Gedɛyɔn Lile Medeanema Anwo Zo Konim

Nzinlii, Yizilayɛma dele atua tiale Gyihova na bɛzonlenle adalɛ nyamenle. Yemɔti Medeanema wuale bɛ nyɛmoa na bɛzɛkyele bɛ ɛya nu ninyɛne ɛvolɛ nsuu. Amaa Medeanema asa anga Yizilayɛma la, bɛnriandile bɛhɔveale awolɛ mbɔne nu nee awoka zo. Bɛzɛlɛle Gyihova kɛ ɔlie bɛ. Yemɔti Gyihova zoanle ye anwumabɔvolɛ wɔ kpavolɛ bie mɔɔ bɛfɛlɛ ye Gedɛyɔn la ɛkɛ. Anwumabɔvolɛ ne hanle kɛ: ‘Gyihova ɛkpa wɔ kɛ sogya kpanyinli.’ Gedɛyɔn bizale ye kɛ: ‘Menle ɛhwee, kɛ ɔkɛyɛ na mealie Yizilayɛma ɛ?’

Kɛ ɔkɛyɛ na Gedɛyɔn anwu ye kɛ Gyihova ɛkpa ye ɛ? Ɔvale boane enrinli ɔguale azɛlɛ ne anwo, na akee ɔzele Gyihova kɛ: ‘Saa ɔkadwu nwonlomɔ na ɛbɔlɛ ne ɛloa boane enrinli ɛhye na azɛlɛ ne anwo le resee a, mebanwu kɛ ɛbalua me nwo zo wɔalie Yizilayɛ.’ Aleɛ hyenle la ɛnee boane enrinli ne ɛloa noko azɛlɛ ne anwo le resee! Noko Gedɛyɔn hanle hilele Gyihova kɛ ɔkadwu nwonlomɔ la ɔmaa azɛlɛ ne anwo ɛloa na boane enrinli ne ɛyɛ resee. Mɔɔ Gedɛyɔn nwunle ye zɔ la, ɔliele ɔlile bɔkɔɔ kɛ Gyihova a ɛkpa ye a. Ɔboɔboale ye sogyama ne anloa kɛ ɔ nee Medeanema kaho.

Gyihova zele Gedɛyɔn kɛ: ‘Mebamaa Yizilayɛma ali konim. Noko wɔ sogyama ne zonle somaa. Wɔannea a wɔ adwenle bayɛ wɔ kɛ wɔ anwosesebɛ ti a bɛlile konim a. Ka kile bɛ nuhua ne mɔɔ sulo la kɛ ɔzia ɔhɔ sua nu.’ Yemɔti sogyama 22,000 ziale na ɔhale 10,000. Akee Gyihova hanle kɛ: ‘Sogyama ne anwo tɛso. Fa bɛ kɔ azule ne anloa na ka kile bɛ kɛ bɛnlo nzule. Ɛ nee menli mɔɔ bɛlɛno nzule ne a bɛmaa bɛ ti zo bɛnea kɛ bɛ agbɔvolɛ ɛlɛba la ɛhɔ.’ Mɔɔ ɔyɛle ɛhye la, ɔhale bɛ nuhua 300 pɛ. Gyihova bɔle ɛwɔkɛ kɛ ɔbava menli ekyi ɛhye yeazɛkye Medean sogyama 135,000 ne.

Zɔhane nɔe ne, Gyihova hanle hilele Gedɛyɔn kɛ: ‘Mekɛ ɛdwu kɛ ɛkɔ Medeanema anwo zo!’ Gedɛyɔn vale aweɛne, mbuakɛ mgbole nee tɛkɛ wulale ye menli ne asa anu na ɔzele bɛ kɛ: ‘Bɛnlea na bɛyɛ mɔɔ mebayɛ la bie.’ Akee Gedɛyɔn bɔle ye aweɛne ne anu, ɔbɔle ye buakɛ ne, ɔwosole ye tɛkɛ ne na ɔdeanle nu kɛ: ‘Gyihova nee Gedɛyɔn konle dadeɛ ɔ!’ Ye menli 300 ne amuala yɛle mɔɔ ɔyɛle la bie. Medeanema anye zo danle bɛ na bɛnriandile. Kɛmɔ ɛnee bɛ nye zo ɛda bɛ la ati, bɛpɛle bɛ nwo bɛhunle bɛ nwo. Gyihova maanle Yizilayɛma lile bɛ kpɔvolɛma anwo zo konim bieko.