Kɛzi Gyisɛse Afɔlebɔlɛ Ne Le ‘Ɛkpɔnedeɛ Maa Menli Dɔɔnwo Ɛ’?
Baebolo ne bua kɛ
Gyisɛse afɔlebɔlɛ ne azo a Nyamenle balua yealie alesama ngoane yeavi ɛtane nee ewule nu a. Baebolo ne fɛlɛ Gyisɛse mogya ne mɔɔ ɔhwinle la kɛ ɛkpɔnedeɛ. (Ɛfɛsɛsema 1:7; 1 Pita 1:18, 19) Ɔti a Gyisɛse hanle kɛ ɔrale kɛ ‘ɔbava ye ngoane yeayɛ ɛkpɔnedeɛ yeamaa menli dɔɔnwo’ la.—Mateyu 20:28.
Nzɔne ati a ɛnee ‘ɛkpɔnedeɛ maa menli dɔɔnwo’ anwo hyia ɛ?
Ɛnee Adam nrenyia mɔɔ limoa la di munli, anzɛɛ ɛtane biala ɛnle ɔ nwo. Ɛnee ɔlɛ anyelazo kɛ ɔbadɛnla aze dahuu noko ɔminlinle ɛhye wɔ mekɛ mɔɔ ɔkpale kɛ ɔbayɛ Nyamenle anwo anzosesebɛ la. (Mɔlebɛbo 3:17-19) Mekɛ mɔɔ ɔwole mralɛ la, ɔvale sinlidɔlɛ mɔɔ le ɛtane la ɔwole bɛ. (Wulomuma 5:12) Ɛhye ati, Baebolo ne ka kɛ Adam ‘dɔnenle’ ɔ nwo nee ɔ mra kɛ ngɛkɛlɛ ɔmaanle ɛtane nee ewule. (Wulomuma 7:14) Kɛmɔ yɛnli munli la ati, yɛ nuhua biala ɛnrɛhola ɛnrɛmaa yɛ sa ɛnrɛha mɔɔ Adam maanle ɔvile yɛ sa la.—Edwɛndolɛ 49:7, 8.
Nyamenle akunlu yelɛyelale ye maanle Adam abozoamra kɛ bɛnlɛ anyelazo la. (Dwɔn 3:16) Noko, Nyamenle pɛlepɛlelilɛ nwo ngyinlazo ne kile kɛ ɔnle kɛ ɔbu ɔ nye ɔgua bɛ ɛtane ne azo mɔɔ ɔnyɛ nwolɛ debie a. (Edwɛndolɛ 89:14; Wulomuma 3:23-26) Nyamenle kulo alesama, ɔti ɔluale mɛla adenle zo ɔkpondɛle debie mɔɔ ɔbagyinla zo yeava bɛ ɛtane yeahyɛ bɛ na eza yeaye ɛtane yeavi ɛkɛ la. (Wulomuma 5:6-8) Ɛkpɔnedeɛ ne a le mɛla adenle zo deɛ ɛhye a.
Kɛzi ɛkpɔnedeɛ ne yɛ gyima ɛ?
Wɔ Baebolo ne anu, “ɛkpɔnedeɛ” ne kile ninyɛne nsa ɛhye mɔ mɔɔ doa zo la:
Ɔle ezukoa mɔɔ bɛtua.—Ɛdianlɛ 3:46, 47.
Ɔmaa bɛdie awie, anzɛɛ bɛsia bɛdie debie.—Adendulɛ 21:30.
Ɔwɔ kɛ ɔsa deɛ ne tua, anzɛɛ ɔ nee deɛ ne mɔɔ ɛzɛkye la bolɛ sɛ.a
Suzu deɛmɔti ninyɛne nsa ɛhye mɔ fale Gyisɛse Kelaese ɛkpɔnelɛ afɔlebɔlɛ ne anwo la.
Ezukoa. Baebolo ne ka Kilisienema anwo edwɛkɛ kɛ bɛdɔle bɛ “bolɛ ɛsesebɛ.” (1 Kɔlentema 6:20; 7:23) Gyisɛse mogya ne mɔɔ ɔvale ‘ɔkpɔnenle menli ɔvile abusua ekpunli, aneɛ nee maanle ngakyile kɔsɔɔti anu ɔmanle Nyamenle’ la a le bolɛ ɛsesebɛ ne a.—Yekile 5:8, 9.
Ɛlielɛ. Gyisɛse afɔlebɔlɛ ne ɛmaa bɛlie “menli kɔsɔɔti bɛvi ɛtane” nu.—1 Kɔlentema 1:30; Kɔlɔsaema 1:14; Hibuluma 9:15.
Ɔsa deɛ ne tua. Gyisɛse afɔlebɔlɛ ne nee mɔɔ Adam minlinle la le ko—dasanli ngoane mɔɔ di munli. (1 Kɔlentema 15:21, 22, 45, 46) Baebolo ne ka kɛ: “Kɛmɔ sonla ko [Adam] anzosesebɛ ti menli muala yɛle ɛtanevolɛma la, zɔhane ala yɛɛ ɔlua sonla ko [Gyisɛse] anzomɛlɛkɛ zo menli somaa bazɔ Nyamenle anye a.” (Wulomuma 5:19) Ɛhye kilehile deɛmɔti sonla ko ewule kola yɛ ɛkpɔnedeɛ maa ɛtanevolɛma dɔɔnwo la anu. Nɔhalɛ nu, Kelaese [Gyisɛse] afɔlebɔlɛ ne kola ‘kpɔne menli kɔsɔɔti’ mɔɔ tu agyakɛ mɔɔ fɛta amaa bɛanyia zolɛ nvasoɛ la.—1 Temɔte 2:5, 6.
a Wɔ Baebolo ne anu, edwɛkɛkpɔkɛ mɔɔ bɛlimoale bɛhilele ɔ bo “ɛkpɔnedeɛ” la kile ezukoa mɔɔ bɛtua bɛdie debie mɔɔ sonle bolɛ la. Kɛ neazo la, Hibulu yɛkpɔkɛ ka·pharʹ ne kile ‘ka zo’ anzɛɛ “keda zo.” (Mɔlebɛbo 6:14) Fane dɔɔnwo ne ala, ɔkile ɛtane mɔɔ bɛkeda zo. (Edwɛndolɛ 65:3) Edwɛkɛkpɔkɛ koʹpher mɔɔ zɔho ye la noko kile ezukoa mɔɔ bɛtua bɛkeda debie zo, anzɛɛ bɛdie debie la. (Adendulɛ 21:30) Zɔhane ala a, Giliki edwɛkɛkpɔkɛ lyʹtron mɔɔ bɛkile ɔ bo “ɛkpɔnedeɛ” la noko kola kile “ezukoa mɔɔ bɛtua bɛsia bɛdie debie.” (Mateyu 20:28; The New Testament in Modern Speech, by R. F. Weymouth ) Giliki kɛlɛvoma vale edwɛkɛkpɔkɛ ɛhye lile gyima hilele ezukoa mɔɔ bɛtua bɛdie awie mɔɔ bɛhyele ye wɔ konle nu anzɛɛ bɛdie akɛlɛ la.