BAEBOLO NGYEHYƐNU NGILENU
Dwɔn 3:16—“Ɔluakɛ Nyamenle Hulole Ewiade Ne Kpole”
“Na Nyamenle hulole ewiade ne kpole kpalɛ yemɔti ɔvale ɔ Ra kokye ne ɔmaanle, amaa awie biala mɔɔ kɛla ye ali kɛ ɔlɛ diedi wɔ ye nu la bɛanzɛkye ye na yeanyia dahuu ngoane.”—Dwɔn 3:16, Ewiade Fofolɛ Ngilebɛbo.
“Ɔluakɛ Nyamenle hulole ewiade ne kpole la ati yɛɛ ɔvale ɔ Ra kokye ne ɔmaanle a, amaa awie biala mɔɔ kɛlie ye kɛli la anzɛkye na yeanyia ngoane mɔɔ ɛnlɛ awieleɛ.”—Dwɔn 3:16, King James Version.
Mɔɔ Dwɔn 3:16 abo kile la
Nyamenle kulo yɛ na ɔkpondɛ kɛ yɛtɛnla aze dahuu. Ɛhye ati a ɔzoanle ɔ Ra Gyisɛse Kelaese ɔmaanle ɔrale azɛlɛ ye azo a. Mekɛ mɔɔ Gyisɛse wɔ azɛlɛ ye azo la, ɔyɛle gyima mgbalɛ dɔɔnwo. Bie a le kɛ ɔhilehilele ye ɛdoavolɛma ye Nyamenle ne nee ɔ Ze anwo debie. (1 Pita 1:3) Eza ɔvale ye ngoane ɔbɔle afɔle ɔmaanle alesama. Ɔwɔ kɛ yɛnyia diedi wɔ Gyisɛse anu amaa yɛanyia dahuu ngoane.
Yɛnwu Nyamenle ɛlɔlɛ kpole ne wɔ edwɛkɛ ne mɔɔ se, “ɔvale ɔ Ra kokye ne ɔmaanle” la anu.a Gyisɛse le Nyamenle Ara mɔɔ le titili. Adenle boni azo? Gyisɛse ala a Nyamenle angomekye bɔle ye a. (Kɔlɔsaema 1:17) Yemɔ a ɔle “abɔdeɛ muala anu belamunli ralɛ a.” (Kɔlɔsaema 1:15) Bɛluale Gyisɛse anwo zo a bɛbɔle debie biala mɔɔ ɛha, mɔɔ anwumabɔvolɛma gyɛne mɔɔ ɛha boka nwo la. Noko, Gyihovab Nyamenle vile ye ɛhulolɛ nu zoanle ɔ Ra ne mɔɔ ɔkulo ye kpalɛ la ‘kɛ ɔrazonle na ɔva ye ngoane ɔyɛ ɛkpɔnedeɛ ɔlie menli dɔɔnwo.’ (Mateyu 20:28) Gyisɛse nwunle amaneɛ na ɔwule ɔvale ɔliele yɛ ɔvile ɛtane nee ewule mɔɔ yɛnyianle yɛvile sonla ne mɔɔ limoa, Adam ɛkɛ ne la anu.—Wulomuma 5:8, 12.
Diedi mɔɔ yɛda ye ali wɔ Gyisɛse anu la ɛngile kɛ yɛdie ye yeali ala anzɛɛ yɛdie mɔɔ ɔyɛle ɔmaanle yɛ la yɛado nu. Ɔwɔ kɛ yɛkile kɛ yɛlɛ Nyamenle Ara ne anu diedi ɔlua tieyɛ mɔɔ yɛbayɛ yɛamaa ye na yeazukoa ye la azo. (Mateyu 7:24-27; 1 Pita 2:21) Baebolo ne ka kɛ: “Awie biala mɔɔ kɛla ye ali kɛ ɔlɛ diedi wɔ Ralɛ ne anu la lɛ dahuu ngoane; mɔɔ ɛndie Ralɛ ne la ɛnrɛnyia ngoane.”—Dwɔn 3:36.
Mɔɔ Dwɔn 3:16 fale nwo la
Gyisɛse hanle zɔhane edwɛkɛ ne wɔ mekɛ mɔɔ ɔ nee Dwuuma ɛzonlenlɛ nu kpanyinli bie mɔɔ bɛfɛlɛ ye Nekɔdimɛse ɛlɛtendɛ la. (Dwɔn 3:1, 2) Gyisɛse hanle Nyamenle Belemgbunlililɛ nec nee awie mɔɔ ɔwɔ kɛ ‘bɛwo ye fofolɛ’ la anwo edwɛkɛ dɔɔnwo wɔ zɔhane adwelielilɛ ne anu. (Dwɔn 3:3) Eza ɔhanle kɛzi ɔbawu la anwo edwɛkɛ. ‘Ɔwɔ kɛ bɛmaa sonla Ra ne zo [bɛkenda ye baka zo], amaa awie biala mɔɔ kɛlie ye kɛli la anyia dahuu ngoane.’ (Dwɔn 3:14, 15) Akee ɔzile zolɛ kɛ ɛlɔlɛ kpole mɔɔ Nyamenle lɛ maa alesama la ati a ɔmaanle yɛnyianle nwolɛ adenle ɛhye kɛ yɛbanyia ngoane a. Gyisɛse hilehilele nuhua kɛ saa yɛbanyia ngoane a, ɔwɔ kɛ yɛda ye ali kɛ yɛlɛ diedi na yɛyɛ gyima mɔɔ sɔ Nyamenle anye la ɔvale ɔdwulale ye edwɛkɛ ne.—Dwɔn 3:17-21.
a Giliki edwɛkɛ monogenes mɔɔ bɛhile ɔ bo “kokye” la kile “kɔtokokye, . . . mɔɔ ɔ ngomekye ɔle ngakyile, ɔnlɛ ye ɛsaso la.”—A Greek-English Lexicon of the New Testament and Other Early Christian Literature, m. 658.
b Nyamenle duma a le Gyihova.—Edwɛne 83:18.
c Nyamenle Belemgbunlililɛ ne mɔɔ eza bɛfɛlɛ ye “Anwuma Belemgbunlililɛ ne” la le arane mɔɔ wɔ anwuma. (Mateyu 10:7; Yekile 11:15) Nyamenle ɛkpa Kelaese kɛ Belemgbunlililɛ zɔhane azo Belemgbunli. Nyamenle Belemgbunlililɛ ne bamaa bodane mɔɔ Nyamenle lɛ maa azɛlɛ ye la ara nu. (Daneɛle 2:44; Mateyu 6:10) Ɛkpondɛ nwolɛ edwɛkɛ dɔɔnwo a nea edwɛkɛ ne mɔɔ se “Nyamenle Belemgbunlililɛ Ne A Le Duzu?” la.