ƐZUKOALƐDEƐ 12

Da Nganeɛdelɛ Ali

1 Tɛsalonaekama 2:7, 8

MƆƆ ƆHYIA KƐ ƐYƐ: Tendɛ wɔ adenle mɔɔ bamaa wɔ tievolɛma ade nganeɛ kɛ ɛkulo bɛ edwɛkɛ na ɛkulo kɛ ɛboa bɛ la azo.

Dwenle wɔ tievolɛma anwo. Siezie wɔ ahonle ɔlua ngyegyelɛ mɔɔ bɛlɛyia mɔɔ ɛbamaa yeadɛnla wɔ adwenle nu la azo. Bɔ mɔdenle kɛ ɛbade kɛzi bɛte nganeɛ la abo.
Kpa wɔ edwɛkɛ agbɔkɛ nrɛlɛbɛ nu. Maa wɔ tievolɛma ahonle ɛdɔ bɛ azule nu, kyekye bɛ rɛle, na maa bɛ anwosesebɛ. Mmaka edwɛkɛ mɔɔ bamaa wɔ tievolɛma ava ɛya yɛɛ mmaka edwɛkɛ mɔɔ ɛnle kpalɛ la ɛtia menli mɔɔ bɛnle diedima la anzɛɛ bɛ diedi ne.
Kile kɛ ɛ nye die bɛ nwo. Fa ɛnelɛ mɔɔ fɛta nee kɛzi ɛkeha ɛ nwo la kile kɛ ɛdwenle wɔ tievolɛma anwo. Nea ɛ nyunlu maanle ne boɛ; ɔyɛ a sele.

Mmada nganeɛdelɛ ali ɛmaa ɔbo zo. Saa ɛlɛkenga a, da nganeɛdelɛ mɔɔ wɔ edwɛkɛ ne anu la ali, noko mmatwe adwenle ɛkɔ ɛ nwo zo. Bɔ mɔdenle tendɛ wɔ atiakunlukɛnlɛma nee ɛlɔlɛ adenle zo.