Ɛkulo Kɛ Ɛsenza Nu Ɔ?
1. Ngakyile mɔɔ kɔ zo wɔ ewiade ne anu la kile kɛ duzu a ɔwɔ kɛ yɛsenza nu a?
1 Wɔ 1 Kɔlentema 7:31 NW, Baebolo ne fa ewiade ne to bama mɔɔ ninyɛne nee nwɔhoalilɛma kɔ zo kakyi bɛ nwo wɔ zo la anwo. Ngakyile mɔɔ kɔ zo wɔ ewiade la kile kɛ ɔwɔ kɛ yɛyɛ nzenzaleɛ ɔvi mekɛ mɔɔ kɔ mekɛ la wɔ ndenle mɔɔ yɛdua zo yɛka edwɛkɛ ne, yɛ ngyehyɛleɛ nee edwɛkɛ ne mɔɔ yɛka la anu. Ɛkulo kɛ ɛsenza nu ɔ?
2. Duzu ati a ɔwɔ kɛ yɛsenza nu amaa yɛahola yɛ nee Gyihova ahyehyɛdeɛ ne alua ɛ?
2 Ndenle Mɔɔ Ɛdua Zo Ɛka Edwɛkɛ Ne La: Keleseɛne asafo ne yɛ nzenzaleɛ dahuu. Mɔlebɛbo ne mɔɔ Gyisɛse zoanle ye ɛdoavolɛma ne la, ɔhanle ɔhilele bɛ kɛ bɛmmafa aleɛ kodoku anzɛɛ ezukoa bɛbɔ bɛ nwo. (Mat. 10:9, 10) Noko akee, nzinlii ɔhakyile adehilelɛ ne ɔluakɛ ɛnee bɛbakpɔ ye ɛdoavolɛma kenlebie yɛɛ edwɛkɛhanlɛ gyima ne anu babuke ahɔdwu azɛlɛsinli gyɛne nu. (Luku 22:36) Wɔ ɛvoya ne mɔɔ ɛze ɛhɔ la anu, Gyihova ahyehyɛdeɛ ne ɛlua ndenle ngakyile zo ɛha edwɛkɛ ne—daselɛlilɛ ngɛlata, riledio zo edwɛkɛ, kale mɔɔ milahyinli mɔɔ maa bɛte edwɛkɛ wɔ nu—kɛmɔ ɛnee nwolɛ hyia wɔ zɔhane mekɛ ne la. Ɛnɛ, kɛmɔ menli dɔɔnwo ɛnda ɛndɛnla sua nu la ati, bɛlɛboa yɛ bɛamaa yɛali bagua nu yɛɛ mekɛ mɔɔ yɛnle daselɛlilɛ nu la daselɛ yɛaboka yɛ azua nu gyima ne anwo. Eza bɛmaa yɛ anwosesebɛ kɛ saa menli kɔ gyima wɔ alehyenlɛ ne anu a, yɛhɔ azua nu wɔ nɔsolɛ nu. Saa Gyihova anwuma ehwili ne kakyi ɔ nwo a, ɛsenza nu ɔ?—Yiz. 1:20, 21.
3. Kɛzi yɛsenza nu a ɔboa ɔmaa yɛdi daselɛ kpalɛ wɔ azɛlɛsinli ne anu ɛ?
3 Edwɛkɛ Mɔɔ Ɛka La: Duzu a menli mɔɔ wɔ ɛleka mɔɔ ɛde la dwenle nwolɛ kɛkala a? Gyima nee ezukoa? Abusua? Konle? Ɔle kpalɛ kɛ yɛnwu ngyegyelɛ nee tɛnlabelɛ mɔɔ menli wɔ nu wɔ yɛ azɛlɛsinli ne anu la amaa yɛanwu edwɛkɛ mɔɔ fɛta kɛ yɛka la. (1 Kɔl. 9:20-23) Saa yɛsenza yɛ edwɛkɛ ne anu yɛmaa ɔdi bɛ ngyegyelɛ nwo gyima a, ɔmaa suamenle ne mɔ ka bɛ ahonle nu edwɛkɛ tɛla kɛ yɛbaha yɛ ɛdeɛ mɔɔ yɛziezie la na bɛahile bɛ adwenle ala la.
4. Duzu ati a ɔwɔ kɛ yɛyɛ ye ndɛndɛ yɛsenza nu a?
4 Ɔnrɛhyɛ kɛzi ewiade ɛhye ɛlɛkakyi la bara awieleɛ, na amaneɛnwunlɛ kpole ne abɔ ɔ bo. “Mekɛ ne ɛwie.” (1 Kɔl. 7:29) Nea kɛzi ɔhyia kɛ yɛbazenza nu ndɛndɛ, amaa yɛahola yɛayɛ dɔɔnwo wɔ mekɛ ekyi ne mɔɔ ɛha la anu a!