Nyamenle Belemgbunlililɛ Ne A Le Duzu?

Nyamenle Belemgbunlililɛ ne a le debie titili mɔɔ Baebolo ne ka nwolɛ edwɛkɛ a. Gyihova balua Belemgbunlililɛ ne azo yeamaa bodane mɔɔ ɔti ɔbɔle azɛlɛ ye la ara nu. Belemgbunlililɛ ne a le duzu? Kɛzi yɛkola yɛnwu kɛ ɔlɛdi tumi kɛkala ɛ? Duzu a yelimoa yeyɛ a? Na duzu a ɔbayɛ ye kenle bie a? Bɛbabua kpuya ɛhye mɔ wɔ ɛzukoalɛdeɛ ɛhye nee nwiɔ ne mɔɔ doa zo la anu.

1. Nyamenle Belemgbunlililɛ ne a le duzu, yɛɛ nwane a le zolɛ Belemgbunli a?

Belemgbunlililɛ ne le arane mɔɔ Gyihova Nyamenle ɛva ɛzie ɛkɛ a. Gyisɛse Kelaese mɔɔ le zolɛ Belemgbunli la ɛlɛdi tumi wɔ anwuma. (Mateyu 4:​17; Dwɔn 18:​36) Baebolo ne ka Gyisɛse anwo edwɛkɛ kɛ: “Ɔbali Belemgbunli . . . dahuu.” (Luku 1:​32, 33) Gyisɛse mɔɔ le Belemgbunlililɛ ne azo Belemgbunli la banlea awie biala mɔɔ wɔ azɛlɛ ye azo la anwo zo.

2. Nwane mɔ a nee Gyisɛse bali tumi a?

Tɛ Gyisɛse angomekye a bali tumi a. Menli mɔɔ vi ‘abusua nee aneɛ nee menli nee maanle biala anu la bayɛ arelemgbunli na bɛanlea azɛlɛ ye azo.’ (Yekile 5:​9, 10) Menli nyɛ a nee Kelaese bali tumi a? Ɔvi mekɛ mɔɔ Gyisɛse rale azɛlɛ ye azo la, Kilisienema mgbe dɔɔnwo ɛrayɛ ye ɛdoavolɛma. Noko bɛ nuhua 144,000 ala a nee Gyisɛse bali tumi wɔ anwuma a. (Kenga Yekile 14:​1-4.) Kilisienema kɔsɔɔti mɔɔ ɛha wɔ azɛlɛ ye azo la bayɛ Belemgbunlililɛ ne maanlema.​—Edwɛne 37:29.

3. Kɛzi Nyamenle Belemgbunlililɛ ne le kpalɛ tɛla sonla arane ɛ?

Saa tumivolɛma bɔ mɔdenle kɛ bɛyɛ ninyɛne mgbalɛ bɔbɔ a, bɛnlɛ tumi mɔɔ bɛkola bɛfa bɛyɛ debie biala a. Bɛfi zolɛ a menli gyɛne badi tumi na bie a bɛndwenle bɛ maanlema ne anwo kpalɛ. Noko Gyisɛse mɔɔ le Nyamenle Belemgbunlililɛ ne azo Belemgbunli la ɛdeɛ, awie gyɛne biala ɛnrɛhola ɛnrɛli ɔ gyakɛ anu. Nyamenle ‘ɛva belemgbunlililɛ bie ɛzie ɛkɛ mɔɔ bɛnrɛzɛkye ye ɛlɛ a.’ (Daneɛle 2:​44) Gyisɛse banlea azɛlɛ ye amuala azo na ɔnrɛyɛ nyeyenu. Ɔlɛ ɛlɔlɛ, ɔle atiakunlukɛnlɛma yɛɛ ɔdi pɛlepɛle, na ɔbahilehile menli yeamaa bɛ nee bɛ gɔnwo mɔ ali ye wɔ ɛlɔlɛ, atiakunlukɛnlɛma yɛɛ pɛlepɛlelilɛ nu.​—Kenga Ayezaya 11:9.

4. Arane mɔɔ lɛ tumi la banlea azɛlɛ ye azo amuala

Gyisɛse Kelaese lɛ tumi kpole tɛla dasanli tumivolɛ biala. Kenga Mateyu 28:​18, na akee bɛzuzu kpuya ɛhye anwo:

• Kɛzi Gyisɛse tumi ne le kpole tɛla dasanli tumivolɛ biala ɛ?

Bɛta bɛkakyi sonla arane, yɛɛ nuhua ko biala nea azɛlɛ ye ɛleka ekyi bie azo ala. Na Nyamenle Belemgbunlililɛ ne ɛ? Kenga Daneɛle 7:​14, na akee bɛzuzu kpuya ɛhye mɔ anwo:

• Duzu ati a ɔle kpalɛ kɛ “bɛnrɛzɛkye” Nyamenle Belemgbunlililɛ ne a?

• Duzu ati a ɔle kpalɛ kɛ ɔbanlea azɛlɛ ye azo amuala a?

5. Ɔwɔ kɛ bɛye sonla tumililɛ bɛfi ɛkɛ

Duzu ati a ɔwɔ kɛ Nyamenle Belemgbunlililɛ ne ye sonla arane fi ɛkɛ a? Ye VIDIO ne, na akee bɛzuzu kpuya ɛhye anwo.

VIDIO: Duzu A Le Nyamenle Belemgbunlililɛ Ne?​—Foa Bie (1:41)

• Duzu a ɛvi sonla tumililɛ nu ɛra a?

Kenga Nolobɔvo 8:​9, na akee bɛzuzu kpuya ɛhye mɔ anwo:

• Ɛnea a ɔwɔ kɛ Nyamenle Belemgbunlililɛ ne ye sonla arane fi ɛkɛ ɔ? Kɛmɔti ɛ?

6. Nyamenle Belemgbunlililɛ ne tumivolɛma te yɛ edwɛkɛ bo

Kɛmɔ yɛ Belemgbunli Gyisɛse dɛnlanle azɛlɛ ye azo kɛ sonla la ati, ‘ɔte yɛ bɛtɛɛyɛlɛ bo.’ (Hibuluma 4:​15) Gyihova ɛkpa mrenyia nee mraalɛ nɔhavoma 144,000 ɛvi “abusua nee aneɛ nee menli nee maanle biala anu” kɛ bɛ nee Gyisɛse ɛli tumi.​—Yekile 5:9.

• Menli mɔɔ nee Gyisɛse bali tumi mɔɔ bɛte tɛnlabelɛ mɔɔ alesama wɔ nu abo la maa ɛ rɛle kyekye ɔ? Kɛmɔti ɛ?

7. Nyamenle Belemgbunlililɛ ne lɛ mɛla kpalɛ

Arane ngakyile di mɛla mɔɔ bɛnea a ɔbaboa bɛ maanlema na yeabɔ bɛ nwo bane la. Nyamenle Belemgbunlililɛ ne noko lɛ mɛla mɔɔ ɔwɔ kɛ ye maanlema di zo a. Kenga 1 Kɔlentema 6:​9-11, na akee bɛzuzu kpuya ɛhye mɔ anwo:

• Saa awie biala di Nyamenle mɛla zo a, ɛnea a kɛzi ewiade bayɛ ɛ?a

• Ɛnea a ndelebɛbo wɔ nu kɛ Gyihova banlea kɛ Belemgbunlililɛ ne maanlema bali mɛla ɛhye mɔ azo ɔ? Kɛmɔti ɛ?

• Duzu a kile kɛ menli mɔɔ ɛnli mɛla ɛhye mɔ azo la bahola ahakyi a?​—Nea ngyɛnu 11.

EDWƐKƐ TITILI

Nyamenle Belemgbunlililɛ ne le arane mɔɔ wɔ anwuma mɔɔ banlea azɛlɛ ye azo amuala a.

Ndinu

• Nwane mɔ a bali tumi wɔ Nyamenle Belemgbunlililɛ ne anu a?

• Kɛzi Nyamenle Belemgbunlililɛ ne le kpalɛ tɛla sonla arane biala ɛ?

• Ninyɛne mɔɔ Gyihova anye la kɛ Belemgbunlililɛ ne maanlema bayɛ la bie mɔ a le boni?

KPONDƐ DƆƆNWO

Nea mɔɔ Gyisɛse hanle ye wɔ ɛleka mɔɔ Belemgbunlililɛ ne wɔ anwo la.

“Asoo Nyamenle Belemgbunlililɛ Ne Wɔ Wɔ Ahonle Nu Ɔ?” (Edwɛkɛ mɔɔ wɔ jw.org azo)

Duzu ati a Gyihova Alasevolɛ di nɔhalɛ maa Nyamenle Belemgbunlililɛ ne tɛla sonla tumililɛ a?

Mendule Me Nwo Memaanle Nyamenle Belemgbunlililɛ Ne (1:​43)

Nea mɔɔ Baebolo ne ka ye wɔ menli 144,000 ne mɔɔ Gyihova ɛkpa bɛ kɛ bɛ nee Gyisɛse ɛli tumi anwo la.

“Nwane Mɔ A Kɔ Anwuma A?” (Edwɛkɛ mɔɔ wɔ jw.org azo)

Duzu a maanle raalɛ bie mɔɔ la efiade la liele lile kɛ Nyamenle ala a bahola amaa pɛlepɛlelilɛ ara ewiade ye anu a?

“Kɛzi Menyianle Nzisi Mɔɔ Kɔ Zo Anwo Mualɛ La” (Awake!, November 2011)