ƐZUKOALƐDEƐ 49
Kɛ Ɔkɛyɛ Na Wɔ Abusua Ne Anye Alie Ɛ?—Foa 1
Saa menli gya a bɛ nye la kɛ anyelielɛ mɔɔ bɛnyianle wɔ kenle mɔɔ bɛyɛle bɛ atɔfolɛlielɛ ne la badɛnla ɛkɛ dahuu. Na ɔbahola yeayɛ zɔ. Kilisienema mɔɔ ɛgya ɛhyɛ na bɛbɔ mɔdenle bɛfa Baebolo ne anu folɛdulɛ bɛdi gyima la ze kɛ ɔbahola yeayɛ boɛ.
1. Folɛ boni a Baebolo ne tu kunlima a?
Gyihova ɛkpa kunli kɛ ɔle abusua ne ati. (Kenga Ɛfɛsɛsema 5:23.) Gyihova kpondɛ kɛ ɔsi kpɔkɛ mɔɔ baboa abusua ne la. Baebolo ne tu kunlima folɛ kɛ: “Bɛhɔ zo bɛhulo bɛ ye mɔ.” (Ɛfɛsɛsema 5:25) Duzu a ɛhye kile a? Kunli mɔɔ lɛ ɛlɔlɛ la nee ɔ ye di ye kɛnlɛma wɔ sua nu yɛɛ menli nu. Ɔbɔ ɔ nwo bane, ɔnea ɔmaa ɔ sa ka ninyɛne mɔɔ ɔhyia la na ɔmaa ɔ nye die. (1 Timote 5:8) Mɔɔ hyia kpalɛ la, ɔnea ɔdi ye sunsum nu ngyianlɛ nwo gyima. (Mateyu 4:4) Kɛ neazo la, ɔbahola ɔ nee ɔ ye ayɛ asɔne na bɛagenga Baebolo ne. Saa kunli fi ɛlɔlɛ nu nea ɔ ye a, ɔ nee Gyihova agɔnwolɛvalɛ ne anu kɔ zo mia.—Kenga 1 Pita 3:7.
2. Folɛ boni a Baebolo ne tu yelɛma a?
Nyamenle Edwɛkɛ ne se ɔwɔ kɛ yelɛ “nyia ɛbulɛ kpole maa ɔ hu.” (Ɛfɛsɛsema 5:33) Kɛ ɔkɛyɛ na yeayɛ zɔ ɛ? Ɔbahola yeava ye adwenle yeazie ɔ hu subane kpalɛ ne nee mɔdenle mɔɔ ɔlɛbɔ yeanlea ye nee bɛ mra ne mɔ la azo. Eza saa ɔ hu si kpɔkɛ a ɔdi ɔboa ye, ɔtendɛ kɛnlɛma ɔkile ye yɛɛ ɔka ɔ nwo edwɛkɛ kpalɛ a ɔbahile kɛ ɔbu ye, ɔnva nwo bɔbɔ kɛ ɔnle diedinli la.
3. Kɛ ɔkɛyɛ na agyalɛma amaa bɛ agyalɛ nu amia ɛ?
Baebolo ne ka agyalɛma anwo edwɛkɛ kɛ: “Bɛ mu nwiɔ [bɛbayɛ] nwonane ko.” (Mateyu 19:5) Ɛhye kile kɛ ɔwɔ kɛ bɛko bɛtia debie biala mɔɔ bamaa bɛ avinli atete la. Bɛyɛ ɛhye ɔlua mekɛ mɔɔ bɛnyia bɛmaa bɛ nwo na bɛfi bɛ ahonle nu nee ɛlɔlɛ nu bɛka bɛ nzuzulɛ nee kɛzi bɛte nganeɛ bɛkile bɛ nwo dahuu la azo. Bɛmmaa debie biala anzɛɛ awie biala anwo ɛngyia bɛ ɛndɛla ahenle mɔɔ bɛgya ye la, kyesɛ Gyihova ala. Bɛnea boɛ kpalɛ kɛ bɛ nee awie gyɛne biala agɔnwolɛvalɛ ɛnrɛyɛ kyengye somaa a.
SUKOA DƆƆNWO
Nea Baebolo ngyinlazo mɔɔ bamaa wɔ agyalɛ nu amia la.
4. Kunli—kulo ɛ ye na nea ye boɛ
Baebolo ne se “ɔwɔ kɛ kunlima kulo bɛ ye mɔ kɛ bɛ nwo.” (Ɛfɛsɛsema 5:28, 29) Duzu a ɛhye kile a? Ye VIDIO ne, na akee bɛzuzu kpuya ɛhye anwo.
Ndenle mɔɔ kunli bahola alua zo ahile kɛ ɔkulo ɔ ye na ɔnea ye boɛ la bie mɔ a le boni?
Kenga Kɔlɔsaema 3:12, na akee bɛzuzu kpuya ɛhye anwo:
Kɛ ɔkɛyɛ na kunli ala subane ɛhye mɔ ali wɔ ye agyalɛ nu ɛ?
5. Yelɛ—kulo ɛ hu na bu ye
Baebolo ne ka kile yelɛ kɛ ɔbu ɔ hu, saa ɔ hu sonle Gyihova anzɛɛ ɔnzonle ye bɔbɔ a. Kenga 1 Pita 3:1, 2, na akee bɛzuzu kpuya ɛhye mɔ anwo:
Saa ɛ hu ɛnzonle Gyihova a, ɔda ali kɛ ɛkulo kɛ ɔsonle ye. Boni a ɛyɛ a ɛnea a ɔbaboa kpalɛ a—ɛbali ye daselɛ dahuu anzɛɛ ɛbala subane kpalɛ ali wɔahile ye na wɔabu ye? Duzu ati ɔ?
Kunli nee yelɛ bahola abɔ nu azi kpɔkɛ kpalɛ. Noko ɔyɛ a, bie a yelɛ nee ɔ hu adwenle ɛnrɛyɛ ko. Saa ɔba ye zɔ a ɔbahola yeavi ɛbulɛ nee mɛlɛbɛnwoaze nu yeahile ye adwenle, noko ɔwɔ kɛ ɔnwu kɛ Gyihova ɛmaa ɔ hu adenle kɛ ɔzi kpɔkɛ kpalɛ mɔɔ baboa abusua ne la. Ɔwɔ kɛ ɔbɔ mɔdenle ɔdi ɔboa ye kpɔkɛzilɛ ne. Saa ɔyɛ zɔ a, ɔboa ɔmaa abusua ne anye die. Kenga 1 Pita 3:3-5, na akee bɛzuzu kpuya ɛhye anwo:
Saa yelɛ bu ɔ hu a kɛzi Gyihova te nganeɛ wɔ nwo ɛ?
6. Ɛbahola wɔali wɔ agyalɛ nu ngyegyelɛ nwo gyima
Agyalɛ biala ɛnli munli. Ɛhye ati, ɔwɔ kɛ agyalɛma bɔ nu di bɛ ngyegyelɛ nwo gyima. Ye VIDIO ne, na akee bɛzuzu kpuya ɛhye mɔ anwo.
Wɔ vidio ne anu, duzu a kile kɛ ɛnee agyalɛma ne avinli ɛlɛtete a?
Ninyɛne boni mɔ a bɛyɛle bɛvale bɛmiemianle bɛ agyalɛ ne anu a?
Kenga 1 Kɔlentema 10:24 yɛɛ Kɔlɔsaema 3:13. Ɛkenga tɛkese ko biala ɛwie a, bɛzuzu kpuya ɛhye anwo:
Kɛzi agyalɛma fa folɛdulɛ ɛhye di gyima a ɔbamaa bɛ agyalɛ nu amia ɛ?
Baebolo ne se ɔwɔ kɛ yɛdi yɛ gɔnwo mɔ eni. Enililɛ kile kɛ yɛfi ɛbulɛ nu yɛ nee awie ali ye kɛnlɛma. Kenga Wulomuma 12:10, na akee bɛzuzu kpuya ɛhye mɔ anwo:
Asoo ɔwɔ kɛ kunli anzɛɛ yelɛ kendɛ maa ɔ gɔnwo dimoa di ye eni ɔ? Duzu ati ɔ?
BIE MƆ KA KƐ: “Me nee me hu anzɛɛ me ye avinli ɛlɛtete.”
Kɛzi ɛbahilehile nu kɛ Baebolo ne bahola aboa bɛ ɛ?
EDWƐKƐ TITILI
Saa kunli nee yelɛ kulo bɛ nwo, bɛbu bɛ nwo na bɛfa Baebolo ngyinlazo bɛdi gyima a, bɛ nye balie.
Ndinu
Kɛ ɔkɛyɛ na kunli aboa amaa agyalɛ ayɛ anyelielɛ ɛ?
Kɛ ɔkɛyɛ na yelɛ aboa amaa agyalɛ ayɛ anyelielɛ ɛ?
Saa wɔgya a, Baebolo ngyinlazo boni a bahola aboa yeamaa wɔ agyalɛ nu amia a?
KPONDƐ DƆƆNWO
Sukoa ninyɛne bie mɔ mɔɔ bahola aboa wɔ yeamaa wɔ abusua ne anye alie la.
Nea edwɛne mɔɔ bɛyɛ ye vidio mɔɔ bamaa wɔanwu kɛ ɛfa Nyamenle folɛdulɛ ɛdi gyima wɔ wɔ agyalɛ nu a ɛbanyia nyilalɛ dɔɔnwo la.
Nea mɔɔ kile kɛ raalɛ bɛlɛ ɔ nwo aze maa kunli tileyɛlɛ la.
“Mraalɛ, Duzu Ati A Ɔwɔ Kɛ Bɛbɛlɛ Bɛ Nwo Aze Bɛmaa Tileyɛlɛ A?” (Ɛzinzalɛ Arane, May 15, 2010)
Kɛzi agyalɛma bie lile ngyegyelɛ mgbole nee bɛ ewolebɔlɛ ne anwo gyima ɛ?