Lɛvitikɔso
17 Gyihova doale zo zele Mosisi kɛ: 2 “Ka kile Aalɔn nee ɔ mra mrenyia ne mɔ yɛɛ Yizilayɛma amuala kɛ, ‘Mɔɔ Gyihova ɛha la ɛne:
3 “‘“Saa Yizilayɛnli biala ku ɛnlankɛ anzɛɛ boane anzɛɛ abɔnkye wɔ azokoɛleɛ ɛkɛ ne anzɛɛ ɔku ye wɔ azokoɛleɛ ne anzi lɔ, 4 na yeanva yeamba nyianu ɛdanlɛsua ne anuhɔlɛ yeambambɔ afɔle yeammaa Gyihova wɔ Gyihova ɛdanlɛsua ne anyunlu a, bɛbabu zɔhane sonla ne kɛ yeli mogya nwo fɔlɛ. Yeha mogya yegua, na ɔwɔ kɛ bɛye* zɔhane sonla ne bɛfi ye menli ne avinli. 5 Ɛhye bamaa Yizilayɛma ava bɛ afɔlebɔdeɛ ne mɔ mɔɔ kɛkala bɛfa bɛbɔ afɔle wɔ ɛbɔ nu bɛmaa Gyihova la arɛlɛ ɛsɔfo ne wɔ nyianu ɛdanlɛsua ne anuhɔlɛ. Ɔwɔ kɛ bɛfa ɛhye mɔ bɛbɔ anzodwolɛ afɔle bɛmaa Gyihova.+ 6 Na ɛsɔfo ne bakponde mogya ne wɔ Gyihova afɔlemokyea ne mɔɔ wɔ nyianu ɛdanlɛsua ne anuhɔlɛ la anwo na yeamaa ɛnlome ne akpu kɛ afɔlebɔlɛ evuanlɛ mɔɔ Gyihova anye die nwolɛ* la.+ 7 Ɔti ɔnle kɛ bɛbɔ afɔle bɛmaa sunsum ɛtane mɔɔ zɔho mbɔnkye,*+ mɔɔ bɛ nee bɛ bɔ tuutuu la bieko.+ Ɛhye bayɛ mɛla mɔɔ wɔ ɛkɛ ne dahuu maa bɛ wɔ bɛ awolɛndoazo kɔsɔɔti anu a.”’
8 “Ka kile bɛ kɛ, ‘Yizilayɛnli biala anzɛɛ ɛyɛvolɛ biala mɔɔ de bɛ avinli mɔɔ kɛbɔ ɛyelalɛ afɔle anzɛɛ kɛbɔ afɔle gyɛne bie 9 na yeanva yeamba nyianu ɛdanlɛsua ne anuhɔlɛ yeambambɔ afɔle yeammaa Gyihova la, bɛbaye ye* bɛavi ye menli ne avinli.+
10 “‘Saa Yizilayɛnli biala anzɛɛ ɛyɛvolɛ biala mɔɔ de bɛ avinli la di mogya biala a,+ mebadu me nye meazie ahenle* mɔɔ di mogya ne la anwo na meaye ye* meavi ye menli ne avinli. 11 Ɔluakɛ abɔdeɛ biala ngoane* wɔ mogya ne anu,+ yɛɛ meva memaa bɛ kɛ bɛva bɛli bɛ* ti mgbɔdalɛ wɔ afɔlemokyea ne azo,+ ɔluakɛ mogya ne a bɛfa bɛdi mgbɔdalɛ a,+ ɔboalekɛ ngoane* ne wɔ nu. 12 Ɛhye ati meha mehile Yizilayɛma kɛ: “Bɛ nuhua ko biala mmadi mogya, yɛɛ ɔnle kɛ ɛyɛvolɛ biala mɔɔ de bɛ avinli la+ di mogya.”+
13 “‘Saa Yizilayɛnli anzɛɛ ɛyɛvolɛ biala mɔɔ de bɛ avinli la di ɛbɔlɛ na ɔkye nane anzɛɛ aloma na ɔbali a, ɔwɔ kɛ ɔwola ye mogya ne ɔgua aze+ na ɔfa ndɛtɛlɛ ɔkeda zo. 14 Ɔluakɛ abɔdeɛ biala ngoane* a le ye mogya ne, ɔboalekɛ ngoane* ne wɔ nu. Yemɔti meha mehile Yizilayɛma kɛ: “Bɛmmadi abɔdeɛ biala mogya ɔboalekɛ abɔdeɛ biala ngoane* a le ye mogya ne. Awie biala mɔɔ kɛli bie la bɛbahu ye.”+ 15 Saa ekulomeni anzɛɛ ɛyɛvolɛ biala di nane mɔɔ ɛwu anzɛɛ mɔɔ nane anwo ɛzulolɛ ɛtete ye nu la a,+ ɛnee ɔwɔ kɛ ɔkpo ye adɛladeɛ na ɔbia nzule nu, noko ɔ nwo bagua evinli kɔkpula nɔsolɛ nu;+ akee ɔ nwo bade. 16 Noko saa yeamkpo ye adɛladeɛ na yeambia ɔ nwo* a, ɔbali ye ɛtane ne anwo ɛzonle.’”+