“Mɛla Ne Anu Boni A Le Titile Kpalɛ Kpalɛ A?”

Duzu a Nyamenle kpondɛ kɛ yɛyɛ a? Asoo mɛla dɔɔnwo wɔ ɛkɛ mɔɔ ɔwɔ kɛ yɛdi zo ɔ? Yɛkola yɛfa anyezɔlɛ yɛbua kɛ kyɛkyɛ. Nyamenle Ara, Gyisɛse Kelaese mumua ne hilele kɛ, mɔɔ Nyamenle kpondɛ kɛ yɛyɛ la le edwɛkɛkpɔkɛ ko.—Kenga Maake 12:28-31.

Dumua suzu mɔɔ manle Gyisɛse hanle edwɛkɛ ɛhye la anwo. Ɛnee ɔlɛkilehile wɔ ɛzonlenlɛ sua ne anu wɔ Naesan 11, mɔɔ ɛnee yeha mekɛ ekyi na yeawu la. Ye kpɔvolɛma bɔle mɔdenle kɛ bɛbiza ye kpuyia mɔɔ bamaa ɔ nloa avo la. Noko, mekɛ biala ye mualɛ ne manle bɛdɔle mumule. Akee, bɛbizale Gyisɛse kpuyia ɛhye kɛ: “Mɛla ne anu boni a le titile kpalɛ kpalɛ a?”​—Ngyehyɛnu 28.

Ɛnee kpuyia ne anloa ɛyelɛ ɛnla aze. Ɛnee Dwuuma bie mɔ su kpolera wɔ Mosisi Mɛla ne mɔɔ bo 600 la anwo kɛ boni a lumua, anzɛɛ nwolɛ hyia kpalɛ a. Bie mɔ noko hanle kɛ mɛla ne amuala anwo hyia na ɔle nvonleɛ kɛ bɛkɛbu bie kɛ nwolɛ hyia tɛla bie. Kɛzi Gyisɛse babua kpuyia ɛhye ɛ?

Gyisɛse bua la, yeangile mɛla ko emomu ɔhilele nwiɔ. Mɔɔ lumua la, ɔhanle kɛ: “Fa wɔ ahonle muala, wɔ ɛkɛla muala, wɔ adwenle muala, nee wɔ anwosesebɛ muala kulo [Gyihova] wɔ Nyamenle ne.” (Ngyehyɛnu 30; Mɛla ne 6:5) Edwɛkpɔkɛ “ahonle,” “adwenle,” “ɛkɛla,” nee “anwosesebɛ” kola kile debie gyɛne.a Ɔkile kɛ: Ɔwɔ kɛ Gyihova anwo ɛlɔlɛ ka awie sonlabaka ne amuala, ye anwosesebɛ muala nee ye debie biala mɔɔ ɔlɛ la. Buluku bie mɔɔ kilehile Baebolo nu la hanle ye zɛhae: “Ɔwɔ kɛ yɛkulo Nyamenle bɔkɔɔ.” Saa ɛkulo Nyamenle zɛhae a, ɛbabɔ mɔdenle biala wɔabɔ wɔ ɛbɛla wɔ adenle mɔɔ ɔbamaa yealie wɔ yeado nu la azo.—1 Dwɔn 5:3.

Mɔɔ tɔ zo nwiɔ, Gyisɛse hanle kɛ: “Kulo ɛ gɔnwo sonla kɛ ɛdawɔ ɛ nwo la.” (Ngyehyɛnu 31; Sɛlɛvolɛma 19:18) Nyamenle anwo ɛlɔlɛ nee sonla nwo ɛlɔlɛ a lua a. Nyamenle nwo ɛlɔlɛ a maa yɛkulo yɛ gɔnwo mɔ a. (1 Dwɔn 4:20, 21) Saa yɛkulo yɛ gɔnwo kɛ yɛdayɛ mumua ne yɛ nwo a, ɔbamaa yɛayɛ awie mɔ kɛmɔ yɛkulo kɛ bɛyɛ yɛ la. (Mateyu 7:12) Ye zɛhae, ɛnee yɛlɛkile kɛ yɛkulo Nyamenle ne mɔɔ bɔle yɛ nee bɛdabɛ kɛ ye ɛsaso la.—Mɔlebɛbo 1:26.

Kɛzi mɛla ne mɔɔ se yɛhulo Nyamenle nee yɛ gɔnwo mɔ la anwo hyia ɛ? Gyisɛse hanle kɛ, “Mɛla bieko ɛnle ɛkɛ mɔɔ le titile kpalɛ kpalɛ tɛla nwiɔ ɛhye mɔ a.” (Ngyehyɛnu 31) Wɔ Gyisɛse edwɛkɛ bieko mɔɔ le kɛ ɛhye la anu, ɔhanle kɛ mɛla ne amuala gyi edwɛkɛ nwiɔ ɛhye azo.—Mateyu 22:40.

Ɔnyɛ se kɛ yɛbazɔ Nyamenle anye. Yɛbahola yɛabɔ mɔɔ ɔkpondɛ kɛ yɛyɛ la kpɔkɛ wɔ edwɛkɛkpɔkɛ ko anu: ɛlɔlɛ. Yemɔ a dahuu le—yɛɛ dahuu ɔbayɛ—debie mɔɔ hyia wɔ nɔhalɛ ɛzonlenlɛ nu a. Noko, ɛlɔlɛ ɛnle edwɛkɛ anzɛɛ nganeɛdelɛ ala; bɛdua nyɛleɛ zo a bɛda ye ali a. (1 Dwɔn 3:18) Duzu ati a ɛnzukoa kɛzi ɛbahola wɔanyia ɛlɔlɛ wɔamaa Gyihova, Nyamenle ne mɔɔ “le ɛlɔlɛ” la na wɔala ye ali ɛ?—1 Dwɔn 4:8.