Gyihova Senle Mgbɔnwɔ

Ɛnee Selea Belemgbunli Bɛneheedade fa konle toa Yizilayɛma. Noko ɛnee ngapezonli Yilaehya bɔ Yizilayɛ belemgbunli ne kɔkɔ mekɛ biala, yemɔti bɛ sa anga ye. Ɔti Bɛneheedade yɛle ye adwenle kɛ ɔkye Yilaehya. Ɔdele kɛ Yilaehya wɔ suakpole Dotan azo, yemɔti ɔzoanle Selea sogyama kɛ bɛhɔhye ye.

Seleama ne hɔdwule Dotan nɔɔzo. Mɔɔ Yilaehya sonvolɛ ne dwazole nwonlomɔ mangyee ne la, ɔnwunle kɛ sogyama ɛbɔ sua ne ɛyia. Ye ahonle dule na ɔbizale Yilaehya kɛ: ‘Yilaehya, duzu a yɛbayɛ a?’ Yilaehya zele ye kɛ: ‘Bɛdabɛ mɔɔ bɛ nee yɛ lua la zonle tɛla bɛ.’ Ɛkɛ ne ala, Gyihova maanle Yilaehya sonvolɛ ne nwunle kɛ senle mgbɔnwɔ nee konle ehwili dɔɔnwo ɛyi awoka mɔɔ wɔ ɛkɛ la amuala azo.

Mɔɔ Selea sogyama ne bɔle mɔdenle kɛ bɛkye Yilaehya la, ɔyɛle asɔne kɛ: ‘Gyihova mesɛlɛ wɔ, maa bɛ nye ɛzi.’ Ɛkɛ ne ala, ɛnee bɛnwu debie ɛdeɛ, noko bɛannwu ɛleka mɔɔ bɛlua a. Yilaehya zele sogyama ne kɛ: ‘Bɛminli bɛra sua gyɛne zo. Bɛdoa me na me nee bɛ bahɔ ahenle mɔɔ bɛlɛkpondɛ ye la ɛkɛ.’ Na bɛ nee Yilaehya hɔle Samɛlea, ɛleka mɔɔ Yizilayɛ belemgbunli ne de la.

Akee Seleama nwunle ɛleka mɔɔ bɛhɔ la. Yizilayɛ belemgbunli ne bizale Yilaehya kɛ: “Mengu bɛ ɔ?” Asoo Yilaehya bule ye kɛ ɔle adenle mɔɔ ɔbalua zo yeayɛ menli ɛhye mɔɔ bɛngulo ye edwɛkɛ la amumuyɛ ɔ? Kyɛkyɛ. Yilaehya hanle kɛ: ‘Mmaku bɛ. Maa bɛ debie maa bɛli na gyakyi bɛ maa bɛhɔ.’ Yemɔti belemgbunli ne dole bɛ ɛkponle kpole bie na akee ɔmaanle bɛziale bɛhɔle bɛ sua zo.