Yɛ Ɛbɛlabɔlɛ Nee Yɛ Ɛzonlenlɛ Nyianu Buluku Ne Anwo Neɛnleanu

MARCH 7-13

NYAMENLE EDWƐKƐ NE AZO NVASOƐ | 1 SAMOƐLE 12-13

“Anwomemaazo Nee Anyiemgba A Lua A”

w00 8/1 13 ¶17

Anwomemaazo Nee Anyiemgba A Lua A

Saa ɛnea mɔɔ zile la a, ɛbaha kɛ mɔɔ Sɔɔlo yɛle la le ye adenle zo. Ɔlua tɛnlabelɛ mɔɔ anu yɛ se mɔɔ ɛnee Nyamenle menli ne wɔ nu la ati, bɛnwunle kɛ “edwɛkɛ ɛdo bɛ” na “bɛ nwo ɛhyele bɛ.” (1 Sa. 13:6, 7) Nɔhalɛ nu, nvonleɛ biala ɛnle nwo kɛ yɛbalimoa yeali ninyɛne bie anwo gyima ndɛndɛ wɔ tɛnlabelɛ bie mɔ anu. Noko kakye kɛ Gyihova nwu mɔɔ wɔ yɛ ahonle nu nee yɛ adwenle nu la amuala. (1 Sa. 16:7) Ɔti ɔbayɛ kɛ ɔnwunle ninyɛne bie mɔ wɔ Sɔɔlo anwo mɔɔ Baebolo ne anga nwolɛ edwɛkɛ a. Kɛ neazo la, bie a Gyihova nwunle kɛ anwomemaazo ti a Sɔɔlo pelele ɔ nwo yɛle ninyɛne a. Bie a ɔdele nganeɛ kɛ ɔnle kɛ Yizilayɛ Belemgbunli le kɛ ɔdaye kendɛ ngapezonli ɛrelera ɛhye mɔɔ ɔ nwo ɛnyɛ ndɛ la, yemɔti ɔvale ɛya. Kɛ ɔde ye biala la, ɛnee Sɔɔlo dwenle kɛ kɛmɔ Samoɛle amba ndɛ la ati ɔle ye adenle zo kɛ ɔbabu ɔ nye yeagua adehilelɛ fɔɔnwo mɔɔ bɛva bɛmaa ye la azo. Duzu a dole ye a? Samoɛle anganvo Sɔɔlo wɔ debie mɔɔ ɔlile ɔ ti anwo ɔyɛle la anwo. Emomu ɔdeanle ye na ɔhanle ɔhilele ye kɛ: “Wɔ belemgbunlililɛ ne ɛnrɛhyɛ . . . ɔluakɛ wɔanli edwɛkɛ mɔɔ Gyihova hanle hilele wɔ la azo.” (1 Sa. 13:13, 14) Ye anwomemaazo ne maanle ɔbɔle anyiemgba.

w07 6/15 27 ¶8

Ɛyɛ Tieyɛ A Gyihova Anye Die

Belemgbunli Sɔɔlo anwo edwɛkɛ ne mɔɔ ɔwɔ Baebolo ne anu la maa yɛnwu kɛ tieyɛ hyia kpalɛ. Mɔɔ bɛziele Sɔɔlo belemgbunli la, ɛnee ɔbɛlɛ ɔ nwo aze na wɔ ɔdaye mumua ne ɔ nye zo ɔnwunle kɛ ‘ɔle ekyi.’ Noko nzinlii anwomemaazo nee adwenle ɛtane vale ye aze. (1 Sa. 10:21, 22; 15:17) Mekɛ bie ɛnee ɔwɔ kɛ Sɔɔlo nee Filisitiama ne kɔ konle. Samoɛle zele ye kɛ ɔhendɛ ye ɔmaa ɔrɛla ɔrabɔ afɔle ɔmaa Gyihova na bɛlie adehilelɛ bɛvi ye ɛkɛ. Noko Samoɛle andwu ɛkɛ ne ndɛ ɔti menli ne bɔle ɔ bo kɛ bɛkɔ. Mɔɔ Sɔɔlo nwunle ɛhye la ɔpelele ɔ nwo “ɔbɔle ɛyelalɛ afɔle ne.” Gyihova anye anlie mɔɔ ɔyɛle la anwo. Nzinlii mɔɔ Samoɛle rale la, belemgbunli ne vale edwɛkɛ yeyele ɔ nloa wɔ anzosesebɛ mɔɔ yeyɛ la anwo na ɔhanle kɛ kɛmɔ Samoɛle amba mekɛ mɔɔ ɔhilele la ati ‘ɔdele nganeɛ kɛ ɔwɔ kɛ ɔbɔ ɛyelalɛ afɔle ne’ na ɔkpondɛ Gyihova anyunlu ɛlolɛ. Wɔ Belemgbunli Sɔɔlo afoa nu, ɛnee afɔlebɔlɛ ne hyia ye kpalɛ tɛla adehilelɛ mɔɔ bɛvale bɛmaanle ye kɛ ɔhendɛ ɔmaa Samoɛle ɛrabɔ afɔle ne la. Samoɛle zele ye kɛ: “Wɔli ngoaseasɛm. Wɔanli mɛla mɔɔ Gyihova wɔ Nyamenle ne vale maanle wɔ la azo.” Gyihova anwo anzosesebɛ mɔɔ Sɔɔlo yɛle la maanle ye belemgbunlililɛ ne vile ɔ sa.​—1 Sa. 10:8; 13:5-13.

MARCH 14-20

NYAMENLE EDWƐKƐ NE AZO NVASOƐ | 1 SAMOƐLE 14-15

“Tieyɛ Le Kpalɛ Tɛla Afɔlebɔlɛ”

w07 6/15 26 ¶4

Ɛyɛ Tieyɛ A Gyihova Anye Die

Debie biala mɔɔ yɛlɛ ye la vi Gyihova mɔɔ ɔbɔle ninyɛne kɔsɔɔti la ɛkɛ. Saa ɔle zɔ a, ɛnee duzu a yɛbahola yɛava yɛamaa ye a? Yɛbahola yɛava debie mɔɔ sonle bolɛ kpalɛ la yɛamaa ye. Duzu debie ɔ? Mualɛ ne wɔ folɛdulɛ ɛhye anu: “Me ra, nwu nrɛlɛbɛ, na maa me ahonle ɛli fɛlɛko, amaa meahola meabua ahenle mɔɔ tendɛ tia me la.” (Mrɛ. 27:11) Yɛkola yɛkpa kɛ yɛbadie Gyihova. Ɔwɔ nuhua kɛ yɛ tɛnlabelɛ nee ɛleka mɔɔ yɛvi la le ngakyile ɛdeɛ, noko saa yɛtie Gyihova a, ɛnee yɛ nuhua ko biala ɛlɛbua ɛzonle mɔɔ Seetan Abɔnsam ɛdo yɛ kɛ dasanli biala ɛnrɛhola ɛnrɛli nɔhalɛ ɛnrɛmaa Gyihova wɔ sɔnea nu la kɛ ɔle adalɛ. Nea nwolɛ adenle kɛnlɛma mɔɔ yɛnyia a!

it-2 521 ¶2

Tieyɛ

Yɛnrɛhola yɛnrɛva debie biala yɛnrɛzie tieyɛ agyakɛ anu, yɛɛ saa yɛanyɛ tieyɛ a yɛnrɛnyia Nyamenle anyunlu ɛlolɛ. Samoɛle zele Belemgbunli Sɔɔlo kɛ: “Asoo Gyihova anye die ɛyelalɛ afɔlebɔdeɛ nee afɔlebɔlɛ nwo kpole tɛla kɛ bɛkɛdie [sha·maʽʹ] Gyihova ane ɔ? Nea! Tieyɛ [Giliki nu, ɛtie edwɛkɛ] le kpalɛ tɛla afɔlebɔlɛ, yɛɛ ɛyɛ ɛnzolɛ ɛtie edwɛkɛ a ɔtɛla mboane nyinli ɛnlome.” (1 Sa. 15:22) Saa yɛanyɛ tieyɛ a ɔkile kɛ yɛkpo Gyihova edwɛkɛ ne, na yɛlɛda ye ali kɛ yɛnlie yɛnli, yɛnlɛ nuhua anwodozo anzɛɛ yɛnlie edwɛkɛ ne nee ye Kɛlɛvolɛ ne yɛnli. Ɔti awie mɔɔ ɔnyɛ tieyɛ la le kɛ awie mɔɔ ɔkɔ abisadeɛ anzɛɛ ɔsonle awozonle ala la. (1 Sa. 15:23; fa toto Wlo. 6:16 anwo.) Yɛka kɛ yɛdie debie bie yɛto nu na yɛanyɛ nwolɛ ɛhwee a ɔle mgbane; nwolɛ ɛhwee mɔɔ yɛanyɛ la kile kɛ yɛnlie ahenle mɔɔ ɔhanle edwɛkɛ ne la yɛnli yɛɛ yɛmbu ye. (Mat. 21:28-32) Menli mɔɔ bɛtie Nyamenle anwo nɔhalɛ edwɛkɛ ne ala na bɛnli zo la fa adalɛ nzuzulɛ bɛlɛbɛla bɛ nwo na bɛnrɛnyia nyilalɛ biala. (Gye. 1:22-25) Gyisɛse maanle ɔlale ali wienyi kɛ menli mɔɔ bɛyɛ bɛ ninyɛne bɛmaa ɔsɔho mɔɔ Baebolo ne ka noko akee bɛnyɛ ye wɔ adenle fɔɔnwo ne mɔɔ bɛhile azo la, anzɛɛ bɛnva adwenle kpalɛ bɛnyɛ la agyakɛ ba ɛnrɛtia Belemgbunlililɛ ne anu, bɛbavoa bɛ muala.​—Mat. 7:15-23.

Kpondɛ Baebolo Nu Ndelebɛbo

it-1 493

Anwunvɔnezelɛ

Yɛ nwo mɔɔ yɛbapele yɛaze anwunvɔne wɔ mekɛ mɔɔ ɔtia Nyamenle mɛla la nee ngyegyelɛ lua. Ɛhye bie a dole Belemgbunli Sɔɔlo la. Gyihova zele ye kɛ ɔhɔzɛkye Amalɛkema, ɔluakɛ bɛdabɛ a bɛlimoale bɛdwazole bɛtiale Yizilayɛma wɔ mekɛ mɔɔ bɛvi Yigyibiti bɛlɛba la a. Bɛzele Sɔɔlo kɛ ɔmmase awie biala anwunvɔne. Noko ye maanlema ne piepianle ye maanle ɔbulule Gyihova mɛla zo bɔkɔɔ. Ɔlua ɛhye ati a Gyihova kpole Sɔɔlo kɛ belemgbunli la. (1 Sa. 15:2-24) Saa yɛbu Gyihova ndenle kɛ bɛtenrɛ dahuu na yɛmaa nɔhalɛ mɔɔ yɛdi yɛamaa ye la dimoa debie biala mɔɔ yɛyɛ la anyunlu a, yɛnrɛyɛ nvonleɛ mɔɔ Sɔɔlo yɛle na Gyihova kpole ye la bie na yɛanyia Gyihova anyunlu ɛlolɛ.

MARCH 21-27

Kpondɛ Baebolo Nu Ndelebɛbo

it-2 871-872

Sɔɔlo

Mɔɔ ɛhye zile nee mekɛ mɔɔ bɛkpokpale Devidi kɛ Yizilayɛ belemgbunli la anzi yɛɛ Gyihova sunsum ne vile Sɔɔlo anwo zo a. Ɔvi mekɛ zɔhane “Gyihova maanle sunsum ɛtane bie ragyegyele ye.” Kɛmɔ ɛnee Gyihova ɛye ye sunsum ne ɛvi Sɔɔlo anwo zo la ati, ɔmaanle sunsum ɛtane bie nyianle ɔ nwo zo tumi, ɔzɛkyele ye anzodwolɛ na ye nganeɛdelɛ nee ye nzuzulɛ hanle ye ɛzulolɛ yɛɛ ɛnee ɔndwenle ninyɛne mgbalɛ nwo. Ɛnee Sɔɔlo adwenle nee ye ahonle nu nzuzulɛ ɛnle kpalɛ yɛɛ ɛnee Gyihova sunsum ne ɛmbɔ ɔ nwo bane anzɛɛ ɛnzi ye adenle, ɔti a yeangola yɛayɛ tieyɛ yeammaa Gyihova la. Noko akee, kɛmɔ Gyihova maanle adenle maanle “sunsum ɛtane” ne rale ɔ nwo zo na ɔgyegyele ye la ati, ɔle kɛ asɛɛ “sunsum ɛtane” ne vi Nyamenle, ɛhye ati a Sɔɔlo azonvolɛ ne mɔ hanle kɛ, Nyamenle ɛmaa “sunsum ɛtane bie ɛlɛgyegye” Sɔɔlo la. Ɔlua ye azonvolɛ ne mɔ ko nzuzulɛ zo, Sɔɔlo zɛlɛle maanle bɛvale Devidi bɛrale amaa mekɛ biala mɔɔ Nyamenle kɛmaa “sunsum ɛtane ne” kɛra ɔ nwo zo la, yeabɔ edwɛne yeamaa ɔ nwo adɔ ye.​—1 Sa. 16:14-23; 17:15.

MARCH 28–APRIL 3

NYAMENLE EDWƐKƐ NE AZO NVASOƐ | 1 SAMOƐLE 18-19

“Kɔ Zo Bɛlɛ Ɛ Nwo Aze Wɔ Mekɛ Mɔɔ Ɔkɛwie Wɔ Boɛ La”

w04 4/1 15 ¶4

Maa Nyamenle Sunsum Ne Ɛboa Wɔ Wɔ Mekɛ Mɔɔ Ɛbɛlabɔlɛ Ne Bahakyi La

Wɔ mekɛ ekyi anu, mboaneneavolɛ kakula nrenyia ɛhye balie duma wɔ maanle ne anu amuala. Bɛvɛlɛle ye kɛ ɔrazonle belemgbunli ne na ɔbɔ edwɛne ɔmaa ye. Ɔhunle Golayate, konle nu katakyie mɔɔ ɔ nwo ɛzulolɛ ti Yizilayɛ sogyama mɔɔ ze ko bɔbɔ la ahonle dule kɛ bɛkɛgyinla ɔ nyunlu la. Bɛvale Devidi bɛlile ɛlɔnema ne anyunlu noko ɔholale ɔlile Filisitiama anwo zo konim bɔkɔɔ. Ɛnee menli ne kulo ye edwɛkɛ. Bɛhyehyɛle edwɛne bɛhanvole ye. Ɛnee Belemgbunli Sɔɔlo folɛtuvolɛ ko ɛlimoa ɛha Devidi anwo edwɛkɛ kɛ ‘awie mɔɔ ze haape bɔ kpalɛ, ɔlɛ akɛnrasesebɛ, ɔle konle nu katakyie, ɔze tendɛ kpalɛ yɛɛ ɔ nwo yɛ fɛ, na Gyihova nee ye lua.’​—1 Sa. 16:18; 17:23, 24, 45-51; 18:5-7.

Kpondɛ Baebolo Nu Ndelebɛbo

it-2 695-696

Ngapezonli

Bɛdua Gyihova sunsum ne azo a bɛkpa bɛ ɛdeɛ, noko tɛ mekɛ ne amuala a sunsum ne ka bɛ maa bɛtendɛ a. Emomu, Nyamenle sunsum ne ba bɛ nwo zo wɔ mekɛ bie mɔ anu na ɔkile bɛ edwɛkɛ mɔɔ ɔwɔ kɛ bɛka a. (Yiz. 11:4, 5; Maeka 3:8) Ɔle debie mɔɔ ɔyɛ nwanwane kpalɛ, sunsum ne ka bɛ maa bɛtendɛ. (1 Sa. 10:10; Gyɛ. 20:9; Emɔso 3:8) Ninyɛne mɔɔ bɛyɛ la yɛ azibɛnwo, yɛɛ kɛzi bɛka bɛ edwɛkɛ ne la da ye ali kɛ tɛ bɛdabɛ mumua ne bɛ nzuzulɛ nee bɛ nganeɛdelɛ a bɛgyinla zo bɛtendɛ a. Ndelebɛbo ɛhye maa yɛte deɛmɔti Baebolo ne ka menli bie mɔ anwo edwɛkɛ kɛ “bɛbɔle ɔ bo bɛyɛle bɛ nyɛleɛ kɛ ngapezoma la” abo kpalɛ. (1 Sa. 10:6-11; 19:20-24; Gyɛ. 29:24-32; fa toto Gyi. 2:4, 12-17; 6:15; 7:55 anwo.) Bɛfa bɛ adwenle amuala bɛsie bɛ gyima ne azo yɛɛ bɛda akɛnrasesebɛ kpole ali ɔti ɔmaa bɛyɛ bɛ ninyɛne ngakyile, ɔdwu mekɛ ne bie bɔbɔ a ɛbaha kɛ nrɛlɛbɛ ɛnle mɔɔ bɛyɛ la anu. Ɛhye anwo neazo a le ngapezonli bie mɔɔ ɔhɔvindele sogya mgbanyima nyunlu wɔ mekɛ mɔɔ bɛkpokpale Gyihu la. Noko mɔɔ bɛnwunle kɛ ɔle ngapezonli la bɛdiele ye edwɛkɛ ne anyebolo zo. (2 Arl. 9:1-13; fa toto Gyi. 26:24, 25 anwo.) Mɔɔ Sɔɔlo doa Devidi kɛ ɔku ye la, bɛmaanle ɔdaye noko ɔyɛle ye nyɛleɛ kɛ ngapezonli la, eza ɔyeyele ye adɛladeɛ ne na ɔlɛle ɔ nwo zɔ ɔlale ɛkɛ ne alehyenlɛ nee aledwolɛ ne amuala na Devidi holale nriandile hɔle. (1 Sa. 19:18–20:1) Ɛhye ɛngile kɛ ɛnee ngapezoma ne ta yeye bɛ nwo anzɛɛ dɛ bɛ nwo zɔ. Neazo gyɛne nwiɔ mɔɔ wɔ Baebolo ne anu la maa yɛnwu bodane mɔɔ ɔti ngapezonli ne lɛle ɔ nwo zɔ la, ɔvale ɔlile ye ngapezo ne foa bie anwo gyima. (Aye. 20:2-4; Maeka 1:8-11) Bɛanga deɛmɔti Sɔɔlo lɛle ɔ nwo zɔ la anwo edwɛkɛ​—bie a bɛfa bɛahile kɛ ɔle sonla ala, anzɛɛ bɛlie ye belemgbunlililɛ ne, anzɛɛ bɛfa bɛahile kɛ saa ɛfa ye ɛtoto Gyihova tumi mɔɔ ɔlɛ ye la anwo a ɔndwu ɛhwee, anzɛɛ ndelebɛbo gyɛne bie ati ɔ.

APRIL 4-10

NYAMENLE EDWƐKƐ NE AZO NVASOƐ | 1 SAMOƐLE 20-22

“Kɛzi Bɛyɛ Agɔnwolɛ Kpalɛ La”

w08 2/15 8 ¶7

Dua Gyihova Ndenle Ne Mɔ Anu

Nyamenle kulo kɛ yɛyɛ agɔnwolɛma mɔɔ yɛdi nɔhalɛ. (Mrɛ. 17:17) Belemgbunli Sɔɔlo ara Dwɔnatan vale Devidi agɔnwolɛ. Mɔɔ Dwɔnatan dele kɛ Devidi ɛhu Golayate la, “Dwɔnatan nee Devidi yɛle agɔnwolɛ kyengye, na Dwɔnatan hulole ye kɛ ɔdaye ɔ nwo la.” (1 Sa. 18:1, 3) Mɔɔ ɛnee Sɔɔlo kpondɛ kɛ ɔku Devidi la, Dwɔnatan hanle nwolɛ edwɛkɛ hilele Devidi. Devidi nriandile la anzi, Dwɔnatan hɔkpondɛle ye na ɔ nee ye yɛle ngyekyeleɛ. Mɔɔ Sɔɔlo dele kɛ Dwɔnatan nee Devidi ɛhɔdendɛ la anrɛɛ ɔku Dwɔnatan noko ɔziale ɔhɔkpondɛle Devidi na bɛmianle bɛ agɔnwolɛvalɛ ne anu. (1 Sa. 20:24-41) Mekɛ mɔɔ li awieleɛ mɔɔ Dwɔnatan nee Devidi yiale la, Dwɔnatan boale Devidi “ɔmaanle ɔnyianle anwosesebɛ wɔ Gyihova anu.”​—1 Sa. 23:16-18.

w09 10/15 19 ¶11

Agɔnwolɛvalɛ Wɔ Ewiade Mɔɔ Ɛlɔlɛ Ɛnle Nu La Anu

Di nɔhalɛ. Sɔlɔmɔn hɛlɛle kɛ: “Agɔnwolɛ kpalɛ da ɛlɔlɛ ali mekɛ biala yɛɛ ɔle adiema mɔɔ bɛwo ye bɛmaa anwongyelelɛ mekɛ.” (Mrɛ. 17:17) Ɔbayɛ kɛ mekɛ mɔɔ Sɔlɔmɔn hɛlɛle edwɛkɛ ɛhye la ɛnee ye papa Devidi nee Dwɔnatan agɔnwolɛvalɛ ne wɔ ye adwenle nu. (1 Sa. 18:1) Ɛnee Belemgbunli Sɔɔlo kulo kɛ ɔ ra Dwɔnatan di ye agya kɛ Yizilayɛ belemgbunli. Noko Dwɔnatan liele dole nu kɛ Devidi a Gyihova ɛkpa ye kɛ ɔle belemgbunli ne a. Dwɔnatan anye ambolo Devidi kɛ mɔɔ Sɔɔlo yɛle la. Mɔɔ bɛhanvole Devidi la yeandwe nungule yɛɛ yeanlie adalɛ edwɛkɛ mɔɔ Sɔɔlo hanle vanenle Devidi anwo la yeanli. (1 Sa. 20:24-34) Asoo yɛle kɛ Dwɔnatan? Saa yɛ gɔnwo mɔ nyia nwolɛ adenle bie mɔ a, yɛ nye die ɔ? Saa bɛkɔ ngyegyelɛ nu a asoo yɛboa bɛ na yɛkyekye bɛ rɛle? Saa yɛte bɛ nwo adalɛ edwɛkɛ bie a, yɛdie yɛdi ɛkɛ ne ala ɔ? Anzɛɛ yɛgyinla yɛ gɔnwo mɔ anzi kɛ mɔɔ Dwɔnatan yɛle la?

Kpondɛ Baebolo Nu Ndelebɛbo

w05 3/15 24 ¶4

Samoɛle Buluku Ne Mɔɔ Limoa La Anu Edwɛkɛ Titili

1 Sa. 21:12, 13. Gyihova kulo kɛ yɛfa yɛ adwenle nee yɛ nrɛlɛbɛ yɛyɛ gyima yɛdi ngyegyelɛ mɔɔ yɛyia ye la anwo gyima. Yeva ye Edwɛkɛ ne mɔɔ bɛluale sunsum ne azo bɛhɛlɛle la yemaa yɛ na ɔmaa yɛnwu nrɛlɛbɛ, yɛnyia nwunu nee adwenle kpalɛ. (Mrɛ. 1:4) Eza yɛlɛ asafo nu mgbanyima mɔɔ bɛboa yɛ la noko.

APRIL 18-24

NYAMENLE EDWƐKƐ NE AZO NVASOƐ | 1 SAMOƐLE 23-24

“Si Abotane Kendɛ Gyihova”

w04 4/1 16 ¶8

Maa Nyamenle Sunsum Ne Ɛboa Wɔ Wɔ Mekɛ Mɔɔ Ɛbɛlabɔlɛ Ne Bahakyi La

Devidi anyɛ Sɔɔlo ɛtane biala. Ɔlale ye ali kɛ ɔlɛ diedi nee abotane na ɔgyakyile edwɛkɛ ne anu ɔmaanle Gyihova. Mɔɔ belemgbunli ne vi bodane ne anu vindele la, Devidi zele ye kɛ: “Gyihova ɛbua me nee wɔ avinli ndɛne, na Gyihova ɛli wɔ nzenralɛ ɛmaa me, na mame, menrɛva me sa menrɛha wɔ.” (1 Sa. 24:12) Ɛnee ɔze kɛ mɔɔ Sɔɔlo ɛlɛyɛ la ɛnle kpalɛ, noko Devidi anli nzenralɛ; yɛɛ yeandendɛ ɛtane yeantia ye anzɛɛ yeanga ɔ nwo edwɛkɛ ɛtane biala. Devidi homonle ɔ nwo zo fane dɔɔnwo amaa yeangyinla ye nganeɛdelɛ zo yeanyɛ debie. Emomu ɔvale ɔ nwo ɔdole Gyihova anwo zo kɛ Gyihova mumua ne ɛli ninyɛne nwo gyima.​—1 Sa. 25:32-34; 26:10, 11.

w04 6/1 22-23

Asoo Tɛnlabelɛ Mɔɔ Ɛwɔ Nu La Ka Kɛzi Ɛbɔ Wɔ Ɛbɛla La Ɔ?

Ɛzukoalɛdeɛ mɔɔ tɔ zo nsa la a le kɛ, ɔnle kɛ yɛbulu Nyamenle mɛla zo yɛfa yɛdi tɛnlabelɛ bie anwo gyima, ɔwɔ kɛ yɛkendɛ Gyihova. Ɛzoanvolɛ Gyemise hɛlɛle kɛ: “Bɛmaa kpundiigyinlanlɛ ɛwie ye gyima, amaa bɛali munli bɔkɔɔ mɔɔ edwɛkɛ biala ɛnle bɛ nwo wɔ ninyɛne kɔsɔɔti anu, na bɛangyia debie biala anwo.” (Gye. 1:4) Saa yɛgyinla sɔnea ne anloa yɛkɔ awieleɛ na yɛanva adenle mɔɔ Gyihova ɛnlie ɛndo nu la azo yɛampɛ zolɛ a, ɛnee yɛlɛmaa ‘kpundiigyinlanlɛ awie ye gyima.’ Ɛhye bamaa yɛ diedi ne mɔɔ bɛzɔ bɛnlea la ayɛ se kpalɛ. Dwosefi nee Devidi gyinlanle kpundii wɔ sɔnea nu. Bɛanyɛ debie biala mɔɔ bamaa Gyihova ava bɛ nwo ɛya la kɛ bɛfa bɛali bɛ ngyegyelɛ ne anwo gyima. Bɛbɔle mɔdenle bɛyɛle ninyɛne mɔɔ ɔbaboa bɛ yeamaa bɛagyinla bɛ tɛnlabelɛ ne anloa la. Bɛhendɛle Gyihova ɔti bɛnyianle nyilalɛ dɔɔnwo. Gyihova luale bɛ nwo zo liele ye menli ne, eza ɔluale bɛ nwo zo ɔhilele ye menli ne adenle.​—Gyn. 41:39-41; 45:5; 2 Sa. 5:4, 5.

Yɛdayɛ noko yɛbahola yɛahɔ tɛnlabelɛ bie mɔ anu mɔɔ wɔannea a yɛbava adenle mɔɔ Gyihova ɛngulo la azo kɛ yɛfa yɛali nwolɛ gyima. Kɛ neazo la, asoo ɛ sa nu ɛdo ɔluakɛ ɛtɛnyianle awie mɔɔ ɔbagya wɔ la ati ɔ? Saa ɔle zɔ a, ɛnee nea boɛ na wɔambulu Gyihova adehilelɛ mɔɔ ɔse yɛgya “Awulae anu ala” la azo. (1 Kɔl. 7:39) Ɛlɛyia ngyegyelɛ wɔ wɔ agyalɛ nu ɔ? Kɛ anrɛɛ ɛbazukoa ewiade ne na wɔapele ɛ nwo kɛ ɛtete nu anzɛɛ ɛbɔ ewole la, ɛ nee ɛ hu anzɛɛ ɛ ye ɛbɔ nu ɛli ngyegyelɛ ne anwo gyima. (Mal. 2:16; Ɛfɛ. 5:21-33) Ɔyɛ se ɔmaa wɔ kɛ ɛbanlea wɔ abusua ne ɔluakɛ ɛnlɛ ezukoa la ati ɔ? Kendɛ Gyihova na kpo ndenle anzɛɛ gyimalilɛ ngakyile mɔɔ ɔtia mɛla mɔɔ ɛbava zo wɔanyia ezukoa la amuala. (Edw. 37:25; Hib. 13:18) Nɔhalɛ nu, ɔwɔ kɛ yɛ muala yɛyɛ mɔɔ ɔtenrɛ la wɔ yɛ tɛnlabelɛ ne mɔ anwo amaa Gyihova anyia debie agyinla zo ayila yɛ. Mɔɔ yɛgua zo yɛlɛyɛ zɔ la bɛmaa yɛsika yɛ bo kɛ yɛbahendɛ Gyihova yeamaa yeali nwolɛ gyima bɔkɔɔ yeamaa yɛ.​—Maeka 7:7.