‘Bɛmaa Bɛ Kɛnlaneɛ Ne Ɛda’
1. Duzu a yɛnyia nwolɛ adenle kɛ ɔwɔ kɛ yɛka nwolɛ edwɛkɛ yɛkile awie mɔ a?
1 Ɔvi aleɛbahye kɔdwu aledwolɛ, wienyi kɛnlɛma mɔɔ yɛnwu ye la maa yɛye Gyihova Nyamenle ayɛlɛ. Noko akee, ɛnee Gyisɛse ɛlɛka kɛnlaneɛ fofolɛ mɔɔ ɔwɔ kɛ ye ɛdoavolɛ ne mɔ nwu ye la anwo edwɛkɛ—“ngoane nu wienyi ne.” (Dwɔn 8:12) Sunsum nu ndelebɛbo ɛhye mɔɔ yɛnwu ye la le nwolɛ adenle kpole mɔɔ yɛnyia a, na ɛhye nee gyimayɛlɛ dɔɔnwo a lua a. Gyisɛse hanle kɛ: ‘Bɛmaa bɛ kɛnlaneɛ ne ɛda wɔ menli nu,’ amaa yeayɛ moalɛ yeamaa awie mɔ. (Mat. 5:16) Wɔ ewiade ɛhye mɔɔ wɔ sunsum nu awozinli kabii nu la anu, ɔwɔ kɛ yɛka kɛnlaneɛ ɛhye anwo edwɛkɛ yɛkile awie mɔ ɛnɛ yɛtɛla mekɛ biala! Kɛzi yɛbahola yɛamaa yɛ kɛnlaneɛ ne ada kɛ Kelaese ɛdeɛ ne la ɛ?
2. Kɛzi Gyisɛse hilele kɛ nvasoɛ wɔ sunsum nu kɛnlaneɛ ne mɔɔ yɛka nwolɛ edwɛkɛ yɛkile menli la azo ɛ?
2 Ɔlua Daselɛlilɛ Zo: Gyisɛse vale ye mekɛ, ye anwosesebɛ nee debie biala mɔɔ ɔlɛ la ɔlile gyima ɔmanle menli nwunle nɔhalɛ ne anwo wienyi ne wɔ bɛ azua nu, gua zo, awoka zo yɛɛ ɛleka biala mɔɔ ɔbanwu menli la. Ɛnee ɔze kɛ menli nyia nɔhalɛ sunsum nu ndelebɛbo a bɛbanyia zolɛ nvasoɛ dahuu. (Dwɔn 12:46) Amaa menli dɔɔnwo ade edwɛkɛ ne la, Gyisɛse zieziele ye ɛdoavolɛ ne mɔ ɔmanle bɛyɛle “ewiade ye kɛnlaneɛ.” (Mat. 5:14) Bɛdua kpalɛ mɔɔ bɛyɛ nee nɔhalɛ ne mɔɔ bɛka nwolɛ edwɛkɛ bɛkile awie mɔ la azo bɛmaa bɛ kɛnlaneɛ ne ta.
3. Kɛzi yɛbahola yɛahile anyezɔlɛ kpalɛ wɔ nɔhalɛ wienyi ne mɔɔ yɛnwu ye la anwo ɛ?
3 Nyamenle menli maa edwɛkɛ ne mɔɔ se “ɔwɔ kɛ bɛbɔ bɛ ɛbɛla kɛ menli mɔɔ wɔ wienyi nu la” kyia bɛ kpalɛ, na bɛka edwɛkɛ ne wɔ ɛleka biala mɔɔ bɛkɛnyia menli la. (Ɛfɛ. 5:8) Baebolo ne nee Asafo mbuluku mɔɔ bɛkenga ye wɔ ɛleka mɔɔ menli wɔ ɛkɛ wɔ mekɛ mɔɔ awie ɛlɛdie ye ɛnwomenle wɔ gyima anzɛɛ sukulu nu la kola buke nwolɛ adenle maa bɛka Ngɛlɛlera ne anu edwɛkɛ. Adiema kakula raalɛ ko luale adenle ɛhye azo bɔle Baebolo ɛzukoalɛ bo na ɔmanle ɔ gɔnwo mɔ mɔɔ ɔ nee bɛ kɔ sukulu la mbuluku 12!
4. Duzu ati a subane kpalɛ boka yɛ kɛnlaneɛ ne mɔɔ yɛmaa yeada la anwo ɛ?
4 Ɔlua Subane Kpalɛ Zo: Yɛ alehyenlɛ biala ɛbɛlabɔlɛ boka yɛ kɛnlaneɛ ne mɔɔ yɛmaa yeada la anwo. (Ɛfɛ. 5:9) Wɔ gyima nu, sukulu nu, yɛɛ gua zo, menli nwu Keleseɛnema ɛbɛlabɔlɛ kpalɛ ne na ɛhye maa bɛnyia nwolɛ adenle bɛka Baebolo ne anu nɔhalɛ ne anwo edwɛkɛ bɛkile bɛ. (1 Pita 2:12) Kɛ neazo la, kakula nrenya ko mɔɔ ɛli ɛvolɛ nnu la neazo kpalɛ ne hanle ye kilehilevolɛ ne manle ɔvɛlɛle ye awovolɛ. Ɔhanle ɔhilele bɛ kɛ: “Metɛnwunle kakula mɔɔ lɛ subane kpalɛ zɛhae la ɛlɛ!” Ɛhɛe, yɛ ɛzonlenlɛ gyima ne nee yɛ subane kpalɛ twe menli ba “ngoane nu wienyi ne” anwo na ɔmaa bɛye Nyamenle ayɛlɛ.