BAEBOLO KPUYIA MƆƆ BƐBUA

Bɛkola bɛfa yɛ ɛtane bɛkyɛ yɛ ɔ?

Baebolo ne kile kɛ alesama kɔsɔɔti le ɛtanevolɛma. Yɛnyianle subane mɔɔ maa yɛyɛ ɛtane la yɛvile sonla ne mɔɔ lumua, mɔɔ le Adam la ɛkɛ. Ɛhye ati, ɔyɛ a yɛyɛ ɛtane na nzinlii yɛnu yɛ nwo wɔ nwolɛ. Nyamenle Ara, Gyisɛse Kelaese, wule manle yɛ vale duale yɛ ɛtane kakɛ. Ye ɛkpɔnedeɛ afɔlebɔlɛ ne maa bɛkola bɛfa ɛtane bɛkyɛ. Ɔle ahyɛlɛdeɛ mɔɔ vi Nyamenle ɛkɛ a.—Kenga Wulomuma 3:23, 24.

Menli ne bie ɛyɛ ɛtane kpole na bɛngola bɛnnwu ye kɛ saa Nyamenle bava ahyɛ bɛ a. Nyamenle Edwɛkɛ ne ka maa ɔyɛ anyelielɛ kɛ: “Ɔ Ra Gyisɛse mogya ne mɔɔ ɔhwinle ɔguale la te yɛ nwo fi ɛtane biala anwo.” (1 Dwɔn 1:7) Saa yɛnu yɛ nwo nɔhalɛ nu a, Gyihova fi ye ɛhulolɛ nu fa ɛtane kpole biala kyɛ yɛ.—Kenga Ayezaya 1:18.

Duzu a ɔwɔ kɛ yɛyɛ na yɛanyia ɛtanefakyɛ a?

Saa yɛkpondɛ kɛ Gyihova Nyamenle fa yɛ ɛtane kyɛ yɛ a, ɔwɔ kɛ yɛsukoa ɔ nwo debie—yɛnwu ye ndenle, yɛtie ye folɛdulɛ na yɛyɛ mɔɔ ɔkpondɛ la. (Dwɔn 17:3) Gyihova fa menli mɔɔ nu bɛ nwo wɔ ɛbɛlatane mɔɔ bɛkɛbɔ la anwo na bɛbɔ mɔdenle kɛ bɛkakyi bɛ subane la ɛtane kyɛ bɛ bɔkɔɔ.—Kenga Gyima ne 3:19.

Ɔnyɛ se somaa kɛ yɛbanyia Nyamenle anyunlu ɛlolɛ. Gyihova te yɛ sinlidɔlɛ bo. Ɔse anwunvɔne na ɔ ti ɛnyɛ se. Asoo ye ɛhulolɛ kpundii ɛnga wɔ kɛ ɛzukoa ɔ nwo debie dɔɔnwo amaa wɔanwu kɛzi ɛbahola wɔazɔ ɔ nye la?—Kenga Edwɛndolɛ 103:13, 14.