Lɛvitikɔso

27 Gyihova doale zo zele Mosisi kɛ: 2 “Ka kile Yizilayɛma kɛ, ‘Saa awie bɔ ɛwɔkɛ titili bie+ kɛ ɔfa ezukoa mɔɔ nee sonla* ti bolɛ le ko la yeamaa Gyihova a, 3 nrenyia mɔɔ ɛli ɛvolɛ 20 mɔɔ kɔ ɛvolɛ 60 la ati bolɛ bayɛ dwɛtɛ fufule hyikɛle* 50 kɛ mɔɔ bɛsuzu hyikɛle wɔ ɛleka nwuanzanwuanza ne la.* 4 Noko saa ɔle raalɛ a, ɔ ti bolɛ bayɛ hyikɛle 30. 5 Saa bɛli ɛvolɛ 5 mɔɔ kɔ 20 la a, nrenyia ti bolɛ bayɛ hyikɛle 20, yɛɛ raalɛ ɛdeɛ bayɛ hyikɛle 10. 6 Saa bɛli siane ko kɔdwu ɛvolɛ nnu a, nrenyia ti bolɛ bayɛ dwɛtɛ fufule hyikɛle nnu yɛɛ raalɛ ɛdeɛ bayɛ dwɛtɛ fufule hyikɛle nsa.

7 “‘Saa bɛli ɛvolɛ 60 mɔɔ kɔ la a, nrenyia ti bolɛ bayɛ hyikɛle 15, yɛɛ raalɛ ɛdeɛ bayɛ hyikɛle 10. 8 Noko saa ahenle le ehyianli na ɔnrɛhola bolɛ ne tua a,+ ɔbaragyinla ɛsɔfo ne anyunlu na ɛsɔfo ne apɛ ɔ ti bolɛ. Ɛsɔfo ne bapɛ bolɛ mɔɔ ahenle mɔɔ bɔle ɛwɔkɛ ne la bahola adua la.+

9 “‘Saa nane mɔɔ bɛkola bɛfa bɛbɔ afɔle bɛmaa Gyihova la a ɔvale ɔbɔle ɛwɔkɛ a, debie biala mɔɔ ɔbava yeamaa Gyihova la bayɛ debie nwuanzanwuanza. 10 Ɔnrɛhola ɔnrɛhakyi ye anzɛɛ ɔnrɛva mɔɔ le kpalɛ la ɔnrɛzenza mɔɔ le ɛtane la, anzɛɛ ɔnrɛva mɔɔ le ɛtane la ɔnrɛzenza mɔɔ le kpalɛ la. Noko saa ɔwɔ kɛ ɔfa nane ko ɔsenza dɛba ne a, nane dɛba ne nee fofolɛ ne bayɛ nwuanzanwuanza. 11 Saa ɔle nane mɔɔ anwo ɛnde+ mɔɔ bɛngola bɛnva bɛmbɔ afɔle bɛmmaa Gyihova la a, ɔbava nane ne yearagyinla ɛsɔfo ne anyunlu. 12 Ɛsɔfo ne bapɛ ye bolɛ, kpalɛ o, ɛtane o. Bolɛ mɔɔ ɛsɔfo ne bapɛ la a bɛbalie a. 13 Noko saa ahenle kulo kɛ ɔsia ɔtɔ ye debie a, ɔwɔ kɛ ɔfa ye bolɛ ne ngyɛnu nnu anu ko ɔboka nwolɛ.+

14 “‘Saa awie te ye sua nwo kɛ debie nwuanzanwuanza maa Gyihova a, ɛsɔfo ne bapɛ ye bolɛ, kpalɛ o, ɛtane o. Bolɛ mɔɔ ɛsɔfo ne bapɛ la, yemɔ ala a bɛbalie a.+ 15 Noko saa ahenle mɔɔ dele ye sua ne anwo la kulo kɛ ɔsia ɔtɔ ye debie a, ɔwɔ kɛ ɔfa ye bolɛ ne ngyɛnu nnu anu ko ɔboka nwolɛ, na akee ɔbayɛ ye ɛdeɛ.

16 “‘Saa awie te ye ɛya mɔɔ ɔlɛ la bie anwo maa Gyihova a, bɛbanlea ma dodo mɔɔ bɛbalua ye wɔ nu la anwo bɛapɛ ye bolɛ: baale ma homa* ko bayɛ dwɛtɛ fufule hyikɛle 50. 17 Saa ɔte ye ɛya ne anwo wɔ Fanwodi Ɛvolɛ ne anu a,+ ye bolɛ ne ala a bɛbalie a. 18 Saa ɔte ye ɛya ne anwo wɔ Fanwodi Ɛvolɛ ne anzi a, ɛsɔfo ne banlea ɛvolɛ mɔɔ ɛha na Fanwodi Ɛvolɛ bieko adwu la anwo yeasese ye bolɛ ne yeamaa ye na yeade ye ezukoa ne azo.+ 19 Noko saa ahenle mɔɔ dele ɛya ne anwo la kulo kɛ ɔsia ɔtɔ ye debie a, ɔwɔ kɛ ɔfa ye bolɛ ne ngyɛnu nnu anu ko ɔboka nwolɛ, na akee ɔbayɛ ye ɛdeɛ. 20 Noko saa yeandɔ ɛya ne na bɛtɔne ɛya ne bɛmaa awie gyɛne a, ɔnrɛhola ɔnrɛdɔ ye bieko. 21 Saa bɛye bɛ sa bɛfi ɛya ne anwo wɔ Fanwodi Ɛvolɛ ne anu a, ɔbayɛ debie nwuanzanwuanza yeamaa Gyihova, kɛ ɛya mɔɔ bɛva bɛmaa ye la. Ɔbayɛ ɛsɔfo ne mɔ agyapadeɛ.+

22 “‘Saa awie te ɛya mɔɔ ɔdɔle na ɔmboka ye agyapadeɛ ne anwo la anwo yeamaa Gyihova a,+ 23 ɛsɔfo ne basese ye bolɛ ahɔdwu Fanwodi Ɛvolɛ ne azo, na yeadua ezukoa ne kenle ko zɔhane ala.+ Ɔle debie nwuanzanwuanza ɔmaa Gyihova. 24 Fanwodi Ɛvolɛ ne anu, ɛya ne bazia ayɛ ahenle mɔɔ ɔdɔle ɔvile ye ɛkɛ ne la, ahenle mɔɔ lɛ azɛlɛ ne la ɛdeɛ.+

25 “‘Ɔwɔ kɛ bɛpɛ bolɛ biala kɛ mɔɔ bɛsuzu hyikɛle wɔ ɛleka nwuanzanwuanza ne la. Hyikɛle ko biala le gilaa* 20.

26 “‘Noko ɔnle kɛ awie biala te nane biala belamunli ralɛ nwo, ɔluakɛ belamunli ralɛ biala le Gyihova ɛdeɛ.+ Ɛnlankɛ o, boane o, ɔle Gyihova ɛdeɛ.+ 27 Saa ɔle nane mɔɔ anwo ɛnde na ɔkulo kɛ ɔtua ye bolɛ ne na ɔdie ye debie a, ɔwɔ kɛ ɔfa ye bolɛ ne ngyɛnu nnu anu ko ɔboka nwolɛ.+ Noko saa yeandɔ a, bɛbadɔne ye kɛ mɔɔ ye bolɛ ne de la.

28 “‘Noko saa awie fa ye agyapadeɛ ne bie maa Gyihova bɔkɔɔ* a, sonla o, nane o, ye ɛya o, bɛnrɛhola bɛnrɛdɔne ye anzɛɛ bɛnrɛlie ye bieko. Debie biala mɔɔ bɛkɛva bɛkɛmaa la le debie nwuanzanwuanza kpalɛ maa Gyihova.+ 29 Eza ɔnle kɛ bɛdie awie biala mɔɔ bɛbua ye fɔlɛ* kɛ bɛzɛkye ye la.+ Ɔwɔ kɛ bɛku ye.+

30 “‘Azɛlɛ ne azo aleɛ ngyɛnu bulu anu ko,*+ ɛya nu nzoleɛ o, mbakama o, ɔle Gyihova ɛdeɛ. Ɔle debie nwuanzanwuanza ɔmaa Gyihova. 31 Saa awie kpondɛ kɛ ɔtɔ ye ngyɛnu bulu anu ko ne a, ɔwɔ kɛ ɔfa ye bolɛ ne ngyɛnu nnu anu ko ɔboka nwo. 32 Nlankɛ nee mboane ngyɛnu bulu anu ko biala, debie biala mɔɔ kɛze mboaneneavolɛ ne kpɔma ne abo la, nane* ne mɔɔ tɔ zo bulu la bayɛ nwuanzanwuanza amaa Gyihova. 33 Ɔnle kɛ ɔnea kɛ ɔle kpalɛ anzɛɛ ɛtane, yɛɛ ɔnle kɛ ɔkakyi ye. Noko saa ɔbɔ mɔdenle kɛ ɔkakyi ye a, ɔwɔ kɛ dɛba ne nee fofolɛ ne yɛ debie nwuanzanwuanza.+ Ɔnrɛhola ɔnrɛdɔ ye bieko.’”

34 Ɛhye mɔ a le mɛla mɔɔ Gyihova vale maanle Mosisi kɛ ɔva ɔmaa Yizilayɛma wɔ Saenae Boka ne azo a.+