Gyihova Maanle Samesɛn Anwo Yɛle Se

Yizilayɛma dɔɔnwo hɔzonlenle ananze bieko, yemɔti Gyihova maanle Filisitiama honle vale bɛ azɛlɛ ne. Noko ɛnee Yizilayɛma bie mɔ kulo Gyihova. Bɛ nuhua ko a le Manowa. Ɛnee ɔ nee ɔ ye ɛtɛwole. Kenle ko bie Gyihova zoanle anwumabɔvolɛ wɔ Manowa aye ne anwo ɛkɛ. Anwumabɔvolɛ ne zele ye kɛ: ‘Ɛbawo ralɛ nrenyia. Ɔbalie Yizilayɛma yeavi Filisitiama asa nu. Ɔbayɛ Nazalaenli.’ Nwane mɔ a ɛnee bɛfɛlɛ bɛ Nazalaema a? Ɛnee bɛle Gyihova azonvolɛ titili. Ɛnee Nazalaema ɛmkpa bɛ ti enrinli.

Mekɛ hɔle bie la, bɛwole kakula ne na bɛdonle ye Samesɛn. Mɔɔ Samesɛn nyinle la, Gyihova maanle ɔ nwo yɛle se kpalɛ. Ɛnee ɔkola ɔfa ɔ sa mgbane ɔku awenade. Kenle ko bie, Samesɛn angomekye hunle Filisitiama 30. Ɛnee Filisitiama kpɔ ye na bɛhɔle zo bɛkpondɛle adenle mɔɔ bɛbalua zo bɛahu ye la. Kenle ko bie mɔɔ Samesɛn hɔle Gaza la, bɛhɔziale ye wɔ suakpole ne anlenkɛ kpole ne anloa kɛ saa aleɛ kye a, bɛbahu ye. Noko nɔe ne, Samesɛn dwazole hɔle suakpole ne anlenkɛ kpole ne anwo na ɔdule ye. Ɔvale anlenkɛ ne ɔdole ɔ kɔme zo ɔhɔle boka bie mɔɔ bikye Hibulɔn la azo!

Nzinlii, Filisitiama hɔle Samesɛn nwewe bie mɔɔ bɛfɛlɛ ye Dɛlaela la ɛkɛ ne hɔzele ye kɛ: ‘Saa ɛmaa yɛnwu deɛmɔti Samesɛn anwo yɛ se zɔhane la a, yɛbamaa wɔ dwɛtɛ fufule apenle dɔɔnwo. Yɛkulo kɛ yɛkye ye na yɛto ye efiade.’ Ɛnee Dɛlaela kpondɛ ezukoa ne, ɔti ɔliele ɔdole nuhua. Mɔlebɛbo ne, Samesɛn anga deɛmɔti ɔ nwo yɛ se la angile ye. Noko ɔgyegyele Samesɛn too ɔmaanle ɔhanle ɔhilele ye. Ɔhanle kɛ: ‘Mele Nazalaenli yemɔti bɛtɛpepɛle me ti enrinli ɛlɛ.’ Ɔzele ye kɛ ‘Saa bɛpepɛ me ti enrinli a, me anwosesebɛ ne amuala baha aze.’ Samesɛn yɛle nvonleɛ kpole kɛ ɔhanle ɔhilele ye la, ɔnle zɔ ɔ?

Ndɛndɛ ne ala Dɛlaela hanle hilele Filisitiama kɛ: ‘Kɛkala akee yeha debie biala yehile me!’ Ɔmaanle Samesɛn lale ɔ gyakɛ azo na ɔmaanle awie pepɛle ɔ ti enrinli ne. Dɛlaela deanle nu kɛ: ‘Samesɛn, Filisitiama ɛra ɛ nwo zo!’ Mɔɔ Samesɛn dwazole la, ɔnwunle kɛ ye anwosesebɛ ne ɛvi ye nu. Filisitiama hyele ye, bɛbobɔle ɔ nye na bɛdole ye efiade.

Kenle ko bie, Filisitiama hɔyiale bɛ bozonle Deegɔn ɛzonlenlɛsua ne anu na bɛdeɛdeanle nuhua kɛ: ‘Yɛ bozonle ne ɛye Samesɛn ɛmaa yɛ! Bɛva ye bɛvinde bɛmaa ɔlielie yɛ nye!’ Bɛvale ye bɛziele mpila nwiɔ avinli na bɛgolole ɔ nwo. Samesɛn deanle nu kɛ: ‘O Gyihova, mesɛlɛ wɔ maa me anwosesebɛ wɔ mekɛ ɛhye anu.’ Mekɛ zɔhane, ɛnee Samesɛn enrinli ne ɛvi bieko. Ɔvale ye anwosesebɛ kɔsɔɔti ɔzuhunle mpila nwiɔ ne mɔɔ sosɔ bɛ ɛzonlenlɛsua ne la. Ɛzonlenlɛsua ne bule guale aze na ɔhunle menli mɔɔ wɔ nu la amuala. Samesɛn noko wule.