Fa Edwɛkɛ Mɔɔ Bɛva Bɛmaa Ala Di Gyima

BAEBOLO ne fa Keleseɛne asafo ne toto sonlabaka ne anwo. Ko biala anwo hyia, noko “ko biala lɛ ye gyima mɔɔ ɔdi” a. Ɛhye ati, ɔwɔ kɛ yɛyɛ nwolɛ adenle biala mɔɔ yɛkɛnyia la anwo gyima. Ɛhye kile kɛ ɔwɔ kɛ yɛte gyimalilɛ biala mɔɔ le ɛdendɛlɛ mɔɔ bɛbava bɛamaa yɛ la abo na yɛdi nwolɛ gyima kpalɛ. Ɔnle kɛ yɛdwenle kɛ edwɛkɛ bie mɔ anwo hyia tɛla bie mɔ. (Wulo. 12:4-8) Ɔle akɛlɛ nɔhavo nee nrɛlɛbɛvolɛ ne ɛzonlelilɛ kɛ ɔbamaa yɛ sunsum nu aleɛ “wɔ mekɛ ne anloa.” (Mat. 24:45) Saa yɛbɔ mɔdenle yɛsiezie ɛdendɛlɛ ne kɛmɔ adehilelɛ ne kile la a, ɛnee yɛlɛkile ngyehyɛleɛ ne anwo anyezɔlɛ. Ɛhye boa maa ninyɛne kɔ zolɛ pɛpɛɛpɛ wɔ asafo ne anu.

Mɔɔ Ɛbava Wɔaboka Nwo. Saa bɛmaa wɔ gyima wɔ sukulu ne anu a, nea na siezie edwɛkɛtile ne ala, mmasiezie fofolɛ. Fane dɔɔnwo ne ala, bɛbahile wɔ ɛleka titile mɔɔ edwɛkɛ ne wɔ la. Saa bɛangile buluku mɔɔ ɛbagyinla zo wɔaziezie wɔ ɛdendɛlɛ ne a, ɛbahola wɔakpondɛ bie. Noko saa ɛlɛsiezie wɔ ɛdendɛlɛ ne a, nea kɛ wɔ edwɛkɛ ne amuala fane edwɛkɛtile ne mɔɔ bɛva bɛmaa wɔ la anwo. Saa ɛlɛsuzu mɔɔ ɛbava wɔaboka nwo la anwo a, ɔwɔ kɛ ɛdwenle wɔ tievolɛma noko anwo.

Sukoa edwɛkɛ ne mɔɔ bɛva bɛmaa wɔ la kpalɛ, na neɛnlea ngɛlɛlera mɔ wɔ nu la anu. Akee suzu kɛzi ɛbava wɔali gyima kpalɛ amaa zolɛ ara nvasoɛ amaa wɔ tievolɛma la anwo. Kpa edwɛkɛ titile nwiɔ anzɛɛ nsa wɔ edwɛkɛ ne anu fa yɛ wɔ ɛdendɛlɛ ne anu edwɛkɛ titile. Eza kpa edwɛkɛ ne mɔɔ bɛva bɛmaa wɔ la anu ngɛlɛlera mɔɔ ɛkulo kɛ ɛkenga na ɛkilehile nu la.

Edwɛkɛ ne dodo nyɛ a ɔwɔ kɛ ɛfa ɛdi gyima a? Fa dodo mɔɔ ɛbahola wɔali nwolɛ gyima kpalɛ la. Mmabu ɛ nye ɛgua adenle kpalɛ mɔɔ bɛdua zo bɛkilehile la azo yɛɛ mmaka edwɛkɛ dɔɔnwo. Saa edwɛkɛ ne bie ɛnrɛmaa ɛnrɛdwu wɔ ɛdendɛlɛ ne bodane ne anwo a, fa wɔ adwenle sie foa ne mɔɔ ɔbaboa yeamaa wɔadwu wɔ bodane ne anwo la azo. Fa edwɛkɛ ne mɔɔ bɛva bɛmaa wɔ la anu edwɛkɛ mɔɔ tievolɛma banyia zolɛ nvasoɛ na yeaboa bɛ la di gyima. Tɛ wɔ bodane ne a le kɛ ɛnea edwɛkɛ dodo mɔɔ ɛbahola wɔaha la, emomu ɛgyinla mɔɔ bɛva bɛmaa wɔ la azo wɔaziezie wɔ ɛdendɛlɛ ne.

Wɔ ɛdendɛlɛ ne ɛngile kɛ ɔwɔ kɛ ɛpɛ edwɛkɛ mɔɔ bɛva bɛmaa wɔ la sikalɛ ala. Ɔwɔ kɛ ɛyɛ wɔ adwenle kɛ ɛbahilehile edwɛkɛ titile bie mɔ anu kpalɛ, wɔamaa ndonwo na ɔbayɛ boɛ a wɔamaa kɛzi bɛbava bɛali gyima la anwo neazo. Mmafa edwɛkɛ gyɛne ɛsie edwɛkɛ titile mɔɔ bɛva bɛmaa kɛ ɛva ɛziezie wɔ gyimalilɛ ne la agyakɛ anu.

Ɔdwu mekɛ ne bie a bɛbamaa mediema mrenya mɔɔ bɛfɛta la ayɛ gyima wɔ Ɛzonlenlɛ Nyianu ne anu. Bɛte ɔ bo kɛ ɔwɔ kɛ bɛfa edwɛkɛ mɔɔ bɛva bɛmaa la bɛdi gyima kpalɛ na ɔnle kɛ bɛfa debie gyɛne. Zɔhane ala a bɛmaa mediema mɔɔ maa bagua nu ɛdendɛlɛ la ɛdendɛlɛ ngɛlata kɛ bɛva bɛli gyima a. Bɛkola bɛyɛ nzenzaleɛ wɔ nu, noko bɛmaa edwɛkɛ titile mɔɔ bɛbahilehile nu, edwɛkɛ mɔɔ foa zo, nee ngɛlɛlera mɔɔ bɛbava bɛali gyima la da ali. Ɛsukoa kɛ ɛbava edwɛkɛ mɔɔ bɛva bɛmaa la ala wɔaziezie wɔ ɛdendɛlɛ a, ɔbaziezie wɔ yeamaa ɛdendɛlɛ nwo adenle gyɛne.

Ndetelɛ ɛhye noko bahola aboa wɔ yeamaa wɔayɛ sua nu Baebolo ɛzukoalɛ kpalɛ. Ɛbazukoa kɛzi ɛbava wɔ adwenle wɔazie ɛzukoalɛdeɛ ne azo la na tɛ kɛ ɛbahakyi edwɛkɛtile ne ɔlua ninyɛne gyɛne mɔɔ ɔyɛ anyelielɛ noko ɔmboa ɔmmaa bɛnde edwɛkɛtile ne abo mɔɔ ɛbaha nwolɛ edwɛkɛ la azo. Noko saa ɛnwu adwenle mɔɔ wɔ ɛzukoalɛdeɛ ne anu la a, ɛnrɛgyegye ɛ nwo kɛ ɛdi edwɛkɛ ne azo somaa mɔɔ ɛnrɛva ngilehilenu mɔɔ sukoavo ne hyia la ɛnrɛmaa a.