Ndonwo Mɔɔ Tievolɛma Ze Ye

NƆHALƐ nu, ɔwɔ kɛ ɛmaa wɔ ndonwo ne mɔ fɛta edwɛkɛ ne mɔɔ bɛlɛsuzu nwolɛ la. Noko amaa ndonwo ne aboa wɔ tievolɛma kpalɛ la, ɔwɔ kɛ ɔfɛta bɛ.

Kɛzi wɔ tievolɛma bahola aboa wɔ yeamaa wɔakpa ndonwo mɔɔ ɛfa wɔahilehile menli ekpunli bie la ɛ? Duzu a Gyisɛse Kelaese yɛle a? Gyisɛse anva neazo mɔɔ ɛnee Yizilayɛma ɛnze ye wɔ bɛ asetɛnla nu la anli gyima wɔ mekɛ mɔɔ ɔlɛtendɛ yeahile menli dɔɔnwo anzɛɛ ye ɛdoavolɛma bɔbɔ la. Bie a ɛnee ye tievolɛma ne ɛnze zɔhane neazo ne mɔ. Kɛ neazo la, Gyisɛse anga Yigyibitima ndɛnebualɛ anzɛɛ Yendeama ɛzonlenlɛ nwo edwɛkɛ. Emomu, ɔvale ninyɛne mɔɔ menli mɔɔ bɛwɔ maanle ne anu ze la a ɔyɛle ndonwo a. Ɔhanle adɛladeɛ ɛkpomgbalɛ, gualilɛ, debie mɔɔ sonle bolɛ mɔɔ fi bɛ sa, nee atɔfolɛlielɛ bo ɛhɔlɛ nwo edwɛkɛ. Ɔnwunle kɛzi menli yɛ bɛ nyɛleɛ wɔ tɛnlabelɛ bie mɔ anu la, na ɔvale ɔlile gyima kpalɛ. (Maake 2:21; Luku 14:7-11; 15:8, 9; 19:15-23) Ɔluakɛ Yizilayɛma titile a ɛnee Gyisɛse bagua nu daselɛlilɛ ne gyi bɛ nwo zo la ati, fane dɔɔnwo ne ala ɔvale ninyɛne mɔɔ bɛyɛ nee mɔɔ bɛze ye la a ɔyɛle ndonwo a. Yemɔti, ɔhanle ninyɛne le kɛ ɛya ɛyɛlɛ, kɛzi mboane tie bɛ menle ane, nee kɛzi bɛfa nwanye bɛgua nane nwoma nu la anwo edwɛkɛ. (Maake 2:22; 4:2-9; Dwɔn 10:1-5) Ɔhanle tetedwɛkɛ mɔɔ bɛze ye kpalɛ la anwo edwɛkɛ​—yɛbaha nuhua ekyi a, bie a le agyalɛma mɔɔ lumua la ɛbɔlɛ, Nowa mekɛ zo Azuyilɛ ne, Sodɔm nee Gɔmɔla ɛzɛkyelɛ ne nee Lɔɔto aye ne ewule. (Mat. 10:15; 19:4-6; 24:37-39; Luku 17:32) Asoo ɛdawɔ noko ɛsuzu ninyɛne mɔɔ wɔ tievolɛma ze ye nee bɛ amaamuo nwo kpalɛ kolaa na wɔakpa wɔ ndonwo ne mɔ?

Na saa tɛ menli dɔɔnwo a ɛlɛtendɛ wɔahile bɛ, na emomu sonla ko anzɛɛ bie a menli ekyi bie ɛ? Bɔ mɔdenle kɛ ɛbakpa ndonwo mɔɔ bafɛta tievolɛma ekyi zɔhane kpalɛ la. Mɔɔ Gyisɛse di Samɛleanli raalɛ ne daselɛ wɔ bula bie mɔɔ bikye Saekaa la azo la, ɔhanle “ngoane nzule,” “nzuhɔne ɛnrɛhu ye ɛlɛ,” ‘nzubula mɔɔ bamaa ye ngoane nzule nee ngoane mɔɔ ɛnlɛ awieleɛ’ la anwo edwɛkɛ​—ɛhye mɔ le ɛdendɛdenle mɔɔ fane raalɛ ne gyima ne anwo. (Dwɔn 4:7-15) Ɛdendɛdenle mɔɔ fane fɛlɛhyelɛ gyima nwo la a ɔvale ɔlile gyima wɔ mekɛ mɔɔ ɔtendɛ yeahile menli mɔɔ bɛlɛnrinzi bɛ avonle nu la. (Luku 5:2-11) Wɔ nuhua ko biala anu, anrɛɛ ɔbahola yeaha ɛyazonlɛ nwo edwɛkɛ ɔluakɛ ɛnee bɛde ɛleka mɔɔ bɛso ɛya la, noko nea kɛzi ɔfɛta kɛ ɔmanle ɔvanenle bɛ ɛbɛlabɔlɛ nwo na ɔmanle bɛdele ɔ bo a! Asoo ɛbɔ mɔdenle kɛ ɛbayɛ zɔ?

Gyisɛse hwenle adwenle hɔle “mboane ne mɔɔ wɔ Yizilayɛ na bɛminli la angome” anwo zo, noko bɛzoanle ɛzoanvolɛ Pɔɔlo wɔ Yizilayɛma nee Maanle maanle ne mɔ ɛkɛ. (Mat. 15:24; Gyi. 9:15) Asoo ɛhye manle Pɔɔlo hakyile kɛzi ɔdendɛle la? Ɛhɛe. Mɔɔ Pɔɔlo kɛlɛ Keleseɛnema mɔɔ bɛwɔ Kɔlente kɛlata la, ɔhanle ɛnriandilɛ, aleɛ mɔɔ bɛva bɛzɔ amonle, nee ɛlɔnwɔne mɔɔ bɛto bɛdie ahyɛlɛdeɛ, ninyɛne mɔɔ Maanle maanle ne mɔ ze ye la anwo edwɛkɛ.​—1 Kɔl. 8:1-10; 9:24, 25; 2 Kɔl. 2:14-16.

Saa ɛlɛkpa ndonwo nee neazo wɔava wɔali gyima wɔ wɔ ngilehilelɛ nu a, asoo ɛyɛ ye kpalɛ kɛmɔ Gyisɛse nee Pɔɔlo yɛle la? Asoo ɛsuzu wɔ tievolɛma amaamuo nee ninyɛne mɔɔ bɛyɛ ye dahuu la anwo? Nɔhalɛ nu, ninyɛne ɛhakyi wɔ ewiade ye anu ɔvi ɛvoya ne mɔɔ lumua la. Kɛmɔ menli dɔɔnwo lɛ tɛlevihyɛne la ati bɛte ewiade edwɛkɛ. Bɛze ninyɛne mɔɔ ɛlɛkɔ zo wɔ maanle gyɛne zo la. Saa zɔhane a ɔde wɔ ɛleka mɔɔ ɛwɔ la a, ɔnle nvonleɛ kɛ ɛbava edwɛkɛ zɛhae mɔ wɔayɛ ndonwo. Noko, ninyɛne mɔɔ ka menli ahonle kpalɛ la a le ninyɛne mɔɔ fane bɛ asetɛnla nwo​​—bɛ aako, bɛ abusua, bɛ gyima, aleɛ mɔɔ bɛdi, nee kɛzi bɛ maanle nu tɛnlabelɛ de la.

Bie a debie mɔɔ wɔ tievolɛma ɛnze ye la anwo edwɛkɛ a ɛlɛka a yemɔti ɔbahyia kɛ ɛkilehile nuhua ɛkɔ moa. Ndonwo zɛhae bahola amaa edwɛkɛ titile mɔɔ wɔ wɔ ngilehilelɛ ne anu la aminli. Ɛhye bamaa wɔ tievolɛma ahakye ndonwo ne na tɛ Ngɛlɛlera ne anu nɔhalɛ ne mɔɔ ɛbɔle mɔdenle kɛ ɛkilehile nu la.

Kɛ anrɛɛ Gyisɛse bayɛ ndonwo mɔɔ anu yɛ se la, ɔvale edwɛkɛ mɔɔ ɔ bo ɛdelɛ ɛnyɛ se mɔɔ ɔsi dahuu la ɔlile gyima. Ɔvale ninyɛne ngyikyi ɔhilehilele ninyɛne mgbole nu yɛɛ ninyɛne mɔɔ bɛze ye la ɔhilehilele mɔɔ bɛnze bɛ la anu. Gyisɛse boale menli ɔmanle bɛdele sunsum nu nɔhalɛ ne mɔɔ ɛnee ɔlɛkilehile nu la abo na bɛhakyele ɔlua ninyɛne mɔɔ sisi dahuu mɔɔ ɔvale ɔtotole sunsum nu nɔhalɛ nwo la azo. Ɛhye le neazo kpalɛ mɔɔ ɔwɔ kɛ yɛsukoa a!