Bɛnyianle Ɛtanefakyɛ Kolaa Na Bɛadua Ɛkpɔnedeɛ Ne

Ɔlua ɛkpɔnelɛ afɔlebɔlɛ ne mɔɔ Gyisɛse vale ye mogya ne duale la ati a bɛkola bɛfa yɛ ɛtane bɛkyɛ yɛ a. (Ɛfɛ. 1:7) Noko Baebolo ne ka kɛ: “Nyamenle homonle ɔ nwo zo vale ɛtane mɔɔ bɛyɛle ye wɔ dɛba ne la hyɛle,” kile kɛ, kolaa na Gyisɛse adua ɛkpɔnedeɛ ne la. (Wlo. 3:​25, ɔbdw.) Kɛzi Gyihova kola yɛ ɛhye na mekɛ ko ne ala ɔkola ɔyɛ pɛlepɛlelilɛ Nyamenle ɛ?

Wɔ Gyihova anye zo, ɛnee ɔle kɛ asɛɛ bɛdua ɛkpɔnedeɛ ne bɛwie wɔ mekɛ mɔɔ ɔzile kpɔkɛ kɛ ɔfa ɔ “ra” ne mɔɔ ɔbalie alesama mɔɔ bɛlɛ diedi la ngoane la. (Gyn. 3:15; 22:18) Ɛnee Nyamenle lɛ anwodozo kɛ saa mekɛ ne dwu a, ɔ Ra kokye ne bavi ye ɛhulolɛ nu adua ɛkpɔnedeɛ ne. (Gal. 4:4; Hib. 10:​7-10) Mɔɔ Gyisɛse wɔ azɛlɛ ye azo kɛ Nyamenle agyakɛnugyinlavolɛ la, ɛnee ɔlɛ tumi ɔfa ɛtane ɔkyɛ kolaa na yeabɔ ɛkpɔnelɛ afɔle ne. Ɔvale bɛdabɛ mɔɔ bɛlale diedi ali la ɛtane ɔhyɛle bɛ ɔluakɛ ɛnee ɔze kɛ ɛkpɔnedeɛ ne bahola amaa bɛava bɛ ɛtane bɛahyɛ bɛ.—Mat. 9:​2-6.