ƐZUKOALƐDEƐ 58
Kɔ Zo Di Nɔhalɛ Maa Gyihova
Nɔhalɛ Kilisienema ɛbɔ kpɔkɛ kɛ bɛnrɛmaa awie anzɛɛ debie biala ɛnrɛhwe bɛ ɛnrɛvi Gyihova ɛzonlenlɛ nwo. Ɔda ali kɛ adwenle mɔɔ ɛlɛ la ɛne. Gyihova anye die wɔ nɔhalɛlilɛ ne anwo. (Kenga 1 Edwɛkɛsisilɛ 28:9.) Tɛnlabelɛ boni mɔ a bamaa yeahola yeayɛ se kɛ ɛbali nɔhalɛ wɔamaa ye a, na kɛzi ɛbahola wɔali nwolɛ gyima ɛ?
1. Kɛzi awie mɔ kola maa ɔyɛ se kɛ yɛbali nɔhalɛ yɛamaa Gyihova ɛ?
Bie mɔ babɔ mɔdenle kɛ bɛnrɛmaa yɛnrɛzonle Gyihova. Nwane mɔ a bayɛ debie zɛhae a? Menli mɔɔ ɛvi nɔhalɛ ne anu la bie mɔ ka Nyamenle ahyehyɛdeɛ ne anwo adalɛ edwɛkɛ ɔluakɛ bɛkulo kɛ bɛsɛkye yɛ diedi. Bɛle kpɔkyevolɛma. Eza ɛzonlenlɛ nu mgbanyima bie mɔ ka yɛ nwo adalɛ edwɛkɛ amaa bɛdabɛ mɔɔ bɛannwu bɛ nzi la avi nɔhalɛ ne anu. Esiane wɔ nu kɛ yɛ nee dwazotiama bɛazu kpolera, yɛbagenga bɛ mbuluku anzɛɛ ninyɛne gyɛne mɔɔ bɛkɛlɛ la anzɛɛ yɛbahɔ bɛ yintanɛte ɛleka ne mɔ anzɛɛ yɛbanlea vidio ngakyile mɔɔ bɛyɛ la. Gyisɛse hanle menli mɔɔ bɔ mɔdenle kɛ bɛnrɛmaa awie mɔ ɛnrɛva nɔhalɛlilɛ ɛnrɛzonle Gyihova la anwo edwɛkɛ kɛ: “Bɛgyakyi bɛ. Bɛle adekilevolɛma anyenzinliravolɛma. Na saa anyezinliravolɛ kile anyezinliravolɛ adenle a, bɛ mu nwiɔ bɛgua kuma nu.”—Mateyu 15:14.
2. Kɛzi yɛ kpɔkɛzilɛ kola maa ɔyɛ se kɛ yɛbali nɔhalɛ yɛamaa Gyihova ɛ?
Ɛlɔlɛ mɔɔ yɛlɛ yɛmaa Gyihova la ka yɛ maa yɛkpo kɛ yɛbava yɛ nwo yɛawula adalɛ ɛzonlenlɛ nu. Ɔnle kɛ yɛ gyima anzɛɛ eku bie mɔɔ yɛwɔ nu anzɛɛ debie gyɛne bie mɔɔ yɛyɛ la yɛ mɔɔ adalɛ ɛzonlenlɛ bie a gyi ɔ nzi a. Gyihova ɛbɔ yɛ kɔkɔ kɛ: “Bɛvi [Babelɔn Kpole ne anu], me menli.”—Yekile 18:2, 4.
SUKOA DƆƆNWO
Sukoa mɔɔ ɛyɛ a awie ɛnrɛhola ɛnrɛzɛkye nɔhalɛ mɔɔ ɛdi ɛmaa Gyihova la. Eza nea kɛzi ɛtwe ɛ nwo ɛfi Babelɔn Kpole ne anwo a ɔkile kɛ ɛdi nɔhalɛ la.
3. Nea boɛ wɔ adalɛ kilehilevolɛma anwo
Saa yɛte Gyihova ahyehyɛdeɛ ne anwo edwɛkɛ ɛtane bie a, duzu a ɔwɔ kɛ yɛyɛ a? Kenga Mrɛlɛbulɛ 14:15, na akee bɛzuzu kpuya ɛhye anwo:
Duzu ati a yɛnea boɛ amaa yɛanlie edwɛkɛ biala mɔɔ yɛkɛde la yɛanli a?
Kenga 2 Dwɔn 9-11, na akee bɛzuzu kpuya ɛhye mɔ anwo:
Kɛzi ɔwɔ kɛ yɛbu kpɔkyevolɛma ɛ?
Saa yɛ nee kpɔkyevolɛma ɛndendɛ bɔbɔ a, kɛzi yɛbahola yɛadie bɛ ngilehilelɛ ne bie ɛ?
Saa yɛtie Gyihova anzɛɛ ye ahyehyɛdeɛ ne anwo edwɛkɛ mɔɔ ɛnle kpalɛ a, ɛnea a kɛzi ɔbade nganeɛ wɔ nwo ɛ?
4. Saa adiema bie yɛ ɛtane a kɔ zo di nɔhalɛ maa Nyamenle
Saa yɛnwu kɛ awie bie mɔɔ wɔ asafo ne anu la ɛyɛ ɛtane kpole bie a, duzu ɔwɔ kɛ yɛyɛ a? Nea ngyinlazo bie mɔɔ wɔ Nyamenle Mɛla ne mɔɔ ɔvale ɔmaanle tete Yizilayɛma anu la. Kenga Lɛvitikɔso 5:1.
Kɛ mɔɔ bɛhile ye wɔ ngyɛnu ɛhye anu la, saa yɛnwu kɛ awie ɛyɛ ɛtane kpole bie a, ɔwɔ kɛ yɛka mɔɔ yɛze ye wɔ nwolɛ la yɛkile mgbanyima ne mɔ. Noko, kolaa na yɛayɛ zɔ la, ɔbayɛ kpalɛ kɛ yɛbaha yɛahile ahenle kɛ ɔhɔha ɛtane mɔɔ yeyɛ la ɔhile mgbanyima ne mɔ. Saa yeanga yeangile bɛ a, ɔwɔ kɛ nɔhalɛ mɔɔ yɛdi yɛmaa Gyihova la ka yɛ maa yɛka mɔɔ yɛze ye wɔ nwolɛ la yɛkile mgbanyima ne mɔ. Kɛzi yɛyɛ ɛhye a ɔkile kɛ yɛlɛ ɛlɔlɛ kpundii yɛmaa . . .
Gyihova Nyamenle ɛ?
ahenle mɔɔ ɛyɛ ɛtane ne la ɛ?
asafo ne anu amra mɔɔ ɛha la ɛ?
Saa ɛ gɔnwo diedinli bie kɔ ngyegyelɛ nu a, boa ye!
5. Twe ɛ nwo fi Babelɔn Kpole ne anwo
Kenga Luku 4:8 yɛɛ Yekile 18:4, 5, na akee ye kpuya ɛhye mɔ anloa:
Asoo me duma tɛbɔ adalɛ ɛzonlenlɛ bie buluku nu ɔ?
Asoo mewɔ eku bie mɔɔ ɛzonlenlɛ bie a gyi ɔ nzi la anu ɔ?
Asoo gyima mɔɔ meyɛ la boa adalɛ ɛzonlenlɛ wɔ adenle bie azo?
Asoo ɔwɔ kɛ medi ninyɛne bie mɔ anwo gyima amaa meahwe me nwo meavi adalɛ ɛzonlenlɛ nwo ɔ?
Saa menea na edwɛkɛ ɛhye mɔ bie le zɔ wɔ me nwo a, nzenzaleɛ boni mɔ a ɔwɔ kɛ meyɛ a?
Kɛzi ɔde ye biala la, si kpɔkɛ mɔɔ bamaa wɔanyia adwenle mɔɔ anu te na ɔkile kɛ ɛdi nɔhalɛ ɛmaa Gyihova la.
Saa bɛka kɛ ɛye ndoboa wɔ ɛzonlenlɛ bie gyima mɔɔ ɔlɛyɛ la anwo a duzu a ɛbayɛ a?
BIE MƆ KA KƐ: “Ɔwɔ kɛ menwu mɔɔ kpɔkyevolɛma ɛlɛka ye wɔ Gyihova Alasevolɛ anwo la amaa meaha nɔhalɛ mɔɔ wɔ nu la meahile bɛ.”
Asoo nrɛlɛbɛ wɔ nu? Duzu ati ɔ?
EDWƐKƐ TITILI
Saa yɛbahɔ zo yɛali nɔhalɛ yɛamaa Gyihova a ɔnle kɛ yɛ nee menli mɔɔ kulo kɛ bɛbɛlɛbɛla yɛ la tu.
Ndinu
Duzu ati a ɔnle kɛ yɛtie mɔɔ kpɔkyevolɛma ka la ɛ?
Saa yɛnwu kɛ adiema bie ɛyɛ ɛtane kpole a, duzu a ɔwɔ kɛ yɛyɛ a?
Kɛ ɔkɛyɛ na yɛali kɔkɔbɔlɛ ne mɔɔ se yɛhwe yɛ nwo yɛvi adalɛ ɛzonlenlɛ nwo la azo ɛ?
KPONDƐ DƆƆNWO
Nea mɔɔ ɛbahola wɔayɛ wɔ mekɛ mɔɔ awie mɔ kɛha Gyihova Alasevolɛ anwo adalɛ edwɛkɛ la.
Kɛ ɔkɛyɛ na wɔanwu kɛ ahyehyɛdeɛ anzɛɛ gyimalilɛ bie boa Babelɔn Kpole ne ɛ?
“Yɛ Dɔɔnwo Wɔ Mekɛ Ɛhye ‘Mɔɔ Li Awieleɛ La Anu’” (Ɛzinzalɛ Arane, October 2019, ɛdendɛkpunli 16-18)
Duzu a dwazotiama bie mɔ ɛbɔ mɔdenle ɛyɛ kɛ bɛfa bɛazɛkye yɛ diedi ne a?
Kenga Shinto ɛsɔfo bie mɔɔ hwenle ɔ nwo vile adalɛ ɛzonlenlɛ nwo la anwo edwɛkɛ wɔ anwubielɛ ne mɔɔ se “Me Ngakula Nu Amuala Ɛnee Melɛkpondɛ Nyamenle” la anu.