Asoo Ɛze?
Kɛzi belekese nee adenle mɔɔ bɛdua zo bɛyɛ ye la anwo ninyɛne mɔɔ bɛnwu ye wɔ tete Babelɔn la maa yɛnwu kɛ Baebolo ne le nɔhalɛ ɛ?
AZETUDUVOMA ɛdudu tete Babelɔn na bɛnwu belekese mgbe dɔɔnwo mɔɔ bɛvale bɛzile suakpole ne la wɔ azɛlɛ bo. Azetuduvo Robert Koldewey hanle kɛ bɛdonle belekese ɛhye wɔ “suakpole ne anzi, ɛleka mɔɔ ndɛtɛlɛ kpalɛ nee ɛyɛne . . . dɔɔnwo wɔ ɛkɛ la.”
Azetuduvoma ɛnwu daselɛ mɔɔ kile kɛ ɛnee eza Babelɔn mgbanyima fa fonlomo ɛhye mɔ yɛ atisesebɛ ninyɛne la. Paul-Alain Beaulieu, Toronto Yunivɛsiti abɔlɔba bie mɔɔ yebe wɔ Aseleama tetedwɛkɛ nee bɛ aneɛ ne anu la hanle kɛ: “Babelɔn edwɛkɛ dɔɔnwo . . . maa ɔda ali kɛ ɛnee belemgbunli ne di mɛla maa bɛyela awie biala mɔɔ ambu ye anzɛɛ ambu ninyɛne nwuanzanwuanza biala la wɔ fonlomo nu.” Ndɛne bie mɔɔ bɛbuale ye wɔ Belemgbunli Nɛbukadenɛza mekɛ zo la hanle kɛ: “Bɛzɛkye bɛ, bɛyela bɛ, bɛdondo bɛ . . . wɔ fonlomo nu . . . bɛmaa bɛ esike ne ɛyɛ mungumungu, bɛyela bɛ bɛmaa bɛdɔ nzonle.”
Ɛhye maa menli mɔɔ kenga Baebolo ne la kakye edwɛkɛ mɔɔ wɔ Daneɛle tile 3 la. Tetedwɛkɛ zɔhane hanle kɛ Belemgbunli Nɛbukadenɛza yɛle nvutuke ananze kpole bie ziele Dula azɛlɛ sɛsɛ ne mɔɔ wɔ suakpole Babelɔn anzi la azo. Mɔɔ Hibulu mgbavolɛ nsa, Hyeedelake, Mihyake nee Abɛdenɛgo ambɔ bɛ ti aze ammaa ananze ne la, Nɛbukadenɛza vale ɛya kpole na ɔhanle kɛ bɛmaa fonlomo ne ɛlɔ “ɛdɛla dɛba ne fane nsuu” na ɔmaanle ‘bɛvuandinle bɛ bɛguale fonlomo ne mɔɔ senle ɛlɛsɔ wɔ nu la anu.’ Anwumabɔvolɛ bie mɔɔ lɛ tumi la liele bɛ vile ewule nu.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Belekese bie mɔɔ bɛdo mɔɔ Nɛbukadenɛza duma wɔ zo
Eza belekese mɔɔ bɛnwu ye wɔ Babelɔn la maa yɛnwu kɛ Baebolo ne le nɔhalɛ. Edwɛkɛ mɔɔ yeyɛ belemgbunli ne la wɔ nuhua dɔɔnwo azo. Edwɛkɛ ne mɔ ko se: “Nɛbukadenɛza, Babelɔn belemgbunli . . . Belemgbunli sua ne mɔɔ medame Belemgbunli Kpole ne mezi . . . Me bo zo amra ɛdɛnla ɛke ɛli belemgbunli dahuu.” Edwɛkɛ ɛhye zɔho mɔɔ bɛhɛlɛ ye wɔ Daneɛle 4:30 la kpalɛ. Wɔ ɛkɛ ne, Nɛbukadenɛza dule ɔ nloa anu kɛ: “Asoo tɛ Babelɔn Kpole ne mɔɔ medame mumua ne meva me anwosesebɛ nee me tumi mekyekye memaa yeyɛ belemgbunli sua kɛ mefa meala me anyunlunyia nee me kpoleyɛlɛ ne ali la ɛne?”