YƐ KILISIENE ƐBƐLABƆLƐ

Bɛva Debie Fofolɛ Bɛboka Dapɛne Avinli Nyianu Ne Anwo

Ɔvi January 2018 mɔɔ kɔ la, bɛbava ngilenu nee media (nvoninli nee vidio) mɔɔ wɔ online study edition of the New World Translation of the Holy Scriptures (nwtsty) ne anu la bɛaboka yɛ dapɛne avinli debiezukoalɛ ne anwo. Saa bɛnlɛ ye wɔ bɛ aneɛ nu bɔbɔ a bɛbava bɛayɛ gyima. Ɛhye bamaa yɛanyia anyuhɔlɛ wɔ kɛzi yɛsiezie yɛ nwo yɛmaa debiezukoalɛ la anu. Na mɔɔ hyia kpalɛ la, ɔbamaa yɛabikye yɛ anwuma Selɛ Gyihova mɔɔ lɛ ɛlɔlɛ la!

NGILENU

Ngilenu ne maa ɛnwu amaamuo, ɛleka yɛɛ aneɛ mɔɔ bɛvale bɛhɛlɛle Baebolo ngyɛnu bie mɔ la anwo edwɛkɛ dɔɔnwo.

Mateyu 12:20

Kɛnlaneɛ mɔɔ kpondɛ anlu: Ɛnee bɛfa ɔlivi nwole bɛgua buakɛ ekyi nu, na yemɔ a ɛnee bɛsɔ ye wɔ sua nu kɛ kɛnlaneɛ a. Wiki ne twe nwole ne kɔ anwuma amaa senle ne azɔ. Giliki edwɛkpɔkɛ “Kɛnlaneɛ mɔɔ kpondɛ anlu” bahola ahile wiki mɔɔ senle la nuhua noko ɔluakɛ ɔka ekyi ɔnu la ati ɔlɛkpu esike la. Ngapezo ne mɔɔ wɔ Ayezaya 42:3 la hanle Gyisɛse anwunvɔnezelɛ nwo edwɛkɛ kɛ; ɔnrɛnlua anzɛɛ ɔnrɛmaa menli mɔɔ lɛ diedi na bɛbɛlɛ bɛ nwo aze la ɛnrɛkpo aze.

Mateyu 26:13

Nɔhalɛ nu: Hibulu edwɛkɛ a·men mɔɔ bɛva bɛhɔle Giliki nu ʼa·men, la kile “ɔyɛ ɛkɛ,” anzɛɛ “amgba.” Ɛnee Gyisɛse ta fa zɔhane edwɛkɛ ne dimoa wɔ ye edwɛkɛhanlɛ, ɛwɔkɛ anzɛɛ ngapezo nu, ɔfa ɔkile kɛ edwɛkɛ ne le nɔhalɛ na bɛkola bɛfa bɛ nwo bɛto zo bɔkɔɔ. Edwɛkɛ “nɔhalɛ nu,” anzɛɛ amen, mɔɔ Gyisɛse vale lile gyima la le ngakyile bɔkɔɔ wɔ buluku nwuanzanwuanza ne anu. Wɔ aneɛ mɔɔ bɛlimoale bɛvale bɛhɛlɛle Baebolo ne la anu, saa bɛka (a·menʹ a·menʹ) bɛtoa zo, kɛ mɔɔ ɔwɔ Dwɔn Edwɛkpa ne anu la a, bɛkile Gyisɛse edwɛkɛ ne abo kɛ “nɔhalɛ nu, nɔhalɛ nu.”—Dwn 1:51.

MEDIA

Nvoninli, ninyɛne mɔɔ bɛze, vidio mɔɔ ɛdendɛlɛ ɛnle nu yɛɛ ninyɛne mɔɔ bɛdolɔ la kilehile Baebolo kɛlɛtokɛ bie anu kɔ moa.

Bɛtefagye, Ɔlivi Boka Ne Yɛɛ Gyɛlusalɛm

Vidio ezinra ɛhye kile aduduleɛ adenle mɔɔ kɔ Gyɛlusalɛm ɔvi namule ekyi bie mɔɔ ɛnɛ bɛfɛlɛ ye et-Tur azo too ɔkɔdwu Ɔlivi Boka ne ati zo nehane. Bɛdie bɛdi kɛ ɛke a ɛnee bɛfɛlɛ ye Bɛtefagye wɔ Baebolo mekɛ zo la. Bɛtani wɔ Bɛtefagye aduduleɛ. Yɛɛ Bɛtefagye wɔ Ɔlivi Boka ne Sɛnzɛnduduleɛ. Saa Gyisɛse nee ye ɛdoavolɛ ne mɔ kɔ Gyɛlusalɛm a, bɛda Bɛtani mɔɔ ɛnɛ bɛfɛlɛ ye el-ʽAzariyeh (El ʽEizariya) la. Ɔle Arabic duma mɔɔ kile “Lazalɛse Sua Zo.”Kpolerazulɛ biala ɛnle nwo kɛ Gyisɛse lale Maata, Mɛle nee Lazalɛse sua nu. (Mt 21:17; Mk 11:11; Lu 21:37; Dwn 11:1) Ɔbahola yeara kɛ, mɔɔ Gyisɛse nee ɔ gɔnwo mɔ tu adenle ahɔ Gyɛlusalɛm la, bɛvale adenle ne mɔɔ bɛhile ye wɔ vidio ne anu la azo. Wɔ Naesan 9, 33 Y.M., mɔɔ Gyisɛse dɛnlanle asoaso ne azo luale Ɔlivi Boka ne azo hɔle Gyɛlusalɛm la, ɔbayɛ kɛ ɔvale Bɛtefagye adenle ne mɔɔ kɔ Gyɛlusalɛm la azo.

Bɛtani Mɔɔ Kɔ Bɛtefagye Adenle Ne
Bɛtefagye
Ɔlivi Boka
Kedelɔn Bɔnza
Ɛzonlenlɛ Sua

Agyakɛ Babonle Mɔɔ PɛlɛKo Zia Nu

Ɛhye le sonla gyakɛ babonle mɔɔ pɛlɛko mɔɔ ye tendenle le enkyi 4.5 zia nu la anwo nvoninli. Bɛnwunle kpalɛ ne mɔɔ bɛze la wɔ 1968 wɔ mekɛ mɔɔ bɛlɛtudu aze wɔ Gyɛlusalɛm sɔlɔ la. Ɛnee yedɛnla ɛkɛ ne ɔvi Wulomuma mekɛ zo. Ɛhye di daselɛ kɛ ɛnee saa bɛku awie a bɛfa pɛlɛko bɛbɔ ye bɛbeta baka ne anwo. Ɔbayɛ kɛ pɛlɛko ɛhye bie a Wulomuma sogyama vale bɔle Gyisɛse Kelaese baka nu la. Bɛnwunle ɛhye wɔ bolɛ ɛlɛka bie mɔɔ bɛfɛlɛ ye mbowule ɛlɛka la anu, ɛnee bɛfa sonla mɔɔ ɛwu la mbowule mɔɔ nwolɛ ɛhoa la bɛgua nu. Ɛhye kile kɛ ɛnee bɛsie sonla mɔɔ bɛkɛhu ye wɔ baka zo la.—Mt 27:35.