Kpuya Mɔɔ Vi Kengavolɛma Ɛkɛ
Asoo edwɛkɛ “Ɛbazinza bɛ” mɔɔ wɔ Edwɛne 12:7 la fale “mɔɔ nyane ɛha ye la” anwo (ngyɛnu 5) anzɛɛ ɔfale “Gyihova anloa anu edwɛkɛ ne mɔ” anwo (ngyɛnu 6)?
Edwɛkɛ gyɛne mɔɔ boka nwo la kile kɛ ngyɛnu ɛhye ɛlɛka menli nwo edwɛkɛ.
Yɛkenga ye wɔ Edwɛne 12:1-4 kɛ “nɔhalɛma ɛwie menli ne anu.” Yɛɛ wɔ Edwɛne 12:5-7, ɔhanle kɛ:
“‘Ɔluakɛ bɛsisi mɔɔ nyane ɛha ye la,
Yɛɛ ehyiavolɛma ɛkponlenlɛ ne ati,
Mebadwazo meayɛ nwolɛ debie,’ Gyihova a se a.
‘Mebalie bɛ meavi menli mɔɔ ɛmbu bɛ bie la asa anu.’
Gyihova anloa anu edwɛkɛ ne mɔ anwo te;
Bɛle kɛ dwɛtɛ fufule mɔɔ bɛbolo nwo wɔ ndɛtɛlɛ fonlomo nu, na bɛdu nuhua evinli ne fane nsuu la.
O Gyihova, ɛbazinza bɛ;
Ɛbabɔ bɛ nuhua ko biala anwo bane wɔavi awolɛndoazo ɛhye anwo dahuu.”
Ngyɛnu 5 ne hanle mɔɔ Nyamenle bayɛ amaa bɛdabɛ ‘mɔɔ nyane ɛha bɛ la.’ Ɔbalie bɛ.
Ngyɛnu 6 ne vale zɔle zolɛ kɛ “Gyihova anloa anu edwɛkɛ ne mɔ anwo te,” ‘bɛle kɛ dwɛtɛ fufule mɔɔ bɛdu nuhua evinli.’ Ɛhye le edwɛkɛ mɔɔ nɔhalɛ Kilisienema die to nu bɔkɔɔ a.—Edw. 18:30; 119:140.
Akee suzu ngyɛnu mɔɔ doa zo la, Edwɛne 12:7 anwo: “O Gyihova, ɛbazinza bɛ; ɛbabɔ bɛ nuhua ko biala anwo bane wɔavi awolɛndoazo ɛhye anwo dahuu.” Duzu a edwɛkɛkpɔkɛ “bɛ” fale nwo a?
Ngyɛnu 6 fale “Gyihova anloa anu edwɛkɛ ne mɔ” anwo, na kɛmɔ ngyɛnu 7 ne doa zo la ati, wɔannea a bie mɔ baha kɛ “bɛ” gyi ɛkɛ ne maa Nyamenle edwɛkɛ ne mɔ. Na yɛze kɛ Nyamenle ɛhɔ zo ɛzinza Baebolo ne ɔnva nwo mɔdenle mɔɔ dwazotiama ɛbɔ kɛ bɛnrɛmaa menli ɛnrɛgenga anzɛɛ bɛsɛkye ye la.—Aye. 40:8; 1 Pita 1:25.
Noko akee, edwɛkɛ mɔɔ wɔ ngyɛnu 5 ne anu la le nɔhalɛ bɔkɔɔ. Gyihova ɛboa “mɔɔ nyane ɛha ye” nee mɔɔ “bɛsisi” ye la na yelie bɛ yɛɛ ɔbahɔ zo yɛayɛ zɔ.—Dwobu 36:15; Edw. 6:4; 31:1, 2; 54:7; 145:20.
Ɔti edwɛkɛkpɔkɛ “bɛ” mɔɔ wɔ ngyɛnu 7 la fale nwane anwo?
Edwɛkɛ mɔɔ wɔ Edwɛne ɛhye anu la maa yɛnwu kɛ “bɛ” ne gyi ɛkɛ ne maa menli.
Edwɛne 12:1 hanle “nɔhalɛma” mɔɔ bie a amumuyɛma bɛlɛbɛlale bɛ la anwo edwɛkɛ. Akee yɛnwu edwɛkɛ mɔɔ kile kɛ Gyihova badwazo atia bɛdabɛ mɔɔ bɛnva bɛ tafinlima bɛnli gyima kpalɛ la. Edwɛndolɛnli ne maanle yɛnyianle anwodozo kɛ yɛbahola yɛalie yɛali kɛ Nyamenle bali aboa ye menli ɔluakɛ ɔ nloa anu edwɛkɛ ne mɔ anwo te.
Ɔti ngyɛnu 7 ne ɛlɛka kɛ Gyihova bazinza na yeabɔ “bɛ” nwo bane, kile kɛ menli mɔɔ amumuyɛma maanle bɛlile nyane la.
Hibulu Ngɛlɛlera mɔɔ menli dɔɔnwo lɛ nuhua anwodozo, le kɛ Hebrew Masoretic ne, noko vale edwɛkɛkpɔkɛ “bɛ” lile gyima wɔ ɛke. Greek Septuagint ne, mɔɔ le Hibulu Ngɛlɛlera ne mɔɔ bɛlimoale bɛhilele ɔ bo bɛhɔle Giliki nu la vale edwɛkɛkpɔkɛ “yɛ” lile gyima fane nwiɔ wɔ ngyɛnu 7 ne. Ɔti ɔbayɛ kɛ ɔfale nɔhavoma mɔɔ bɛhilele bɛ nyane na bɛsisile bɛ la anwo. Awieleɛ bɔkɔɔ ne, ngyɛnu 7 ne hanle kɛ bɛbabɔ nɔhavoma ne “nuhua ko biala” anwo bane bɛavi “awolɛndoazo ɛhye,” mɔɔ kile amumuyɛma mɔɔ “kanvo ɛbɛlatane” la anwo. (Edw. 12:7, 8) Wɔ Aramaic Targum ngilebɛbo ne anu, ngyɛnu 7 ne foa bie kenga kɛ: “Wɔmɔ, O AWULAE, ɛbabɔ tenlenema anwo bane, ɛbazinza bɛ wɔ awolɛndoazo ɛtane ɛhye anwo dahuu.” Ɛhye le daselɛ bieko mɔɔ kile kɛ Edwɛne 12:7 ne ɛnvale Nyamenle anloa anu edwɛkɛ ne mɔ anwo a.
Ɛhye ati, ngyɛnu ɛhye maa “nɔhalɛma” nyia anyelazo kɛ Nyamenle bayɛ bɛ ngyegyelɛ ne mɔ anwo debie.