Bu Asɔneyɛlɛ Nwo Adenle Mɔɔ Ɛlɛ La Kɛ Ɔsonle Bolɛ

1. Kɛzi ɔwɔ kɛ yɛbu nwolɛ adenle mɔɔ yɛlɛ yɛyɛ asɔne la ɛ?

YƐNYIA nwolɛ adenle kɛnlɛma bie​—yemɔ a le kɛ yɛbabikye anwuma nee aze Bɔvolɛ ne wɔ asɔneyɛlɛ nu. Wɔmɔ nea o: Yɛkola yɛka yɛ ahonle nu edwɛkɛ yɛkile Gyihova mekɛ biala wɔ aneɛ biala anu, mɔɔ ɔngyia kɛ yɛdimoa yɛsɛlɛ ye adenle a. Saa yɛla asopiti anzɛɛ efiade bɔbɔ a, yɛbahola yɛayɛ asɔne na yɛlɛ anwodozo kɛ yɛ anwuma Selɛ ne mɔɔ lɛ ɛlɔlɛ la badie yɛ. Yɛnva nwolɛ adenle ɛhye mɔɔ yɛlɛ la yɛnli nwɔhoa.

2. Kɛzi Belemgbunli Devidi hilele kɛ nwolɛ adenle mɔɔ ɔlɛ ɔyɛ asɔne la sonle bolɛ maa ye ɛ?

² Belemgbunli Devidi bule nwolɛ adenle mɔɔ ɔlɛ ɔyɛ asɔne la kɛ ɔsonle bolɛ. Ɔdole edwɛne ɔmaanle Gyihova kɛ: “Maa me asɔneyɛlɛ ɛyɛ kɛ ayilevuanlɛ mɔɔ bɛziezie ye wɔ ɛ nyunlu la.” (Edw. 141:1, 2) Wɔ Devidi mekɛ zo, saa ɛnee bɛlɛfonlɔfonla ayilevuanlɛ nwuanzanwuanza ne mɔɔ ɛsɔfo ne mɔ fa di gyima wɔ nɔhalɛ ɛzonlenlɛ nu la a, bɛnea boɛ kpalɛ. (Ɛzɛ. 30:34, 35) Ayilevuanlɛ mɔɔ Devidi hwenle adwenle hɔle zolɛ la kile kɛ, ɛnee ɔkulo kɛ ɔdwenle mɔɔ ɔbaha yeahile ye anwuma Selɛ ne la anwo kpalɛ. Zɔhane ala a yɛdayɛ noko yɛkulo kɛ yɛyɛ a. Yɛkulo kɛ Gyihova anye die yɛ asɔneyɛlɛ nwo.

3. Saa yɛlɛbikye Gyihova wɔ asɔneyɛlɛ nu a, subane boni a ɔwɔ kɛ yɛda ye ali a, na duzu ati ɔ?

³ Saa yɛlɛyɛ asɔne a, ɔnle kɛ yɛyɛ ye kɛ asɛɛ yɛ nee Gyihova ɛlɛbɔ ngoayɛ bie. Emomu, ɔwɔ kɛ yɛda ɛbulɛ kpole ali. Dwenle ɛnyelɛzodeɛnwunlɛ mɔɔ yɛ nwanwane mɔɔ Ayezaya, Yizikeɛle, Daneɛle nee Dwɔn nyianle la anwo. Zɔhane ɛnyelɛzodeɛnwunlɛ ne mɔ le ngakyile ɛdeɛ, noko debie ko wɔ ɔ muala anu mɔɔ bɛzɔho bɛ nwo a. Bɛ muala bɛmaa yɛnwu ye kɛ Gyihova le Belemgbunli bedevinli. Ayezaya nwunle “Gyihova kɛ ɔde belemgbunli ebia kpole bie anu.” (Aye. 6:1-3) Yizikeɛle nwunle Gyihova kɛ ɔde ye anwuma ehwili nu, na “ɔ nwo amuala ta kɛ nyangondonle.” (Yiz. 1:26-28) Daneɛle nwunle “Mɔɔ Ye Mekɛ Vi Tete” la kɛ ɔwula tɛladeɛ fufule, na ɛnee senle mɔɔ ɛlɛsɔ la vi Ye belemgbunli ebia ne anwo. (Dan. 7:9, 10) Yɛɛ Dwɔn nwunle kɛ Gyihova de belemgbunli ebia bie azo, na debie bie mɔɔ le kɛ ɛmelade nyangondonle kɛnlɛma bie la ɛbɔ ɛyia ye. (Yek. 4:2-4) Saa yɛdwenledwenle Gyihova anyunlunyia mɔɔ tɛla biala la anwo a, ɔbamaa yɛahakye kɛzi yɛnyia nwolɛ adenle kɛnlɛma kɛ yɛbabikye ye wɔ asɔneyɛlɛ nu nee kɛzi ɔhyia kɛ yɛbayɛ zɔ wɔ ɛbulɛ nu la. Noko kɛzi ɔwɔ kɛ yɛyɛ asɔne ɛ?

“YEMƆTI BƐYƐ ASƆNE A, BƐYƐ YE ZƐHAE”

4. Duzu a yɛsukoa yɛfi edwɛkɛ mɔɔ limoa wɔ asɔneyɛlɛ nwo neazo ne mɔɔ wɔ Mateyu 6:9, 10 la anu a?

⁴ Kenga Mateyu 6:9, 10. Gyisɛse hilele ye ɛdoavolɛma kɛzi bɛyɛ asɔne a Nyamenle anye balie nwolɛ la wɔ Boka Zo Ɛdendɛlɛ ne anu. Mɔɔ Gyisɛse hanle kɛ, “Yemɔti bɛyɛ asɔne a, bɛyɛ ye zɛhae” wiele la, ɔlimoale ɔhanle ninyɛne mɔɔ hyia kpalɛ mɔɔ ɔwɔ kɛ yɛyɛ nwolɛ asɔne la, na ɔfale Gyihova bodane ne anwo: bɛmɛ a le ye duma ne mɔɔ bɛte nwolɛ; Belemgbunlililɛ ne mɔɔ barazɛkye menli kɔsɔɔti mɔɔ dwazo tia Nyamenle; yɛɛ ninyɛne mgbalɛ mɔɔ ɔbayɛ wɔ azɛlɛ ye azo nee nyilalɛ mɔɔ ɔbava yearɛlɛ alesama kenle bie la. Saa yɛka ninyɛne ɛhye mɔ anwo edwɛkɛ wɔ yɛ asɔneyɛlɛ nu a, ɛnee yɛlɛkile kɛ Nyamenle ɛhulolɛdeɛ hyia yɛ kpalɛ.

5. Asoo ɔle kpalɛ kɛ yɛbayɛ yɛdayɛ mumua ne yɛ ninyɛne mɔɔ hyia yɛ la anwo asɔne?

⁵ Wɔ asɔneyɛlɛ ne foa mɔɔ doa zo la anu, Gyisɛse maanle ɔlale ali kɛ ɔle kpalɛ kɛ yɛbayɛ ninyɛne mɔɔ yɛdayɛ mumua ne yɛhyia nwo la anwo asɔne. Yɛbahola yɛazɛlɛ Gyihova kɛ ɔmaa yɛ aleɛ mɔɔ yɛbali wɔ alehyenlɛ ne anu, ɔva yɛ ɛtane ɔhyɛ yɛ, ɔbɔ yɛ nwo bane ɔvi sɔnea nwo na ɔlie yɛ ɔvi amumuyɛnli ne asa anu. (Mat. 6:11-13) Saa yɛsɛlɛ ninyɛne ɛhye mɔ yɛfi Gyihova ɛkɛ a, ɛnee yɛlɛkile kɛ yɛ nye la ɔ nwo zo na yɛkulo kɛ yɛnyia ɔ nyunlu ɛlolɛ.

6. Asoo ninyɛne mɔɔ yɛbahola yɛayɛ nwolɛ asɔne la ala a bɛha nwolɛ edwɛkɛ wɔ asɔneyɛlɛ nwo neazo ne anu la ɔ? Kilehile nu.

⁶ Ɛnee Gyisɛse anye ɛnla kɛ ye ɛdoavolɛma baha edwɛkɛ mɔɔ wɔ asɔneyɛlɛ nwo neazo ne anu la pɛpɛɛpɛ. Wɔ asɔne gyɛne mɔɔ Gyisɛse yɛle la anu, ɔhanle ninyɛne ngakyile mɔɔ ɛnee nwolɛ hyia ye wɔ zɔhane mekɛ ne anu la anwo edwɛkɛ. (Mat. 26:39, 42; Dwɔn 17:1-26) Zɔhane ala a yɛbahola yɛayɛ debie biala mɔɔ hyia yɛ la anwo asɔne a. Saa ɔwɔ kɛ yɛsi kpɔkɛ bie a, yɛbahola yɛayɛ asɔne yɛakpondɛ nrɛlɛbɛ nee ndelebɛbo. (Edw. 119:33, 34) Saa yɛlɛba yɛabɔ gyimalilɛ bie mɔɔ yɛ se la abo a, yɛbahola yɛazɛlɛ Gyihova kɛ ɔboa yɛ ɔmaa yɛnwu kɛzi yɛbayɛ gyima ne la. (Mrɛ. 2:6) Awovolɛ bahola ayɛ asɔne amaa bɛ mra, ngakula bahola ayɛ asɔne amaa bɛ awovolɛ yɛɛ yɛ muala yɛbahola yɛayɛ asɔne yɛamaa yɛ Baebolo sukoavoma nee menli mɔɔ yɛka edwɛkɛ ne bie yɛkile bɛ la, na ɔwɔ kɛ yɛyɛ ye zɔ. Noko ɔnle kɛ yɛ asɔneyɛlɛ ne yɛ debie ɛbizalɛ ala.

7. Duzu ati a ɔwɔ kɛ yɛye Gyihova ayɛlɛ wɔ yɛ asɔneyɛlɛ nu a?

⁷ Ɔwɔ kɛ yɛkakye kɛ yɛbaye Gyihova ayɛlɛ wɔ yɛ asɔneyɛlɛ nu. Awie biala ɛnfɛta ayɛlɛyelɛ ɛndɛla yɛ Nyamenle ne. Ɔle “kpalɛ yɛɛ ɔlɛ ɛhulolɛ kɛ ɔbava ɛtane yeahyɛ.” Eza ‘ɔse anwunvɔne na ɔ kunlu yelɛyela ye, ɔkyɛ na yeava ɛya yɛɛ ɛlɔlɛ kpundii nee nɔhalɛlilɛ ɛyi ye tɛkɛɛ.’ (Edw. 86:5, 15) Ɔti ɔwɔ kɛ yɛye Gyihova ayɛlɛ wɔ sonla holɛ mɔɔ ɔde nee mɔɔ ɔyɛ la anwo.

8. Ninyɛne mɔɔ yɛbahola yɛayɛ Gyihova mo wɔ nwolɛ la bie mɔ a le boni? (Edwɛne 104:12-15, 24)

⁸ Ɔwɔ kɛ yɛye Gyihova ayɛlɛ wɔ yɛ asɔneyɛlɛ nu, yɛɛ eza ɔwɔ kɛ ninyɛne mgbalɛ mɔɔ yeyɛ yemaa yɛ la ka yɛ maa yɛyɛ ye mo. Kɛ neazo la, yɛbahola yɛayɛ ye mo wɔ felawɔse ngɛnlɛma mɔɔ asolo biala kɔla, aleɛ fɛlɛko ngakyile mɔɔ yɛnyia yɛɛ agɔnwolɛma kpalɛ mɔɔ yɛlɛ la anwo. Yɛ Ze ne mɔɔ lɛ ɛlɔlɛ la fa ninyɛne ɛhye mɔ nee dɔɔnwo maa yɛ amaa yɛ nye alie. (Kenga Edwɛne 104:12-15, 24.) Mɔɔ hyia kpole bɔbɔ la a le kɛ, yɛbayɛ Gyihova mo wɔ sunsum nu aleɛ dɔɔnwo mɔɔ ɔfa ɔmaa yɛ nee kenle bie anyelazo kɛnlɛma mɔɔ yemaa yɛnyia la anwo.

9. Duzu a bahola aboa yɛ yeamaa yɛahakye kɛ yɛbayɛ Gyihova mo a? (1 Tɛsalonaekama 5:17, 18)

⁹ Ɔnyɛ se kɛ yɛ rɛle bavi kɛ yɛbayɛ Gyihova mo wɔ ninyɛne mɔɔ yeyɛ yemaa yɛ la amuala anwo. Duzu a baboa wɔ yeamaa wɔahakye a? Ɛbahola wɔahɛlɛ ninyɛne fɔɔnwo bie mɔɔ ɛzɛlɛle Gyihova la wɔado ɛkɛ na ɔyɛ a wɔanlea kɛzi Gyihova ɛbua wɔ asɔneyɛlɛ ne la. Akee yɛ asɔne yɛ ye mo wɔ ye moalɛ ne anwo. (Kenga 1 Tɛsalonaekama 5:17, 18.) Dwenle ɛhye anwo nea: Saa yɛyɛ debie na awie mɔ kile nwolɛ anyezɔlɛ a, ɔmaa yɛ nye die. Zɔhane ala a saa Gyihova bua yɛ asɔneyɛlɛ na yɛkakye yɛyɛ ye mo a, ɔmaa ɔ nye die a. (Kɔl. 3:15) Noko debie gyɛne mɔɔ hyia la boni ati a ɔwɔ kɛ yɛyɛ Nyamenle mo a?

YƐ GYIHOVA MO WƆ YE KULOVOLƐ RALƐ NE ANWO

10. Kɛ mɔɔ 1 Pita 2:21 kile la, duzu ati a ɔwɔ kɛ yɛyɛ Gyihova mo kɛ ɔzoanle Gyisɛse wɔ azɛlɛ ye azo a?

¹⁰ Kenga 1 Pita 2:21. Ɔwɔ kɛ yɛyɛ Gyihova mo kɛ ɔzoanle ye kulovolɛ Ralɛ ne ɔmaanle ɔrahilehilele yɛ la. Saa yɛsukoa kɛzi Gyisɛse bɔle ye ɛbɛla la anwo debie a, ɔmaa yɛsukoa Gyihova nee kɛzi yɛbayɛ mɔɔ sɔ ɔ nye la anwo ninyɛne dɔɔnwo. Saa yɛda ye ali kɛ yɛlɛ diedi wɔ Kelaese afɔlebɔlɛ ne anu a, ɔbamaa yɛ nee Gyihova Nyamenle anyia agɔnwolɛvalɛ kpalɛ na anzodwolɛ adɛnla yɛ nee Ye avinli.​—Wlo. 5:1.

11. Duzu ati a yɛyɛ asɔne wɔ Gyisɛse duma nu a?

¹¹ Yɛyɛ Gyihova mo kɛ yɛkola yɛdua ɔ Ra ne anwo zo yɛfa yɛ asɔneyɛlɛ yɛto ɔ nyunlu la. Gyihova dua Gyisɛse anwo zo fa mɔɔ yɛkɛbiza la maa yɛ. Gyihova tie yɛɛ ɔbua asɔne mɔɔ yɛyɛ ye wɔ Gyisɛse duma nu la. Gyisɛse hanle kɛ: “Debie biala mɔɔ bɛkɛbiza wɔ me duma nu la, mebayɛ, amaa bɛalua Ralɛ ne anwo zo bɛawula Selɛ ne anyunlunyia.”​—Dwɔn 14:13, 14.

12. Duzu bieko boni ati a yɛyɛ Gyihova mo kɛ ɔvale ɔ Ra ne ɔmaanle yɛ a?

¹² Gyihova gyinla Gyisɛse ɛkpɔnenlɛ afɔlebɔlɛ ne azo fa yɛ ɛtane kyɛ yɛ. Ngɛlɛlera ne ka Gyisɛse anwo edwɛkɛ kɛ, ɔle yɛ “ɛsɔfo kpanyinli . . . na ɔde Nyamenle Bedevinli ne belemgbunli ebia ne fema zo wɔ anwuma.” (Hib. 8:1) Gyisɛse le yɛ “boavolɛ wɔ Selɛ ne anwo lɔ.” (1 Dwɔn 2:1) Yɛyɛ Gyihova mo kɛ yemaa yɛ Ɛsɔfo Kpanyinli mɔɔ se anwunvɔne na ɔte yɛ bɛtɛɛyɛlɛ bo mɔɔ “ɔsɛlɛ ɔmaa yɛ a”! (Wlo. 8:34; Hib. 4:15) Yɛtɔ sinli, ɔti saa tɛ Gyisɛse afɔlebɔlɛ ne a, anrɛɛ yɛnrɛhola yɛnrɛbikye Gyihova wɔ asɔneyɛlɛ nu. Nɔhalɛ nu, ɛ nee yɛ bayɛ adwenle kɛ yɛnrɛhola yɛnrɛyɛ Gyihova mo yɛnrɛwie ɛlɛ wɔ ahyɛlɛdeɛ ɛhye mɔɔ sonle bolɛ, mɔɔ yemɔ a le ye kulovolɛ ralɛ ne mɔɔ ɔvale ɔmaanle yɛ la anwo!

YƐ ASƆNE MAA Ɛ MEDIEMA

13. Nɔe ne mɔɔ aleɛ kye a Gyisɛse bawu la, kɛzi ɔhilele kɛ ɔkulo ye ɛdoavolɛma ne ɛ?

¹³ Nɔe ne mɔɔ aleɛ kye a Gyisɛse bawu la, ɔvale mekɛ tendenle ɔyɛle asɔne ɔmaanle ye ɛdoavolɛma ne na ɔzɛlɛle ɔ Ze kɛ, ɔnlea “bɛ nwo zo ɔlua amumuyɛnli ne ati.” (Dwɔn 17:15) Ɛhye kile kɛ ɛnee Gyisɛse kulo bɛ kpalɛ! Ɛnee ɔdaye mumua ne ɔlɛba yearayia sɔnea mɔɔ anu yɛ se la; noko ɛnee kɛzi ninyɛne bahɔ boɛ amaa ye ɛzoanvolɛma ne la a hyia ye kpalɛ a.

14. Kɛzi yɛbahile kɛ yɛkulo yɛ mediema ɛ?

¹⁴ Kɛmɔ yɛlɛsukoa Gyisɛse la ati, yɛnva yɛ adwenle yɛnzie yɛ ngomekye yɛ ngyianlɛ zo. Emomu, yɛta yɛyɛ asɔne yɛmaa yɛ mediema. Saa yɛyɛ zɔ a, ɛnee yɛlɛdi Gyisɛse mɛla mɔɔ se yɛhulo yɛ nwo ngoko la azo yɛɛ yɛmaa Gyihova nwu ye kɛ yɛkulo yɛ mediema diedima kpalɛ. (Dwɔn 13:34) Saa yɛyɛ asɔne yɛmaa yɛ mediema a, ɔngile kɛ yɛlɛsɛkye yɛ mekɛ. Nyamenle Edwɛkɛ ne ka kile yɛ kɛ, “tumi kpole wɔ tenlenenli modolɛ nzɛlɛlɛ nu.”​—Gye. 5:16.

15. Duzu ati a ɔhyia kɛ yɛyɛ asɔne yɛmaa yɛ mediema diedima a?

¹⁵ Ɔhyia kɛ yɛyɛ asɔne yɛmaa yɛ mediema diedima ɔluakɛ bɛyia sɔnea dɔɔnwo. Yɛbahola yɛazɛlɛ Gyihova kɛ ɔboa bɛ ɔmaa bɛgyinla anwodolɛ, esiane, konle konle, kpɔdekpɔdeyɛlɛ yɛɛ ngyegyelɛ gyɛne nloa. Eza yɛbahola yɛayɛ asɔne yɛamaa yɛ mediema mɔɔ tu bɛ nwo maa boa yɛ mediema mɔɔ wɔ ngyianlɛ nu la. Bie a ɛdawɔ mumua ne ɛze yɛ mediema bie mɔ mɔɔ ɛlɛyia ngyegyelɛ ɛhye mɔ bie la. Duzu ati a ɛmbobɔ bɛ aluma wɔ wɔ asɔneyɛlɛ nu a? Saa yɛsɛlɛ Gyihova kɛ ɔboa bɛ ɔmaa bɛgyinla ɔ nloa a, ɛnee yɛlɛda mediema ɛlɔlɛ kpalɛ ali.

16. Duzu ati a ɔwɔ kɛ yɛyɛ asɔne yɛmaa bɛdabɛ mɔɔ bɛli yɛ nyunlu la a?

¹⁶ Bɛdabɛ mɔɔ bɛli yɛ nyunlu wɔ asafo ne anu la anye sɔ asɔne mɔɔ awie mɔ yɛ maa bɛ la na ɔboa bɛ kpalɛ. Ɛnee ɛzoanvolɛ Pɔɔlo ze ɛhye kpalɛ. Ɔhɛlɛle kɛ: “Bɛyɛ asɔne bɛmaa medame noko, amaa saa mebuke me nloa kɛ metendɛ a meanyia edwɛkɛ meaha, na meava akɛnrazilɛ meabɔ edwɛkpa ne mɔɔ fale fealeranu edwɛkɛ nwuanzanwuanza ne anwo la nolo.” (Ɛfɛ. 6:19) Ɛnɛ noko, yɛlɛ mediema dɔɔnwo mɔɔ bɛli yɛ nyunlu mɔɔ bɛyɛ gyima ɛsesebɛ a. Saa yɛsɛlɛ Gyihova kɛ ɔyila bɛ gyima ne azo a, ɛnee yɛlɛkile kɛ yɛkulo bɛ.

SAA YƐLƐDI AWIE MƆ ANYUNLU WƆ ASƆNEYƐLƐ NU A

17-18. Mekɛ boni mɔ a bie a bɛbaha bɛahile yɛ kɛ yɛli awie mɔ anyunlu wɔ asɔneyɛlɛ nu a, na duzu a ɔwɔ kɛ yɛkakye a?

¹⁷ Ɔdwu mekɛ ne bie a bɛka bɛkile yɛ kɛ yɛli awie mɔ anyunlu wɔ asɔneyɛlɛ nu. Kɛ neazo la, bie a adiema raalɛ bie mɔɔ ɛlɛkɔ ahɔyɛ Baebolo ɛzukoalɛ la baha ahile adiema raalɛ gyɛne mɔɔ ɔ nee ye lua la kɛ ɔyɛ asɔne. Bie a adiema raalɛ ne mɔɔ nee ye hɔle la ɛnze Baebolo sukoavo ne kpalɛ, ɔti bie a ɔbahulo kɛ ɔbayɛ asɔne mɔɔ bɛbava bɛakpɔne la. Ɛhye bamaa yeanwu sukoavo ne ngyianlɛ mɔɔ ɔwɔ kɛ ɔka nwolɛ edwɛkɛ la.

¹⁸ Bie a bɛbaha bɛahile adiema nrenyia bie kɛ ɔyɛ asɔne wɔ daselɛlilɛ ayia anzɛɛ debiezukoalɛ bo. Ɔwɔ kɛ mediema mɔɔ lɛ nwolɛ adenle ɛhye la kakye deɛmɔti bɛlɛyɛ ayia ne la. Ɔnle kɛ yɛdua asɔneyɛlɛ zo yɛtu folɛ anzɛɛ yɛfa yɛbɔ nolo wɔ asafo ne anu. Wɔ debiezukoalɛ dɔɔnwo abo, edwɛndolɛ nee asɔneyɛlɛ ne le mitini nnu, ɔti ɔnle kɛ adiema nrenyia ne mɔɔ ɛlɛyɛ asɔne la ka “edwɛkɛ dɔɔnwo,” titili mɔɔ bɛfa bɛabɔ debiezukoalɛ ne abo la.​—Mat. 6:7.

MAA ASƆNEYƐLƐ ƐHYIA WƆ KPALƐ WƆ WƆ ƐBƐLABƆLƐ NU

19. Duzu a baboa yɛ yeamaa yɛaziezie yɛ nwo yɛamaa Gyihova ndɛnebualɛ kenle ne a?

¹⁹ Mekɛ mɔɔ yɛlɛbikye Gyihova ndɛnebualɛ kenle ne la, ɔwɔ kɛ yɛmaa asɔneyɛlɛ kyia yɛ kpalɛ wɔ yɛ ɛbɛlabɔlɛ nu. Ɛhye ati Gyisɛse hanle kɛ: “Bɛhɔ zo bɛzinza na bɛzɛlɛ mekɛ biala amaa bɛahola bɛanriandi ninyɛne ɛhye mɔ mɔɔ ɔwɔ kɛ sisi la.” (Luku 21:36) Nɔhalɛ nu, saa yɛyɛ asɔne dahuu a, ɔbaboa yɛ yeamaa yɛazinza wɔ sunsum nu na Nyamenle kenle ne ambando yɛ arɛlevilɛ nu.

20. Kɛ ɔkɛyɛ na yɛ asɔneyɛlɛ ayɛ kɛ ayilevuanlɛ mɔɔ bɔ evuanlɛ la ɛ?

²⁰ Duzu a yɛzuzu nwo a? Yɛbu asɔneyɛlɛ nwo adenle mɔɔ yɛlɛ la kɛ ɔsonle bolɛ kpalɛ. Ninyɛne mɔɔ hyia kpalɛ mɔɔ ɔwɔ kɛ yɛyɛ nwolɛ asɔne la a le ninyɛne mɔɔ fale Gyihova bodane nwo la. Eza yɛyɛ Nyamenle mo wɔ ɔ Ra ne nee ye Belemgbunlililɛ ne anwo yɛɛ yɛyɛ asɔne yɛmaa yɛ mediema diedima. Yɛbahola noko yɛayɛ ninyɛne mɔɔ yɛdayɛ mumua ne yɛhyia nwo wɔ nwonane nu nee sunsum nu la anwo asɔne. Saa yɛdwenle mɔɔ yɛbaha wɔ yɛ asɔneyɛlɛ nu la anwo kpalɛ a, ɛnee yɛlɛkile kɛ nwolɛ adenle kɛnlɛma ɛhye mɔɔ yɛnyia la sonle bolɛ maa yɛ. Yɛ edwɛkɛ bayɛ kɛ ayilevuanlɛ mɔɔ bɔ evuanlɛ mɔɔ Gyihova ‘anye die nwo.’​—Mrɛ. 15:8.