ƐZUKOALƐDEƐ 60
Kɔ Zo Nyia Anyuhɔlɛ
Wɔzukoa Gyihova anwo ninyɛne dɔɔnwo wɔ Baebolo ɛzukoalɛ ɛhye anu. Ninyɛne mɔɔ wɔzukoa la ɛmaa wɔnyia Gyihova anwo ɛlɔlɛ kpole na bie a wɔyila ɛ nwo zo wɔmaa ye na bɛzɔne wɔ. Saa ɛtɛyɛle zɔ a, bie a ɛlɛdwenle nwo kɛ ɔnrɛhyɛ ɛbayɛ zɔ. Noko bɛsɔne wɔ a ɛnee ɔtɛwiele. Ɛbahola wɔahɔ zo wɔabikye Gyihova dahuu. Adenle boni azo?
1. Duzu ati a ɔwɔ kɛ ɛkɔ zo ɛmaa agɔnwolɛvalɛ mɔɔ ɛ nee Gyihova lɛ la anu mia a?
Ɔwɔ kɛ yɛkɔ zo yɛbɔ mɔdenle kpalɛ yɛmaa agɔnwolɛvalɛ mɔɔ yɛ nee Gyihova lɛ la anu mia. Kɛmɔti ɛ? “Amaa yɛandwe yɛ nwo” yɛanvi ɔ nwo ɛlɛ. (Hibuluma 2:1) Duzu a baboa yɛ yeamaa yɛahɔ zo yɛava nɔhalɛlilɛ yɛazonle Gyihova a? Yɛbahola yɛayɛ dɔɔnwo wɔ daselɛlilɛ gyima ne anu na yɛakpondɛ ndenle gyɛne yɛalua zo yɛazonle yɛ Nyamenle ne kpalɛ. (Kenga Felepaema 3:16.) Gyihova ɛzonlenlɛ a le debie kpalɛ wɔ yɛ ɛbɛlabɔlɛ nu a!—Edwɛne 84:10.
2. Duzu bieko a ɔwɔ kɛ ɛkɔ zo ɛyɛ a?
Buluku ɛhye mɔɔ ɛlɛsukoa la ɛlɛba awieleɛ ɛdeɛ, noko ɛbahɔ zo wɔabɔ wɔ ɛbɛla kɛ Kilisienenli la. Baebolo ne ka kɛ ɔwɔ kɛ ‘yɛfa subane fofolɛ ne yɛwula.’ (Ɛfɛsɛsema 4:23, 24) Mekɛ mɔɔ ɛlɛkɔ zo wɔazukoa Nyamenle Edwɛkɛ ne na wɔahɔ debiezukoalɛ la, ɛbazukoa Gyihova nee ye subane ne mɔ anwo ninyɛne fofolɛ. Kpondɛ ndenle dua zo sukoa ye subane ne mɔ kpalɛ na fa bɔ wɔ ɛbɛla. Kɔ zo yɛ nzenzaleɛ biala mɔɔ hyia la maa Gyihova anye ɛlie.
3. Kɛzi Gyihova baboa wɔ yeamaa wɔanyia anyuhɔlɛ ɛ?
Baebolo ne ka kɛ: “Nyamenle . . . mumua ne bawie bɛ ndetelɛ ne. Ɔbamaa bɛazi pi, ɔbamaa bɛayɛ se, ɔbamaa bɛagyinla kpundii.” (1 Pita 5:10) Yɛ muala yɛyia sɔnea. Noko Gyihova maa yɛnyia mɔɔ yɛhyia amaa yɛahola yɛagyinla ɔ nloa la. (Edwɛne 139:23, 24) Yebɔ ɛwɔkɛ kɛ ɔbamaa wɔanyia ɛhulolɛ ne yɛɛ anwosesebɛ ne mɔɔ ɛbava wɔazonle ye nɔhalɛ nu la.—Kenga Felepaema 2:13.
SUKOA DƆƆNWO
Sukoa kɛzi ɛbahola wɔahɔ zo wɔanyia anyuhɔlɛ nee kɛzi Gyihova bayila wɔ la anwo debie.
4. Kɔ zo ɛ nee ɛ Gɔnwo kpalɛ ne ɛdendɛ
Asɔneyɛlɛ nee Baebolo ɛzukoalɛ ɛboa wɔ ɛmaa wɔyɛ Gyihova agɔnwo. Kɛzi ninyɛne ɛhye mɔ baboa wɔ yeamaa wɔabikye ye kpalɛ ɛ?
Kenga Edwɛne 62:8, na akee bɛzuzu kpuya ɛhye anwo:
Kɛzi ɛkɔ zo ɛyɛ asɔne kpalɛ a ɔbamaa agɔnwolɛvalɛ mɔɔ ɛ nee Gyihova lɛ la anu amia ɛ?
Kenga Edwɛne 1:2, na akee bɛzuzu kpuya ɛhye anwo:
Kɛzi ɛmaa wɔ Baebolo ɛgengalɛ ne kɔ zo kpalɛ a ɔbamaa agɔnwolɛvalɛ mɔɔ ɛ nee Gyihova lɛ la anu amia ɛ?
Kɛ ɔkɛyɛ na wɔamaa ɛ ti anwo debiezukoalɛ ayɛ anyelielɛ ɛ? Amaa wɔanyia nwolɛ nzuzulɛ bie mɔ la, ye VIDIO ne, na akee bɛzuzu kpuya ɛhye mɔ anwo.
Nzuzulɛ mɔɔ wɔ vidio ne anu la boni mɔ a ɛbava wɔali gyima a?
Edwɛkɛtile boni mɔ a ɛkulo kɛ ɛsukoa a?
5. Fa sunsum nu bodane sie ɛ nye zo
Saa ɛfa bodane ɛsie ɛ nye zo wɔ Gyihova ɛzonlenlɛ nu a ɔbaboa wɔ yeamaa wɔanyia anyuhɔlɛ. Ye VIDIO ne, na akee bɛzuzu kpuya ɛhye anwo.
Kɛzi Cameron mɔɔ wɔ vidio ne anu la nyianle sunsum nu bodane mɔɔ ɔvale ɔziele ɔ nye zo la azo nvasoɛ ɛ?
Tɛ awie biala a bahola adu ahɔ maanle gyɛne zo ahɔha edwɛkɛ ne a. Noko, yɛ muala yɛbahola yɛava bodane mɔɔ yɛbadwu nwo la yɛazie yɛ nye zo. Kenga Mrɛlɛbulɛ 21:5, na akee nea bodane mɔɔ ɛbahola wɔava wɔazie ɛ nye zo wɔ . . .
asafo ne anu la.
daselɛlilɛ gyima ne anu la.
Kɛzi ngyinlazo mɔɔ wɔ tɛkese ɛhye anu la baboa wɔ yeamaa wɔadwu wɔ bodane nwo ɛ?
Fa bodane ɛhye mɔ sie ɛ nye zo
Kɔ zo yɛ asɔne kpalɛ.
Kenga Baebolo ne amuala.
Bɔ mɔdenle nwu awie biala mɔɔ wɔ wɔ asafo ne anu la.
Bɔ Baebolo ɛzukoalɛ bo na kɔ zo yɛ.
Sonle kɛ adekpakyelɛ boavolɛ anzɛɛ dahuu adekpakyelɛnli.
Saa ɛle adiema nrenyia a, kpondɛ nwolɛ adenle sonle kɛ asafo nu sonvolɛ.
6. Nyia anyelielɛ dahuu!
Kenga Edwɛne 22:26, na akee bɛzuzu kpuya ɛhye anwo:
Duzu a ɛbahola wɔayɛ amaa ɛ nye alie ɛnɛ nee dahuu a?
EDWƐKƐ TITILI
Kɔ zo maa agɔnwolɛvalɛ mɔɔ ɛ nee Gyihova lɛ la anu ɛmia na fa sunsum nu bodane sie ɛ nye zo. Ɛhye bamaa ɛ nye alie ɛnɛ nee dahuu!
Ndinu
Duzu ati a ɛdie ɛdi kɛ Gyihova baboa wɔ yeamaa wɔava nɔhalɛlilɛ wɔazonle ye a?
Kɛzi ɛbahola wɔamaa agɔnwolɛvalɛ mɔɔ ɛ nee Gyihova lɛ la anu amia ɛ?
Kɛzi ɛfa sunsum nu bodane ɛsie ɛ nye zo a ɔbaboa wɔ yeamaa wɔanyia anyuhɔlɛ ɛ?
KPONDƐ DƆƆNWO
Duzu a Gyihova anye die nwo kpalɛ a, kɛ yɛbayɛ debie kpole ko bie yɛava yɛahile kɛ yɛlɛsonle ye anzɛɛ yɛbava nɔhalɛlilɛ yɛazonle ye wɔ yɛ ngoane mekɛ kɔsɔɔti anu?
Gyihova sonvolɛ mɔɔ di nɔhalɛ bɔbɔ la anyelielɛ bahola aha aze. Nea kɛzi ɔ nye bahola alie bieko la.
Debie Ɛzukoalɛ Nee Ninyɛne Nwo Ɛdwenledwenlenlɛ Zo Lɛ Nvasoɛ (5:25)
Kɛ ɔkɛyɛ na wɔava sunsum nu bodane wɔazie ɛ nye zo na wɔadwu nwo ɛ?
Duzu ati a ɔhyia kɛ ɛyɛ Kilisienenli mɔɔ ɛnyi sunsum nu a, na kɛ ɔkɛyɛ na wɔayɛ zɔ ɛ?
“Bɔ Mɔdenle Nyi Sunsum Nu—‘Gyihova Kenle Kpole Ne Ɛbikye’” (Ɛzinzalɛ Arane, May 15, 2009)