Fa Neanleɛ Ne Di Gyima Kpalɛ

Ɛzoanvolɛ Gyemise vale Baebolo ne totole neanleɛ mɔɔ maa yɛnwu kɛzi yɛdayɛ mumua ne yɛde la anwo. (Gye. 1:​22-25) Kɛ ɔkɛyɛ na yɛahola yɛava Baebolo ne yɛali gyima kpalɛ kɛ neanleɛ ɛ?

To ɛ rɛle aze kenga. Saa yɛfa yɛ nye yɛfa neanleɛ bie anyunlu ala a, debie wɔ yɛ nwo mɔɔ ɔwɔ kɛ yɛyɛ ye boɛ a, yɛnrɛnwu ye. Zɔhane ala a amaa yɛanwu kɛzi yɛdayɛ mumua ne yɛde la, ɔwɔ kɛ yɛto yɛ rɛle aze yɛkenga Nyamenle Edwɛkɛ ne na yɛneɛnlea nuhua kpalɛ a.

Nea ɛdawɔ mumua ne ɛ nwo, mmanea awie mɔ. Ɔyɛ na ɛnea neanleɛ nu a, ɛnwu awie mɔ noko wɔ nu, ɔti yɛbahola yɛava yɛ adwenle yɛazie nvonleɛ mɔɔ wɔ bɛ nwo mɔɔ ɔwɔ kɛ bɛdi nwolɛ gyima la azo. Zɔhane ala a yɛbahola yɛagenga Baebolo ne na yɛanwu awie mɔ gyɛne nvonleɛ bie mɔɔ ɔwɔ kɛ bɛdi nwolɛ gyima la a. Noko saa yɛyɛ ye zɔ a, ɔnrɛboa yɛ ɔnrɛmaa yɛnrɛli nvonleɛ mɔɔ wɔ yɛdayɛ mumua ne yɛ nwo la anwo gyima.

Mmayɛ kyengye. Saa yɛfa yɛ adwenle yɛsie yɛdayɛ mumua ne yɛ nvonleɛ zo somaa a, ɔbahola yeamaa yɛ sa nu ado. Saa yɛlɛkenga Nyamenle Edwɛkɛ ne a, ɔnle kɛ yɛyɛ kyengye, kile kɛ ɔnle kɛ yɛkpondɛ dɔɔnwo yɛfi yɛdayɛ mumua ne yɛ ɛkɛ yɛtɛla mɔɔ Gyihova kpondɛ la.—Gye. 3:17.