Kɛzi Ngoane Bɔle Ɔ Bo Ɛ?

“[Nyamenle] ɛkɛ ne a ngoane vi a.” (Edwɛne 36:9) Ɛdie ɛdi ɔ? Bie mɔ ka kɛ bɛambɔ ngoane. Saa ɔle zɔ a, ɛnee ɔkile kɛ yɛrale mgbane ala. Noko saa Gyihova Nyamenle bɔle ngoane a, ɛnee bodane bie ati ɔ, ɔnle zɔ ɔ?a Sukoa mɔɔ Baebolo ne ka ye wɔ kɛzi ngoane bɔle ɔ bo nee deɛmɔti ɛbahola wɔalie wɔali la.

1. Kɛzi anwuma nee aze bɔle ɔ bo ɛ?

Baebolo ne ka kɛ: “Mɔlebɛbo ne Nyamenle bɔle anwuma nee aze.” (Gyɛnɛsese 1:1) Abɔdeɛ nwo nrɛlɛbɛvolɛma dɔɔnwo die to nu kɛ anwuma nee aze lɛ ye mɔlebɛbo. Kɛzi Nyamenle bɔle anwuma nee aze ɛ? Ɔluale sunsum nwuanzanwuanza ne, mɔɔ le ye “gyimayɛlɛ tumi ne” la azo ɔbɔle debie biala mɔɔ wɔ anwuma nee aze, yɛɛ nwɔlɔra ekpunli ngakyile nee pelanet ne mɔ.​—Gyɛnɛsese 1:2.

2. Duzu ati a Nyamenle bɔle azɛlɛ ne a?

Gyihova ‘ambɔ azɛlɛ ye mgbane, emomu ɔbɔle kɛ bɛdɛnla zo.’ (Ayezaya 45:​18) Ɔbɔle azɛlɛ ne ɔmaanle ɔyɛle ɛleka kɛnlɛma mɔɔ alesama badɛnla ɛkɛ dahuu a. (Kenga Ayezaya 40:​28; 42:5.) Abɔdeɛ nwo nrɛlɛbɛvolɛma ka kɛ azɛlɛ ne le ngakyile. Ɔ ngomekye a ɔle pelanet mɔɔ bɛnwu kɛ alesama bahola adɛnla zolɛ a.

3. Duzu a maa sonla yɛ ngakyile fi nane nwo a?

Gyihova bɔle azɛlɛ ne wiele la, ɔbɔle abɔdeɛ mɔɔ ngoane wɔ bɛ nu la ɔguale zo. Mɔɔ limoa la, ɔbɔle ndile nee mbaka yɛɛ nane ngakyile ɔguale zo. Akee “Nyamenle bɔle sonla kɛ ye ɛsaso.” (Kenga Gyɛnɛsese 1:​27.) Duzu a maa sonla yɛ ngakyile a? Kɛmɔ Nyamenle bɔle yɛ kɛ ye ɛsaso la ati, yɛkola yɛda ye subane ne mɔ, mɔɔ bie a le ɛlɔlɛ nee pɛlepɛlelilɛ la ali. Eza ɔbɔle yɛ wɔ adenle mɔɔ maa yɛkola yɛsukoa aneɛ, yɛ nye die ninyɛne ngɛnlɛma yɛɛ edwɛne nwo a. Yɛɛ yɛnle kɛ nane la ati, yɛkola yɛsonle yɛ Bɔvolɛ ne.

SUKOA DƆƆNWO

Nea daselɛ mɔɔ kile kɛ bɛbɔle ngoane ɔti abɔdeɛ nwo edwɛkɛ mɔɔ wɔ Baebolo ne anu le nɔhalɛ la. Sukoa mɔɔ alesama subane maa yɛnwu ye wɔ Nyamenle anwo la.

4. Bɛbɔle ngoane

Saa menli nea abɔdeɛ zo yɛ ninyɛne a bɛkanvo bɛ wɔ nwo. Ɔti nwane a ɔwɔ kɛ bɛkanvo ye wɔ deɛ mɔɔ bɛnleanle zolɛ la anwo a? Ye VIDIO ne, na akee bɛzuzu kpuya ɛhye anwo.

VIDIO: Nyamenle Anu Diedi (2:43)

• Duzu a menli mɔɔ yɛ ninyɛne la ɛnlea abɔdeɛ zo ɛyɛ bie a?

Sua biala awie a hyehyɛ na ɔsi a. Noko nwane a bɔle ninyɛne kɔsɔɔti a? Kenga Hibuluma 3:​4, na akee bɛzuzu kpuya ɛhye mɔ anwo:

• Ninyɛne mɔɔ Nyamenle ɛbɔ la boni mɔ a ɛ nye die nwo a?

• Asoo ndelebɛbo wɔ nu kɛ ɛbalie wɔali kɛ bɛbɔle anwuma nee aze yɛɛ debie biala mɔɔ wɔ nu la? Duzu ati ɔ?

Asoo ɛze?

Ɛbahola wɔanwu edwɛkɛ nee vidio mɔɔ fale edwɛkɛtile ɛhye anwo la wɔ jw.org edwɛkɛ mɔɔ ba toɔdoa zo mɔɔ se “Asoo Awie A Yɛle A?” nee “Ngoane Ɛvileka” foa ne.

“Nɔhalɛ nu, sua biala awie a si a, na ahenle mɔɔ yɛle ninyɛne kɔsɔɔti la a le Nyamenle”

5. Ɛbahola wɔalie ninyɛnebɔlɛ nwo edwɛkɛ mɔɔ wɔ Baebolo ne anu la wɔali

VIDIO: Asoo Bɛbɔle Ewiade Ne?​—Foa Bie (3:51)

• Asoo Baebolo ne kilehile kɛ bɛvale kenle nsia mɔɔ ko biala le dɔnehwele 24 la a bɛbɔle azɛlɛ ne nee abɔdeɛ mɔɔ wɔ zo la ɔ?

• Ɛnea a ninyɛnebɔlɛ nwo edwɛkɛ mɔɔ wɔ Baebolo ne anu la le nɔhalɛ yɛɛ ndelebɛbo wɔ nu ɔ? Nzɔne ati ɔ?

Kenga Gyɛnɛsese 1:​1, na akee bɛzuzu kpuya ɛhye anwo:

• Abɔdeɛ nwo nrɛlɛbɛvolɛma ka kɛ anwuma nee aze lɛ ye mɔlebɛbo. Saa ɛfa mɔɔ bɛka la ɛtoto mɔɔ wɔgenga ye kɛkala wɔ Baebolo ne anu la anwo a, kɛzi ɛnwu ye ɛ?

Bie mɔ ɛngola ɛnnwu ye saa Nyamenle luale ngakyihakyililɛ zo a bɔle ninyɛne a. Kenga Gyɛnɛsese 1:​21, 25, 27, na akee bɛzuzu kpuya ɛhye mɔ anwo:

• Asoo Baebolo ne kilehile kɛ Nyamenle yɛle debie ko yɛɛ ɔmaanle ɔhakyihakyile ɔyɛle fɛlɛ, nane ngakyile yɛɛ sonla ɔ? Anzɛɛ ɔbɔle abɔdeɛ ngakyile kɛ mɔɔ bɛ “ɛsaso” de la?b

6. Sonla le Nyamenle abɔdeɛ mɔɔ le ngakyile

Yɛnle kɛ nane mɔɔ Gyihova ɛbɔ la. Kenga Gyɛnɛsese 1:​26, na akee bɛzuzu kpuya ɛhye anwo:

• Kɛmɔ Nyamenle bɔle yɛ kɛ ye ɛsaso la ati, duzu a ɛlɔlɛ nee anwunvɔnezelɛ mɔɔ yɛda ye ali la maa yɛnwu ye wɔ subane mɔɔ Nyamenle lɛ la anwo a?

EDWƐKƐ TITILI

Gyihova bɔle anwuma nee aze yɛɛ abɔdeɛ kɔsɔɔti mɔɔ ngoane wɔ bɛ nu la.

Ndinu

• Duzu a Baebolo ne kilehile wɔ kɛzi anwuma nee aze bɔle ɔ bo la anwo a?

• Asoo Nyamenle yɛle debie ko yɛɛ ɔmaanle ɔhakyihakyile ɔyɛle abɔdeɛ ngakyile a, anzɛɛ ɔbɔle bɛ muala?

• Duzu a maa sonla yɛ ngakyile a?

KPONDƐ DƆƆNWO

Abɔdeɛ kile kɛ Bɔvolɛ bie wɔ ɛkɛ.

“Duzu A Abɔdeɛ Maa Ɔda Ali A?” (Awake!, September 2006)

Nea kɛzi selɛ bie bahola ahilehile ninyɛnebɔlɛ nwo edwɛkɛ mɔɔ wɔ Baebolo ne anu la anu ahile ɔ ra kakula nrenyia la.

‘Gyihova A . . . Bɔle Ninyɛne Kɔsɔɔti A’ (2:​37)

Nea saa ngakyihakyililɛ nee mɔɔ Baebolo ne ka la le ko a?

“Asoo Nyamenle Luale Ngakyihakyililɛ Zo A Bɔle Abɔdeɛ Ngakyile Mɔɔ Ngoane Wɔ Nu La A?” (Edwɛkɛ mɔɔ wɔ jw.org azo)

Nea saa nane mbowule anzɛɛ neɛnleanu mɔɔ abɔdeɛ nwo nrɛlɛbɛvolɛma ɛyɛ la kile kɛ bɛbɔle ngoane anzɛɛ ɔrale mgbane ala a.

Kɛzi Ngoane Bɔle Ɔ Bo La​—Kpuya Nnu Mɔɔ Ɔfɛta Kɛ Ɛbiza (buluku)

1. Duzu ati a ɔwɔ kɛ yɛ nye die ngoane nwo a?

Ɔwɔ kɛ yɛ nye die ngoane nwo ɔluakɛ ɔle ahyɛlɛdeɛ mɔɔ yɛ ɛlɔlɛ Selɛ, Gyihova ɛva ɛmaa yɛ a. Ye “ɛkɛ ne a ngoane vi a”​—ɔdaye a ɔbɔle ngoane kɔsɔɔti a. (Edwɛne 36:9) “Ɔdaye a ɔmaa menli kɔsɔɔti ngoane nee ɛnwomenle nee debie biala a.” (Gyima ne 17:​25, 28) Gyihova maa yɛnyia mɔɔ yɛhyia nwo amaa yɛadɛnla ngoane nu la. Eza noko ɔbɔ yɛ ngoane nwo bane amaa yɛ nye alie wɔ ɛbɛlabɔlɛ nu.​—Kenga Gyima ne 14:17.