Nrɛlɛbɛ Wɔ Nu Kɛ Ɛbayɛ Bɛlɛvo

Toñi mɔɔ bɛtete ye kɛ ɔnlea wuliravolɛma la bɔle sua bie anlenkɛ, na raalɛ bie mɔɔ ɛli kɛyɛ ɛvolɛ 50 la liele zo. Raalɛ ne bɔle Toñi aholoba na ɔdeanle ye kɛ yeamba gyima ndɛ. Toñi anga amozi wɔ gyima nu. Noko, ɔkpale raalɛ ne kyɛlɛ.

ƆHƆLE ɛkɛ ne bieko la, raalɛ ne eza deanle ye. Duzu a Toñi yɛle a? Ɔka kɛ: “Ɛnee tɛnlabelɛ ne anu yɛ se, ye aholoba ne ɛnlɛ ngyinlazo.” Noko, Toñi kpale raalɛ ne kyɛlɛ bieko na ɔzele ye kɛ ɔte nyane mɔɔ ɔlɛdi la abo.

Saa ɛdawɔ a le Toñi a, anrɛɛ duzu a ɛbayɛ a? Anrɛɛ ɛbabɔ mɔdenle wɔala bɛlɛvo subane ali ɔ? Anrɛɛ ɔbayɛ se kɛ ɛbahomo ɛ nwo zo ɔ? Nɔhalɛ nu, ɔnla aze kɛ ɛbazie ɛ nwo dii wɔ tɛnlabelɛ zɛhae anu. Saa yɛ ahonle tu anzɛɛ yɛfa ɛya a, ɔhyia mɔdenlebɔlɛ na yɛazie yɛ nwo dii.

Noko, Baebolo ne maa Kilisienema anwosesebɛ kɛ bɛyɛ bɛlɛvo. Nɔhalɛ nu, Nyamenle Edwɛkɛ ne se nrɛlɛbɛ wɔ nu kɛ yɛbayɛ zɔ. Gyemise bizale kɛ: “Bɛ nuhua boni a ze nrɛlɛbɛ na ɔlɛ ndelebɛbo a? Bɛmaa ɔva ye ɛbɛlabɔlɛ kpalɛ ɔpɛ kilemunli ɔhile nyɛleɛ kpalɛ mɔɔ bɛfa mɛlɛbɛnwoaze nee nrɛlɛbɛ bɛyɛ la.” (Gye. 3:13) Kɛzi bɛlɛvo subane da nrɛlɛbɛ ne mɔɔ vi anwuma la ali ɛ? Na duzu a bamaa yɛanyia subane kɛnlɛma ɛhye a?

BƐLƐVO SONLA ZE NRƐLƐBƐ

Bɛlɛvo sonla kola di ɛzulolɛ zo. “Nyelebɛnloa bɛtɛɛ maa ɛya dwo, na ɛdendɛlɛ katekate ka ɛya.”—Mrɛ. 15:1.

Debie mɔɔ bɛyɛ ye ɛya zo la kola maa edwɛkɛ ɛtane bie sɛkye bɔkɔɔ ɔluakɛ ɔtwehwe konle ɔba. (Mrɛ. 26:21) Noko, nyelebɛnloa bɛtɛɛ boa kpole kpalɛ. Ɔkola ɔmaa awie mɔɔ yɛ basabasa la ahonle dwo.

Toñi ɛnwu ɛhye bie ɛlɛ. Mɔɔ raalɛ ne nwunle kɛzi Toñi buale ye bɛtɛɛ la, ɔzunle. Ɔhanle kɛ ɔlɛ ngyegyelɛ yɛɛ abusua ngyegyelɛ noko gua ɔ nwo zo. Toñi lile ye daselɛ, bɛbɔle Baebolo ɛzukoalɛ bo—ɔluakɛ ɔziele ɔ nwo dii yɛɛ yeanyɛ basabasa.

Bɛlɛvo sonla kola maa yɛ nye die. “Nyilalɛ ɛha bɛdabɛ mɔɔ bɛle bɛlɛvo la; Azɛlɛ ye bayɛ bɛ ɛdeɛ!”—Mat. 5:5.

Duzu ati a bɛlɛvoma anye die ɛ? Menli mɔɔ ɛnee yɛ basabasa la ɛrayɛ bɛlɛvoma la ati, kɛkala bɛ nye die. Bɛ ɛbɛlabɔlɛ ɛyɛ kpalɛ, na bɛze kɛ bɛbanyia anyelielɛ kenle bie. (Kɔl. 3:12) Adolfo, maangyebakyi zo neavolɛ bie mɔɔ wɔ Spain la kakye kɛzi ɛnee ɔde kolaa na yeanwu nɔhalɛ ne la.

Adolfo ka kɛ: “Ɛnee menlɛ bodane biala wɔ ɛbɛlabɔlɛ nu. Ɛnee mengola me ɛya ne azo komo fee, ɔti ɛnee me gɔnwo mɔ sulo kɛ mebava ɛya na meayɛ basabasa. Akee edwɛkɛ bie zile maanle mengakyile. Bɛwɔle me dadeɛ fane nsia wɔ konle nu, mogya dule me too mɔɔ anrɛɛ mewu.”

Noko kɛkala, Adolfo dua ye edwɛkɛ nee ye nyɛleɛ zo kilehile awie mɔ kɛ bɛyɛ bɛlɛvo. Ɔ nye mɔɔ die nee ye subane kpalɛ ne ɛmaa menli dɔɔnwo ɛbikye ye. Adolfo se ɔyɛ ye fɛ kɛ yehola yehakyi la. Eza ɔ nye sɔ kɛzi Gyihova ɛboa ye yemaa yenyia bɛlɛvo subane la.

Bɛlɛvo sonla maa Gyihova anye die. “Me ra nrenya, nwu nrɛlɛbɛ na maa me nye ɛlie, amaa saa awie ka me nwo edwɛkɛ a meahola ye bua.”—Mrɛ. 27:11.

Gyihova kpɔvolɛ kpanyinli Abɔnsam, ɛlɛbɔ ye aholoba. Nyamenle lɛ adenle fa ɛya wɔ aholoba ɛhye mɔ anwo, noko Baebolo ne se Gyihova ɛnva “ɛya mgbane mgbane.” (Ade. 34:6) Saa yɛbɔ mɔdenle yɛsukoa Nyamenle mɔɔ ɔnva ɛya mgbane mgbane na ɔbɛlɛ ɔ nwo aze la a, ɛnee yɛlua nrɛlɛbɛ adenle mɔɔ maa Gyihova anye die kpole la azo.—Ɛfɛ. 5:1.

Ɛkpɔlɛ wɔ ewiade. Bie a yɛbayia menli mɔɔ le ‘anwomemaazo, adubɛnwo, bɛka munzule edwɛkɛ, dumasɛkyevoma, menli mɔɔ ɛngomo bɛ nwo zo, menli mɔɔ anwo yɛ ɛzulolɛ’ la. (2 Tem. 3:2, 3) Noko, ɔnle kɛ ɛhye si Kilisienenli adenle kɛ ɔbayɛ bɛlɛvo. Nyamenle Edwɛkɛ ne kakye yɛ kɛ ‘nrɛlɛbɛ ne mɔɔ vi anwuma lɔ la le anzodwolɛ, ɔlɛ ndelebɛbo.’ (Gye. 3:17) Saa yɛda anzodwolɛ nee ndelebɛbo subane ali a, ɛnee yɛlɛkile kɛ yɛlɛ nrɛlɛbɛ ne mɔɔ vi anwuma lɔ la. Saa bɛka yɛ ɛya a, nrɛlɛbɛ ɛhye bamaa yɛala bɛtɛɛyɛlɛ subane ali na yɛabikye Gyihova, nrɛlɛbɛ Maavolɛ ne.

Kɛ Ɔkɛyɛ Na Wɔayɛ Bɛlɛvo La

Saa awie sisi wɔ anzɛɛ ɔ nee wɔ anli ye boɛ a, duzu a bamaa wɔahomo ɛ nwo zo na wɔayɛ debie mɔɔ bamaa Gyihova anye alie ɛ? Ngyinlazo ɛhye mɔ mɔɔ ɛbadwenledwenle nwo la baboa wɔ:

1 KPO ‘EWIADE SUNSUM NE.’—1 Kɔl. 2:12. Menli dɔɔnwo bu sonla mɔɔ le bɛlɛvo la kɛ ɔ nwo ɛnyɛ se. Bɛ adwenle a le kɛ saa sonla nwo bayɛ se a, kyesɛ ɔmaa ɔ nye yɛ se. Adwenle zɛhae da ewiade sunsum ne ali—tɛ nrɛlɛbɛ ne mɔɔ vi anwuma lɔ la ɔ. Nɔhalɛ nu, Baebolo ne maa ɔda ali kɛ, awie mɔɔ le bɛlɛvo la lɛ anwosesebɛ kpole. “Sonla mɔɔ lɛ abotane la kola ka edwɛkɛ toonwo maa belemgbunli fa; ɛdendɛlɛ bɛtɛɛ bubu mbowule nu.”—Mrɛ. 25:15.

Kpuya:

Asoo mebu bɛlɛvo sonla kɛ ɔ nwo yɛ se anzɛɛ ɔle bobonyia?

Melɛbɔ mɔdenle meakpo “sonla su ne gyima” mɔɔ bie a le ɛya nee ɛkpɔlɛ la ɔ?—Gal. 5:19, 20.
2 NYIA MEKƐ DWENLEDWENLE NINYƐNE NWO. “Tenlenenli dwenle na yeabua edwɛkɛ nwo, na amumuyɛnli buke ɔ nloa a, munzule ngome.” (Mrɛ. 15:28) Saa edwɛkɛ bie si na yɛbuke yɛ nloa ɛkɛ ne ala a, bie a yɛbaha edwɛkɛ mɔɔ nzinlii yɛbanlu yɛ nwo la. Noko, saa yɛdwenle kolaa na yɛadendɛ a, yɛbahyehyɛ yɛ edwɛkɛ ne kpalɛ, yɛ nyelebɛnloa bayɛ bɛtɛɛ, na yeamaa anwosesebɛ.

Kpuya:

Saa melɛ ahonle a, kɛzi ɔbaha me ɛ?

Anzodwolɛ ti, mebabu me nye meagua nzisi zo ɔ?—Mrɛ. 19:11.
3 TA YƐ ASƆNE.Yɛ asɔne biza sunsum nwuanzanwuanza ne mɔɔ le tumi kpole wɔ ewiade la. (Luku 11:13) Kakye kɛ mɛlɛbɛnwoaze nee bɛnwozohomolɛ boka Nyamenle sunsum nwuanzanwuanza ne ma ne anwo. Adolfo ka kɛ: “Gyihova mɔɔ mesɛlɛ ye dahuu la ɛboa me kpole kpalɛ, titili wɔ mekɛ mɔɔ tɛnlabelɛ ne anu kɛyɛ se kpalɛ la.” Saa yɛfi ahonle nu ‘yɛyɛ nzɛlɛlɛ dahuu’ a, Gyihova babua asɔne mɔɔ yɛdayɛ noko yɛyɛ kɛ ɔmaa yɛ sunsum nwuanzanwuanza la.—Wlo. 12:12.

Kpuya:

Mesɛlɛ Gyihova dahuu kɛ ɔnleɛnlea me ahonle nee me nzuzulɛ nu ɔ?

Asoo meyɛ asɔne mebiza ye sunsum ne nee nrɛlɛbɛ mɔɔ bamaa meayɛ mɔɔ sɔ ɔ nye la?—Edw. 139:23, 24; Gye. 1:5.