera mɔɔ wɔ wɔ ɛdendɛlɛ kɛlata ne azo la kɛmɔ ɔfɛta la.

Ɔwɔ nuhua kɛ ɔwɔ kɛ tendɛvolɛma mɔɔ bɛlɛ anwubielɛ la ta maa ɛdendɛlɛ mɔɔ bɛngenga la ɛdeɛ, noko saa bɛdua ndenle ngakyile zo bɛmaa ɛdendɛlɛ ne a ɔboa. Wɔ mukenye nee adwulaleɛ ne mɔɔ ɔwɔ kɛ ɛnea tievolɛma anyunlu kpalɛ na ɛfa edwɛkɛ mɔɔ anu yɛ se, edwɛkɛ mɔɔ bɛziezie ye kpalɛ ɛdi gyima la anu, bie a ɛkye edwɛkɛ ekyi ɛgua ɛ ti anu a ɔbaboa. Wɔ ɛleka mɔɔ bɛva nɔhalɛ edwɛkɛ bie, nvoninli, awie edwɛkɛ, anzɛɛ ngɛlɛlera bie mɔ bɛli gyima la, ɔwɔ kɛ ɛkenga ye kpalɛ ɛmaa tumi ba nu.

Saa Awie Mɔ Biza Ngilehilenu A. Ɔdwu mekɛ ne bie a bɛfɛlɛ yɛ kɛ yɛrahilehile yɛ diedi ne anu mɔɔ yɛnnyia adenle yɛnziezie yɛ nwo a. Bie a ɛhye bazi wɔ mekɛ mɔɔ awie mɔɔ yɛbayia ye wɔ daselɛlilɛ nu baha kɛ ɔnlie edwɛkɛ bie ɔndo nu la. Saa yɛ nee yɛ mbusuafoɔ, gyima nu amra anzɛɛ sukuluma wɔ a, ɛhye bie kola si. Bie a arane mgbanyima noko baha kɛ yɛhilehile yɛ diedi nee kɛzi yɛbɔ yɛ ɛbɛla la anu. Ngɛlɛlera ne ka kɛ: “Dahuu bɛziezie bɛ nwo, amaa saa awie biza bɛ bɛ anyelazo ne mɔɔ bɛlɛ ye la anwo edwɛkɛ a bɛahola bɛaye ɔ nloa, noko anrɛɛ bɛva bɛtɛɛyɛlɛ.”​—1 Pita 3:15, 16.

Yɛ kɛzi Pita nee Dwɔn buale Dwuuma Sanhedelene ne, kɛmɔ bɛhɛlɛ ye wɔ Gyima ne 4:19, 20 la nzonlɛ. Bɛvale ɛdendɛmunli nwiɔ pɛ bɛhilehilele bɛ gyinlabelɛ ne anu wienyi. Bɛyɛle zɔ wɔ adenle mɔɔ baboa bɛ tievolɛma la azo, bɛmanle bɛnwunle kɛ kɔɔto ne noko anwo wɔ edwɛkɛ mɔɔ bɛ nee ɛdoavolɛma ne ɛlɛdi la anu. Nzinlii, bɛbɔle Sitivin somolɛ na bɛvale ye bɛhɔle kɔɔto ko ne ala anu. Kenga ye mgbemgbenu mualɛ ne mɔɔ ɔvale ɔmanle la wɔ Gyima ne 7:2-53. Kɛzi ɔhyehyɛle ye edwɛkɛ ne ɛ? Ɔhanle kɛzi edwɛkɛ ne zile la ɔmanle ɔdoɔdoale zo. Ɔdwule ɛleka mɔɔ fɛta la, ɔzile atuadelɛ sunsum mɔɔ Yizilayɛ maanle ne lale ye ali la azo. Ɔdwula ye edwɛkɛ ne la, ɔmanle bɛnwunle kɛ Sanhedelene ne noko ɛla zɔhane sunsum ne bie ali ɔlua Nyamenle Ara ne mɔɔ bɛhunle ye la azo.

Saa bɛfɛlɛ wɔ mgbemgbenu kɛ ɛrahilehile wɔ diedi ne anu a, duzu a baboa wɔ yeamaa nvasoɛ ara wɔ edwɛkɛ ne azo a? Sukoa Nihɛmaya mɔɔ yɛle asɔne sikalɛ wɔ ɔ ti anu kolaa na yeabua Belemgbunli Zɛzɛse kpuyia ne la. (Nih. 2:4) Bieko, hyehyɛ edwɛkɛ wɔ ɛ ti anu ndɛndɛ. Ɛbahola wɔahyehyɛ ndenle titile ne mɔ zɛhae: (1) Kpa edwɛkɛ titile ko anzɛɛ nwiɔ mɔɔ ɔwɔ kɛ ɛfa ɛboka ngilenu ne anwo la (ɛbahola wɔava Reasoning From the Scriptures ne anu edwɛkɛ ne bie). (2) Nea ngɛlɛlera mɔɔ ɛbava wɔazi zɔhane edwɛkɛ titile ne mɔ azo la. (3) Dwenle kɛzi ɛbalua nrɛlɛbɛ adenle zo wɔabɔ wɔ ngilehilenu ne abo amaa bizavolɛ ne anye alie nwolɛ kɛ ɔbadie la anwo. Akee bɔ ɔ bo tendɛ.

Saa bɛlɛpiepia wɔ a, ɛbahakye mɔɔ ɔwɔ kɛ ɛka la ɔ? Gyisɛse zele ye ɛdoavolɛma ne kɛ: “Bɛmmadwenle mɔɔ bɛbaha la anwo anzɛɛ kɛ bɛbazi bɛaha ye la anwo; saa mekɛ ne dwu a, bɛbava mɔɔ bɛbaha la bɛamaa bɛ. Ɔluakɛ tɛ bɛmɛ a bɛbadendɛ a; bɛ Ze mɔɔ wɔ anwuma la Sunsum ne balua bɛ nwo zo adendɛ.” (Mat. 10:19, 20) Ɛhye ɛngile kɛ ɛdawɔ noko ɛbalua nwanwane adenle zo “wɔaha nrɛlɛbɛ edwɛkɛ” kɛmɔ bɛvale bɛmanle alumua Keleseɛnema ne la. (1 Kɔl. 12:8) Noko saa ɛfa ndetelɛ mɔɔ Gyihova fa maa ye azonvolɛ wɔ Keleseɛne asafo ne anu la ɛdi gyima a, sunsum nwuanzanwuanza ne bahakyehakye wɔ wɔ mekɛ mɔɔ ɛhyia nwolɛ la.​—Aye. 50:4.

Nɔhalɛ nu, ɛdendɛlɛ mɔɔ bɛngenga nuhua edwɛkɛ ne la kola boa kpalɛ. Saa ɛfa gyimalilɛ mɔɔ ɛyɛ wɔ asafo ne anu la ɛsukoa a, ɛlɛmaa mgbemgbenu mualɛ a ɔnrɛyɛ se, ɔluakɛ adehilelɛ mɔɔ yɛha nwolɛ edwɛkɛ la noko baboa. Mmatwehwenle ɛ bo aze. Saa ɛsukoa kɛ ɛbamaa ɛdendɛlɛ mɔɔ ɛngenga a, ɔbamaa wɔ daselɛlilɛ ne azo ma dɔɔnwo. Yɛɛ saa ɛnyia nwolɛ adenle kɛ ɛmaa ɛdendɛlɛ wɔahile asafo ne a, wɔ tievolɛma badie wɔ na wɔ edwɛkɛ ne aha bɛ ahonle.