Bɛhile Gyihova Nɔhalɛlilɛ Nee Ye Fakyɛ Nwo Anyezɔlɛ

1, 2. (a) Duzu ati a yɛ nye die agɔnwolɛ mɔɔ di nɔhalɛ na ɔfa ɛtane ɔkyɛ la anwo ɛ? (b) Kpuyia boni mɔ a yɛbazuzu nwo a?

AGƆNWOLƐ kpalɛ a le nwane? Adiema raalɛ ko mɔɔ bɛfɛlɛ ye Ashley la hilele nu kɛ: “Agɔnwolɛ kpalɛ a le awie mɔɔ wɔ ɛkɛ dahuu maa wɔ na ɔfa ɛtane ɔkyɛ la.” Yɛ kɔsɔɔti yɛ nye die agɔnwolɛma mɔɔ bɛdi nɔhalɛ na bɛfa ɛtane bɛkyɛ la anwo. Bɛbɔ yɛ nwo bane yɛɛ bɛkulo yɛ edwɛkɛ.​—Mrɛ. 17:17.

² Agɔnwolɛ mɔɔ di nɔhalɛ na ɔfa ɛtane ɔkyɛ mɔɔ tɛla biala mɔɔ yɛbahola yɛanyia la a le Gyihova. Edwɛndovo ne hanle kɛ: “Ɔluakɛ, O Awulae, ɛle kpalɛ yɛɛ fakyɛ wɔ wɔ afoa, ɛkile wɔ ɛhulolɛ kpundii [anzɛɛ, “nɔhalɛ ɛlɔlɛ”] ne wɔ bɛdabɛ mɔɔ bɛsu bɛfɛlɛ wɔ la anwo zo.” (Edw. 86:5) Duzu a kile kɛ yɛdi nɔhalɛ na fakyɛ wɔ yɛ afoa ɛ? Kɛzi Gyihova da subane ngɛnlɛma ɛhye mɔ ali ɛ? Na kɛ ɔkɛyɛ na yɛazukoa ye neazo ne ɛ? Mualɛ ne mɔ baboa yɛ yeamaa ɛlɔlɛ mɔɔ yɛlɛ yɛmaa yɛ Gɔnwo kpalɛ, Gyihova la ayɛ kpole. Eza ɔbamaa yɛ nee yɛ mediema avinli agɔnwolɛvalɛ ne anu ayɛ se.​—1 Dwɔn 4:7, 8.

GYIHOVA LE NƆHALƐNLI

3. Nɔhalɛlilɛ kile duzu?

³ Nɔhalɛlilɛ le subane kɛnlɛma mɔɔ ɔmaa menli tu bɛ nwo maa, ka nɔhalɛ, na bɛsonle kpalɛ. Sonla mɔɔ di nɔhalɛ la si pi. Ɔfi ɛlɔlɛ nu ɔfa ɔ nwo ɔbeta awie (anzɛɛ debie) nwo dahuu, bɔbɔ wɔ ngyegyelɛ mekɛ nu. Ɛhɛe, Gyihova a le “Nɔhalɛnli” kpole wɔ aleɛabo amuala a.​—Yek. 16:5, NW.

4, 5. (a) Kɛzi Gyihova da ye nɔhalɛlilɛ ne ali ɛ? (b) Saa yɛdwenledwenle Nyamenle nɔhalɛlilɛ ne anwo a kɛzi ɔmaa yɛ anwosesebɛ ɛ?

⁴ Kɛzi Gyihova da ye nɔhalɛlilɛ ali ɛ? Ɔmkpo ye nɔhalɛ azonvolɛ ɛlɛ. Belemgbunli Devidi mɔɔ zonlenle Gyihova nɔhalɛ nu la lile ɛhye anwo daselɛ. (Bɛgenga 2 Samoɛle 22:26.) Gyihova boale Devidi wɔ ye sɔnea kɔsɔɔti anu, ɔbɔle ɔ nwo bane, na ɔliele ye. (2 Sam. 22:1) Ɛnee Devidi ze kɛ Gyihova nɔhalɛlilɛ ne ɛnle bɛ nloa anu edwɛkɛ ala. Duzu ati a Gyihova lile nɔhalɛ manle Devidi ɛ? Ɔluakɛ ɛnee Devidi di “nɔhalɛ.” Gyihova anye die ye azonvolɛ nɔhalɛlilɛ nwo, na ɔdi nɔhalɛ ɔmaa bɛ ɔfa ɔtua bɛ kakɛ.​—Mrɛ. 2:6-8.

⁵ Saa yɛsuzu Gyihova nɔhalɛlilɛ ne anwo a, ɔmaa yɛnyia anwosesebɛ. Adiema nrenya bie mɔɔ bɛfɛlɛ ye Reed la hanle kɛ: “Saa mekenga kɛzi Gyihova nee Devidi luale wɔ ye amaneɛnwunlɛ mekɛ nu la a, ɔboa me kpalɛ. Mekɛ bɔbɔ mɔɔ ɛnriandinlɛ dɔle Devidi anwo na ɔhɔveale awolɛ mbɔne nu la, Gyihova nleanle ye. Ɛhye maa me anwosesebɛ kpalɛ! Ɔkakye me kɛ ɔnva nwo tɛnlabelɛ biala mɔɔ mebahɔ nu la, saa medi nɔhalɛ memaa Gyihova a, ɔbaboa me.” Ɔda ali kɛ, zɔhane ala a ɛdawɔ noko ɛte nganeɛ a.​—Wulo. 8:38, 39.

6. Ndenle boni bieko a Gyihova dua zo da ye nɔhalɛlilɛ ne ali a, na kɛzi ye azonvolɛ nyia zolɛ nvasoɛ ɛ?

⁶ Ndenle boni bieko a Gyihova dua zo da ye nɔhalɛlilɛ ne ali a? Ɔdi ye ngyinlazo zo mekɛ biala. Yebɔ yɛ ɛwɔkɛ kɛ: “Kɛkala bɔbɔ mɔɔ bɛwie nyi la, medame ala yɛɛ mebazɔ bɛ [a].” (Aye. 46:4) Ɔgyinla ye kpalɛ nee ɛtane nwo ngyinlazo ne mɔɔ ɛngakyi ɛlɛ la azo ɔsi kpɔkɛ dahuu. (Mal. 3:6) Eza Gyihova di ye ɛwɔkɛ zo ɔfa ɔda ye nɔhalɛlilɛ ali. (Aye. 55:11) Gyihova nɔhalɛ azonvolɛ kɔsɔɔti nyia ye nɔhalɛlilɛ ne azo nvasoɛ. Kɛzi? Saa yɛbɔ mɔdenle yɛdi Gyihova ngyinlazo ne mɔ azo dahuu a, ɔdaye noko ɔbali ɛwɔkɛ mɔɔ yebɔ kɛ ɔbayila yɛ la azo.​—Aye. 48:17, 18.

SUKOA GYIHOVA NƆHALƐLILƐ NE

7. Adenle ko mɔɔ yɛdua zo yɛsukoa Nyamenle nɔhalɛlilɛ ne la a le boni?

⁷ Kɛ ɔkɛyɛ na yɛazukoa Gyihova nɔhalɛlilɛ ne ɛ? Adenle ko a le kɛ yɛbaboa menli mɔɔ wɔ anwongyelelɛ nu la. (Mrɛ. 3:27) Kɛ neazo la, ɛze adiema bie mɔɔ ɔlua anwondolɛ, abusua nu ɛkpɔlɛ, anzɛɛ sinlidɔlɛ ti ye abɛ nu ɛbu ɔ? Duzu ati a ɛngɔ ye ɛkɛ ɛnga “ɛlolɛ nee arɛlekyekyelɛ edwɛkɛ” ɛngile ye a? (Zɛk. 1:13)a Zɔhane mɔɔ ɛbayɛ la bahile kɛ ɛle agɔnwolɛ kpalɛ mɔɔ ɛdi nɔhalɛ, agɔnwolɛ mɔɔ “tɛla bɛ nli akunlu.”​—Mrɛ. 18:24.

8. Kɛ ɔkɛyɛ na yɛazukoa Gyihova nɔhalɛlilɛ ne wɔ agyalɛ nu ɛ?

⁸ Eza yɛsukoa Gyihova nɔhalɛlilɛ ne yɛdi nɔhalɛ yɛmaa yɛ kulovolɛma dahuu. Kɛ neazo la, saa yɛgya a, yɛze kɛ ɔwɔ kɛ yɛdi nɔhalɛ yɛmaa yɛ bokavolɛ. (Mrɛ. 5:15-18) Yemɔti yɛkpo kɛ yɛbadu egyakɛ mɔɔ lumua mɔɔ kɔwie agyalɛ ɛzɛkyelɛ nu la bɔbɔ. (Mat. 5:28) Bieko, yɛkile kɛ yɛdi nɔhalɛ ɔlua yɛ mediema nwo nzekue mɔɔ yɛmbɔ anzɛɛ yɛnsokpa bɛ la azo.​—Mrɛ. 12:18.

9, 10. (a) Nwane titile a yɛkulo kɛ yɛdi nɔhalɛ yɛmaa ye a? (b) Duzu ati a tɛ mekɛ ne amuala a ɔla aze kɛ yɛbali Gyihova mɛla zo ɛ?

⁹ Mɔɔ tɛla biala la, yɛkulo kɛ yɛdi nɔhalɛ yɛmaa Gyihova. Kɛ ɔkɛyɛ na yɛayɛ ɛhye ɛ? Ɔwɔ kɛ yɛbɔ mɔdenle yɛkulo mɔɔ ɔkulo la na yɛkyi mɔɔ ɔkyi la. (Bɛgenga Edwɛndolɛ 97:10.) Saa yɛ nee Gyihova yɛ adwenle a, ɔnrɛyɛ se kɛ yɛbali ye mɛla zo.—Edw. 119:104.

¹⁰ Nɔhalɛ nu, ɔnla aze kɛ yɛbali Gyihova mɛla zo mekɛ biala. Bie a ɔbahyia mɔdenlebɔlɛ na yɛahola yɛali nɔhalɛ. Kɛ neazo la, mbelazinli dɔɔnwo wɔ asafo ne anu mɔɔ bɛkulo kɛ bɛgya noko bɛtɛnyianle bokavolɛ mɔɔ fɛta la wɔ Gyihova azonvolɛ avinli. (1 Kɔl. 7:39) Adiema raalɛ mɔɔ ɔtɛgyale la nwu kɛ ɔ gɔnwo mɔ gyimayɛvoma mɔɔ bɛnle mediema la bɔ mɔdenle kɛ bɛkpondɛ bokavolɛ bɛamaa ye. Bie a adiema raalɛ ne anwo yɛ ye koonwu. Noko akee, ɔmia ɔ nwo ɛsesebɛ kɛ ɔbali nɔhalɛ yeamaa Gyihova. Asoo yɛ nye ɛnlie nɔhalɛlilɛ nwo neazo ngɛnlɛma ɛhye mɔ anwo? Nɔhalɛ nu, Gyihova bayila bɛdabɛ mɔɔ bɛdi nɔhalɛ bɛmaa ye ɔnva nwo ngyegyelɛ mɔɔ bɛyia la kɔsɔɔti.​—Hib. 11:6.

GYIHOVA FA ƐTANE KYƐ

11. Duzu a ɛtanefakyɛ kile a?

¹¹ Gyihova subane ngɛnlɛma ne mɔ ko a le ɛtane mɔɔ ɔfa ɔkyɛ la. Duzu a ɛtanefakyɛ kile a? Ɔkile kɛ ndelebɛbo kpalɛ bie ati yɛbava awie ɛtane yɛahyɛ ye. Saa awie fa ɛtane kyɛ a ɛnee ɔngile kɛ ɔkponle ɛtane ne azo anzɛɛ ɔnlie ɔnli kɛ ɔzile. Emomu, yɛnva nwolɛ ɛya yɛnzie yɛ nu. Ngɛlɛlera ne ka kɛ “fakyɛ wɔ” Gyihova afoa, yemɔti ɔfa bɛdabɛ mɔɔ bɛnu bɛ nwo nɔhalɛ nu la ɛtane ɔkyɛ bɛ.​—Edw. 86:5.

12. (a) Kɛzi Gyihova fa ɛtane kyɛ ɛ? (b) Duzu a awie ‘ɛtane mɔɔ bɛfa bɛahyɛ ye la’ kile a?

¹² Kɛzi Gyihova fa ɛtane kyɛ ɛ? Saa Gyihova fa ɛtane ahyɛ a, ‘ɔfa ɔkyɛ’ bɔkɔɔ yɛɛ ɔngakye ye bieko. (Aye. 55:7) Duzu a maa yɛnwu kɛ Gyihova fa ɛtane kyɛ bɔkɔɔ ɛ? Suzu edwɛkɛ mɔɔ wɔ Gyima ne 3:19 la anwo. (Bɛgenga.) Ɛzoanvolɛ Pita dule ye tievolɛma folɛ kɛ ‘bɛnlu bɛ nwo na bɛzia bɛrɛla Nyamenle ɛkɛ.’ Saa ɛtanevolɛ nu ɔ nwo nɔhalɛ nu a, ɔdi nyane wɔ ye nvonleɛ nwo. Eza ɔbɔ mɔdenle kɛ ɔnrɛyɛ ɛtane bieko. (2 Kɔl. 7:10, 11) Bieko, nɔhalɛ anlubɛnwo maa ɛtanevolɛ ne ‘sia ba Nyamenle ɛkɛ,’ ɔgyakyi ye ɛtane ne na ɔbɔ ɛbɛla mɔɔ sɔ Nyamenle anye la. Saa Pita tievolɛma ne nu bɛ nwo wɔ adenle ɛhye azo a, duzu a bavi nu ara a? Pita hanle kɛ ‘bɛbava bɛ ɛtane ne mɔ bɛahyɛ bɛ.’ Bɛnyianle edwɛkɛ ɛhye bɛvile Giliki edwɛkɛkpɔkɛ mɔɔ ɔ bo kile “kyikyi” la anu. Yemɔti, saa Gyihova fa yɛ ɛtane kyɛ yɛ a, ɔkyikyi ɔfi ɛkɛ. Ɔfa ɔkyɛ yɛ bɔkɔɔ.​—Hib. 10:22; 1 Dwɔn 1:7.

13. Anyelazo boni a edwɛkɛ “menrɛhakye bɛ ɛtane ne mɔ mɔɔ bɛyɛ la bieko” maa yɛnyia a?

¹³ Duzu a maa yɛnwu kɛ saa Gyihova fa ɛtane kyɛ a ɔngakye ye bieko ɛ? Suzu Gyɛlɛmaya ngapezo ne mɔɔ fane ngyekyeleɛ fofolɛ ne mɔɔ bɛ nee Keleseɛnema mɔɔ bɛkpokpa bɛ yɛle, amaa awie biala mɔɔ kɛnyia ɛkpɔnedeɛ ne anu diedi la anyia ɛtane fakyɛ la anwo nea. (Bɛgenga Gyɛlɛmaya 31:34.) Gyihova ɛha kɛ: “Mebava bɛ ɛtane meahyɛ bɛ, yɛɛ menrɛhakye bɛ ɛtane ne mɔ mɔɔ bɛyɛ la bieko.” Wɔ ɛke, Gyihova ɛlɛmaa yɛanwu ye kɛ saa ɔfa yɛ ɛtane ɔkyɛ yɛ a, ɔnrɛdua yɛ nwolɛ kakɛ kenlebie. Ɔndi yɛ ɛtane ne mɔ anu ɔngyinla zo ɔndwe yɛ nzo fane dɔɔnwo. Emomu, Gyihova fa ɛtane ɛhye mɔ kyɛ, ɔmbu nwolɛ mgbonda anzɛɛ ɔngakye bɛ bieko.​—Wulo. 4:7, 8.

14. Saa yɛsuzu Gyihova fakyɛ ne anwo a, kɛzi ɔkyekye yɛ rɛle ɛ? Maa neazo.

¹⁴ Saa yɛdwenledwenle Gyihova fakyɛ ne anwo a, ɔkyekye yɛ rɛle. Suzu neazo ɛhye anwo. Ɛvolɛ bie mɔɔ ɛze ɛhɔ la, bɛdule yɛ diema raalɛ bie mɔɔ yɛbavɛlɛ ye Elaine la. Nzinlii, bɛliele ye. Elaine ka kɛ: “Ɔnva nwo kɛ ɛnee medie medi kɛ Gyihova ɛva me ɛtane ɛhyɛ me na meka nwolɛ edwɛkɛ mekile awie mɔ la, ɛnee mete nganeɛ kɛ me nee ye yɛ avinli twe kpalɛ, na menli mɔɔ ɛha la bikye ye tɛla me.” Noko, Elaine nyianle arɛlekyekyelɛ vile Baebolo ne anu ndonwo ngakyile mɔɔ kilehile Gyihova fakyɛ ne anu la anu. Elaine doale zo kɛ: “Akee mendele nganeɛ kɛ Gyihova kulo me na ye anwunvɔnezelɛ ne wɔ me nwo zo kpalɛ.” Edwɛkɛ ɛhye a hanle ye kpalɛ a: “Saa Gyihova fa yɛ ɛtane kyɛ yɛ a, ɔnle kɛ yɛte nganeɛ kɛ ɛtane ne abo zo wɔ yɛ nwo dahuu.”b Elaine se: “Akee menwunle kɛ ɛnee menlie menli kɛ Gyihova fa ɛtane kyɛ bɔkɔɔ, ɛnee mesuzu kɛ mebazoa adesoa ɛhye dahuu. Meze kɛ ɛhye balie mekɛ ɛdeɛ, noko kɛkala mete nganeɛ kɛ mebahola meabikye Gyihova, ɔle kɛ bɛye adesoa bie bɛvi me nwo zo la.” Nea kɛzi Nyamenle ne mɔɔ yɛlɛsonle ye la lɛ ɛlɔlɛ nee fakyɛ a!​—Edw. 103:9.

SUKOA GYIHOVA FAKYƐ NE

15. Kɛ ɔkɛyɛ na yɛazukoa kɛzi Gyihova fa ɛtane kyɛ la ɛ?

¹⁵ Yɛbahola yɛazukoa Gyihova fakyɛ ne yɛava yɛ mediema nvonleɛ yɛahyɛ bɛ mekɛ biala mɔɔ ɔwɔ kɛ yɛyɛ ye zɔ la. (Bɛgenga Luku 17:3, 4.) Kakye kɛ saa Gyihova fa ɛtane kyɛ a, ɔngakye ye bieko, ɔngyinla zo ɔndwe yɛ nzo bieko. Saa yɛfa yɛ gɔnwo mɔ ɛtane yɛkyɛ bɛ a, ɔnle kɛ yɛkakye ye bieko, ɔnle kɛ yɛka nwolɛ edwɛkɛ bieko.

16. (a) Asoo ɛtanefakyɛ kile kɛ yɛbasosɔ awie mɔ ɛtane zo anzɛɛ yɛbamaa bɛasisi yɛ? Kilehile nu. (b) Amaa Nyamenle ava yɛ ɛtane ahyɛ yɛ la, duzu a ɔwɔ kɛ yɛyɛ a?

¹⁶ Ɛtanefakyɛ ɛngile kɛ yɛkponle ɛtane zo anzɛɛ yɛmaa awie mɔ asisi yɛ. Kyɛkyɛ. Mɔɔ ɔkile la a le kɛ yɛnrɛva edwɛkɛ yɛnrɛzie yɛ nu. Debie mɔɔ nwolɛ hyia kpalɛ la a le kɛ, saa Nyamenle bava yɛ ɛtane ahyɛ yɛ a, ɛnee ɔwɔ kɛ yɛsukoa Gyihova ɛtanefakyɛ ne yɛfa awie mɔ ɛtane yɛkyɛ bɛ. (Mat. 6:14, 15) Yeanyɛ boɛ fee la, Gyihova kakye kɛ “yɛle ndɛtɛlɛ” ɔluakɛ ɔse anwunvɔne. (Edw. 103:14) Asoo ɔnle kɛ yɛdayɛ noko yɛse anwunvɔne yɛbu yɛ nye yɛgua yɛ mediema nvonleɛ zo yɛfa bɛ ɛtane yɛkyɛ bɛ ɔ?​—Ɛfɛ. 4:32; Kɔl. 3:13.

17. Saa yɛ diema bie yɛ debie maa yɛdi nyane a, duzu a baboa yɛ a?

¹⁷ Noko, ɔnla aze kɛ yɛbava ɛtane yɛahyɛ. Ɛnee ɔyɛ se ɔmaa Keleseɛnema mɔɔ bɛkpokpa bɛ wɔ ɛvoya ne mɔɔ lumua la anu amra bie mɔ bɔbɔ kɛ bɛbagyakyi edwɛkɛ nu. (Fel. 4:2) Saa yɛ diema diedinli bie ɛyɛ debie yemaa yɛli nyane a, duzu a baboa yɛ a? Fa Dwobu kɛ neazo. Ɔlile nyane kpole kpalɛ wɔ mekɛ mɔɔ ɔ gɔnwo mɔ​—Ɛlaefaze, Beledade, yɛɛ Zofaa dendɛle mgbane mgbane hilele ye la. (Dwo. 10:1; 19:2) Awieleɛ kolaa ne, Gyihova deanle bɛ. Nyamenle manle bɛhɔzɛlɛle Dwobu kɛ ɔbɔ bɛ ɛtane ne anwo afɔle ɔmaa bɛ. (Dwo. 42:7-9) Ɛnee Gyihova kpondɛ kɛ Dwobu noko yɛ debie. Duzu debie ɔ? Gyihova zele Dwobu kɛ ɔyɛ asɔne ɔmaa ɔ gɔnwo mɔ mɔɔ bɛdendɛle mgbane mgbane bɛhilele ye la. Dwobu yɛle mɔɔ Gyihova zele ye la, na Gyihova yilale ye wɔ ɛtanefakyɛ ne anwo. (Bɛgenga Dwobu 42:10, 12, 16, 17.) Duzu a yɛsukoa yɛfi nu a? Saa yɛfi ahonle nu yɛsɛlɛ yɛmaa awie mɔɔ ɛvo yɛ la a, ɔmmaa yɛnva edwɛkɛ yɛnzie yɛ nu.

BƐMAA YƐHILE GYIHOVA SUBANE NE MƆ ANWO ANYEZƆLƐ DAHUU

18, 19. Duzu a baboa yɛ amaa yɛahile Gyihova subane ngɛnlɛma ne anwo anyezɔlɛ dahuu a?

¹⁸ Ɔda ali kɛ yɛ nye ɛlie kɛ yɛzuzu Gyihova subane ngɛnlɛma ɛhye mɔ anwo la. Yenwu kɛ bɛkola bɛbikye ye, ɔnnea sonla nyunlu, ɔle ahunlunyele, ɔte edwɛkɛ bo, ɔdi nɔhalɛ, yɛɛ ɔfa ɛtane ɔkyɛ. Ɔ nwo debie ekyi bie ala a yɛzukoa a. Yɛbanyia adenle yɛazukoa Gyihova anwo ninyɛne dɔɔnwo wɔ mekɛ mɔɔ ɛnlɛ awieleɛ. (Nolo. 3:11) Yɛ nee ɛzoanvolɛ Pɔɔlo mɔɔ hanle ye Nyamenle anwo kɛ: “Ye nrɛlɛbɛ nee ye adwenle le kpole bo zolɛ” la yɛ adwenle. Na yɛbahola yɛaha kɛ zɔhane ala a ye ɛlɔlɛ nee ye subane nsia ɛhye mɔ mɔɔ yɛzuzu nwo la noko de a.​—Wulo. 11:33.

¹⁹ Bɛmaa yɛ kɔsɔɔti yɛhile Gyihova subane ngɛnlɛma ɛhye mɔ anwo anyezɔlɛ dahuu. Saa yɛnwu ye subane ngakyile ne mɔ, yɛdwenledwenle nwo, na yɛnea zo yɛbɔ yɛ ɛbɛla a, yɛbahola yɛayɛ zɔ. (Ɛfɛ. 5:1) Mekɛ mɔɔ yɛlɛyɛ zɔ la, yɛbade deɛmɔti edwɛndolɛnli ne hanle edwɛkɛ ɛhye la abo kpalɛ: “Mame, ɔle kpalɛ kɛ menwɔbikye Nyamenle.”​—Edw. 73:28.