“Bɛdabɛ Mɔɔ Bɛkpondɛ Gyihova La Ɛnrɛhyia Debie Kpalɛ Biala Anwo”

1. Tɛnlabelɛ mɔɔ anu yɛ se la boni a Devidi hɔle nu a?

ƐNEE Devidi ngoane la esiane nu. Ɛnee Sɔɔlo, Yizilayɛ belemgbunli mɔɔ ɔlɛ tumi kpole la kulo kɛ ɔku ye. Mekɛ mɔɔ ɛnee Devidi hyia aleɛ la, ɔhɔle suakpole Nɔɔbo azo ɔhɔzɛlɛle kɛ bɛmaa ye paano nnu. (1 Sa. 21: 1, 3) Nzinlii, Devidi nee mrenyia mɔɔ ɔ nee bɛ lua la hɔveale bolɛ bɔne bie anu. (1 Sa. 22:1) Duzu a maanle Devidi hɔle tɛnlabelɛ ɛhye anu a?

2. Kɛzi Sɔɔlo vale ɔ nwo dole esiane nu ɛ? (1 Samoɛle 23:16, 17)

² Kɛmɔ ɛnee Devidi ɛlie duma na yeli konim wɔ konle dɔɔnwo anu la ati, Sɔɔlo anye bolole ye kpole kpalɛ. Eza ɛnee Sɔɔlo ze kɛ ye anzosesebɛ ti Gyihova ɛkpo ye kɛ Yizilayɛ belemgbunli na yekpa Devidi kɛ ɔli ebia ne. (Kenga 1 Samoɛle 23:16, 17.) Kɛmɔ ɛnee Sɔɔlo tɛde Yizilayɛ belemgbunli la ati, ɛnee ɔlɛ sogyama nee menli dɔɔnwo mɔɔ bɛli ɔ nzi a, ɔti ɛnee ɔwɔ kɛ Devidi nriandi amaa bɛangu ye. Asoo ɛnee Sɔɔlo lɛ adwenle kɛ ɔbahola yeazi Nyamenle adenle amaa yeanva Devidi yeanzie belemgbunli ɔ? (Aye. 55:11) Baebolo ne anga, noko yɛze deɛ ko ɛhye: Ɛnee Sɔɔlo ɛlɛfa ɔ nwo ado esiane nu. Bɛdabɛ mɔɔ bɛko bɛtia Nyamenle la asa si aze dahuu!

3. Ɔnva nwo tɛnlabelɛ ngakyile mɔɔ Devidi hɔle nu la, kɛzi ɔdele nganeɛ?

³ Ɛnee Devidi anye ɛmbolo debie. Tɛ ɔdaye a ɔkpale kɛ ɔkulo kɛ ɔyɛ Yizilayɛ belemgbunli a. Gyihova a kpale ye a. (1 Sa. 16:1, 12, 13) Sɔɔlo kpɔle Devidi kpole kpalɛ. Noko Devidi ambɔ Gyihova somolɛ wɔ ngyegyelɛ mɔɔ ɔwɔ nu la anwo; anzɛɛ yeandendɛ ɔ nzo abo wɔ aleɛ ekyi mɔɔ ɔnyianle nee bolɛ bɔne nu mɔɔ ɔhɔveale la anwo. Emomu, ɔbayɛ kɛ mɔɔ ɛnee ɔvea bolɛ bɔne ne anu la a ɔhyehyɛle ayɛlɛyelɛ edwɛne kɛnlɛma ɛhye mɔɔ yɛ edwɛkɛtile tɛkese ne boka nwo la a: “Bɛdabɛ mɔɔ bɛkpondɛ Gyihova la ɛnrɛhyia debie kpalɛ biala anwo.”​—Edw. 34:10.

4. Kpuya boni mɔ a yɛbazuzu nwo a, na duzu ati a nwolɛ hyia a?

⁴ Ɛnɛ, Gyihova azonvolɛ dɔɔnwo ɛnnyia aleɛ mɔɔ sa bɛ yɛɛ ninyɛne gyɛne mɔ bɛhyia nwo wɔ ɛbɛlabɔlɛ nu la.b Ewulenzane ne mɔɔ ɛra kenlensa ye la a akee bɔbɔ ɛzɛkye edwɛkɛ ne a. Na mekɛ mɔ yɛlɛbikye “anwongyelelɛ kpole” ne la, bɔ zo mɔɔ ninyɛne nu bayɛ se kpalɛ bɔbɔ a. (Mat. 24:21) Mɔɔ nɔhalɛ edwɛkɛ ɛhye mɔ wɔ yɛ adwenle nu la, bɛmaa yɛkpondɛ kpuya nna ɛhye mɔ anwo mualɛ: Adenle boni azo a Devidi ‘angyia debie kpalɛ biala anwo a’? Duzu ati a ɔwɔ kɛ yɛsukoa kɛ yɛbamaa yɛ kunlu adwo yɛ nwo a? Duzu ati a yɛbahola yɛanyia anwodozo kɛ Gyihova banlea yɛ a? Na kɛ ɔkɛyɛ na yɛaziezie yɛ nwo kɛkala yɛamaa kenle bie ɛ?

“MENRƐHYIA ƐHWEE”

5-6. Kɛzi Edwɛne 23:1-6 boa yɛ maa yɛte deɛmɔti Devidi hanle kɛ Nyamenle azonvolɛ “ɛnrɛhyia debie kpalɛ biala anwo” la abo ɛ?

⁵ Mɔɔ Devidi hanle kɛ Gyihova azonvolɛ “ɛnrɛhyia debie kpalɛ biala anwo” la, duzu a ɛnee ɔlɛkile a? Saa yɛsuzu edwɛkɛ ko ne ala bie mɔɔ ɔhɛlɛle ye wɔ Edwɛne 23 la anwo a, ɔbamaa yɛanwu mɔɔ ɛnee ɔlɛkile la. (Kenga Edwɛne 23:1-6.) Devidi bɔle Edwɛne 23 ne abo kɛ: “Gyihova le me Neavolɛ. Menrɛhyia ɛhwee.” Wɔ edwɛne ne mɔɔ ɛha la anu, Devidi diedianle ninyɛne mɔɔ amgba nwolɛ hyia kpalɛ la, bie a le sunsum nu nyilalɛ dɔɔnwo mɔɔ ɔnyianle ɔluakɛ ɔliele Gyihova ɔdole nu kɛ ye Neavolɛ la ati. Gyihova fa ye dua “tenleneyɛlɛ ndenle nu” na ɔdi nɔhalɛ ɔboa Devidi wɔ mekɛ kpalɛ nee mekɛ ɛtane nu. Devidi liele dole nu kɛ ɔwɔ Gyihova “adidileka mɔɔ ndile amolɛ wɔ ɛkɛ la” ɛdeɛ, noko ɔbayia ngyegyelɛ. Ɔdwu mekɛ ne bie a, ɔ sa nu bado kɛ asɛɛ ɔlua “awozinli kabii bɔnza nu” la yɛɛ ɔbanyia agbɔvolɛ. Noko kɛmɔ Gyihova le Devidi Neavolɛ la ati, ‘ɔnrɛzulo munzule biala.’

⁶ Ɛhye a le yɛ kpuya: Adenle boni azo a Devidi ‘angyia debie kpalɛ biala anwo a’? la anwo mualɛ a. Yeangyia sunsum nu debie biala anwo. Ɛnee ye anyelielɛ ne ɛngyi nwonane afoa nu ninyɛne zo. Devidi maanle ɔ kunlu dwole mɔɔ Gyihova vale maanle ye la anwo. Mɔɔ ɛnee hyia ye kpalɛ la a le kɛ ye Nyamenle ne yilale ye na ɔbɔle ɔ nwo bane la.

7. Kɛ mɔɔ Luku 21:20-24 kile la, ngyegyelɛ boni a alimoa Kilisienema mɔɔ ɛnee wɔ Dwudiya la yiale a?

⁷ Devidi edwɛkɛ ne maa yɛnwu kɛ ɔhyia kɛ yɛnyia nwonane afoa nu ninyɛne nwo adwenle mɔɔ fɛta. Yɛbahola yɛava nwonane afoa nu ninyɛne biala mɔɔ yɛlɛ la yɛali gyima noko ɔnle kɛ yɛmaa yemɔ kyia yɛ somaa. Ɛhye le nɔhalɛ edwɛkɛ mɔɔ alimoa Kilisienema mɔɔ ɛnee de Dwudiya la radele ɔ bo a. (Kenga Luku 21:20-24.) Ɛnee Gyisɛse ɛbɔ bɛ kɔkɔ kɛ mekɛ bie bara mɔɔ bɛbanwu kɛ “sogyama ɛbɔ Gyɛlusalɛm ɛyia a.” Saa ɔba ye zɔ a, ɔwɔ kɛ bɛbɔ ɔ bo ‘bɛnriandi bɛkɔ awoka ne mɔ azo’ lɔ. Saa bɛnriandi bɛkɔ a, bɛbanyia ngoane noko bɛ ninyɛne dɔɔnwo bɛavi bɛ sa. Ɛzinzalɛ Arane ne hanle ye mekɛ bie kɛ: “Bɛgyakyile bɛ azɛlɛ nee bɛ azua ɛkɛ bɛhɔle na bɛangola bɛansesa ninyɛne mɔɔ wɔ bɛ azua nu bɔbɔ la. Anwodozo mɔɔ ɛnee bɛlɛ kɛ Gyihova babɔ bɛ nwo bane na yeaboa bɛ la maanle bɛvale ye ɛzonlenlɛ bɛlimoale debie biala mɔɔ ɛnee ɔzɔho kɛ nwolɛ hyia kpalɛ la anyunlu.”

8. Ɛzukoalɛdeɛ mɔɔ ɔhyia la boni a yɛbahola yɛazukoa yɛavi mɔɔ dole alimoa Kilisienema mɔɔ ɛnee de Dwudiya la edwɛkɛ ne anu a?

⁸ Ɛzukoalɛdeɛ mɔɔ hyia la boni a yɛbahola yɛazukoa yɛavi mɔɔ dole alimoa Kilisienema mɔɔ ɛnee de Dwudiya la anu a? Ɛzinzalɛ Arane ne mɔɔ yɛlimoa yɛha nwolɛ edwɛkɛ la hanle kɛ: “Bie a kenle bie yɛbayia kɛzi yɛbu nwonane afoa nu ninyɛne la anwo sɔnea; asoo yemɔ a hyia yɛ kpalɛ a, anzɛɛ ngoane mɔɔ bɛdabɛ mɔɔ bɛdi nɔhalɛ bɛmaa Nyamenle la banyia la a hyia yɛ kpalɛ a? Nɔhalɛ nu saa awieleɛ ne ba a, bie a yɛbayia ngyegyelɛ yɛɛ ninyɛne bie mɔ noko bavi yɛ sa. Ɔwɔ kɛ yɛsiezie yɛ nwo kɛ yɛbayɛ biala mɔɔ ɔwɔ kɛ yɛyɛ la, kɛ mɔɔ yɛ mediema Kilisienema mɔɔ nriandile vile Dwudiya wɔ ɛvoya mɔ limoa la anu la yɛle la.”c

9. Kɛzi folɛ mɔɔ ɛzoanvolɛ Pɔɔlo dule Hibuluma la maa wɔ anwosesebɛ ɛ?

⁹ Ɛbahola wɔapɛ kɛzi ɛnee ɔyɛ se ɔmaa zɔhane Kilisienema ne kɛ bɛbagyakyi asɛɛ debie biala mɔɔ bɛlɛ la bɛ nzi na bɛabɔ ɛbɛlabɔlɛ bo fofolɛ la anwo nvoninli ɔ? Ɛnee bɛhyia diedi amaa bɛahola bɛava bɛ nwo bɛado Gyihova anwo zo kɛ ɔbamaa bɛ sa aha mɔɔ bɛhyia nwo la. Noko ɛnee bɛlɛ debie mɔɔ ɔbaboa bɛ a. Mɔɔ ɔka ɛvolɛ nnu na Wulomuma abɔ Gyɛlusalɛm ayia la, ɛzoanvolɛ Pɔɔlo dule Hibuluma folɛ bie mɔɔ anwo hyia la kɛ: “Bɛmmamaa ezukoa nwo anyebolo ba bɛ ɛbɛlabɔlɛ nu, na bɛmaa bɛ kunlu ɛdwo mɔɔ bɛlɛ ye la anwo. Ɔluakɛ yeha kɛ: ‘Menrɛgyakyi wɔ ɛlɛ, yɛɛ menrɛkpo wɔ ɛlɛ.’ Amaa yɛanyia akɛnrasesebɛ kpole na yɛaha kɛ: ‘Gyihova le me boavolɛ; menrɛzulo. Duzu a sonla kɛhola kɛyɛ me a?’” (Hib. 13:5, 6) Nɔhalɛ nu, bɛdabɛ mɔɔ bɛvale Pɔɔlo folɛdulɛ ne bɛlile gyima kolaa na Wulomuma arateta Gyɛlusalɛm la akunlu dwole ninyɛne ekyi mɔɔ ɛnee bɛlɛ wɔ ɛleka fofolɛ mɔɔ bɛhɔle la anwo. Ɛnee bɛlɛ anwodozo kɛ Gyihova bamaa bɛ sa aha mɔɔ bɛhyia nwo la. Pɔɔlo edwɛkɛ ne maa yɛdayɛ noko anwosesebɛ kɛ yɛnyia anwodozo kɛ Gyihova bava mɔɔ yɛhyia nwo la amaa yɛ.

“YƐBAMAA YƐ KUNLU ADWO ƐHYE MƆ ANWO”

10. “Debie mɔɔ menli ekyi bie ala a ze” ye la boni a Pɔɔlo hanle nwolɛ edwɛkɛ hilele yɛ a?

¹⁰ Pɔɔlo dule Timote folɛ ko ne ala bie na ɔfale yɛdayɛ noko yɛ nwo. Ɔhɛlɛle kɛ: “Ɔti saa yɛlɛ aleɛ nee adɛladeɛ a, yɛbamaa yɛ kunlu adwo ɛhye mɔ anwo.” (1 Tim. 6:8) Asoo ɛhye kile kɛ ɔnle kɛ yɛdi aleɛ kpalɛ, yɛda sua kɛnlɛma nu anzɛɛ ɔyɛ a ɔnle kɛ yɛtotɔ adɛladeɛ fofolɛ ɔ? Tɛ mɔɔ Pɔɔlo ɛlɛkile la ɛne. Mɔɔ Pɔɔlo ɛlɛka la a le kɛ ɔwɔ kɛ yɛmaa yɛ kunlu dwo nwonane afoa nu debie biala mɔɔ yɛlɛ la anwo. (Fel. 4:12) Ɛnee ɛhye le debie mɔɔ Pɔɔlo nee “menli ekyi bie ala a ze” ye a. Debie mɔɔ sonle bolɛ kpalɛ ɔmaa yɛ la a le yɛ nee yɛ Nyamenle ne agɔnwolɛvalɛ ne, na tɛ nwonane afoa nu ninyɛne mɔɔ yɛlɛ la ɔ.​—Hab. 3:17, 18.

11. Kɛzi edwɛkɛ mɔɔ Mosisi hanle hilele Yizilayɛma la maa yɛsukoa kɛ ɔwɔ kɛ yɛmaa yɛ kunlu dwo yɛ nwo ɛ?

¹¹ Bie a yɛsuzu kɛ yɛhyia ninyɛne bie mɔ anwo, noko tɛ zɔhane a Gyihova nwu ye a. Suzu edwɛkɛ ɛhye mɔɔ Mosisi hanle hilele Yizilayɛma wɔ mekɛ mɔɔ ɛnee bɛli ɛvolɛ 40 wɔ fienemgbole ne anu la anwo: “Gyihova bɛ Nyamenle ne ɛyila bɛ wɔ debie biala mɔɔ bɛyɛ la anu. Ɔze ye bɔbɔ kɛ bɛlua fienemgbole kpole ɛhye anu. Ɛvolɛ 40 ɛhye anu, Gyihova bɛ Nyamenle ne nee bɛ lua yɛɛ bɛtɛkyianle ɛhwee.” (Dit. 2:7) Wɔ zɔhane ɛvolɛ 40 ne amuala anu, Gyihova maanle Yizilayɛma mana ɔmaanle bɛlile. Bɛ adɛladeɛ mɔɔ bɛ nee ye vi Yigyibiti la antete ɛlɛ. (Dit. 8:3, 4) Wɔannea a bie mɔ babu ninyɛne ɛhye mɔ kɛ yeanzo ɛdeɛ, noko Mosisi hakyele Yizilayɛma kɛ bɛ sa hanle debie biala mɔɔ bɛhyia nwo la. Saa yɛsukoa kɛ yɛbamaa yɛ kunlu adwo yɛ nwo, kɛ yɛbahile anyezɔlɛ wɔ ninyɛne ngyikyi mɔɔ Gyihova fa maa yɛ la anwo, na yɛabu bɛ kɛ ɔle nyilalɛ mɔɔ ɔvi ye ɛkɛ na yɛyɛ ye mo wɔ nwolɛ a, ɔbamaa ɔ nye alie.

NYIA ANWODOZO KƐ GYIHOVA BANLEA WƆ

12. Duzu a kile kɛ Devidi vale ɔ nwo dole Gyihova anwo zo na tɛ ɔdaye mumua ne ɔ nwo zo ɛ?

¹² Ɛnee Devidi ze kɛ Gyihova le nɔhavo na ɔdwenle bɛdabɛ mɔɔ bɛkulo Ye la anwo kpalɛ. Mɔɔ Devidi ɛlɛhyehyɛ Edwɛne 34 ne la, ɛnee ye ngoane la esiane nu ɛdeɛ, noko diedi maanle ɔnwunle kɛ ‘Gyihova anwumabɔvolɛ ɛbɛnga ɔ nwo ɛyia.’ (Edw. 34:7) Bie a ɛnee Devidi ɛlɛfa Gyihova anwumabɔvolɛ ne atoto sogyanli mɔɔ ɔlɛkɔ konle na yeyɛ ye azokoɛleɛ la anwo, dahuu ɔ nye gyi adenle zo kɛ ɔnea saa ye agbɔvolɛ ɛlɛba a. Ɛnee Devidi mumua ne ze konle nye zo yɛɛ Gyihova bɔle ye ɛwɔkɛ kɛ ɔbava belemgbunlililɛ ne yeamaa ye ɛdeɛ, noko yeanva ɔ nwo yeando kɛzi ɔze totoabɔ to anzɛɛ kɛzi ɔkola ɔfa konle dadeɛ ɔdi agbɔvolɛ nwo zo konim la azo. (1 Sa. 16:13; 24:12) Devidi vale ɔ nwo ɔdole Nyamenle anwo zo, na ɛnee ɔze kɛ Gyihova anwumabɔvolɛ die “bɛdabɛ mɔɔ bɛsulo Ye la.” Nɔhalɛ nu, ɛnɛ yɛ nye ɛnla kɛ bɛbabɔ yɛ nwo bane wɔ nwanwane adenle zo. Noko yɛze kɛ awie biala ɛnle ɛkɛ ne mɔɔ ɔfa ɔ nwo ɔto Gyihova anwo zo a ɔ sa bazi aze a.

13. Saa Gɔgo mɔɔ vi Meegɔgo la bateta yɛ a, duzu ati a ɔbazɔho kɛ yɛnlɛ anwobanebɔlɛ a, noko duzu ati a yɛnrɛzulo a? (Nea ɔ nyunlu nvoninli ne.)

¹³ Ɔnrɛhyɛ, yɛbayia anwodozo mɔɔ yɛlɛ kɛ Gyihova kola bɔ yɛ nwo bane la anwo sɔnea. Saa Gɔgo mɔɔ vi Meegɔgo, maanle maanle mɔɔ bɛha bɛ nwo bɛbɔ nu la ba Nyamenle menli ne anwo zo a, ɔbazɔho kɛ yɛ ngoane la esiane nu. Ɔwɔ kɛ yɛnyia anwodozo kɛ Gyihova bahola alie yɛ yɛɛ ɔbalie yɛ. Wɔ maanle maanle ne anye zo yɛbayɛ kɛ mboane mɔɔ bɛngola bɛnyɛ bɛ nwo ɛhwee yɛɛ bɛnlɛ awie mɔɔ ɔbabɔ bɛ nwo bane la. (Yiz. 38:10-12) Bɛnrɛmaa yɛ akodeɛ biala yɛɛ bɛtɛtetele yɛ wɔ konle nu. Maanle maanle ne bazuzu kɛ bɛbahola bɛali yɛ nwo zo konim ndɛndɛ. Bɛnrɛnwu mɔɔ yɛ diedi maa yɛnwu ye la, anwumabɔvolɛ ɛlɔne mɔɔ ɛbɔ Nyamenle menli ɛyia na bɛziezie bɛ nwo kɛ bɛdie yɛ la. Nɔhalɛ nu, bɛnrɛnwu ye ɔluakɛ bɛnlɛ Gyihova anu diedi. Saa anwuma ɛlɔne ne bako die yɛ a, ɔbazi bɛ nwo kpole kpalɛ!​—Yek. 19:11, 14, 15.

SIEZIE Ɛ NWO KƐKALA MAA KENLE BIE

14. Kɛzi yɛbahola yɛaziezie yɛ nwo kɛkala yɛamaa kenle bie ɛ?

¹⁴ Kɛzi yɛbahola yɛaziezie yɛ nwo kɛkala yɛamaa kenle bie ɛ? Mɔɔ limoa, ɔwɔ kɛ yɛnyia nwonane afoa nu ninyɛne nwo adwenle mɔɔ fɛta, na yɛnwu kɛ kenle ko dedee yɛbagyakyi debie biala mɔɔ yɛlɛ la ɛkɛ. Eza ɔwɔ kɛ yɛmaa yɛ kunlu dwo yɛ nwo na yɛmaa agɔnwolɛvalɛ mɔɔ yɛ nee Gyihova lɛ la yɛ debie mɔɔ maa yɛ nye die kpole a. Saa yɛnwu yɛ Nyamenle ne kpalɛ a, ɔbamaa yɛanyia anwodozo bɔkɔɔ kɛ saa Gɔgo mɔɔ vi Meegɔgo la bateta yɛ a, ɔbahola yeabɔ yɛ nwo bane.

15. Duzu a Devidi limoale nwunle ye mɔɔ ɔmaanle ɔnyianle anwodozo bɔkɔɔ kɛ Gyihova ɛnrɛye ɔ rɛle ɛnrɛdo ɔ sa nu ɛlɛ a?

¹⁵ Suzu debie bieko mɔɔ boale Devidi mɔɔ bahola aboa yɛdayɛ noko yeamaa yɛaziezie yɛ nwo yɛamaa sɔnea la anwo. Devidi hanle kɛ: “Bɛzɔ bɛnlea na bɛnwu kɛ Gyihova le kpalɛ; anyelielɛ a le sonla ne mɔɔ nriandi kɔfea ye nu la.” (Edw. 34:8) Edwɛkɛ zɔhane maa yɛnwu deɛmɔti ɛnee Devidi lɛ anwodozo kɛ Gyihova baboa ye la. Devidi vale ɔ nwo dole Gyihova anwo zo dahuu, na ye Nyamenle ne anye ɔ rɛle ando ɔ sa nu ɛlɛ. Mɔɔ Devidi le kakula na ɔ nee Filisitianli kakanyinli Golayate mɔɔ ɔ nwo yɛ ɛzulolɛ la ɛlɛba araho la, ɔhanle ɔhilele ye kɛ: “Ɛnɛ kenle ye, Gyihova bava wɔ awula me sa nu.” (1 Sa. 17:46) Nzinlii, Devidi hɔyɛle gyima wɔ Belemgbunli Sɔɔlo sua nu ɛkɛ, na Sɔɔlo bɔle mɔdenle fane dɔɔnwo kɛ ɔku ye. Noko ‘ɛnee Gyihova nee Devidi lua.’ (1 Sa. 18:12) Kɛmɔ ɛnee Gyihova ɛlimoa ɛboa Devidi la ati, ɛnee ɔze kɛ Ɔbaboa ye wɔ sɔnea bieko mɔɔ ɛnee ɔlɛyia la anu.

16. Ndenle boni mɔ a yɛbahola yɛalua zo yɛazɔ Gyihova kpalɛyɛlɛ ne yɛanlea a?

¹⁶ Saa yɛfa yɛ nwo yɛto Gyihova adehilelɛ zo kɛkala a, ɔbamaa yɛanyia anwodozo bɔkɔɔ kɛ ɔbalie yɛ kenle bie. Ɔwɔ kɛ yɛnyia diedi nee ɛhulolɛ kɛ yɛbava yɛ nwo yɛado Gyihova anwo zo amaa yɛahola yɛazɛlɛ yɛ gyimamenle ne kɛ ɔmaa yɛ mekɛ ɔmaa yɛhɔ nyianu anzɛɛ yɛazɛlɛ ye kɛ ɔyɛ nzenzaleɛ wɔ mekɛ mɔɔ yɛfa yɛyɛ gyima la anu amaa yɛahola yɛahɔ debiezukoalɛ na yɛanyia mekɛ dɔɔnwo yɛayɛ daselɛlilɛ gyima ne. Fa ye kɛ yɛ gyimamenle ne anlie ando nu na yɛ gyima ɛvi yɛ sa. Asoo yɛlɛ diedi kɛ Gyihova ɛnrɛgyakyi yɛ anzɛɛ ɔnrɛkpo yɛ ɛlɛ na ɔbava mɔɔ yɛhyia nwo la yeamaa yɛ dahuu ɔ? (Hib. 13:5) Menli dɔɔnwo mɔɔ bɛwɔ dahuu ɛzonlenlɛ gyima ne anu la lɛ anwubielɛ mɔɔ kile kɛ Gyihova boale bɛ wɔ mekɛ mɔɔ ɛnee bɛhyia ɔ nwo kpalɛ la. Gyihova le nɔhavo.

17. Yɛ 2022 ɛvolɛdwɛkɛ ne a le boni, na duzu ati a ɔfɛta a?

¹⁷ Kɛmɔ Gyihova wɔ yɛ afoa la ati, ɔnle kɛ yɛsulo mɔɔ bazi kenle bie la. Saa yɛfa yɛ Nyamenle ne ɛhulolɛdeɛ yɛdimoa yɛ ɛbɛlabɔlɛ nu a, ɔnrɛgyakyi yɛ ɛlɛ. Kɛ mɔɔ Neazo Eku ne kulo kɛ bɛkakye yɛ kɛzi ɔhyia kɛ yɛsiezie yɛ nwo kɛkala yɛmaa tɛnlabelɛ ɛsesebɛ mɔɔ la yɛ nyunlu na yɛnyia anwodozo kɛ Gyihova ɛnrɛgyakyi yɛ ɛlɛ la ati, yekpa Edwɛne 34:10 kɛ yɛ 2022 ɛvolɛdwɛkɛ ne. Ɔse: “Bɛdabɛ mɔɔ bɛkpondɛ Gyihova la ɛnrɛhyia debie kpalɛ biala anwo.”