Belemgbunli Devidi Ɛtane Ne

Mɔɔ Sɔɔlo wule la, Devidi rayɛle belemgbunli. Ɛnee yeli ɛvolɛ 30. Mɔɔ ɔyɛle belemgbunli wɔ ɛvolɛ dɔɔnwo anu la, kenle ko nɔsolɛ bie mɔɔ ɔgyi ye sua ne ati zo la, ɔnwunle raalɛ kɛnlɛma bie. Devidi nwunle kɛ bɛfɛlɛ raalɛ ne Batehyɛba yɛɛ ɔ hu a le sogyanli Yulaya. Devidi maanle bɛhɔvale Batehyɛba bɛrale ye sua nu ɛkɛ. Ɔ nee ye lale na ɔnrenzɛle. Devidi bɔle mɔdenle kɛ ɔkeda ye ɛtane ne azo. Ɔvale nrɛlaleɛ ɔhɔmaanle ye sogya kpanyinli ne kɛ ɔmaa Yulaya ɛhɔgyinla konle ne anloa na ɔhwe ɔ nwo ɔvi ɛkɛ. Mɔɔ bɛhunle Yulaya la, Devidi gyale Batehyɛba.

Noko Gyihova nwunle mɔɔ hɔle zo la amuala. Duzu a ɔyɛle a? Gyihova zoanle ngapezonli Neetan wɔ Devidi ɛkɛ. Neetan hanle hilele Devidi kɛ: ‘Ɛnee sukoavolɛ bie lɛ mboane dɔɔnwo, yɛɛ ehyianli bie lɛ ye boane ralɛ kokye mɔɔ ɔ nye die ɔ nwo kpole la. Sukoavolɛ ne hyele nrenyia ehyianli ne boane kokye ne.’ Devidi vale ɛya kpole na ɔhanle kɛ: ‘Ɔfɛta kɛ bɛku sukoavolɛ ɛhye!’ Akee Neetan zele Devidi kɛ: ‘Sukoavolɛ ne a le ɛdawɔ!’ Devidi lile nyane na ɔhanle kɛ: ‘Meyɛ ɛtane metia Gyihova.’ Ɛtane ɛhye mɔɔ Devidi yɛle la vale ngyegyelɛ dɔɔnwo rale ye sua nu. Gyihova hwenle Devidi anzo, noko yeangu ye ɔluakɛ ɔdi nɔhalɛ yɛɛ ɔbɛlɛ ɔ nwo aze.

Ɛnee Devidi kpondɛ kɛ ɔsi ɛzonlenlɛsua ɔmaa Gyihova, noko Gyihova yele ɔ ra Sɔlɔmɔn kɛ ɔzi sua ne. Devidi kpondɛle ninyɛne mɔɔ Sɔlɔmɔn hyia nwo la ziele ɛkɛ. Ɔhanle kɛ: ‘Ɔwɔ kɛ Gyihova ɛzonlenlɛsua ne yɛ kɛnlɛma. Me ra ye le kakula, yemɔti mebaboɔboa ninyɛne nloa meazie ɛkɛ.’ Devidi vale ye ezukoa dɔɔnwo boale sua ne ɛzilɛ. Ɔkpondɛle menli mɔɔ ze gyima ne anye zo la. Eza ɔboɔboale nvutuke nee dwɛtɛ fufule nloa yɛɛ ɔmaanle bɛvale sida mbaka bɛvile Taya nee Saedɛn bɛrale. Mɔɔ ɔka ekyii Devidi wu la, ɔhilele Sɔlɔmɔn kɛzi ɔwɔ kɛ ɔsi ɛzonlenlɛsua ne la. Ɔhanle kɛ: ‘Gyihova a maanle mengɛlɛle ninyɛne ɛhye mɔ mendole ɛkɛ a. Ɔbaboa wɔ. Mmasulo. Maa ɛ nwo ɛyɛ se na yɛ gyima ne.’