ƐZUKOALƐDEƐ 33
Mɔɔ Belemgbunlililɛ Ne Bayɛ La
Nyamenle Belemgbunlililɛ ne ɛbɔ ɔ bo ɛlɛdi tumi. Ɔnrɛhyɛ ɔbayɛ nzenzaleɛ dɔɔnwo wɔ azɛlɛ ye azo. Maa yɛnlea ninyɛne mgbalɛ bie mɔ mɔɔ ɛ nye bahola ala kɛ ɛbanwu ye wɔ Belemgbunlililɛ ne tumililɛ bo la.
1. Kɛzi Nyamenle Belemgbunlililɛ ne bamaa anzodwolɛ nee pɛlepɛlelilɛ ara azɛlɛ ye azo ɛ?
Gyisɛse mɔɔ le Nyamenle Belemgbunlililɛ ne azo Belemgbunli la bazɛkye ɛtanevolɛma nee arane ngakyile wɔ Amagɛdɔn konle ne anu. (Yekile 16:14, 16) Mekɛ zɔhane, ɛwɔkɛ ɛhye mɔɔ wɔ Baebolo ne anu la bara nu bɔkɔɔ: “Ɔnrɛhyɛ biala ɛnee amumuyɛma ɛnle ɛkɛ bieko.” (Edwɛne 37:10) Gyisɛse balua Belemgbunlililɛ ne azo yeamaa anzodwolɛ nee pɛlepɛlelilɛ ayi azɛlɛ ye azo tɛkɛɛ.—Kenga Ayezaya 11:4.
2. Saa bɛyɛ Nyamenle ɛhulolɛdeɛ wɔ azɛlɛ ye azo a kɛzi ɛbɛlabɔlɛ bayɛ ɛ?
Wɔ Nyamenle Belemgbunlililɛ ne tumililɛ bo, “tenlenema banyia azɛlɛ ne, na bɛadɛnla zolɛ dahuu.” (Edwɛne 37:29) Fa ye kɛ ɛwɔ ewiade mɔɔ awie biala yɛ mɔɔ tenrɛ yɛɛ bɛ muala bɛkulo Gyihova nee bɛ nwo la anu! Awie anwo ɛndo ye yɛɛ awie biala badɛnla aze dahuu.
3. Saa bɛsɛkye ɛtanevolɛma bɛwie a, duzu a Nyamenle Belemgbunlililɛ ne bayɛ a?
Saa bɛsɛkye ɛtanevolɛma bɛwie a, Gyisɛse bali Belemgbunli ɛvolɛ 1,000. Mekɛ zɔhane, ɔ nee menli 144,000 mɔɔ ɔ nee bɛ bali tumi la baboa alesama mɔɔ wɔ azɛlɛ ye azo la bɛamaa bɛali munli mɔɔ ɛtane biala ɛnle bɛ nwo a. Ɔkadwu mekɛ zɔhane awieleɛ la, azɛlɛ ye bayɛ paladaese kɛnlɛma, na menli mɔɔ di Gyihova mɛla zo la badɛnla zolɛ wɔ anyelielɛ nu. Akee Gyisɛse bava tumililɛ ne azia amaa ɔ Ze Gyihova. Akee Gyihova “duma nwo [bade]” adɛla mekɛ biala. (Mateyu 6:9, 10) Ɔbala ali wɔ mekɛ zɔhane kɛ Gyihova le Tumivolɛ kpalɛ mɔɔ dwenle ye maanlema anwo a. Akee Gyihova bazɛkye Seetan, sunsum ɛtane ne mɔ yɛɛ awie biala mɔɔ bade ye tumililɛ ne anwo atua la. (Yekile 20:7-10) Ninyɛne mgbalɛ mɔɔ Nyamenle Belemgbunlililɛ ne bayɛ la badɛnla ɛkɛ ne dahuu.
SUKOA DƆƆNWO
Sukoa deɛmɔti yɛkola yɛdie yɛdi kɛ Nyamenle balua Belemgbunlililɛ ne azo yeamaa ɛwɔkɛ mɔɔ wɔ Baebolo ne anu la amuala ara nu kenle bie la.
4. Nyamenle Belemgbunlililɛ ne bazɛkye sonla arane
“Sonla di sonla nwo zo tumi maa ɔnwu amaneɛ.” (Nolobɔvo 8:9) Gyihova balua ye Belemgbunlililɛ ne azo aye nzisi ɛhye avi ɛkɛ.
Kenga Daneɛle 2:44 yɛɛ 2 Tɛsalonaekama 1:6-8, na akee bɛzuzu kpuya ɛhye mɔ anwo:
Kɛzi Gyihova nee ɔ Ra Gyisɛse bayɛ sonla arane ngakyile nee menli mɔɔ li bɛ nzi la ɛ?
Kɛzi mɔɔ wɔzukoa ye wɔ Gyihova nee Gyisɛse anwo la maa ɛdie ɛdi kɛ mɔɔ bɛbayɛ la bayɛ mɔɔ le pɛlepɛle na ɔtenrɛ ɛ?
5. Gyisɛse le Belemgbunli kpalɛ
Gyisɛse mɔɔ le Nyamenle Belemgbunlililɛ ne azo Belemgbunli la bayɛ ninyɛne dɔɔnwo mɔɔ baboa ye maanlema la. Ye VIDIO ne na nea kɛzi Gyisɛse ɛla ye ali dɛba kɛ ɔkulo menli yɛɛ Nyamenle ɛmaa ye tumi kɛ ɔboa bɛ la.
Ninyɛne mɔɔ Gyisɛse yɛle ye wɔ azɛlɛ ye azo la le mɔɔ Belemgbunlililɛ ne bayɛ la anwo neazo. Nyilalɛ mɔɔ bɛha nwolɛ edwɛkɛ wɔ ɛke la boni a ɛ nye la zo titili a? Kenga ngɛlɛlera ne mɔ mɔɔ ka nyilalɛ ne mɔ anwo edwɛkɛ la.
GYISƐSE WƆ AZƐLƐ YE AZO LA . . . |
GYISƐSE BADƐNLA ANWUMA LƆ . . . |
|---|---|
|
|
|
|
|
|
|
|
6. Nyamenle Belemgbunlililɛ ne bamaa yɛ nye alie kenle bie
Belemgbunlililɛ ne bamaa bodane mɔɔ Gyihova lɛ maa alesama la ara nu bɔkɔɔ. Bɛbadɛnla aze dahuu wɔ paladaese. Ye VIDIO ne na nea kɛzi Gyihova ɛlɛdua ɔ Ra Gyisɛse anwo zo ali ye bodane nwo gyima la.
Kenga Edwɛne 145:16, na akee bɛzuzu kpuya ɛhye anwo:
Kɛzi Gyihova mɔɔ wɔnwu kɛ ɔbamaa “tease abɔdeɛ biala [anyia] mɔɔ ɔkulo la” maa ɛte nganeɛ ɛ?
BIE MƆ KA KƐ: “Saa yɛ muala yɛdi yɛboa a yɛbahola yɛali ewiade ngyegyelɛ ne anwo gyima.”
Ngyegyelɛ boni mɔ a Nyamenle Belemgbunlililɛ ne baye avi ɛkɛ mɔɔ sonla arane ɛnrɛhola a?
EDWƐKƐ TITILI
Nyamenle Belemgbunlililɛ ne bamaa ye bodane ara nu. Ɔbamaa azɛlɛ ye azo amuala ayɛ paladaese na tenlenema mɔɔ badɛnla zolɛ la bazonle Gyihova dahuu.
Ndinu
Kɛzi Nyamenle Belemgbunlililɛ ne bade Gyihova duma nwo ɛ?
Duzu ati a yɛdie yɛdi kɛ Nyamenle Belemgbunlililɛ ne bamaa ɛwɔkɛ mɔɔ wɔ Baebolo ne anu la ara nu ɛ?
Mɔɔ Belemgbunlililɛ ne bayɛ mɔɔ ɛ nye la zo titili la a le boni?
KPONDƐ DƆƆNWO
Nea mɔɔ Amagɛdɔn kile la.
Nea ninyɛne mɔɔ Gyisɛse hanle kɛ ɔbasisi wɔ “anwongyelelɛ kpole” ne anu la.—Mateyu 24:21.
“Duzu A Le Anwongyelelɛ Kpole Ne?” (Edwɛkɛ mɔɔ wɔ jw.org azo)
Nea kɛzi mbusua bahola adwenledwenle nyilalɛ mɔɔ Belemgbunlililɛ ne bamaa yɛanyia ye kenle bie anwo la.
Wɔ edwɛkɛ ne mɔɔ se “Ɛnee Kpuya Dɔɔnwo Gyegye Me” la anu, sukoa kɛzi awie bie mɔɔ ɛnee ko tia arane la nwunle debie mɔɔ bali ye ngyegyelɛ nwo gyima la.