Siezie Wɔ Ahonle

Saa yɛlɛsukoa Baebolo ne a, yɛkulo kɛ yɛmaa ninyɛne mɔɔ yɛsukoa ye wɔ Gyihova anwo la ka yɛ ahonle. Ɛzela yɛle ɛhye anwo neazo kɛnlɛma wɔ mekɛ mɔɔ ɔzieziele “ye ahonle kɛ ɔbanleɛnlea Gyihova Mɛla ne anu” la. (Ɛzela 7:10) Kɛzi yɛbaziezie yɛ ahonle ɛ?

Yɛ asɔne. Kolaa na wɔabɔ ɔ bo kɛ ɛsukoa debie biala la, yɛ asɔne. Sɛlɛ Gyihova kɛ ɔmaa ɛde mɔɔ ɛlɛsukoa la abo na ɛva ɛyɛ gyima.—Edw. 119:​18, 34.

Bɛlɛ ɛ nwo aze. Nyamenle fa nɔhalɛ ne fea bɛdabɛ mɔɔ bɛmemaa bɛ nwo zo na bɛfa bɛ nwo bɛto bɛdabɛ mumua ne bɛ ndelebɛbo zo la. (Luku 10:21) Mmanyia adwenle kɛ ɛsukoa amaa menli anwu kɛ ɛze debie. Saa ɛnwu kɛ ɔhyia kɛ ɛyɛ nzenzaleɛ bie a, bɛlɛ ɛ nwo aze na yɛ ye zɔ.

Bɔ mɔdenle kɛ ɛbadie Belemgbunlililɛ edwɛne ko. Edwɛne kola ka yɛ nganeɛdelɛ, na ɔsiezie yɛ ahonle ɔmaa Nyamenle ɛzonlenlɛ. Ɔti saa ɛtie Belemgbunlililɛ edwɛne ko kolaa na wɔabɔ ɔ bo kɛ ɛsukoa debie a, bie a ɔbaboa wɔ yeamaa wɔava wɔ adwenle wɔazie Gyihova anwo zo amaa mɔɔ ɛbazukoa la aha wɔ ahonle kpalɛ.