Asoo Baka Mɔɔ Bɛpɛ La Bafifi Bieko?

SAA ɛfa ɔlivi baka kpole mɔɔ ɛkpo na yehyibehyiba la ɛtoto Lɛbanɔn sida baka kpole kɛnlɛma nwo a, ɛ nye ɛnrɛlie ɔlivi ne anwo. Noko ɔyɛ nwanwane kɛ ɔlivi mbaka kola nyi wɔ tɛnlabelɛ mɔɔ ɛnle kpalɛ bɔbɔ la anu. Bie mɔ ɛli ɛvolɛ kɛyɛ 1,000. Ɔlivi baka ndinli ne mɔ kola kɔ moa kpalɛ wɔ azɛlɛ ne abo, na ɛhye ati saa ye baka ne wu bɔbɔ a, ɔkola ɔfifi bieko. Suzu amgba ala mɔɔ ndinli ne mɔ ɛtɛwule la, ɔbafifi bieko.

Ɛnee nɔhavo Dwobu lɛ anwodozo kɛ saa ɔwu bɔbɔ a, ɔbadɛnla ngoane nu bieko. (Dwobu 14:13-15) Bie a ɔvale ɔlivi baka ɔyɛle neazo ɔhilele anwodozo mɔɔ ɔlɛ wɔ Nyamenle anu kɛ ɔbahola yeadwazo ye yeara ngoane nu la. Dwobu hanle kɛ: “Ɔluakɛ baka bɔbɔ lɛ anyelazo, kɛ bɛpɛ ye bɔbɔ a, ɔbafifi bieko.” Saa wawaa ne pɛ nu na ezule tɔ a, ɔlivi dosinli mɔɔ ɛwu la bafifi bieko ayeye “ngane kɛ baka ekyi la.”​—Dwobu 14:7-9.

Kɛmɔ ɛyazonlɛnli anye la kɛ ɔlivi baka mɔɔ bɛpɛ la bafifi bieko la, zɔhane ala a Gyihova Nyamenle anye la kɛ ɔbadwazo ye azonvolɛ nee menli dɔɔnwo yeara ngoane nu a. (Mat. 22:31, 32; Dwɔn 5:28, 29; Gyi. 24:15) Nea kɛzi yɛ nye balie wɔ mekɛ mɔɔ yɛbanwu kɛ bɛdwazo mɔwuamra bɛra ngoane nu bieko la a!