Mgbavolɛ, Bɛ Nye Ɛbolo Ɔ?
1. Mekɛ boni a ɔwɔ kɛ kpavolɛ bɔ ɔ bo di adehilelɛ ne mɔɔ wɔ 1 Temɔte 3:1 la azo a?
1 ‘Saa awie anye bolo kɛ ɔyɛ kpanyinli a, ɛnee yeva gyima kpalɛ.’ (1 Tem. 3:1) Zɔhane edwɛkɛ ne mɔɔ vi sunsum nu la maa mediema mrenya anwosesebɛ kɛ bɛmaa bɛ nye ɛbolo na bɛfɛta bɛmaa ɛzonlenlɛ nwo adenle wɔ asafo ne anu. Ɔwɔ kɛ ɛnyi na wɔayɛ zɔ ɔ? Nɔhalɛ nu, ɔwɔ kɛ ɛbɔ ɔ bo ɛmaa ɛ nye bolo wɔ mekɛ mɔɔ ɛle kpavolɛ la. Wɔ adenle ɛhye azo ɛbahola wɔanyia ndetelɛ na wɔala ye ali kɛ wɔnyi na bɛkpa wɔ kɛ sonvolɛ a ɛbahola wɔazonle. (1 Tem. 3:10) Saa ɛle kpavolɛ mɔɔ bɛzɔne wɔ a, kɛ ɔkɛyɛ na wɔahile kɛ ɛ nye ɛbolo ɛ?
2. Kɛ ɔkɛyɛ na wɔanyia anwofamaa sunsum na wɔala ye ali ɛ?
2 Anwofamaa: Kakye kɛ ɛlɛmaa ɛ nye abolo gyima kpalɛ, na tɛ amodinli bie. Ɛhye ati, nyia ɛhulolɛ kɛ ɛbaboa ɛ mediema mrenya nee mraalɛ. Adenle ko mɔɔ ɛbahola wɔalua zo wɔayɛ ɛhye la a le kɛ ɛbadwenledwenle Gyisɛse neazo kɛnlɛma ne anwo. (Mat. 20:28; Dwɔn 4:6, 7; 13:4, 5) Sɛlɛ Gyihova kɛ ɔboa wɔ ɔmaa ɛdwenle awie mɔ anwo. (1 Kɔl. 10:24) Asoo ɛbahola wɔalua adenle kpalɛ zo wɔaboa asafo ne anu amra mɔɔ bɛyɛ mgbanyinli anzɛɛ bɛnlɛ anwosesebɛ la? Asoo ɛtu ɛ nwo ɛmaa ɛdɔ ndile, ɛsiezie ɛleka mɔɔ nolobɔlɛma gyɛne ɛngola ɛkɛ kɔ la, anzɛɛ ɛboa ɛmaa bɛsiezie Belemgbunlililɛ Asalo ne ɛleka ngakyile? Asoo ɛbahola wɔadu ɛ nwo wɔamaa wɔayɛ Teokelase Ɛzonlenlɛ Sukulu ne anu gyimalilɛ bie mɔɔ ɔ menle amba la? Ɛbanwu kɛ ɛtu ɛ nwo ɛmaa ɛyɛ gyima ɛboa awie mɔ a ɛ nye balie.—Gyi. 20:35.
3. Kɛzi sunsum nu gyinlabelɛ hyia ɛ, na adenle boni a bɛdua zo bɛnyia a?
3 Sunsum nu gyinlabelɛ: Ɔhyia kpalɛ kɛ asafo ne anu sonvolɛ nyia sunsum nu gyinlabelɛ tɛla kɛ ɔbanyia ahyɛlɛdeɛ anzɛɛ mɔdenlebɔlɛ titile bie. Sunsum nu sonla bɔ mɔdenle bu ninyɛne kɛmɔ Gyihova nee Gyisɛse bu bɛ la. (1 Kɔl. 2:15, 16) Ɔda “sunsum ne ma” ne ali. (Gal. 5:22, 23) Ɔ nye bolo daselɛlilɛ nwo na ɔfa Belemgbunlililɛ ne ɔdumua. (Mat. 6:33) Ɛta ɛsukoa debie a, ɛbanyia sunsum nu gyinlabelɛ kpalɛ. Ɛhye bie a le kɛ ɛbagenga Baebolo ne dahuu, wɔagenga Ɛzinzalɛ Arane nee Awake! biala mɔɔ bara la, na akee wɔaziezie ɛ nwo wɔahɔ debiezukoalɛ. (Edw. 1:1, 2; Hib. 10:24, 25) Mekɛ mɔɔ Pɔɔlo ɛlɛmaa Temɔte anwosesebɛ kɛ ɔnyia sunsum nu anyuhɔlɛ la, ɔhɛlɛle kɛ: ‘Nea wɔ ngilehilelɛ ne boɛ.’ (1 Tem. 4:15, 16) Yemɔti bɔ mɔdenle yɛ Teokelase Ɛzonlenlɛ Sukulu gyimalilɛ mɔɔ bɛkɛva bɛkɛmaa wɔ la kpalɛ. Siezie ɛ nwo maa daselɛlilɛ, na kɔ bie dahuu. Fa sunsum nu bodane mɔɔ le kɛ adekpakyelɛ gyima, Bɛtɛle ɛzonlenlɛ, anzɛɛ Mediema Mrenya Mɔɔ Bɛtɛgyale Baebolo Sukulu sie ɛ nye zo na bɔ mɔdenle di nwolɛ gyima. Sunsum nu gyinlabelɛ baboa wɔ yeamaa wɔakpo “wɔ mgbavolɛ nu atiakunluwɔzo ne mɔ.”—2 Tem. 2:22.
4. Nvasoɛ boni a wɔ anwodozo nee nɔhalɛlilɛ zo a?
4 Anwodozo Nee Nɔhalɛlilɛ: Kɛmɔ mediema mɔɔ bɛyele bɛ kɛ bɛnlea bɛhyehyɛ aleɛ bɛmaa Keleseɛnema mɔɔ bɛhyia wɔ ɛvoya ne mɔɔ lumua la anu le mɔɔ “menli bu bɛ,” bɛdi nɔhalɛ na bɛlɛ bɛ nu anwodozo la ati, ɛzoanvolɛ ne mɔ andwenle nwo kɛ saa bɛkɛyɛ gyima ne a. Ɛhye manle bɛdwenlenle ninyɛne gyɛne mɔɔ hyia la anwo. (Gyi. 6:1-4) Yemɔti, saa bɛmaa wɔ gyimalilɛ bie wɔ asafo ne anu a yele ɛ nwo yɛ ye kpalɛ. Sukoa Nowa mɔɔ lile ɛlɛne ne anwo adehilelɛ ne azo pɛpɛɛpɛ na ɔbobɔle la. (Mɔl. 6:22) Gyihova anye die nɔhalɛlilɛ nwo na ɔkile kɛ awie ɛnyi wɔ sunsum nu.—1 Kɔl. 4:2; nea ɛlɛka, “Nvasoɛ Wɔ Ndetelɛ Zo.”
5. Kɛmɔti a ɔwɔ kɛ mgbavolɛ maa bɛ nye bolo ɛ?
5 Kɛmɔ ngapezo ne kile la, Gyihova ɛlɛboɔboa ninyɛne nloa ndɛndɛ. (Aye. 60:22) Ɛvolɛ biala bɛkyehyɛ nu a, bɛsɔne menli mgbe ko ngyɛnu 4. Kɛmɔ menli dɔɔnwo ɛlɛba nɔhalɛ ne anu la ati, bɛhyia mrenya mɔɔ fɛta mɔɔ bayɛ gyima ngakyile wɔ asafo ne anu la anwo. Kɛkala, yɛhyia menli mɔɔ bayɛ gyima dɔɔnwo wɔ Gyihova sua nu la yɛtɛla mekɛ biala. (1 Kɔl. 15:58) Mgbavolɛ, bɛ nye ɛbolo ɔ? Saa ye ɔle zɔ a, ɛnee bɛva gyima kpalɛ amgba!
[Edwɛkɛ mɔɔ bɛkpa wɔ mukelɛ 2]
Kɛmɔ menli dɔɔnwo ɛlɛba nɔhalɛ ne anu la ati, bɛhyia mrenya mɔɔ fɛta mɔɔ bayɛ gyima ngakyile wɔ asafo ne anu la anwo
[Ɛlɛka wɔ mukelɛ 3]
Nvasoɛ Wɔ Ndetelɛ Zo
Saa mgbanyima maa mgbavolɛ mɔɔ fɛta la gyima na bɛtete bɛ a ɔboa bɛ. Mekɛ bie, ɛnee maanzinli zo neavolɛ de bama ne anyunlu na ɔlɛmaa nolobɔlɛnli bie anwosesebɛ wɔ mekɛ mɔɔ bɛkpɔne debiezukoalɛ la. Ɔnwunle kɛ kakula nrenya bie gyi ɛleka mɔɔ bikye bɛ la, yemɔti ɔbizale ye kɛ saa ɔkulo kɛ ɔ nee ye tendɛ a. Kakula nrenya ne hanle kɛ bɛye ye kɛ bɛkpɔne debiezukoalɛ biala a ɔkpoa bama ne azo. Ɛnee ye awovolɛ kulo kɛ bɛkɔ, noko ɛnee ɔkulo kɛ ɔyɛ ye gyima ne kolaa na yeahɔ. Maanzinli zo neavolɛ ne vale anyelielɛ vile ɛkɛ ne. Ɔhanle kɛ: “Mgbanyima mɔɔ wɔ zɔhane asafo ne anu la ta tete mgbavolɛ ɔlua gyima mɔɔ bɛmaa bɛyɛ wɔ asafo ne anu la azo. Ɔlua ɛhye ati, ɔnyɛ nwanwane kɛ mebasonle bɛ a bɛkanvo kpavolɛ kɛ sonvolɛ la.”