Gyima Mɔɔ Kelaese Di Ye Wɔ Nyamenle Ngyehyɛleɛ Nu La

“MƆLEBƐBO ne Nyamenle bɔle anwuma nee aze,” na debie biala mɔɔ ɔyɛle la le “kpalɛ bɔkɔɔ.” (Gyn. 1:1, 31) Gyihova bɔle menli mɔɔ ɛnee bɛlɛ kenle bie anyelazo kpalɛ a. Noko Yidɛn atuadelɛ ne zɛkyele anyelielɛ mɔɔ ɛnee alesama lɛ la. Noko akee, bodane mɔɔ Gyihova lɛ maa azɛlɛ ne nee alesama la ɛtɛkakyile. Nyamenle ɛha kɛ bɛbalie Adam abozoamra mɔɔ yɛ tieyɛ la. Bɛbava nɔhalɛ ɛzonlenlɛ bɛazie ɛkɛ bieko, na Nyamenle bazɛkye amumuyɛnli ne nee ye gyima ɛtane ne mɔ kɔsɔɔti. (Gyn. 3:15) Ninyɛne bazia ayɛ “kpalɛ bɔkɔɔ.” Gyihova balua ɔ Ra Gyisɛse Kelaese anwo zo a yeayɛ ɛhye a. (1 Dwɔn 3:8) Ɛhye ati, ɔhyia kɛ yɛdie gyima mɔɔ Kelaese di ye wɔ Nyamenle ngyehyɛleɛ nu la yɛto nu.​​—Gyi. 4:12; Fel. 2:9, 11.

GYIMA MƆƆ KELAESE DI LA

² Saa yɛlɛdwenle gyima mɔɔ Kelaese di ye wɔ Nyamenle ngyehyɛleɛ nu la anwo a, yɛnwu kɛ ɔgua ye ngakyile. Gyisɛse sonle kɛ alesama Kpɔnevolɛ, Ɛsɔfo Kpanyinli, Kilisiene asafo ne Ati na kɛkala ɔle Nyamenle Belemgbunlililɛ ne azo Belemgbunli. Saa yɛdwenledwenle ɛhye mɔ anwo a, ɔmaa yɛ nye sɔ Nyamenle ngyehyɛleɛ ne kpalɛ na yɛnyia Kelaese Gyisɛse anwo ɛlɔlɛ kpole. Baebolo ne ka ye gyima ngakyile ne mɔ bie anwo edwɛkɛ.

³ Wɔ Kelaese azɛlɛ ye azo ɛzonlenlɛ gyima ne anu, ɔlale ali wienyi kɛ ɔlua Gyisɛse anwo zo a alesama mɔɔ yɛ tieyɛ la nee Nyamenle bahola abɔ nu a. (Dwɔn 14:6) Kɛ alesama Kpɔnevolɛ la, Gyisɛse vale ɔ nwo yɛle ɛkpɔnedeɛ liele menli dɔɔnwo. (Mat. 20:28) Ɔti tɛ ɛbɛla kpalɛ angomekye a Gyisɛse yɛle nwolɛ neazo a. Ɔlɛdi gyima titili yeamaa Gyihova bodane mɔɔ ɔlɛ ɔmaa alesama la ara nu. Ɔ ngomekye a ɔbamaa yɛanyia Nyamenle anyunlu ɛlolɛ a. (Gyi. 5:31; 2 Kɔl. 5:18, 19) Gyisɛse afɔlebɔlɛ ne nee ye ewudwazo ne bamaa alesama mɔɔ yɛ tieyɛ la anyia nyilalɛ dahuu wɔ Nyamenle anwuma Belemgbunlililɛ ne abo.

⁴ Kɛ Ɛsɔfo Kpanyinli la, Gyisɛse kola te “yɛ bɛtɛɛyɛlɛ bo” na ɔkpɔda ye ɛdoavolɛma mɔɔ bɛdu bɛ nwo bɛmaa wɔ azɛlɛ ye azo la ɛtane. Ɛzoanvolɛ Pɔɔlo hanle kɛ: “Yɛnlɛ ɛsɔfo kpanyinli mɔɔ ɔnde yɛ bɛtɛɛyɛlɛ bo a, emomu yɛlɛ awie mɔɔ bɛzɔ ye bɛnlea wɔ debie biala anu kɛ yɛdayɛ la, noko ɛtane biala ɛnle ɔ nwo.” Akee Pɔɔlo maanle bɛdabɛ mɔɔ bɛlɛ Gyisɛse Kelaese anu diedi la anwosesebɛ kɛ bɛli ngyehyɛleɛ ɛhye mɔɔ bamaa bɛayɛ Nyamenle agɔnwo mɔ la azo kpalɛ. Ɔhanle kɛ: “Zɔhane ati, bɛmaa yɛva anwodozo yɛbikye ɛlolɛ kpole belemgbunli ebia ne, amaa bɛanwu yɛ anwunvɔne na yɛanyia ɛlolɛ kpole mɔɔ baboa yɛ wɔ mekɛ kpalɛ nu la.”​—Hib. 4:14-16; 1 Dwɔn 2:2.

⁵ Eza Gyisɛse le Kilisiene asafo ne Ati. Kɛ mɔɔ ɛnee ye ɛvoya mɔɔ limoa ɛdoavolɛma ne ɛnlɛ sonla kɛ bɛ adekilevolɛ la, zɔhane ala a ɔde ye ɛnɛ a. Gyisɛse dua sunsum nwuanzanwuanza ne nee neavolɛma ngyikyi ne mɔ mɔɔ babu mgbonda ahile ɔ nee ye anwuma Selɛ ne wɔ Nyamenle mboane ne mɔ ɛnleanlɛ nwo la azo fa adehilelɛ maa. (Hib. 13:17; 1 Pita 5:2, 3) Gyihova hanle Gyisɛse anwo ngapezo kɛ: “Nea! Meyɛ ye maanle maanle dasevolɛ, maanle maanle ne mɔ adekilevolɛ nee bɛ kpanyinli.” (Aye. 55:4) Gyisɛse maanle ngapezo ɛhye rale nu wɔ mekɛ mɔɔ ɔzele ye ɛdoavolɛma ne kɛ: “Bɛmmamaa bɛfɛlɛ bɛ adekilevolɛma, ɔluakɛ bɛ Adekilevolɛ kokye, yemɔ a le Kelaese ne” la.​—Mat. 23:10.

⁶ Ɔlua adwenle nee ɛhulolɛ mɔɔ Gyisɛse lɛ kɛ ɔbaboa yɛ la ati, ɔlɛto ɛsalɛ yeavɛlɛ yɛ kɛ: “Bɛdabɛ mɔɔ bɛvɛ na bɛzo adesoa la amuala, bɛrɛla me nwo ɛke, na mebamaa bɛalie bɛ menle. Bɛva me gyɛnvayile ne bɛdo bɛ kɔme zo na bɛzukoa me, ɔluakɛ mele bɛtɛɛ yɛɛ mebɛlɛ me nwo aze wɔ ahonle nu, na bɛ nwo kɛdɔ bɛ. Na me gyɛnvayile ne ɛmmaa bɛ kɔme ɛnyɛ bɛ nyane, yɛɛ me adesoa ne ɛnyɛ ɛlomboɛ.” (Mat. 11:28-30) Ɔluakɛ Gyisɛse Kelaese fa mɛlɛbɛnwoaze di Kilisiene asafo ne anu gyima na ɔmaa yɛ nwo tɔ yɛ la ati, yela ɔ nwo ali kɛ ɔle “mboaneneavolɛ kpalɛ” mɔɔ sukoa ye anwuma Selɛ Gyihova Nyamenle a.​—Dwɔn 10:11; Aye. 40:11.

⁷ Pɔɔlo hilehilele Gyisɛse Kelaese gyima bieko mɔɔ ɔdi la anu wɔ kɛlata mɔɔ ɔlimoale ɔhɛlɛle Kɔlentema la anu kɛ: “Na ɔwɔ kɛ ɔdi belemgbunli kɔkpula kɛ Nyamenle kɛva agbɔvolɛ kɔsɔɔti kɛwula ɔ gyakɛ abo la. Na saa bɛfa ninyɛne kɔsɔɔti bɛwula ɔ gyakɛ abo a, akee Ralɛ mumua ne noko bava ɔ nwo awula Mɔɔ vale ninyɛne kɔsɔɔti wulale ɔ gyakɛ abo la abo, na Nyamenle ali ninyɛne kɔsɔɔti azo tumi.” (1 Kɔl. 15:25, 28) Gyisɛse le Nyamenle abɔdeɛ mɔɔ limoa, ɔti kolaa na yeara azɛlɛ ye azo la, ɛnee ɔle “gyimayɛvo mɔɔ ɛbe.” (Mrɛ. 8:22-31) Mɔɔ Nyamenle zoanle Gyisɛse wɔ azɛlɛ ye azo la, ɔyɛle Nyamenle ɛhulolɛdeɛ mekɛ biala. Ɔgyinlanle sɔnea bedevinli ne anloa na ɔlile nɔhalɛ ɔmaanle ɔ Ze ɔhɔle ewule nu. (Dwɔn 4:34; 15:10) Kɛmɔ Nyamenle Ara ne lile nɔhalɛ hɔle ewule nu la ati, ɔdwazole ye ɔhɔle anwuma na ɔmaanle ɔyɛle anwuma Belemgbunlililɛ ne azo Belemgbunli. (Gyi. 2:32-36) Ɛhye ati, Nyamenle ɛmaa Kelaese Gyisɛse gyima kpole kɛ ɔli sunsum nu abɔdeɛ mgbe dɔɔnwo mɔɔ bɛlɛ tumi la anyunlu ɔmaa bɛye sonla tumililɛ nee amumuyɛyɛlɛ kɔsɔɔti bɛvi ewiade. (Mrɛ. 2:21, 22; 2 Tɛs. 1:6-9; Yek. 19:11-21; 20:1-3) Akee Nyamenle anwuma Belemgbunlililɛ ne mɔɔ wɔ Kelaese asa anu la angomekye a bali azɛlɛ ye kɔsɔɔti azo tumi a.​—Yek. 11:15.

GYIMA MƆƆ ƆDI MƆƆ ƐDIE WƆADO NU LA KILE DUZU?

⁸ Gyisɛse Kelaese, yɛ Neazovolɛ ne di munli. Bɛmaa ye gyima kɛ ɔnlea yɛ nwo zo. Amaa yɛanyia ye ɛnleanlɛ ne mɔɔ ɛlɔlɛ wɔ nu azo nvasoɛ la, ɔwɔ kɛ yɛdi nɔhalɛ yɛmaa Gyihova dahuu na yɛ nee Gyihova ahyehyɛdeɛ ne mɔɔ ɔlɛkɔ ɔ nyunlu la dua.

⁹ Gyisɛse ɛdoavolɛma liele gyima mɔɔ Kelaese di ye wɔ Nyamenle ngyehyɛleɛ nu la dole nu bɔkɔɔ wɔ ɛvoya mɔɔ limoa la anu. Bɛlale ɛhye ali ɔlua koyɛlɛ mɔɔ bɛvale bɛbɔle nu bɛyɛle gyima wɔ Kelaese tileyɛlɛ bo la azo. Eza bɛlile ye adehilelɛ mɔɔ ɔluale sunsum nwuanzanwuanza ne azo ɔvale ɔmaanle la azo. (Gyi. 15:12-21) Ɛzoanvolɛ Pɔɔlo hanle koyɛlɛ mɔɔ wɔ Kilisienema mɔɔ bɛkpokpa bɛ la asafo ne anwo edwɛkɛ kɛ: “Ɔwɔ kɛ yɛka nɔhalɛ na yɛda ɛlɔlɛ ali, amaa yɛanyi wɔ adenle biala anu yɛava yɛazukoa Kelaese mɔɔ le tile ne la. Ye nuhua a sonlabaka ne amuala toɔdoa nu pɛpɛɛpɛ na bɛbɔ nu bɛyɛ gyima na nvɛyeba biala fa mɔɔ hyia la maa a. Saa nvɛyeba biala yɛ ye gyima kpalɛ a, ɔboa ɔmaa sonlabaka ne nyi na ɔ nwo yɛ se wɔ ɛlɔlɛ nu.”​—Ɛfɛ. 4:15, 16.

¹⁰ Saa awie biala mɔɔ wɔ asafo ne anu la nee menli mɔɔ ɛha la anloa sɛ bɛ nwo na bɛyɛ gyima bɛbɔ nu wɔ Kelaese tileyɛlɛ bo a, bɛnyi na ɛlɔlɛ mɔɔ “ɔmaa menli koyɛlɛ di munli” la tɛnla bɛ nu.​—Dwɔn 10:16; Kɔl. 3:14; 1 Kɔl. 12:14-26.

¹¹ Mɔɔ ɛlɛsisi ewiade mɔɔ ɛlɛmaa Baebolo ngapezo ara nu la maa ɔda ali kɛ ɔvi 1914 mɔɔ ba la, bɛmaa Gyisɛse Kelaese tumi kɛ ɔli Belemgbunli. Kɛkala ɔlɛdi tumi wɔ ye agbɔvolɛ avinli. (Edw. 2:1-12; 110:1, 2) Duzu a ɛhye kile maa bɛdabɛ mɔɔ bɛde aze kɛkala la ɛ? Ɔnrɛhyɛ Gyisɛse bayɛ ye gyima kɛ arelemgbunli Belemgbunli yɛɛ awulae mɔ Awulae wɔ mekɛ mɔɔ ɔbara yearabua ye agbɔvolɛ ndɛne la. (Yek. 11:15; 12:10; 19:16) Akee ngoanelielɛ ne mɔɔ Gyihova bɔle nwolɛ ɛwɔkɛ wɔ mekɛ mɔɔ atuadelɛ bɔle ɔ bo la bara nu amaa menli mɔɔ wɔ Kelaese asa fema zo la. (Mat. 25:34) Nea kɛzi yɛ nye die kɛ yɛlie gyima mɔɔ Kelaese di wɔ Nyamenle ngyehyɛleɛ nu la yɛdo nu a! Bɛmaa yɛva koyɛlɛ yɛyɛ ɛzonlenlɛ gyima ne wɔ ewiade amuala wɔ Kelaese adehilelɛ bo wɔ awieleɛ mekɛ ɛhye anu.