Edwɛkɛ Titile Mɔɔ Bɛmaa Ɔda Ali

EDWƐKƐ titile mɔɔ wɔ ɛdendɛlɛ nu la a le boni mɔ? Tɛ bɛmɛ a le edwɛkɛ mɔɔ yɛ anyelielɛ mɔɔ wɔ nu la. Bɛle nzuzulɛ mɔɔ bɛgyinlanle zolɛ bɛhilehilele edwɛkɛ ne anu bɛhɔle moa la. Bɛle nzuzulɛ mɔɔ bamaa wɔadwu wɔ bodane nwo la.

Debie ko mɔɔ bamaa wɔ edwɛkɛ titile ne mɔ ala ali la a le edwɛkɛ mɔɔ ɛbakpa na wɔaziezie bɛ kpalɛ nu la. Saa ɛyɛ ɛdendɛlɛ mɔɔ ɛbamaa la anwo neɛnleanu a, ɔmaa ɛnyia edwɛkɛ dɔɔnwo. Kɛzi ɛbanwu edwɛkɛ mɔɔ ɔwɔ kɛ ɛfa ɛdi gyima la ɛ?

Mɔɔ lumua la, suzu wɔ tievolɛma anwo. Asoo bɛze wɔ edwɛkɛ ne anwo debie ekyi anzɛɛ bɛnze bie fee ɔ? Asoo bɛ nuhua dɔɔnwo die mɔɔ Baebolo ne ka fane edwɛkɛ ne anwo la di, anzɛɛ bie mɔ ɛnlie ɛnli? Saa bɛbɔ mɔdenle kɛ bɛfa mɔɔ Baebolo ne ka fane edwɛkɛ ne anwo la bɛali gyima a, ngyegyelɛ boni a bɛyia ye wɔ bɛ dahuu ɛbɛlabɔlɛ nu a? Mɔɔ tɔ zo nwiɔ, saa ɛlɛmaa ɛdendɛlɛ ne a, bɔ mɔdenle kɛ ɛbamaa bodane mɔɔ yemɔti ɛlɛtendɛ wɔahile tievolɛma zɔhane la adɛnla wɔ adwenle nu. Fa adehilelɛ nwiɔ ɛhye yɛ gyima, suzu wɔ edwɛkɛ ne anwo na kpa mɔɔ ɔfɛta la ala.

Saa bɛmaa wɔ ɛdendɛlɛ kɛlata mɔɔ lɛ edwɛkɛtile nee edwɛkɛ titile a, di yemɔ ala azo. Noko, saa ɛmaa nzuzulɛ mɔɔ wɔ anwuma ɛke la tɛnla wɔ adwenle nu wɔ mekɛ mɔɔ ɛlɛsiezie wɔ edwɛkɛ titile ne mɔ la a, nvasoɛ kpole bara mɔɔ ɛbaha la azo. Saa bɛammaa wɔ ɛdendɛlɛ kɛlata a, yemɔ ɛdawɔ a ɔwɔ kɛ ɛkpa wɔ edwɛkɛ titile ne mɔ a.

Saa wɔ edwɛkɛ titile ne mɔ wɔ wɔ adwenle nu yɛɛ wɔlua adehilelɛ ɛhye azo wɔziezie wɔ edwɛkɛ ne a, wɔ ɛdendɛlɛ ne ɛmanlɛ ɛnrɛyɛ se. Zɔhane ala a wɔ tievolɛma ne noko banyia zolɛ nvasoɛ kpole a.

Ndenle Ngakyile Mɔɔ Ɛbalua Zo Wɔaziezie Wɔ Edwɛkɛ. Ɛbahola wɔalua ndenle ngakyile zo wɔaziezie wɔ ɛdendɛlɛ ne. Mekɛ mɔɔ ɛlɛnwu ndenle ɛhye mɔ kpalɛ la, ɛbanwu kɛ bodane mɔɔ ɛkulo kɛ ɛdwu nwo la a bahile mɔɔ baboa kpalɛ la.

Ɛdendɛlɛ mɔɔ bɛkyehyɛ nu bɛyɛ ye edwɛkɛ adile ngyikyi la boka adenle mɔɔ bɛdua zo bɛsiezie ɛdendɛlɛ la anwo. (Edwɛkɛ titile ko biala hyia ɔboalekɛ ɔmaa wɔ tievolɛma te edwɛkɛ ne abo anzɛɛ ɔboa ɔmaa ɛdwu wɔ ɛdendɛlɛ ne bodane nwo.) Adenle bieko a le kɛzi debie si ndoɔdoazo la. (Kɛ neazo la, ɛbahola wɔaha ninyɛne mɔɔ sisile kolaa na Azuyilɛ ne ara, wɔava ninyɛne mɔɔ sisile kolaa na bɛazɛkye Gyɛlusalɛm wɔ 70 Y. M. wɔadoa zo, na akee wɔava ninyɛne mɔɔ ɛlɛsisi ɛnɛ la wɔadoa zo.) Adenle mɔɔ tɔ zo nsa la a le nyɛleɛ nee mɔɔ fi nu ba la. (Ɛbahola wɔayɛ ɛhye wɔ adenle ngakyile zo. Kɛ neazo la, ɛbahola wɔava tɛnlabelɛ mɔɔ wɔ ɛkɛ ɛnɛ la wɔabɔ ɔ bo, wɔaha mɔɔ ɛvi nu ɛra nee deɛmɔti tɛnlabelɛ ne rale la.) Adenle mɔɔ tɔ zo nna la a le ndotonwo. (Ɛbahola wɔava kpalɛ wɔatoto ɛtane nwo.) Ɔdwu mekɛ ne bie a, ɛbahola wɔalua adenle mɔɔ bo ko la azo wɔaziezie ɛdendɛlɛ ne.

Mɔɔ bɛdole Sitivin ɛzonle na ɔgyi Dwuuma Sanhedelene ne anyunlu la, ɔluale ninyɛne mɔɔ sisile doɔdoale zolɛ la azo ɔmanle ɛdendɛlɛ mɔɔ ka ahonle la. Mekɛ mɔɔ ɛlɛkenga Gyima ne 7:2-53 la, anrɛɛ yɛ kɛzi ɔkpale edwɛkɛ kpalɛ la nzonlɛ. Sitivin lumuale manle ɔlale ali kɛ ɔlɛka edwɛkɛ mɔɔ zile mɔɔ ye tievolɛma ne ɛnrɛhola ɛnrɛzu nwolɛ kpolera a. Akee ɔmanle ɔlale ali kɛ, ɔnva nwo kɛ Dwosefi amediema ne mɔ kpole ye la, Nyamenle vale ye lile gyima ɔmanle ɔliele ngoane. Bieko, ɔhanle kɛ Dwuuma andie Mosisi mɔɔ ɛnee Nyamenle ɛlɛdua ɔ nwo zo ayɛ gyima la. Ɔvale ye edwɛkɛ ne ɔrale awieleɛ ɔlua kɛzi ɔmanle ɔlale ali kɛ bɛdabɛ mɔɔ bɛmanle bɛhunle Gyisɛse Kelaese la lale zɔhane subane ne mɔɔ ɛnee wɔ alumua Dwuuma awolɛndoazo ne anwo la bie ali la azo.

Mmakpa Edwɛkɛ Titile Dɔɔnwo. Ninyɛne ekyi a ɛbahyia na wɔava wɔaziezie wɔ edwɛkɛtile ne a. Fane dɔɔnwo ne ala, ɔbahola yeayɛ edwɛkɛ titile kɛyɛ nnu. Ɛhye le nɔhalɛ, saa ɛbava mitini 5, mitini 10, mitini 30, anzɛɛ mɔɔ bo zɔ la a wɔamaa ɛdendɛlɛ ne bɔbɔ a. Mmabɔ mɔdenle kɛ ɛmaa edwɛkɛ titile dɔɔnwo ala ali. Edwɛkɛ titile ekyi bie ala a wɔ tievolɛma bahola ahakye a. Mekɛ mɔɔ ɛdendɛlɛ ne ɛlɛwa la, zɔhane ala a ɔwɔ kɛ edwɛkɛ titile mɔɔ wɔ nu la ka ahonle na nuhua da ɛkɛ a.

Ɔnva nwo edwɛkɛ titile dodo biala mɔɔ ɛbakpa la, bɔ mɔdenle kɛ ɛbaziezie ko biala kpalɛ. Maa tievolɛma mekɛ ekyii maa bɛva bɛzuzu edwɛkɛ titile ko biala anwo amaa yeaha bɛ ti anu.

Ɔwɔ kɛ bɛte wɔ ɛdendɛlɛ ne abo ndɛndɛ. Tɛ edwɛkɛ dodo mɔɔ ɛbaha la a bamaa wɔahola wɔayɛ ɛhye a. Saa ɛhyehyɛ wɔ edwɛkɛ ne ɛmaa ɔyɛ edwɛkɛ adile mɔɔ nuhua la ɛkɛ na ɛsiezie ko biala kpalɛ a, bɛbade ɔ bo yɛɛ bɛ rɛle ɛnrɛvi ye ndɛndɛ.

Maa Wɔ Edwɛkɛ Titile Ne Mɔ Ɛla Ali. Saa wɔziezie wɔ ɛdendɛlɛ ne kpalɛ a, ɔnrɛyɛ se kɛ ɛbalua ye ɛmanlɛ ne azo wɔamaa bɛanwu edwɛkɛ titile ne mɔ mɔɔ wɔ nu la.

Adenle titile mɔɔ ɛbalua zo wɔamaa edwɛkɛ titile ala ali la a le kɛ ɛbaha daselɛ edwɛkɛ mɔɔ fane nwo, ngɛlɛlera, nee edwɛkɛ gyɛne mɔɔ boka nwo la wɔ adenle mɔɔ ɔbahwe adwenle yeara wɔ edwɛkɛ titile ne azo na yeamaa nuhua ala ɛkɛ la azo. Ɔwɔ kɛ edwɛkɛ gyɛne mɔɔ boka nwo la kɔsɔɔti maa edwɛkɛ titile ne anu da ɛkɛ. Mmaka edwɛkɛ mɔɔ yɛ anyelielɛ na nwolɛ ɛngyia la. Mekɛ mɔɔ ɛlɛkilehile edwɛkɛ gyɛne mɔɔ boka nwo anu la, ɔwɔ kɛ ɛmaa bɛnwu kɛzi ɔfoa edwɛkɛ titile ne azo la. Mmagyakyi ɛmaa tievolɛma kɛ bɛkpondɛ. Ɛbahola wɔazi edwɛkɛ agbɔkɛ mɔɔ maa adwenle titile mɔɔ wɔ nu da ali anzɛɛ edwɛkɛ titile ne azo fane dɔɔnwo wɔamaa bɛanwu kɛzi ɔfane edwɛkɛ ne anwo la.

Tendɛvolɛma bie mɔ tiedia edwɛkɛ titile ne mɔ bɛmaa tievolɛma nwu ye. Ɛhye le adenle ko mɔɔ bɛfa bɛda edwɛkɛ titile ali ɛdeɛ noko ɔnle kɛ yɛfa yɛsie edwɛkɛ kpalɛ mɔɔ yɛkpa na yɛaziezie bɛ pɛpɛɛpɛ la agyakɛ anu.

Ɛbahola wɔala wɔ edwɛkɛ titile ne mɔ ali wɔ wɔ ɛdendɛlɛ ne mɔlebɛbo kolaa na wɔaha edwɛkɛ mɔɔ kilehile nuhua la. Ɛhye baboa tievolɛma yeamaa bɛanwu kɛzi mɔɔ doa zo la anwo hyia la, na yemɔ noko bazi edwɛkɛ titile ne azo. Saa ɛsiezie edwɛkɛ titile ne mɔ ɛwie a, ɛbahola wɔaha ye sikalɛ wɔava wɔala tumi mɔɔ wɔ nu la ali.

Wɔ Daselɛlilɛ Nu. Yɛbahola yɛava ngyinlazo mɔɔ yɛzuzu nwolɛ wɔ anwuma ɛke la yɛali gyima wɔ ɛdendɛlɛ ɛmanlɛ nee daselɛlilɛ nu noko. Saa ɛlɛsiezie ɛ nwo a, suzu tɛnlabelɛ titile mɔɔ menli mɔɔ bɛwɔ wɔ azɛlɛsinli ne anu dwenle nwolɛ la anwo. Kpa edwɛkɛtile mɔɔ bamaa wɔanyia adenle wɔaha kɛzi anyelazo mɔɔ Baebolo ne fa maa la bali tɛnlabelɛ zɔhane anwo gyima la. Ɛbahola wɔakpa edwɛkɛ titile nwiɔ wɔava wɔaziezie edwɛkɛtile ne. Suzu ngɛlɛlera mɔɔ ɛbava wɔali gyima wɔava wɔazi edwɛkɛ titile zɔhane mɔ azo la anwo. Akee suzu kɛzi ɛbabɔ wɔ adawubɔlɛ ne abo la anwo. Anwoziezielɛ zɛhae kola maa ɛbɔ adawu kpalɛ. Eza ɔboa wɔ ɔmaa ɛka edwɛkɛ mɔɔ suamenle ne bahakye la.