Yɛ Daselɛlilɛ Gyima Ne Hyia Abotane
1. Kɛzi Gyihova ɛla ye ali kɛ ɔlɛ alesama anwo abotane ɛ?
1 Nyamenle lɛ alesama anwo abotane kpalɛ. (Ade. 34:6; Edw. 106:41-45; 2 Pita 3:9) Adenle titile mɔɔ ɔdua zo ɔfi ɛlɔlɛ nu ɔfa abotane ɔdi gyima la a le ewiade amuala Belemgbunlililɛ nolobɔlɛ gyima ne. Gyihova ɛnyia alesama anwo abotane kɛyɛ ɛvolɛ 2,000 ɛne, noko ɔlɛkɔ zo yeahwe menli mɔɔ lɛ ahonle kpalɛ la yeabikye ye. (Dwɔn 6:44) Kɛ ɔkɛyɛ na yɛ daselɛlilɛ ne ala Gyihova abotane ne ali ɛ?
2. Kɛzi yɛbahola yɛala abotane ali wɔ mekɛ mɔɔ yɛlɛyɛ yɛ azɛlɛsinli ne anu gyima la ɛ?
2 Azua Nu Daselɛlilɛ: Saa yɛkɔ daselɛlilɛ “dahuu” wɔ azɛlɛsinli mɔɔ menli anye ɛnlie edwɛkɛ ne anwo bɔbɔ la anu a yɛfa yɛsukoa Gyihova abotane ne. (Gyi. 5:42) Yɛfa abotane yɛgyinla anyetele, agolobɛnwo, nee dwazotia mɔɔ yɛyia ye wɔ daselɛlilɛ gyima ne anu la anloa. (Mak. 13:12, 13) Eza yɛda abotane ali ɔlua mɔdenle mɔɔ yɛbɔ kɛ yɛbagugua nɔhalɛ ma ne azo nzule wɔ mekɛ bɔbɔ mɔɔ ɔyɛ se kɛ yɛbado anyelielɛma wɔ sua nu la.
3. Duzu ati a ɔwɔ kɛ yɛsi abotane wɔ mekɛ mɔɔ yɛlɛyɛ sia kɔkpɔla yɛɛ Baebolo ɛzukoalɛ la ɛ?
3 Baebolo Ɛzukoalɛ: Baka ɛlualɛ hyia abotane. Yɛbahola yɛabɔ nwolɛ bane, noko yɛnrɛhola yɛnrɛmaa ɔnrɛnyi ɛkɛ ne ala. (Gye. 5:7) Zɔhane ala a sunsum nu ɛnyinlɛ kɔ zo ngyikyi ngyikyi wɔ ye mekɛ nu a. (Mak. 4:28) Bie a ɔbayɛ se yeamaa menli mɔɔ yɛ nee bɛ sukoa debie la kɛ bɛbakpo adalɛ ɛzonlenlɛ nu diedi anzɛɛ amaamuo mɔɔ ɛngyi ngɛlɛlera ne azo la. Ɔnle kɛ yɛbɔ mɔdenle kɛ yɛpiepia yɛ sukoavoma yɛamaa bɛayɛ nzenzaleɛ na bɛanyi ndɛndɛ. Ɔwɔ kɛ yɛsi abotane na yɛmaa sukoavo ne mekɛ dɔɔnwo amaa Nyamenle sunsum ne ayɛ gyima wɔ ye ahonle nu.—1 Kɔl. 3:6, 7.
4. Kɛzi abotane baboa yɛ yeamaa yɛali yɛ mbusua mɔɔ bɛnle mediema la daselɛ kpalɛ ɛ?
4 Yɛ Mbusua Mɔɔ Bɛnle Mediema: Ɔwɔ nuhua kɛ yɛkulo kɛ yɛ abusua ne anu amra mɔɔ bɛnle mediema la sukoa nɔhalɛ ne ɛdeɛ, noko yɛsi abotane yɛkendɛ mekɛ kpalɛ mɔɔ yɛbahola yɛaha yɛ diedi ne anwo edwɛkɛ yɛahile bɛ la, na yɛnea boɛ kɛ yɛnrɛva edwɛkɛ dɔɔnwo yɛnrɛgyegye bɛ. (Nolo. 3:1, 7) Mekɛ mɔɔ yɛlɛyɛ zɔ la, ɔwɔ kɛ yɛyɛ neazo kpalɛ na yɛsiezie yɛ nwo dahuu kɛ yɛbava bɛtɛɛyɛlɛ nee ɛbulɛ yɛaha yɛ diedi ne anwo edwɛkɛ. (1 Pita 3:1, 15) Saa yɛfa abotane yɛyɛ yɛ daselɛlilɛ gyima ne a ɔbamaa yɛaboa menli dɔɔnwo na yɛ anwuma Selɛ ne anye balie nwolɛ.