Nwane Mɔ A Ɛlɛka Edwɛkpa Ne A?

“Bɛbabɔ . . . nolo wɔ aleɛabo amuala.”—MATEYU 24:14.

GYIHOVA ALASEVOLƐ ɛlɛbɔ edwɛkpa ne nolo wɔ ewiade amuala. Bɛdua ndenle ngakyile zo a bɛyɛ ɛhye a. Ndenle ne mɔ ko a le . . .

Edwɛkɛ Ne Ɛhanlɛ. Gyihova Alasevolɛ fa edwɛkpa ne kɔ menli ɛkɛ kɛmɔ Gyisɛse nee ye ɛdoavolɛ ne mɔ yɛle la. (Luku 8:1; 10:1) Bɛngendɛ bɛmmaa menli ne ɛmba bɛ nwo. Alasevolɛ kɔsɔɔti—mɔɔ bɛ dodo bo mgbe nsuu la—fa bɛ nwo wula Nyamenle Belemgbunlililɛ ne anwo daselɛlilɛ ne anu. Bɛka edwɛkɛ ne wɔ azua nu, awɔdenle zo, telefuu nee ndenle gyɛne zo. Ɛkenle ɛvolɛ ne, Alasevolɛ ne mɔ vale dɔnehwele mɔɔ bo mgbe mgbe ko nee foa la yɛle gyima ɛhye.

Tɛ Nyamenle Belemgbunlililɛ ne anwo debie angome a bɛkilehile a, bɛkilehile “debie biala” mɔɔ Gyisɛse hanle la noko. (Mateyu 28:20) Bɛ nee menli mɔɔ bo mgbe mɔtwɛ la sukoa Baebolo ne wɔ bɛ azua nu dahuu mɔɔ bɛnlie bɛ ɛhwee a.

Alasevolɛ ne mɔ ɛlɛka edwɛkɛ ne wɔ maanle 236 anu wɔ ewiade amuala. Bɛka bɛkile awie biala. Bɛka ye wɔ namunamu nee azua mgbole zo, Amazon nee Siberia ɛhoayelɛ ne mɔ anu, Afeleka ɛsɛlɛ zo yɛɛ Himalaya Awoka ne mɔ azo. Bɛndua bɛ kakɛ wɔ gyima ɛhye anwo; bɛdabɛ mumua ne a bɛbɔ nwolɛ kakɛ a, yɛɛ bɛfa bɛ mekɛ a bɛyɛ a. Nyamenle nee bɛ gɔnwo mɔ anwo ɛlɔlɛ ti a bɛyɛ a. Eza bɛmaa menli te edwɛkpa ne ɔlua . . .

Mbuluku Ngakyile Zo. Bɛyɛ magazine ɛhye mɔɔ ye duma ne amuala a le Ɛzinzalɛ Arane Ɔbɔ Gyihova Belemgbunlililɛ Nolo la wɔ aneɛ 185 anu kɛkala na ko biala mɔɔ bɛyɛ la bɛfa mɔɔ bo mgbe 42 la bɛmaa. Bɛyɛ Awake! magazine ne mɔɔ ɔdaye noko ɔbɔ Belemgbunlililɛ ne nolo la wɔ aneɛ 83 anu, na ko biala mɔɔ bɛyɛ la bɛfa mɔɔ ɔkɛyɛ mgbe 40 la bɛmaa.

Bɛyɛ mbuluku, brohyua, trate, CD anzɛɛ MP3 nee DVD mɔɔ kilehile Baebolo nu la wɔ aneɛ mɔɔ bo 540 la anu. Alasevolɛ ne mɔ ɛyɛ ninyɛne ɛhye mɔ mɔɔ bo mgbe mgbe 20 la wɔ ɛvolɛ bulu pɛ mɔɔ ɛze la anu. Saa bɛkyɛ ye pɛpɛɛpɛ a awie ko biala mɔɔ de azɛlɛ ye azo la banyia kɛyɛ nsa!

Gyihova Alasevolɛ eza ɛyɛ anzɛɛ ɛmaa bɛyɛ Baebolo ne dɔɔnwo. Kɛkala, bɛyɛ New World Translation of the Holy Scriptures ne mɔɔ Alasevolɛ ne mɔ a hilele ɔ bo, na bɛfa bɛmaa awie mɔ la kɔsɔɔti anzɛɛ foa bie wɔ aneɛ 96 anu. Bɛva mɔɔ bo mgbe 166 la bɛmaa. Eza Alasevolɛ ne mɔ ka Belemgbunlililɛ edwɛkpa ne wɔ . . .

Keleseɛnema Ayia Bo. Ayia mɔɔ bɛyɛ ye dapɛne biala wɔ Belemgbunlililɛ Asalo la ɛnle ɛzonlenlɛ nu nyɛleɛ bie ala; bɛdua zo bɛtete menli. Bɛmaa ɛdendɛlɛ mɔɔ gyi Baebolo ne azo, yɛɛ bɛdua Ɛzinzalɛ Arane ne nee mbuluku gyɛne zo bɛsukoa Baebolo ne. Eza Alasevolɛ ne mɔ sukoa kɛzi bɛdi edwɛkpa ne anwo daselɛ kpalɛ la wɔ bɛ ayia ne mɔ abo.

Alasevolɛ mɔɔ wɔ asafo mɔɔ bo 107,000 anu wɔ azɛlɛ ye kɔsɔɔti azo la sukoa deɛ ko ne ala, na ɔmaa bɛyɛ ko. Awie biala kola ba ayia ɛhye bie. Bɛnlielie ezukoa wɔ ɔ bo. Nɔhalɛ nu, saa Alasevolɛ ne mɔ ɛnli mɔɔ bɛka la azo a anrɛɛ ɛhye mɔ amuala bayɛ mgbane. Ɛhye ati, bɛbɔ mɔdenle bɛbɔ edwɛkpa ne nolo ɔlua . . .

Bɛ Ɛbɛla Kpalɛ Zo. Bɛbɔ mɔdenle bɛbɔ ɛbɛla kpalɛ kɛ Keleseɛnema. Bɛyɛ mɔɔ bɛkpondɛ kɛ menli yɛ maa bɛ la bɛmaa awie mɔ. (Mateyu 7:12) Ɔnva nwo kɛ bɛnli munli na ɔdwu mekɛ ne bie a bɛfo la, bɛka edwɛkpa ne bɛkile awie mɔ na eza bɛlɛ ɛhulolɛ kɛ bɛbalua ndenle gyɛne zo bɛaboa awie biala.

Tɛ Gyihova Alasevolɛ ne mɔ adwenle a le kɛ bɛdua bɛ edwɛkɛhanlɛ ne azo bamaa ewiade amra amuala ahakyi. Emomu, saa bɛyɛ gyima ne kɛmɔ Gyihova kulo la a, awieleɛ ne bara kɛmɔ Gyisɛse hanle dole ɛkɛ la. Kɛzi ɛhye baha azɛlɛ ne nee menli mɔɔ de zolɛ la ɛ?

[Nvoninli wɔ mukelɛ 7]

Gyihova Alasevolɛ ɛlɛka edwɛkpa ne wɔ ewiade amuala

Duzu A Le “Awieleɛ Ne”?

“. . . kolaa na awieleɛ ne ara.”—MATEYU 24:14.

KENLENSA ye menli ta ka ewiade awieleɛ ne anwo edwɛkɛ. Yɛnwu nwolɛ edwɛkɛ dɔɔnwo wɔ mbuluku, video, nee magazine ngakyile nu. Ninyɛne mɔɔ bie mɔ kile kɛ ɔbava awieleɛ ne yeara la bie a le nukelea konle, pelanet ngyikyi mɔɔ bayia nu, ewule ngɛkɛba, maanle nu ɛhakyilɛ mɔɔ bɛngola nwolɛ ɛhwee yɛ, nee ɛlɔne mɔɔ vi anwomanyunlu la.

Ɛzonlenlɛ dɔɔnwo noko lɛ adwenle ngakyile wɔ nwo; dɔɔnwo kilehile kɛ “awieleɛ ne” bazɛkye ngoane mɔɔ wɔ azɛlɛ ye azo la kɔsɔɔti. Abɔlɔba bie vale nyanelilɛ hɛlɛle ye wɔ Mateyu 24:14 anwo kɛ: “Edwɛkɛ ɛhye anwo hyia kpalɛ wɔ Nyamenle Edwɛkɛ ne anu . . . Ɛzɛkyelɛ mɔɔ yɛ ɛzulolɛ kpalɛ la ɛlɛba yɛ awolɛndoazo ye azo mɔɔ yɛ nuhua ekyi bie ala a die to nu a.”

Menli ɛhye mɔ ta bu bɛ nye gua edwɛkɛ bie mɔɔ anwo hyia kpalɛ la azo: Gyihova Nyamenle “bɔle” azɛlɛ ye; “ɔbɔle . . . amaa sonla adɛnla” zo. (Ayezaya 45:18) Yemɔti mekɛ mɔɔ Gyisɛse hanle “awieleɛ ne” anwo edwɛkɛ la, ɛnee ɔngile kɛ bɛbazɛkye azɛlɛ ne; yɛɛ ɛnee ɔngile kɛ bɛbabɔ alesama abo zo bɔkɔɔ. Mɔɔ ɛnee ɔlɛkile la a le kɛ bɛbazɛkye amumuyɛma—menli mɔɔ ɛnli adehilelɛ kpalɛ mɔɔ Gyihova fa maa azo la.

Suzu neazo ɛhye anwo. Fa ye kɛ ɛlɛ sua kɛnlɛma bie na wɔva wɔmaa awie mɔ kɛ bɛdɛnla nu mgbane. Bie mɔ de anzondwolɛ nu yɛɛ bɛnea wɔ sua ne boɛ. Noko bie mɔ ɛdeɛ, bɛgyegye adwenle, bɛko, na bɛyɛ menli ne mɔɔ de anzondwolɛ nu la basabasa. Bɛsɛkye wɔ sua ne yɛɛ ɛka ɛkile bɛ kɛ bɛgyakyi a bɛngyakyi.

Kɛzi ɛbali ngyegyelɛ ɛhye anwo gyima ɛ? Asoo ɛbazɛkye wɔ sua ne? Kyɛkyɛ. Kpolerazulɛ biala ɛnle nwolɛ kɛ ɛbadu menli mɔɔ ɛnli boɛ la na wɔayɛ ɛleka mɔɔ bɛzɛkye ye la boɛ.

Zɔhane ala a Gyihova bayɛ a. Ɔmanle edwɛndolɛnli ne hɛlɛle kɛ: “Bɛbaminli amumuyɛma abo zo; na bɛdabɛ mɔɔ bɛ rɛle wɔ [Gyihova] anu la bava azɛlɛ ne. Ɔnrɛhyɛ biala ɛnee amumuyɛnli ne abo zo ɛminli, ɛbahɔnlea ɛleka mɔɔ ɔwɔ la, na ɛnrɛnwu ye. Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”—Edwɛndolɛ 37:9-11.

Ɛzoanvolɛ Pita noko hanle edwɛkɛ ko ne ala. Ɔhɛlɛle kɛ: “[Nyamenle] manle anwuma rale, na azɛlɛ resee ye noko yele ɔ nwo vile nzule nu rale dɛbadɛba ne, na nzule ɛbɔ ye ɛyia a, yɛɛ eza noko nzule ye ala a yile zɛkyele ewiade dɛba ne la.” (2 Pita 3:5, 6) Wɔ ɛke ɛnee ɛzoanvolɛ ne ɛlɛka Nowa mekɛ zo Azuyilɛ ne anwo edwɛkɛ. Bɛzɛkyele ɛtanevolɛma, noko bɛanzɛkye azɛlɛ ne. Ɔvale ewiade amuala Azuyilɛ ne “ɔhilele kɛ kenle bie bɛdabɛ mɔɔ bɛngulo Nyamenle la kɛzi kɛwie ye la” ɛne.—2 Pita 2:6.

Pita hanle zɔle zolɛ kɛ: “Bɛhua anwuma nee aze mɔɔ kɛkala wɔ ɛkɛ ne la anwo senle bɛzie ɛkɛ.” Saa yɛfa ye zɔhane ala a, yɛbanyia adwenle mɔɔ ɛndenrɛ. Noko, suzu nwo nea. Ngyɛnu ko ne ala ka kɛ: “Nee menli mɔɔ ɛnze Nyamenle la ɛzɛkyelɛ.” Tɛ azɛlɛ ne a bɛbazɛkye ye a, emomu ɛtanevolɛma. Duzu a badoa zo a? Pita hɛlɛle kɛ: “Yɛkendɛ anwuma fofolɛ ne [Nyamenle Mɛzaya Belemgbunlililɛ] nee ewiade fofolɛ ne [alesama abusua mɔɔ yɛ mɔɔ tenrɛ] mɔɔ pɛlepɛlelilɛ wɔ nu la.”—2 Pita 3:7, 13.

Baebolo ngapezo eza kile kɛ “awieleɛ ne” ɛbikye kpalɛ. Kenga Mateyu 24:3-14 nee 2 Temɔte 3:1-5 na nea ninyɛne mɔɔ kile kɛ ɛhye le nɔhalɛ la.a

Kakula bɔbɔ kola te edwɛkɛ mɔɔ wɔ Mateyu 24:14 la abo. Asoo ɔnyɛ wɔ azibɛnwo kɛ menli ɛnde ɔ bo ɔ? Seetan ɛzi menli adwenle ne anye wɔ nɔhalɛ mɔɔ wɔ Nyamenle Edwɛkɛ ne anu la anwo. (2 Kɔlentema 4:4) Ɛhye ati a bɛnde ɔ bo a. Eza Nyamenle ɛva ye bodane ne mɔ ɛvea bɛdabɛ mɔɔ bɛmemaa bɛ nwo zo la na yela ye ali yehile bɛlɛvoma. Wɔ ɛhye anwo, Gyisɛse hanle kɛ: “Egya, anwuma nee aze Awulae, meyɛ wɔ mo kɛ ninyɛne mɔɔ wɔva wɔvea nrɛlɛbɛvolɛma nee nwomama la wɔye wɔhile menli mɔɔ ɛnze nwolɛ bie la.” (Mateyu 11:25) Ɔle enililɛ kpole kɛ yɛboka bɛlɛvoma mɔɔ bɛte Nyamenle Belemgbunlililɛ ne abo na bɛ nye la kenlebie nyilalɛ mɔɔ bara la anwo.