Kɛ Bɛfɛlɛ Nyamenle Ɛ?

Saa ɛkulo kɛ ɛnwu awie kpalɛ a, debie mɔɔ limoa mɔɔ ɛbabiza la a le ye duma. Saa anrɛɛ ɔwɔ kɛ ɛbiza Nyamenle noko duma a, duzu a ɔbaha a?

“Medame a mele [Gyihova] a, me duma ɛne!”—Ayezaya 42:8.

Wɔde duma ɛhye ɛlɛ ɔ? Bie a ɛtɛtele ye ɛlɛ ɔluakɛ Baebolo edwɛbohilelɛma dɔɔnwo ɛnda ɛnva Nyamenle duma ne ɛnli gyima. Bɛta bɛfa amodinli “AWULAE” anzɛɛ “ƐDƐNKƐMA” bɛsie ɔ gyakɛ anu. Noko Nyamenle duma ne finde fane kɛyɛ 7,000 wɔ aneɛ mɔɔ bɛlimoale bɛvale bɛhɛlɛle Baebolo ne la anu. Ɔvi Hibulu Kɔnsɔnante nna mɔɔ gyi ɛkɛ ne maa YHWH anzɛɛ JHVH la anu. Ɔvi tete ne bɛhile nu wɔ Nrelenza nu kɛ “Jehovah.”

Bɛhɛlɛ Nyamenle duma ne Hibulu nu wɔ Nyevile Wulera Nwomamobɔleɛ ne anu — Nyevile Wulera Ne Anu Edwɛndolɛ Nwomamobɔleɛ Ne Ɛvoya mɔɔ limoa Y.M., HIBULU

Bɛhɛlɛ Nyamenle duma ne Nrelenza nu wɔ Tyndale Baebolo ngilebɛbo ne anu — Tyndale ngilebɛbo 1530, NRENLEZA

Bɛhɛlɛ Nyamenle duma ne Spanish nu wɔ Reina-Valera Baebolo ngilebɛbo ne anu — Reina-Valera ngilebɛbo 1602, SPANISH

Bɛhɛlɛ Nyamenle duma ne Chinese nu wɔ Union Version Baebolo ngilebɛbo ne anu — *Union* Version 1919, CHINESE

Nyamenle duma ne finde dɔɔnwo wɔ Hibulu ngɛlɛlera ne anu yɛɛ ɛbanwu ye wɔ ngilebɛbo dɔɔnwo anu

DEƐMƆTI NYAMENLE DUMA NE HYIA LA

Duma ne anwo hyia Nyamenle mumua ne. Nyamenle mumua ne a kpale ye duma ne a. Ɔhanle kɛ: “Ɛhye a le me duma wɔ melɛ mɔɔ ɛnlɛ awieleɛ, na ɛhye yɛɛ ɔwɔ kɛ awolɛndoazo kɔsɔɔti fa fɛlɛ me a.” (Adendulɛ 3:15) Wɔ Baebolo ne anu, Nyamenle duma ne finde fane dɔɔnwo tɛla ye amodinli ne mɔ, le kɛ Tumivolɛ Bedevinli, Egya, Awulae, anzɛɛ Nyamenle. Eza ye duma ne finde fane dɔɔnwo tɛla duma biala mɔɔ wɔ Baebolo ne anu, le kɛ Ebileham, Mosisi, Devidi, anzɛɛ Gyisɛse. Bieko, Gyihova kulo kɛ menli nwu ye duma ne. Baebolo ne ka kɛ: “Maa bɛnwu kɛ ɛdawɔ ɛ ngomekye, mɔɔ wɔ duma a le [Gyihova] la a ɛle Anwuma Anwumanli ne mɔɔ sie azɛlɛ ye a.”—Edwɛndolɛ 83:18.

Duma ne anwo hyia Gyisɛse. Wɔ asɔneyɛlɛ mɔɔ bɛfɛlɛ ye Yɛ Ze Mɔɔ Wɔ Anwuma anzɛɛ Awulae Nzɛlɛlɛ ne anu, Gyisɛse hilele ye ɛdoavolɛ ne mɔ kɛ bɛzɛlɛ Nyamenle kɛ ‘ye duma nwo ɛde.’ (Mateyu 6:9) Ɔyɛle asɔne kɛ: “Egya, wula wɔ duma anyunlunyia.” (Dwɔn 12:28) Gyisɛse maanle Nyamenle duma ne mɔɔ ɔwula ye anyunlunyia la hyianle ye wɔ ye ɛbɛlabɔlɛ nu, ɛhye ati ɔyɛle asɔne kɛ: “Memaa bɛnwu wɔ duma yɛɛ mebamaa bɛanwu ye.”—Dwɔn 17:26.

Duma ne anwo hyia menli mɔɔ ze Nyamenle la. Nyamenle tete azonvolɛ ɛnee ze kɛ saa bɛbanyia banebɔlɛ nee ngoanelielɛ a, ɔgyi Nyamenle duma ne azo. “[Gyihova] duma ne le aranemgbole; sonla mɔɔ le tenlene la nriandi kɔfea nu a, ɔ nwo kɔlɔnwo.” (Mrɛlɛbulɛ 18:10) “Awie biala mɔɔ kɛbɔ Gyihova duma la, bɛbalie ye ngoane.” (Wulomuma 10:13) Baebolo ne maa yɛnwu kɛ Nyamenle duma ne bamaa yɛanwu ye azonvolɛ. “Maanle maanle kɔsɔɔti di bɛ nyamenle ne mɔ mɛla zo na bɛsonle bɛ, na yɛmɛ, yɛbazonle [Gyihova] yɛ Nyamenle ne na yɛali ye mɛla zo dahuu.”—Maeka 4:5; Gyima ne 15:14.

MƆƆ DUMA NE DA YE ALI LA

Duma ne maa yɛnwu Nyamenle kpalɛ. Mbɔlɔba dɔɔnwo ka kɛ duma Gyihova ne kile kɛ “Ɔmaa Ɔyɛ Ɛkɛ.” Gyihova Nyamenle maanle mɔɔ ye duma ne kile la lale ali wɔ mekɛ mɔɔ ɔhanle ɔ nwo edwɛkɛ ɔhilele Mosisi kɛ: “Medame a le Medame” la. Bɛkola bɛkile Hibulu aneɛ mɔɔ bɛvale bɛhɛlɛle edwɛkɛ ɛhye la abo kɛ “Mebayɛ Me Nwo Mɔɔ Mekpondɛ Kɛ Meyɛ La.” (Adendulɛ 3:14) Nyamenle duma ne maa yɛnwu ye kpalɛ yɛtɛla kɛ ɔle Bɔvolɛ ala. Ye duma ne maa ɔda ali kɛ ɔkola ɔyɛ ɔ nwo anzɛɛ ye abɔdeɛ kɛzi ɔkulo kɛ ɛyɛ ye biala la ɔmaa ye bodane ba nu. Nyamenle amodinli maa yɛnwu ye dibilɛ nee ye tumi, noko ye duma Gyihova ne ala a maa yɛnwu ye sonla holɛ nee mɔɔ ɔkola ɔyɛ la.

Nyamenle duma ne maa yɛnwu kɛ ɔkulo yɛ. Mɔɔ Nyamenle duma ne kile la maa yɛnwu kɛzi ɔkulo ye abɔdeɛ, mɔɔ yɛdayɛ noko yɛboka nwo la. Bieko, ye duma ne mɔɔ yemaa yɛnwu ye la di daselɛ kɛ ɔkulo kɛ yɛnwu ye. Ɔlimoale ɔbɔle ye duma ɔhilele yɛ kolaa na yɛanwu bɔbɔ kɛ ɔwɔ kɛ yɛbiza ye. Ɔda ali kɛ, Nyamenle kulo kɛ yɛnwu ye kɛ ɔnle adalɛ Nyamenle, emomu ɔle Awie mɔɔ wɔ ɛkɛ ne mɔɔ yɛbahola yɛabikye ye a.—Edwɛndolɛ 73:28.

Nyamenle duma ne mɔɔ yɛbava yɛali gyima la kile kɛ yɛkulo ye. Kɛ neazo la, bie a ɛbabɔ wɔ duma kpalɛ wɔahile awie mɔɔ ɛkulo kɛ ɛfa ye agɔnwolɛ la kɛ ɔva ɔvɛlɛ wɔ. Saa ahenle ɛngulo kɛ ɔfa ɔfɛlɛ wɔ a, kɛzi ɛbade nganeɛ ɛ? Bie a ɛbabiza ɛ nwo kɛ, asoo ahenle kulo kɛ ɔfa me agɔnwolɛ amgba? Zɔhane ala a ɔde wɔ Nyamenle afoa nu a. Gyihova ɛbɔ ye duma ne ɛhile alesama na ɔmaa yɛ anwosesebɛ kɛ yɛva yɛvɛlɛ ye. Saa yɛyɛ ye zɔ a, yɛmaa Gyihova nwu ye kɛ yɛkulo kɛ yɛbikye ye. Duzu ati ɔ? Ɔnwu ‘bɛdabɛ mɔɔ bɛdwenle ye duma’ ne anwo la.—Malakae 3:16.

Nyamenle duma ne mɔɔ yɛbanwu ye la le debie mɔɔ limoa mɔɔ hyia. Noko ɔnle kɛ ɔka ɛkɛ ne ala. Ɔwɔ kɛ yɛnwu Ahenle ne mɔɔ duma ne la ɔ nwo zo la. Ɔhyia kɛ yɛsukoa ye subane ne mɔ.

KƐ BƐFƐLƐ NYAMENLE Ɛ? Nyamenle duma a le Gyihova. Nyamenle angome a lɛ duma ɛhye mɔɔ maa yɛnwu kɛ ɔle awie mɔɔ bahola ali ye bodane nwo gyima a

NIENWU A NYAMENLE VI RALE A?

Menli dɔɔnwo dwenle kpuya ɛhye anwo. Bie a, ɛdawɔ noko wɔdwenle nwolɛ. Wɔ adenle fofolɛ zo: Saa Nyamenle a bɔle anwuma nee aze nee debie biala mɔɔ wɔ nu la a, ɛnee Nyamenle vi nienwu a ɔrale a?

Abɔdeɛ nwo nrɛlɛbɛvoma die di kɛ ninyɛne mɔɔ wɔ aleɛabo la amuala lɛ bɛ mɔlebɛbo. Mɔɔ nee adwenle ɛhye le ko la, ngyɛnu mɔɔ limoa wɔ Baebolo ne anu la ka kɛ: “Mɔlebɛbo ne Nyamenle bɔle anwuma nee aze.”—Mɔlebɛbo 1:1.

Anwuma nee aze ɛnrɛhola ɛnrɛra mɔɔ bɛambɔ a. Awie anyɛ debie a, debie ɛnrɛra. Kolaa na anwuma nee aze ara la, saa ɛnee awie biala ɛnle ɛkɛ a, anrɛɛ yɛnlɛ debie mɔɔ bɛfɛlɛ ye anwuma nee aze. Ɔnla aze kɛ yɛbade ɔ bo, noko awie mɔɔ ɔnlɛ ye mɔlebɛbo nee awieleɛ na ɔle sunsum la a bɔle anwuma nee aze a. Gyihova Nyamenle mɔɔ ye tumi ne ɛnlɛ ye awieleɛ na ɔle sunsum nu sonla mɔɔ ze nrɛlɛbɛ la a Bɔle Ɛhye mɔ a.—Dwɔn 4:24.

Baebolo ne ka ye wɔ Nyamenle anwo kɛ: “Mekɛ mɔɔ ɛkabɔ awoka, anzɛɛ azɛlɛ ye nee ewiade ye la, ɔvi tete, mɔɔ kɔdwu mekɛ mɔɔ ɛnlɛ awieleɛ, ɛle Nyamenle.” (Edwɛndolɛ 90:2) Ɛhye kile kɛ, Nyamenle wɔ ɛkɛ ne dahuu. Akee wɔ “mɔlebɛbo ne” ɔbɔle anwuma nee aze.—Yekile 4:11.