Ɔnrɛhyɛ Gyihova balua ye Belemgbunlililɛ ne azo aye yɛ ngyegyelɛ kɔsɔɔti avi ɛkɛ. Ɛhye le edwɛkpa mɔɔ ɔwɔ kɛ awie biala te a. Ɛnee Gyisɛse kulo kɛ ye ɛdoavolɛma ka edwɛkɛ ɛhye kile awie biala! (Mateyu 28:​19, 20) Kɛzi Gyihova Alasevolɛ ɛlɛyɛ mɔɔ Gyisɛse hanle la ɛ?

1. Kɛzi Mateyu 24:​14 ɛlɛba nu ɛnɛ ɛ?

Gyisɛse hanle kɛ: “Bɛbabɔ Belemgbunlililɛ ne anwo edwɛkpa ɛhye nolo wɔ azɛlɛ ye azo amuala.” (Mateyu 24:​14) Gyihova Alasevolɛ anye die kɛ bɛlɛyɛ gyima ɛhye mɔɔ anwo hyia la. Yɛlɛbɔ edwɛkpa ne nolo wɔ aneɛ mɔɔ bo 1,000 la anu wɔ ewiade amuala! Gyima kpole ɛhye hyia mɔdenlebɔlɛ nee ngyehyɛleɛ kpalɛ. Gyihova amboa yɛ a yɛnrɛhola ye yɛ.

2. Mɔdenle boni a yɛbɔ yɛdi menli daselɛ a?

Yɛka edwɛkɛ ne wɔ ɛleka biala mɔɔ menli wɔ la. Yɛka edwɛkɛ ne wɔ “azua nu” kɛ mɔɔ alimoa Kilisienema ne yɛle la. (Gyima ne 5:​42) Adenle kpalɛ ɛhye maa yɛkola yɛka edwɛkɛ ne yɛkile menli mgbe dɔɔnwo ɛvolɛ biala. Kɛmɔ menli ɛnda ɛnle sua nu la ati, eza yɛka edwɛkɛ ne wɔ bagua nu. Dahuu yɛkpondɛ ndenle yɛdua zo yɛka Gyihova nee ye bodane ne anwo edwɛkɛ yɛkile awie mɔ.

3. Nwane a ɔle ye gyima kɛ ɔbɔ edwɛkpa ne nolo a?

Ɔwɔ kɛ nɔhalɛ Kilisienema kɔsɔɔti bɔ edwɛkpa ne nolo kile awie mɔ. Yɛfa gyima ɛhye anyebolo zo. Yɛbɔ mɔdenle biala mɔɔ yɛbahola la yɛka edwɛkɛ ne ɔluakɛ yɛnwu kɛ menli ngoane la esiane nu. (Kenga 1 Timote 4:​16.) Bɛndua yɛ kakɛ wɔ gyima ɛhye anwo, ɔluakɛ Baebolo ne ka kɛ: “Bɛnyianle ye mgbane, bɛva bɛmaa mgbane.” (Mateyu 10:​7, 8) Tɛ awie biala a anye die yɛ edwɛkɛ ne anwo a. Noko yɛkɔ zo yɛka ɔluakɛ edwɛkɛhanlɛ ne boka yɛ ɛzonlenlɛ ne anwo yɛɛ ɔmaa Gyihova anye die.

SUKOA DƆƆNWO

4. Yɛbɔ mɔdenle kpalɛ yɛdi menli kɔsɔɔti daselɛ

VIDIO: Bɛli Daselɛ ‘Bɛhɔdwu Azɛlɛ Ye Azo Ɛleka Biala’ (7:33)

• Duzu a ɛ nye die nwo wɔ mɔdenle mɔɔ Gyihova Alasevolɛ ɛlɛbɔ aha edwɛkɛ ne la anwo a?

Kenga Mateyu 22:​39 yɛɛ Wulomuma 10:​13-15, na akee bɛzuzu kpuya ɛhye mɔ anwo:

• Kɛzi yɛ daselɛlilɛ gyima ne kile kɛ yɛkulo yɛ gɔnwo mɔ ɛ?

• Kɛzi Gyihova bu menli mɔɔ bɔ edwɛkpa ne nolo la ɛ? ​—Nea ngyɛnu 15.

5. Nyamenle le yɛ gɔnwo gyimayɛvo

Anwubielɛ dɔɔnwo kile kɛ Gyihova ɛlɛkile yɛ gyima ne adenle. Kɛ neazo la, wɔ New Zealand, adiema nrenyia bie mɔɔ bɛfɛlɛ ye Paul la yiale raalɛ bie wɔ mekɛ mɔɔ ɔlɛyɛ azua nu daselɛlilɛ gyima ne wɔ kenle ko ewiazo la. Zɔhane nwonlomɔ ne, ɛnee raalɛ ne ɛbɔ Nyamenle duma Gyihova ne na yezɛlɛ ye kɛ ɔmaa awie ɛrakpɔla ye. Paul hanle kɛ: “Dɔnehwele nsa pɛle nu la ɛnee megyi ye anlenkɛ ne anloa.”

Kenga 1 Kɔlentema 3:​9, na akee bɛzuzu kpuya ɛhye anwo:

• Kɛzi anwubielɛ ngakyile le kɛ mɔɔ zile wɔ New Zealand la kile kɛ Gyihova ɛlɛkile edwɛkɛhanlɛ gyima ne adenle ɛ?

Kenga Gyima ne 1:​8, na akee bɛzuzu kpuya ɛhye anwo:

• Duzu ati a yɛhyia Gyihova moalɛ amaa yɛahola yɛayɛ yɛ daselɛlilɛ gyima ne a?

Asoo ɛze?

Dapɛne biala, yɛnyia ndetelɛ mɔɔ boa ɔmaa yɛka edwɛkɛ ne la wɔ yɛ dapɛne avinli debiezukoalɛ ne abo. Saa wɔhɔ debiezukoalɛ ɛhye mɔ bie ɛlɛ a, kɛzi ɛnwu ndetelɛ mɔɔ bɛfa bɛmaa la ɛ?

6. Yɛtie Nyamenle mɔɔ ɔse yɛha edwɛkɛ ne la

Wɔ ɛvoya mɔɔ limoa la anu, dwazotiama bɔle mɔdenle kɛ bɛmaa Gyisɛse ɛdoavolɛma agyakyi edwɛkɛhanlɛ ne. Alimoa Kilisienema gyinlanle adenle mɔɔ bɛlɛ kɛ bɛka edwɛkɛ ne la anzi ɔlua ‘edwɛkpa ne mɔɔ bɛluale mɛla adenle zo bɛvale bɛziele ɛkɛ ne la’ azo. (Felepaema 1:7) Zɔhane ala a Gyihova Alasevolɛ yɛ ye ɛnɛ a.a

VIDIO: Bɛfa Edwɛkpa Ne Bɛsie Ɛkɛ Wɔ Mɛla Adenle Zo (2:28)

Kenga Gyima ne 5:​27-42, na akee bɛzuzu kpuya ɛhye anwo:

• Duzu ati a yɛnrɛgyakyi edwɛkɛhanlɛ gyima ne a?​—Nea ngyehyɛnu 29, 38 yɛɛ 39.

EDWƐKƐ TITILI

Gyisɛse hanle hilele ye ɛdoavolɛma kɛ bɛbɔ edwɛkpa ne nolo wɔ maanle maanle kɔsɔɔti anu. Gyihova ɛlɛboa ye menli ne yeamaa bɛayɛ gyima ɛhye.

Ndinu

• Kɛzi bɛlɛbɔ edwɛkpa ne nolo wɔ ewiade amuala ɛ?

• Kɛzi yɛ daselɛlilɛ gyima ne kile kɛ yɛkulo yɛ gɔnwo mɔ ɛ?

• Ɛnea a edwɛkɛhanlɛ gyima ne maa yɛ nye die ɔ? Duzu ati ɔ?

KPONDƐ DƆƆNWO

Nea kɛzi Gyihova Alasevolɛ ka edwɛkɛ ne wɔ azuamgbole zo la.

Azuamgbole Zo Nee Bagua Nu Daselɛlilɛ Titili Wɔ Paris (5:​11)

Kɛzi Gyihova Alasevolɛ ɛlɛboa tutanema ɛ?

Bɛlile Tutanema Sunsum Nu Ngyianlɛ Nwo Gyima (5:​59)

Tie kɛzi dahuu ɛzonlenlɛ gyima ne ɛmaa awie anye ɛlie la.

Ɔyɛ Me Fɛ Kɛ Memkpale Gyima Ɛhye La (6:​29)

Sukoa kɔɔto konimlilɛ ngakyile mɔɔ ɛboa ɛmaa yɛlɛbɔ edwɛkpa ne nolo la anwo debie.

“Belemgbunlililɛ Edwɛkɛhanlɛma Fa Bɛ Edwɛkɛ Kɔ Kɔɔto” (Nyamenle Belemgbunlililɛ Di Tumi!, tile 13)

Gyisɛse hanle kɛ ɔwɔ kɛ bɛsɔne Kilisienema. (Kenga Mateyu 28:​19, 20.) Noko ɛzɔnenlɛ kile duzu? Na duzu a ɔwɔ kɛ awie yɛ na bɛazɔne ye a?

1. Ɛzɔnenlɛ kile duzu?

Edwɛkɛkpɔkɛ “sɔne” vi Giliki edwɛkɛ mɔɔ kile “wula ye” nzule bo la anu. Mekɛ mɔɔ bɛzɔnenle Gyisɛse la, bɛnlomanle ye wɔ Azule Dwɔdan ne anu, na akee “ɔvi nzule ne anu ɔvindele.” (Maake 1:​9, 10) Kɛ bɛsɔne nɔhalɛ Kilisienema la ɛne, bɛfa bɛ bɛwula nzule nu anzɛɛ bɛnoma bɛ wɔ nu.

2. Duzu a ɛzɔnenlɛ maa ɔda ali a?

Saa bɛsɔne awie a, ɔmaa ɔda ali kɛ yeyila ɔ nwo zo yemaa Gyihova Nyamenle. Kɛzi awie yila ɔ nwo zo ɛ? Kolaa na awie azɔne la, ɔka ye wɔ asɔneyɛlɛ nu ɔkile Gyihova kɛ ɔkulo kɛ ɔsonle ye dahuu. Ɔbɔ ɛwɔkɛ kɛ ɔbazonle Gyihova angomekye na yeamaa Nyamenle ɛhulolɛdeɛyɛlɛ ayɛ debie mɔɔ hyia ye kpalɛ wɔ ye ɛbɛlabɔlɛ nu. Ɔsi kpɔkɛ kɛ ‘ɔbakpo ɔ nwo na yeahɔ zo’ yeali Gyisɛse ngilehilelɛ nee ye neazo ne anzi. (Mateyu 16:​24) Ɔ nwo zo ɛyilalɛ nee ye ɛzɔnenlɛ ne maa ɔkola ɔ nee Gyihova yɛɛ ɔ gɔnwo mɔ azonvolɛ nyia agɔnwolɛvalɛ kyengye.

3. Kɛ ɔkɛyɛ na awie afɛta amaa ɛzɔnenlɛ ɛ?

Amaa wɔafɛta wɔamaa ɛzɔnenlɛ la, ɔwɔ kɛ ɛsukoa Gyihova anwo debie na ɛnyia ye nu diedi. (Kenga Hibuluma 11:6.) Mekɛ mɔɔ ɛlɛnyia ndelebɛbo nee diedi kpole la, ɛbanyia ɛlɔlɛ kpole wɔamaa Gyihova. Akee ɛbahulo kɛ ɛdi ɔ nwo daselɛ na ɛfa ye ngyinlazo ɛbɔ wɔ ɛbɛla. (2 Timote 4:2; 1 Dwɔn 5:3) Saa awie ɛlɛbɔ ɛbɛla mɔɔ ‘fɛta na ɔsɔ Gyihova anye bɔkɔɔ a’ bie a ɔbahulo kɛ ɔyila ɔ nwo zo ɔmaa Nyamenle na bɛsɔne ye.​—Kɔlɔsaema 1:​9, 10.a

SUKOA DƆƆNWO

4. Yɛkola yɛsukoa debie yɛfi Gyisɛse ɛzɔnenlɛ ne anu

Kenga Mateyu 3:​13-17 na sukoa Gyisɛse ɛzɔnenlɛ ne anwo ninyɛne dɔɔnwo. Akee bɛzuzu kpuya ɛhye mɔ anwo:

• Mɔɔ bɛzɔnenle Gyisɛse la ɛnee ɔle adɔma ɔ?

• Kɛzi bɛzɔnenle ye ɛ? Bɛkpondenle nzule wɔ ɔ nwo ala ɔ?

Bɛzɔnenle Gyisɛse la ɔbɔle gyima titili mɔɔ Nyamenle vale maanle ye la abo. Kenga Luku 3:​21-​23 yɛɛ Dwɔn 6:​38, na akee bɛzuzu kpuya ɛhye anwo:

• Mɔɔ bɛzɔnenle Gyisɛse la, gyima boni a ɔvale ɔlimoale ye ɛbɛlabɔlɛ nu a?

5. Fa sie ɛ nye zo kɛ ɛmaa bazɔne wɔ

Bɛnwozoyilalɛ nee ɛzɔnenlɛ bahola amaa wɔ ahonle adu wɔ mɔlebɛbo ne. Noko mekɛ mɔɔ ɛlɛnyia anyuhɔlɛ la ɛbahola wɔanyia anwodozo wɔava wɔazi kpɔkɛ ɛhye mɔɔ anwo hyia la. Amaa wɔanwu awie mɔ mɔɔ yɛle zɔ la, ye VIDIO ne.

VIDIO: Ɛ Nee Gyihova Ɛnyia Agɔnwolɛvalɛ Kpalɛ (1:11)

Kenga Dwɔn 17:3 yɛɛ Gyemise 1:​5, na akee bɛzuzu kpuya ɛhye anwo:

• Duzu a baboa awie yeamaa yeaziezie ɔ nwo yeamaa ɛzɔnenlɛ a?

1. Yɛyila yɛ nwo zo wɔ mekɛ mɔɔ yɛbaha yɛahile Gyihova kɛ yɛkulo kɛ yɛsonle ye dahuu la

2. Saa bɛsɔne yɛ a, yɛmaa menli nwu ye kɛ yɛyila yɛ nwo zo yɛmaa Nyamenle

6. Ɛzɔnenlɛ maa yɛboka Gyihova abusua ne anwo

Saa bɛsɔne yɛ a, ɛnee yɛraboka ewiade amuala abusua mɔɔ koyɛlɛ wɔ nu la anwo. Ɔnva nwo ɛleka mɔɔ yɛvi anzɛɛ kɛzi bɛtetele yɛ la, yɛ muala yɛlɛ diedi ko yɛɛ yɛfa ngyinlazo ko ne ala yɛbɔ yɛ ɛbɛla. Kenga Edwɛne 25:​14 yɛɛ 1 Pita 2:​17, na akee bɛzuzu kpuya ɛhye anwo:

• Awie sɔne a, kɛzi ɔka agɔnwolɛvalɛ mɔɔ wɔ ɔdaye nee Gyihova yɛɛ menli mɔɔ sonle ye la avinli ɛ?

EDWƐKƐ TITILI

Gyisɛse hanle kɛ ɔwɔ kɛ bɛsɔne Kilisienema. Amaa bɛazɔne awie la, ɔwɔ kɛ ɔnyia Gyihova anu diedi kpole, ɔfa Gyihova ngyinlazo ɔbɔ ye ɛbɛla na ɔyila ɔ nwo zo ɔmaa ye.

Ndinu

• Ɛzɔnenlɛ kile duzu, na kɛmɔti a nwolɛ hyia ɛ?

• Kɛzi bɛnwozoyilalɛ maa awie fɛta kɛ ɔsɔne ɛ?

• Duzu a ɔwɔ kɛ awie yɛ amaa yeayila ɔ nwo zo na bɛazɔne ye a?

KPONDƐ DƆƆNWO

Sukoa mɔɔ ɛzɔnenlɛ kile nee mɔɔ ɔngile la.

“Ɛzɔnenlɛ A Le Duzu?” (Edwɛkɛ mɔɔ wɔ jw.org azo)

Sukoa ndenle mɔɔ awie bahola alua zo afɛta amaa ɛzɔnenlɛ la anwo debie bieko.

“Gyihova Anwo Ɛlɔlɛ Nee Anyezɔlɛ Bamaa Wɔazɔne” (Ɛzinzalɛ Arane, March 2020)

Kenga debie mɔɔ maanle nrenyia bie zɔnenle la anwo edwɛkɛ.

“Ɛnee Bɛkpondɛ Kɛ Medame Mumua Ne Menwu Nɔhalɛ Ne” (Ɛzinzalɛ Arane, February 1, 2013)

Nea deɛmɔti ɛzɔnenlɛ le debie mɔɔ hyia nee kɛzi ɛbahola wɔaziezie ɛ nwo wɔamaa ɛzɔnenlɛ la.

“Asoo Ɔwɔ Kɛ Memaa Bɛsɔne Me?” (Mgbavolɛ Nee Mbɛlɛra Biza Kɛ​—Mualɛ Mɔɔ Boa, Foa 2, tile 37)