Nwane Mɔ A Ɛlɛyɛ Gyihova Ɛhulolɛdeɛ Ɛnɛ A?
1. Mekɛ boni a yɛbabɔ ɔ bo yɛazukoa Nwane Mɔ A Ɛlɛyɛ Gyihova Ɛhulolɛdeɛ Ɛnɛ A? na kɛzi ɔbaboa yɛ ɛ?
1 Dapɛne ne mɔɔ bɔ ɔ bo October 28 la anu, yɛbazukoa Nwane Mɔ A Ɛlɛyɛ Gyihova Ɛhulolɛdeɛ Ɛnɛ A? wɔ Asafo Baebolo Ɛzukoalɛ bo. Bɛyɛ brohyua fofolɛ ɛhye mɔɔ bɛyele ye wɔ “Bɔ Wɔ Ahonle Nwo Bane!” Maangyeba Nyianu ne abo la kɛ bɛfa bɛahile sukoavoma adenle bɛara ahyehyɛdeɛ ne anu. Buluku ɛhye mɔɔ yɛbazukoa la ɛnrɛmaa yɛ nye ɛnrɛlie kɛ yɛboka Gyihova ahyehyɛdeɛ ne anwo ala, na eza ɔbaboa yɛ yeamaa yɛade buluku ɛhye mɔɔ hyia la abo kpalɛ na yɛava yɛali gyima wɔ daselɛlilɛ nu.—Edw. 48:13.
2. Kɛzi yɛbazukoa brohyua ne wɔ asafo ne anu ɛ?
2 Kɛzi Yɛbazukoa Ye La: Ɔwɔ kɛ neavolɛ ne kyɛ ye mekɛ ne amaa ɛzukoalɛdeɛ ko biala mekɛ ne ayɛ mɔɔ fɛta. Saa ɔlɛbuke ɛzukoalɛdeɛ 28 ne ko biala anye a ɔbagenga kpuyia ne mɔɔ bɛva bɛyɛ edwɛkɛtile ne la. Akee ɔbamaa kengavolɛ ne agenga mukenye ɛdendɛkpunli ne. Neavolɛ ne akee babiza tievolɛma kpuyia mɔɔ yeziezie wɔ mukenye ne anwo la. Yemɔ anzi, ɔwɔ kɛ bɛkenga foa biala mɔɔ ɛdendɛmunli mɔɔ bɛyɛ ye bile a bɔ ɔ bo la na bɛsuzu ɔ ngomekye anwo. Saa bɛkenga foa ne bɛwie a, neavolɛ ne babiza kɛzi ɛdendɛkpunli ne bua kpuyia ne mɔɔ le ɛzukoalɛdeɛ edwɛkɛtile ne la. Nvoninli dɔɔnwo noko wɔ brohyua ɛhye anu mɔɔ bɛbahola bɛaha nwolɛ edwɛkɛ a. Saa mekɛ wɔ nu a ɔwɔ kɛ bɛkenga ngɛlɛlera titile ne mɔ. Kolaa na neavolɛ ne ahɔ ɛzukoalɛdeɛ fofolɛ zo la, ɔbabiza ndinu kpuyia ne mɔ mɔɔ wɔ mukelɛ ne abo la. Saa “Kpondɛ Dɔɔnwo” ɛlɛka wɔ ɛkɛ a, ɔbamaa bɛagenga na akee yeabiza tievolɛma yeamaa bɛahile kɛzi Baebolo sukoavo bie fa nzuzulɛ mɔɔ wɔ ɛkɛ ne la di gyima a ɔbaboa ye la. Saa bɛsukoa bɛwie na mekɛ wɔ nu a, neavolɛ ne bahola abiza ɛzukoalɛdeɛ edwɛkɛtile ne mɔ yeava yeayɛ ndinu. Kakye kɛ tɛ ɛhye a le adenle mɔɔ bɛbalua zo bɛayɛ sua nu Baebolo ɛzukoalɛ a.
3. Kɛzi yɛsukoa brohyua ɛhye a ɔbaboa yɛ kpalɛ ɛ?
3 Amaa yeaboa wɔ kpalɛ la, siezie ɛ nwo kpalɛ na wɔara debiezukoalɛ. Bɔ mɔdenle maa mualɛ ne bie. Bɛlɛsukoa a, dwenle kɛzi edwɛkɛ ne baboa Baebolo sukoavoma la anwo. Ɔrɛla ye kɛ brohyua fofolɛ ɛhye mɔɔ yɛbazukoa la bamaa yɛahola yɛaboa awie mɔ na bɛaraboka yɛ nwo yɛayɛ Gyihova ɛhulolɛdeɛ amaa bɛdabɛ noko bɛanyia anyelazo kɛ bɛbadɛnla aze dahuu.—1 Dwɔn 2:17.