ƐZUKOALƐDEƐ 5

Ɛgengalɛ Kpalɛ

1 Timote 4:13

MƆƆ ƆHYIA KƐ ƐYƐ: Kenga mɔɔ bɛhɛlɛ la pɛpɛɛpɛ na kenga ye kpole.

Siezie ɛ nwo kpalɛ. Dwenle deɛmɔti bɛhɛlɛle edwɛkɛ ne la anwo. Sukoa kɛ ɛbabobɔ edwɛkɛ agbɔkɛ ne mɔ kɛ ekpunli. Nea na wɔanva edwɛkɛ agbɔkɛ fofolɛ wɔamboka nwo, wɔambɔ wɔandɛla bie, anzɛɛ wɔangenga bɛ ngakyile. Yɛ ɛhɛlɛlɛ sɛkɛlɛneɛ ne mɔ nzonlɛ kpalɛ.

Maa ɛ gɔnwo bie ɛdie wɔ ɛgengalɛ ne na ɔha edwɛkɛ agbɔkɛ mɔɔ wɔambobɔ bɛ boɛ la ɔhile wɔ.
Bɔ edwɛkɛkpɔkɛ ko biala kpalɛ. Saa ɛnze kɛzi bɛbɔ edwɛkɛkpɔkɛ bie a, tie ye ɔdio, anzɛɛ maa awie mɔɔ ze kenga kpalɛ la ɛboa wɔ.
Tendɛ maa nuhua ɛla ɛkɛ. Bobɔ edwɛkɛ agbɔkɛ ne mɔ kpalɛ, maa ɛ ti zo na buke ɛ nloa kpole. Bɔ mɔdenle kɛ ɛbabɔ ɛnelɛkpɔkɛ ko biala.

Mmafa wɔ adwenle ɛsie edwɛkɛ agbɔkɛ ne mɔ mɔɔ ɛbobɔ bɛ kpalɛ la azo somaa ɛmaa wɔ ɛgengalɛ ne akee yɛ basaa.