“Bɛle Me Alasevolɛ”

1, 2. (a) Duzu a dasevolɛ mɔɔ awie bayɛ la kile a, na wɔ adenle titile boni azo a ewiade adwelie kɛlɛvoma anli nɔhalɛ a? (b) Duzu ati a Gyihova ɛnva ɔ nye ɛndo ewiade adwelie kɛlɛvoma anwo zo ɛ?

DUZU a dasevolɛ kile a? Edwɛbohilelɛ buluku bie kile ɔ bo kɛ: “Awie mɔɔ kɛnwu debie na ɔlɛbɔ ye nolo la.” Kɛ neazo la, adwelie kɛlata bie wɔ Pietermaritzburg, South Africa mɔɔ bɛfɛlɛ ye The Witness (anzɛɛ Dasevolɛ), bɛva bɛli gyima ɛvolɛ mɔɔ bo 160. Duma ne fɛta ɔluakɛ adwelie kɛlata bodane a le kɛ bɛfa bɛabɔ edwɛkɛ mɔɔ kɛzi la nolo. The Witness kpanuvolɛ ne mɔɔ lumua la, hanle ndane kɛ ɔbaha “nɔhalɛ ne, nɔhalɛ ne amuala, tɛ ɛhwee kɛ nɔhalɛ ne ala.”

² Noko ɔyɛ alɔbɔlɛ kɛ ɛnɛ adwelie kɛlɛvoma dɔɔnwo ɛnga nɔhalɛ anzɛɛ bɛbu bɛ nye bɛgua edwɛkɛ mɔɔ anwo hyia maa alesama la azo la. Ɛhye ati a tumivolɛ Nyamenle ne luale ye tete ngapezonli Yizikeɛle anwo zo hanle edwɛkɛ ɛhye la: ‘Na maanle maanle ne mɔ anwu kɛ medame a mele Gyihova a.’ (Yiz. 39:7) Noko Tumivolɛ Bedevinli ne ɛnva ɔ nye ɛndo ewiade adwelie kɛlɛvoma anwo zo. Ɔlɛ Alasevolɛ kɛyɛ mgbe mɔtwɛ mɔɔ bɛka mɔɔ yeyɛ, nee mɔɔ ɔbayɛ ye kenlebie la bɛkile menli kɔsɔɔti a. Alasevolɛ ɛlɔne ɛhye eza bɔ nyilalɛ mɔɔ Nyamenle ɛva ɛbɔ ɛwɔkɛ kɛ ɔbava yeamaa alesama la nolo. Saa yɛmaa yɛ nye bolo yɛyɛ gyima ɛhye a, ɛnee yɛlɛbɔ duma ne mɔɔ Nyamenle ɛva ɛdo yɛ nwo zo wɔ Ayezaya 43:10 la anwo ɛbɛla: ‘Gyihova se, “bɛle me alasevolɛ nee me sonvolɛma mɔɔ mekpa nu meye bɛ.”’

3, 4. (a) Mekɛ boni a Baebolo Sukoavoma ne vale duma fofolɛ ne dole bɛ nwo zo a, na kɛzi bɛdele nganeɛ wɔ nwo ɛ? (Nea mɔlebɛbo nvoninli ne.) (b) Kpuyia boni mɔ a akee yɛbazuzu nwo a?

³ Nea nwolɛ adenle mɔɔ yɛnyia kɛ Gyihova duma la yɛ nwo zo a, ɔluakɛ ɔle “tete Belemgbunli,” yɛɛ yeha kɛ: “Ɛhye a le me duma wɔ melɛ mɔɔ ɛnlɛ awieleɛ, na ɛhye yɛɛ ɔwɔ kɛ awolɛndoazo kɔsɔɔti fa [kakye] me a”! (1 Tem. 1:17; Ade. 3:15; fa to Nolobɔvo ne 2:16 anwo.) Baebolo Sukoavoma ne vale duma Gyihova Alasevolɛ dole bɛ nwo zo wɔ 1931. Menli dɔɔnwo ɛhɛlɛ ngɛlata ɛva ɛhile nwolɛ anyezɔlɛ. Asafo ko mɔɔ wɔ Canada la hɛlɛle kɛ: “Kɛmɔ yɛle ‘Gyihova alasevolɛ’ la ati yɛ nye die, na yemaa yɛsika yɛ bo kpalɛ kɛ yɛbabɔ duma fofolɛ ne anwo ɛbɛla.”

⁴ Kɛzi ɛbahile kɛ ɛ nye sɔ nwolɛ adenle mɔɔ wɔnyia kɛ Nyamenle duma la ɛ nwo zo la ɛ? Bieko, asoo ɛbahola wɔahilehile deɛmɔti Baebolo ne fɛlɛ yɛ Gyihova Alasevolɛ la anu ɔ?

NYAMENLE TETE ALASEVOLƐ

5, 6. (a) Kɛzi Yizilayɛ awovolɛ lile Gyihova anwo daselɛ ɛ? (b) Duzu bieko a bɛhanle kɛ bɛyɛ a, na kɛmɔti a ɔwɔ kɛ awovolɛ mɔɔ bɛwɔ ɛkɛ ɛnɛ la noko yɛ bie ɛ?

⁵ Ɛnee Yizilayɛma mɔɔ bɛwɔ Ayezaya mekɛ zo la le Gyihova “alasevolɛ” na ɛnee maanle mumua ne le ye ‘sonvolɛ.’ (Aye. 43:10) Ndenle mɔɔ ɛnee Yizilayɛ awovolɛ dua zo di daselɛ la anu ko a le kɛ bɛkilehile bɛ mra kɛzi Nyamenle nee bɛ nlenya mɔ luale la. Kɛ neazo la, saa bɛka kɛzi ɔwɔ kɛ bɛdi Akpabɛnwo ne bɛahile bɛ ɛvolɛ biala a, bɛse menli ne kɛ: “Saa bɛ mra biza bɛ kɛ, ‘Ɛzonlenlɛ ɛhye abo a le duzu?’ a, bɛze bɛ kɛ, ‘Ɔle [Gyihova] Akpabɛnwo azubɔlɛ, ɔluakɛ mekɛ mɔɔ ɔku Yigyibitima na ɔdwule Yizilayɛma azua nu la, ɔpɛle nuhua.’” (Ade. 12:26, 27) Ɔbayɛ kɛ awovolɛ zɔhane mɔ eza hanle hilele bɛ mra kɛ mekɛ mɔɔ Mosisi lumuale hɔle Yigyibiti belemgbunli ne ɛkɛ kɛ ɔmaa Yizilayɛma ɛhɔzonle Gyihova wɔ fienemgbole ne anu la, Falo buale kɛ: ‘Gyihova a le nwane, mɔɔ ɔwɔ kɛ metie ye na memaa Yizilayɛma kɔ a?’ (Ade. 5:2) Nɔhalɛ nu, eza bɛbaha kɛ mekɛ mɔɔ ngyegyelɛ bulu ne razɛkyele azɛlɛ ne na Yizilayɛma vile Yigyibitima ɛlɔne ne asa wɔ Nyevile Kɔkɔlɛ ne anu la bɛbuale Falo kpuyia ne bɛmanle awie biala nwunle ye wienyi. Gyihova yɛɛ ɛnee le Tumivolɛ Bedevinli ne a, na ɛnɛ noko zɔhane ala a ɔde a. Bieko, Yizilayɛma nwunle kɛ Gyihova a le nɔhalɛ Nyamenle ne a, na ye ɛwɔkɛ mɔɔ ɔbɔle la kɔsɔɔti rale nu.

⁶ Ɔda ali kɛ Yizilayɛma mɔɔ anye liele nwo kɛ Gyihova duma la bɛ nwo zo la, hanle ninyɛne ngɛnlɛma ɛhye mɔ anwo edwɛkɛ hilele bɛ mra nee nyɛvolɛ mɔɔ razonlenle bɛ wɔ bɛ awuke ne mɔ anu la. Ɛnee eza ɔhyia kɛ Yizilayɛma kilehile bɛ mra bɛmaa bɛdi nwuanzanwuanzayɛlɛ nwo ngyinlazo mɔɔ Nyamenle ɛva ɛmaa la azo. Gyihova hanle kɛ: ‘Ɔwɔ kɛ bɛmaa bɛ nwo te, ɔluakɛ Medame, Gyihova bɛ Nyamenle, mele nwuanzanwuanza.’ (Sɛlɛ. 19:2; Mɛla 6:6, 7) Nea kɛzi ɛhye le neazo kɛnlɛma maa Keleseɛne awovolɛ mɔɔ bɛwɔ ɛkɛ ɛnɛ la ɛ! Ɔwɔ kɛ bɛdabɛ noko bɛtete bɛ mra bɛmaa bɛyɛ nwuanzanwuanza amaa yeayɛ enililɛ nee anyunlunyia yeamaa Nyamenle duma ne.​​—Bɛgenga Mrɛlɛbulɛ 1:8; Ɛfɛsɛsema 6:4.

7. (a) Saa Yizilayɛma di nɔhalɛ maa Gyihova a, kɛzi ɔka maanle maanle mɔɔ ɛbɔ bɛ ɛyia la ɛ? (b) Ɛzonlelilɛ boni a la bɛdabɛ mɔɔ Nyamenle duma la bɛ nwo zo la kɔsɔɔti anwo zo a?

⁷ Ɛhye ati, saa Yizilayɛma di nɔhalɛ a, ɔyɛ daselɛlilɛ kɛnlɛma ɔmaa Nyamenle duma ne. Ɛnee bɛha bɛhile bɛ kɛ: “Menli kɔsɔɔti mɔɔ wɔ ewiade la banwu kɛ bɛfa ye duma a bɛfɛlɛ bɛ a, na bɛazulo bɛ.” (Mɛla 28:10) Noko, ɔyɛ alɔbɔlɛ kɛ Yizilayɛma anwo edwɛkɛ kile kɛ bɛanli nɔhalɛ. Fane dɔɔnwo ne ala, bɛziale bɛhɔzonlenle ananze mɔɔ menli ɛyɛ la. Noko akee, bɛyɛle mɔɔ Keenama nyamenle ne mɔ yɛle la bie. Bɛ ti yɛle se, bɛvale bɛ mra bɛbɔle afɔle na bɛsisile ehyianvolɛma. Nea kɛzi ɛhye le ɛzukoalɛdeɛ mɔɔ tumi wɔ nu maa yɛ kɛ yɛbabɔ mɔdenle yɛayɛ nwuanzanwuanza dahuu yɛava yɛazukoa Nwuanzanwuanza Ko ne mɔɔ ye duma la yɛ nwo zo la ɛ!

“BƐNLEA, MELƐYƐ DEBIE FOFOLƐ”

8. Duzu a Gyihova hanle kɛ Ayezaya ɛyɛ a, na duzu a ɛnee Ayezaya kpondɛ kɛ ɔnwu ye a?

⁸ Gyihova hanle kɛ ɔbalie Yizilayɛma yeavi akɛlɛzonlenlɛ nu. (Aye. 43:19) Ayezaya buluku ne adile nsia ne mɔɔ lumua la, ka ɛzɛkyelɛ mɔɔ ɛnee bara Gyɛlusalɛm nee azua mɔɔ zuozua ye azo la anwo edwɛkɛ dɔɔnwo. Gyihova mɔɔ ze ahonle nu la hanle hilele Ayezaya kɛ, ɔnva nwo kɛ menli ne ɛnrɛdie ye la, ɔhɔ zo ɔbɔ bɛ kɔkɔ. Ɔzinle Ayezaya anwo na ɛnee ɔkpondɛ kɛ ɔnwu mekɛ mɔɔ Nyamenle menli ne bɛanlu bɛ nwo la. Kɛzi Nyamenle buale ye ɛ? “Kɔkpula kɛ azuamgbole ne mɔ kɛbɔ, mɔɔ awie ɛnde zolɛ na azua mɔɔ bɛda nu la kɛyɛ azuadu mɔɔ awie ɛnde biala anu, na azɛlɛ ne kɛdɔ mgbane la.”​​—Bɛgenga Ayezaya 6:8-11.

9. (a) Mekɛ boni a Ayezaya ngapezo ne mɔɔ fane Gyɛlusalɛm ɛzɛkyelɛ ne anwo la rale nu a? (b) Ɛnɛ noko, kɔkɔbɔlɛ boni a ɔwɔ kɛ yɛtie a?

⁹ Bɛvale gyima ɛhye bɛmanle Ayezaya wɔ ɛvolɛ mɔɔ li awieleɛ wɔ Belemgbunli Ɛzaya tumililɛ ne anu la anu, anzɛɛ kɛyɛ 778 K.Y.M. Ɔyɛle ye ngapezo gyima ne ɛvolɛ mɔɔ bo 46 ɔhɔdwule 732 K.Y.M., wɔ Belemgbunli Hɛzikaya tumililɛ mekɛ ne anu. Ɛnee yeha ɛvolɛ 125 na bɛazɛkye Gyɛlusalɛm wɔ 607 K.Y.M. Ɛhye ati, bɛmanle Nyamenle menli ne nwunle mɔɔ ɔbado bɛ maanle ne la mekɛ tendenle. Ɛnɛ noko, Gyihova ɛmaa ye menli ɛnwu mɔɔ la bɛ nyunlu la ndɛ. Ɛvolɛ kɛyɛ 135 ɛne, ɔvi Ɛzinzalɛ Arane ne mɔɔ lumua la azo, bɛhɔ zo bɛhakye ye kengavolɛma kɛ bɛdwazo ɔluakɛ Seetan tumililɛ ɛtane ne awieleɛ ɛbikye na bɛbava Gyisɛse Kelaese Ɛvolɛ Apenle Ko Tumililɛ ne bɛazie ɔ gyakɛ anu.​​—Yek. 20:1-3, 6.

10, 11. Kɛzi Yizilayɛma mɔɔ ɛnee wɔ Babelɔn la manle Ayezaya ngapezo bie rale nu ɛ?

¹⁰ Dwuuma mɔɔ yɛle tieyɛ bɛlɛle bɛ nwo aze manle Babeloniama la nyianle bɛ ti na bɛvale bɛ bɛhɔle nlɔnu wɔ Babelɔn. (Gyɛ. 27:11, 12) Mekɛ mɔɔ Nyamenle menli ne lile ɛvolɛ 70 wɔ ɛkɛ la, bɛnwunle kɛzi ngapezo bie rale nu ɔmanle ɔyɛle azibɛnwo la: “[Gyihova], bɛ Kpɔnevolɛ ne, Yizilayɛ Nwuanzanwuanza Ko ne se, ‘Bɛdabɛ bɛ ti, mebazoa meamaa bɛahɔ Babelɔn anwo zo, meamaa bɛahɔbubu suakpole ne nlenkɛ mgbole ne mɔ.’”​​—Aye. 43:14.

¹¹ Amaa zɔhane ngapezo ne ara nu la, edwɛkɛ bie mɔɔ manle ewiade ne kpusule la zile wɔ October 539 K.Y.M. nɔɔzo. Mekɛ mɔɔ ɛnee Babelɔn belemgbunli ne nee ye mgbanyima ɛlɛno dwora nwuanzanwuanza ne mɔ mɔɔ bɛvale bɛvile Gyɛlusalɛm ɛzonlenlɛ sua ne anu bɛrale anu na bɛlɛye bɛ nyamenle ne mɔ mɔɔ menli a yɛle la ayɛlɛ la, Medeanema nee Pɛhyeama honle vale Babelɔn. Wɔ 538 anzɛɛ 537 K.Y.M., Saelɛse mɔɔ lile Babelɔn azo konim lazele Dwuuma kɛ bɛzia bɛhɔ Gyɛlusalɛm bɛhɔzi Nyamenle ɛzonlenlɛ sua ne bieko. Ayezaya hanle ɛhye mɔ nee Gyihova ɛwɔkɛ mɔɔ ɔbɔle kɛ saa bɛsia bɛba Gyɛlusalɛm a, ɔbamaa ye menli ne mɔɔ bɛnlu bɛ nwo la asa aha mɔɔ bɛhyia nwo na yeabɔ bɛ nwo bane la kɔsɔɔti dole ɛkɛ. Nyamenle vɛlɛle bɛ ‘menli mɔɔ mebɔ bɛ memaa me nwo, amaa bɛaye me ayɛlɛ.’ (Aye. 43:21; 44:26-28) Saa nlɔnuma ɛhye mɔ sia ba na bɛbasi Gyihova ɛzonlenlɛ sua ne bieko wɔ Gyɛlusalɛm a, bɛbayɛ daselɛ mɔɔ kile kɛ Gyihova a le nɔhalɛ Nyamenle ne a, na ɔdi ye edwɛkɛ zo dahuu.

12, 13. (a) Nwane mɔ a rabokale Yizilayɛma anwo wɔ Gyihova ɛzonlenlɛ ne anu a? (b) Duzu a bɛkpondɛ bɛavi ‘mboane gyɛne ne’ ɛkɛ wɔ mekɛ mɔɔ bɛlɛboa ‘Nyamenle Yizilayɛ ne’ la ɛ, na anyelazo boni a bɛlɛ a?

¹² Ɛnee menli mɔɔ ɛnle Yizilayɛma la boka maanle fofolɛ ɛhye anwo, na nzinlii menli dɔɔnwo mɔɔ bɛnle Yizilayɛma la hakyile yɛle Dwuuma. (Ɛzela 2:58, 64, 65; Ɛseta 8:17) Ɛnɛ, Gyisɛse ‘mboane gyɛne ne’ anu “menli pemgbenleamgbe bie” ɛlɛfa nɔhalɛlilɛ aboa ‘Nyamenle Yizilayɛ ne’ mɔɔ bɛmɛ a le Keleseɛnema mɔɔ bɛkpokpa bɛ la. (Yek. 7:9, 10; Dwɔn 10:16; Gal. 6:16) Bɛfa Gyihova Alasevolɛ mɔɔ le duma mɔɔ Nyamenle ɛva ɛmaa bɛ la, bɛfɛlɛ menli pemgbenleamgbe ne noko.

¹³ Wɔ Kelaese Ɛvolɛ Apenle Ko Tumililɛ ne anu, ekpunli kpole ne bava anyelielɛ kpole ahilehile kɛzi ɛnee awie le Gyihova Dasevolɛ a ɔde wɔ awieleɛ mekɛ ɛhye anu la anu ahilemenli mɔɔ bɛbadwazo bɛ la. Noko, saa yɛbahola yeayɛ zɔ a, kyesɛ yɛbɔ duma ne mɔɔ la yɛ nwo zo la anwo ɛbɛla na yɛbɔ mɔdenle yɛmaa yɛ nwo kɔ zo te. Bieko, ɔnva nwo mɔdenle biala mɔɔ yɛbabɔ la, ɔwɔ kɛ yɛsɛlɛ evinli mɔɔ kɛha yɛ la anwo ɛtanefakyɛ, na yɛdie yɛto nu kɛ yɛle ɛtanevolɛma na Nyamenle duma ne mɔɔ la yɛ nwo zo la le enililɛ kpole kpalɛ.​​—Bɛgenga 1 Dwɔn 1:8, 9.

MƆƆ NYAMENLE DUMA NE KILE LA

14. Duma Gyihova ne abo kile duzu?

¹⁴ Amaa Nyamenle duma ne mɔɔ la yɛ nwo zo la anwo anyezɔlɛ mɔɔ yɛlɛ ayɛ kpole la, ɔwɔ kɛ yɛdwenledwenle mɔɔ duma ne kile la anwo. “Gyihova” duma ne vi Hibulu yɛkpɔkɛ bie mɔɔ ɔkile “ɔyɛ ɛkɛ” la anu. Yemɔti, bɛnwunle kɛ duma Gyihova ne abo kile kɛ “Ɔmaa Ɔyɛ Ɛkɛ.” Ngilenu ɛhye fɛta Gyihova ɔluakɛ ɔdaye a ɔbɔle debie biala a. Bieko, saa Gyihova ka kɛ ɔyɛ debie bie a, awie biala ɛnrɛhola ɛnrɛzi ye adenle, Seetan bɔbɔ ɛnrɛhola.

15. Duzu a yɛkola yɛsukoa ye wɔ Gyihova duma ne anwo wɔ edwɛkɛ ne mɔɔ ɔhanle ɔhilele Mosisi la anu a? (Nea ɛlɛka “Duma Mɔɔ Lɛ Ngilenu Dɔɔnwo.”)

¹⁵ Gyihova hilehilele ye duma ne anu dɔɔnwo hilele Mosisi. Mekɛ mɔɔ Gyihova zoanle Mosisi kɛ ɔhɔye Ye menli ne ɔvi Yigyibiti la, ɔzele Mosisi kɛ: “Mebayɛ Me Nwo Mɔɔ Mekulo Kɛ Meyɛ La.” Gyihova vale zɔle zo kɛ: “Ka kile Yizilayɛma kɛ, ‘Mebayɛ Me Nwo ɛzoa me bɛ nwo ɛke.’” (Ade. 3:14, NW; ɔ bo ɛkɛ edwɛkɛ ne.) Yemɔti, Gyihova kola kakyi ɔ nwo debie biala ɔfa ɔdi ye bodane nwo gyima. Gyihova hakyile ɔ nwo Dievolɛ, Wowavolɛ, Sinzavolɛ, yɛɛ Maavolɛ ɔmanle Yizilayɛma mɔɔ ɛnee wɔ akɛlɛ ɛzonlenlɛ nu la asa hanle debie biala mɔɔ ɛnee bɛhyia nwo la.

KƐZI YƐKILE ANYEZƆLƐ LA

16, 17. (a) Kɛzi yɛbahile kɛ yɛ nye sɔ nwolɛ adenle mɔɔ yɛnyia kɛ Nyamenle duma la yɛ nwo zo la ɛ? (b) Duzu a yɛbazuzu nwo wɔ edwɛkɛ mɔɔ doa zo la anu a?

¹⁶ Ɛnɛ, Gyihova kɔ zo yɛ ye duma ne anwo gyima ɔmaa yɛ sa ka ninyɛne mɔɔ yɛhyia nwo wɔ sunsum nu nee nwonane nu la. Noko akee, tɛ mɔɔ Nyamenle mumua ne kakyi ɔ nwo yɛ la ala a ye duma ne fane nwo a. Ɔfane mɔɔ ɔdua ye Alasevolɛ ne mɔ anwo zo ɔyɛ ɔmaa ye bodane ba nu la noko anwo. Saa yɛdwenledwenle ɛhye anwo a, ɔbamaa yɛahɔ zo yɛabɔ ye duma ne anwo ɛbɛla. Kɛmɔ Kåre mɔɔ ɛnyia ɛvolɛ 84 na yeva ɛvolɛ 70 yeyɛ Daselɛlilɛ gyima ne wɔ Norway hanle la, ɔse: “Mete nganeɛ kɛ ɔle enililɛ kpole kɛ ɛbazonle Gyihova, damɛnlangoate Belemgbunli ne, na wɔaboka menli ne mɔɔ ye duma nwuanzanwuanza ne la bɛ nwo zo la anwo. Ɔle nwolɛ adenle kpole kɛ ɛbahilehile Baebolo nu nɔhalɛ ne anu wɔahile awie mɔ na wɔanwu kɛ bɛde ɔ bo na bɛ nye ɛlie nwo la. Kɛ neazo la, saa mekilehile gyima mɔɔ Kelaese ɛkpɔnedeɛ ne di nee kɛzi bɛbahola bɛalua zo bɛanyia dahuu ngoane wɔ tenlene ewiade fofolɛ ne mɔɔ anzondwolɛ wɔ nu la anu mekile a, ɔmaa me kunlu dwo me nwo kpalɛ.”

¹⁷ Nɔhalɛ, ɔyɛ se kɛ yɛbanyia menli mɔɔ bɛkulo kɛ bɛsukoa Nyamenle anwo debie la wɔ ɛleka bie mɔ. Noko akee, kɛmɔ Kåre hanle la, saa ɛnyia awie na ɛkola ɛkilehile ye Gyihova duma ne anwo debie a, asoo ɛnli fɛlɛko kpole ɔ? Noko kɛzi yɛbahola yɛayɛ Gyihova Alasevolɛ na mekɛ ko ne ala yɛali Gyisɛse anwo daselɛ ɛ? Yɛbabua kpuyia ɛhye wɔ edwɛkɛ mɔɔ doa zo la anu.