ƐZUKOALƐDEƐ 12
Duzu A Bamaa Wɔahɔ Zo Wɔazukoa Baebolo Ne A?
Nvasoɛ wɔ Baebolo ɛzukoalɛ zo. Noko tɛ dahuu a ye ɛzukoalɛ la aze a. Ɔdwu mekɛ ne bie a, ɛngola ɛnnwu ye saa ɛbahola wɔahɔ zo wɔazukoa Baebolo ne a. Duzu ati a ɔle kpalɛ kɛ ɛbɔ mɔdenle ɛkɔ zo ɛsukoa a? Duzu a bamaa wɔahɔ zo wɔazukoa ɔnva nwo ngyegyelɛ biala a?
1. Duzu ati a nvasoɛ wɔ Baebolo ɛzukoalɛ zo a?
“Nyamenle edwɛkɛ ne de ngoane nu yɛɛ tumi wɔ nu.” (Hibuluma 4:12) Nvasoɛ wɔ Baebolo ne azo ɔluakɛ ɔmaa ɛnwu Nyamenle adwenle nee ɛlɔlɛ mɔɔ ɔlɛ ɔmaa wɔ la. Ɔboa wɔ ɔmaa ɛnyia ndelebɛbo, nrɛlɛbɛ kpalɛ yɛɛ anyelazo. Mɔɔ hyia kpalɛ la, Baebolo ne boa wɔ ɔmaa ɛyɛ Gyihova agɔnwo. Saa ɛsukoa Baebolo ne a tumi mɔɔ wɔ nu la bamaa wɔ ɛbɛlabɔlɛ ayɛ kpalɛ.
2. Duzu ati a ɔhyia kɛ ɛbu Baebolo ne anu nɔhalɛ ne kɛ ɔsonle bolɛ a?
Nɔhalɛ ne mɔɔ wɔ Baebolo ne anu la le kɛ agudeɛ mɔɔ sonle bolɛ la. Ɛhye ati a Baebolo ne ka kile yɛ kɛ ‘yɛdɔ nɔhalɛ na yɛmmatɔne ye ɛlɛ la.’ (Mrɛlɛbulɛ 23:23) Saa yɛkakye kɛ Baebolo ne anu nɔhalɛ ne sonle bolɛ a, yɛbabɔ mɔdenle biala yɛahɔ zo yɛazukoa wɔ mekɛ bɔbɔ mɔɔ yɛlɛyia nwolɛ ngyegyelɛ la.—Kenga Mrɛlɛbulɛ 2:4, 5.
3. Kɛzi Gyihova baboa wɔ yeamaa wɔahɔ zo wɔazukoa ɛ?
Kɛmɔ Gyihova le wɔ Bɔvolɛ nee ɛ Gɔnwo mɔɔ lɛ tumi kpole la ati, ɔkulo kɛ ɔboa wɔ ɔmaa ɛsukoa ɔ nwo debie. Ɔbahola yeamaa ‘wɔanyia ɛhulolɛ ne yɛɛ anwosesebɛ ne na wɔahola wɔayɛ.’ (Kenga Felepaema 2:13.) Ɔti, saa ɔdwu mekɛ ne bie na ɛhyia anwosesebɛmaanlɛ amaa wɔazukoa anzɛɛ wɔava mɔɔ ɛlɛsukoa la wɔali gyima a ɔbaboa wɔ. Ɔbahola yeamaa wɔanyia anwosesebɛ biala mɔɔ ɛhyia nwo amaa wɔagyinla ngyegyelɛ anzɛɛ dwazotia nloa la. Sɛlɛ Gyihova dahuu kɛ ɔboa wɔ ɔmaa ɛhɔ zo ɛzukoa Baebolo ne.—1 Tɛsalonaekama 5:17.
SUKOA DƆƆNWO
Sukoa kɛzi ɛbahola wɔahɔ zo wɔazukoa Baebolo ne ɔnva nwo kɛ ɛnlɛ alagye anzɛɛ awie mɔ dwazo tia wɔ la. Akee nea kɛzi Gyihova baboa wɔ yeamaa wɔahɔ zo wɔazukoa la.
4. Maa wɔ Baebolo ɛzukoalɛ ne ɛhyia wɔ
Ɔyɛ a yɛnnyia alagye ɔti ɔzɔho kɛ yɛnlɛ mekɛ dɔɔnwo mɔɔ yɛbava yɛazukoa Baebolo ne a. Duzu a baboa a? Kenga Felepaema 1:10, na akee bɛzuzu kpuya ɛhye mɔ anwo:
Ɛnea a “ninyɛne mɔɔ hyia kpalɛ” wɔ ɛbɛlabɔlɛ nu la bie mɔ a le boni?
Kɛ ɔkɛyɛ na wɔamaa wɔ Baebolo ɛzukoalɛ ne ahyia wɔ ɛ?
Saa ɛfa ɛnwea dɔɔnwo ɛgua bokiti nu na ɛfa awolɛ ɛgua zo a, awolɛ ne ɛnrɛhɔ nu
Saa ɛdimoa ɛfa awolɛ ne ɛgua nu a, ɛbanyia ɛleka wɔava ɛnwea dɔɔnwo wɔagua. Zɔhane ala a saa ɛfa “ninyɛne mɔɔ hyia kpalɛ” la ɛdimoa wɔ ɛbɛlabɔlɛ nu a, ɛbahola wɔali nwolɛ gyima na wɔanyia mekɛ wɔamaa ninyɛne mɔɔ ɛha la a
Yɛsukoa Baebolo ne a ɔmaa yɛdi yɛ sunsum nu ngyianlɛ nwo gyima—Nyamenle mɔɔ ɔhyia kɛ yɛnwu ye na yɛsonle ye la. Kenga Mateyu 5:3, na akee bɛzuzu kpuya ɛhye anwo:
Saa yɛmaa Baebolo ɛzukoalɛ kyia yɛ a, kɛzi ɔboa yɛ ɛ?
5. Bɔ mɔdenle gyinla dwazotia nloa
Ɔdwu mekɛ ne bie a awie mɔ babɔ mɔdenle kɛ bɛmaa wɔagyakyi Baebolo ne ɛzukoalɛ. Nea mɔɔ dole Francesco la. Ye VIDIO ne, na akee bɛzuzu kpuya ɛhye mɔ anwo.
Wɔ vidio ne anu, duzu a Francesco agɔnwo mɔ nee ye mbusuafoɔ yɛle wɔ mekɛ mɔɔ ɔhanle mɔɔ ɔlɛsukoa la anwo edwɛkɛ ɔhilele bɛ la ɛ?
Kɛzi ɔnyianle ye mɔdenlebɔlɛ ne azo nvasoɛ ɛ?
Kenga 2 Timote 2:24, 25, na akee bɛzuzu kpuya ɛhye mɔ anwo:
Kɛzi wɔ mbusuafoɔ nee ɛ gɔnwo mɔ bu mɔɔ ɛlɛsukoa la ɛ?
Kɛ mɔɔ tɛkese ɛhye mɔ kile la, saa awie anye ɛnlie Baebolo ne mɔɔ ɛlɛsukoa la anwo a duzu a ɛbayɛ a? Nzɔne ati ɔ?
6. Fa ɛ nwo to Gyihova anwo zo maa ɔboa wɔ
Mekɛ mɔɔ yɛlɛbikye Gyihova kpalɛ la, yɛbanyia ɛhulolɛ kpole kɛ yɛbayɛ mɔɔ sɔ ɔ nye la. Noko bie a ɔyɛ se ɔmaa yɛ kɛ yɛbayɛ nzenzaleɛ wɔ yɛ ɛbɛlabɔlɛ nu amaa yɛali ye mɛla zo. Saa zɔhane a ɔde wɔ wɔ afoa nu a, mmamaa ɛ sa nu to. Gyihova baboa wɔ. Ye VIDIO ne, na akee bɛzuzu kpuya ɛhye mɔ anwo.
Wɔ vidio ne anu, nzenzaleɛ boni mɔ a Jim yɛle amaa yeazɔ Gyihova anye a?
Duzu a ɛ nye die nwo wɔ ye neazo ne anwo a?
Kenga Hibuluma 11:6, na akee bɛzuzu kpuya ɛhye mɔ anwo:
Duzu a Gyihova bayɛ amaa bɛdabɛ “mɔɔ bɛ nye ɛbolo bɛlɛkpondɛ ye”—kile kɛ, bɛdabɛ mɔɔ bɛlɛbɔ mɔdenle kɛ bɛbanwu ye na bɛayɛ mɔɔ sɔ ɔ nye la ɛ?
Duzu a ɛhye maa ɛnwu ye wɔ kɛzi Gyihova bu mɔdenle mɔɔ ɛlɛbɔ wɔazukoa Baebolo ne la anwo a?
BIE A AWIE BABIZA KƐ: “Duzu ati a ɛlɛsukoa Baebolo ne a?”
Kɛzi ɛbaye ɔ nloa ɛ?
EDWƐKƐ TITILI
Ɔnla aze kɛ ɛbazukoa Baebolo ne dahuu ɛdeɛ, noko ɛsukoa a ɔbamaa wɔanyia anyelielɛ dahuu. Kɔ zo fa ɛ nwo to Gyihova anwo zo na ɔbayila wɔ.
Ndinu
Duzu ati a Baebolo ne anu nɔhalɛ ne sonle bolɛ maa wɔ a?
Kɛ ɔkɛyɛ na wɔanwu “ninyɛne mɔɔ hyia kpalɛ” la ɛ?
Duzu ati a ɔwɔ kɛ ɛsɛlɛ Gyihova kɛ ɔboa wɔ ɔmaa ɛhɔ zo ɛzukoa Baebolo ne a?
KPONDƐ DƆƆNWO
Nea ninyɛne nna mɔɔ ɛboa menli dɔɔnwo ɛmaa bɛva bɛ mekɛ bɛli gyima nrɛlɛbɛ nu la.
“Kɛzi Ɛbava Wɔ Mekɛ Wɔali Gyima Nrɛlɛbɛ Nu La” (Awake!, February 2014)
Nea kɛzi Gyihova boale raalɛ bie mɔɔ ɛnee ɔ hu ɛngulo mɔdenle mɔɔ ɔlɛbɔ yeayɛ mɔɔ sɔ Nyamenle anye la.
Nea kɛzi nrenyia bie nyianle ɔ ye mɔdenlebɔlɛ ne azo nvasoɛ la.
Ɔyɛ a bɛto Gyihova Alasevolɛ ɛzonle kɛ bɛtete mbusua nu. Asoo ɛhye le nɔhalɛ?
“Asoo Gyihova Alasevolɛ Tete Mbusua Nu Anzɛɛ Bɛka Bɛ Bɛbɔ Nu?” (Edwɛkɛ mɔɔ wɔ jw.org azo)