3. Nea wɔ kpɔkɛdelɛ zo boɛ

Kilisienema mɔɔ ɛyila bɛ nwo zo la fa bɛ ngoane muala sonle Gyihova. Ɔle kɛ asɛɛ bɛlɛfa bɛ sonlabaka ne amuala bɛabɔ afɔle bɛamaa Nyamenle la. Kenga Wulomuma 12:​1, 2, na akee bɛzuzu kpuya ɛhye mɔ anwo:

• Duzu a ɔwɔ kɛ ka wɔ ɔmaa ɛnea wɔ kpɔkɛdelɛ zo boɛ a?

• Ndenle mɔɔ ɛbahola wɔalua zo wɔayɛ zɔ la bie mɔ a le boni?

Wɔzukoa Gyihova anwo ninyɛne dɔɔnwo ɔlua Baebolo ne mɔɔ ɛlɛsukoa la azo. Bie a wɔyɛ nzenzaleɛ bie mɔ amaa wɔava mɔɔ ɛlɛsukoa la wɔabɔ wɔ ɛbɛla. Noko, bie a ninyɛne bie mɔ ɛlɛsi wɔ adenle kɛ ɛbayila ɛ nwo zo wɔamaa Gyihova na bɛazɔne wɔ. Yɛbazuzu ninyɛne bie mɔ mɔɔ ta si ɛzɔnenlɛ nwo adenle nee kɛzi ɛbahola wɔali nwolɛ gyima la anwo wɔ ɛzukoalɛdeɛ ɛhye anu.

1. Ninyɛne nyɛ a ɔwɔ kɛ ɛnwu ye kolaa na bɛazɔne wɔ a?

Kolaa na bɛazɔne wɔ la, ɔwɔ kɛ ɛnyia “nɔhalɛ ne anwo nɔhalɛ ndelebɛbo.” (1 Timote 2:4) Ɛhye ɛngile kɛ ɔwɔ kɛ ɛnwu Baebolo ne anwo kpuya biala mualɛ kolaa na bɛazɔne wɔ. Kilisienema mɔɔ bɛzɔne bɛ la ɛhyɛ bɔbɔ la kɔ zo sukoa debie. (Kɔlɔsaema 1:​9, 10) Noko ɔwɔ kɛ ɛnyia Baebolo ngilehilelɛ bie mɔ anwo ndelebɛbo ekyi. Asafo nu mgbanyima baboa wɔ bɛamaa wɔanwu ye saa ɛlɛ ndelebɛbo mɔɔ fɛta la a.

2. Ninyɛne boni mɔ a ɔwɔ kɛ ɛyɛ kolaa na wɔazɔne a?

Kolaa na bɛazɔne wɔ la, ɔwɔ kɛ ‘ɛnu ɛ nwo na ɛkakyi wɔ ɛbɛlabɔlɛ.’ (Kenga Gyima ne 3:​19.) Ɛhye kile kɛ ɔwɔ kɛ ɛdi nyane kpole wɔ ɛtane biala mɔɔ wɔyɛ la anwo na ɛsɛlɛ Gyihova kɛ ɔva wɔ ɛtane ɔhyɛ wɔ. Eza ɛbɔ kpɔkɛ kɛ ɛnrɛbɔ ɛbɛlatane biala, emomu ɛbabɔ ɛbɛla mɔɔ Nyamenle anye die nwolɛ la. Bieko, ɛbɔ ɔ bo ɛkɔ debiezukoalɛ na ɛ nee asafo ne bɔ nu kɔ daselɛlilɛ kɛ nolobɔlɛnli mɔɔ bɛtɛsɔnenle ye la.

3. Duzu ati a ɔnle kɛ ɛmaa ɛzulolɛ twe wɔ sia a?

Bie mɔ sulo kɛ bɛnrɛhola bɛnrɛli ɛwɔkɛ mɔɔ bɛbɔ Gyihova la azo. Nɔhalɛ nu, ɔyɛ a ɛbavo wɔ ninyɛne bie mɔ anu kɛ mɔɔ mrenyia nee mraalɛ nɔhavoma mɔɔ bɛha bɛ nwo edwɛkɛ wɔ Baebolo ne anu la yɛle la. Noko Gyihova anye ɛnla kɛ ye azonvolɛ bali munli. (Kenga Edwɛne 103:​13, 14.) Saa ɛyɛ mɔɔ ɛbahola la a ɔ nye die nwolɛ! Ɔbaboa wɔ. Nɔhalɛ nu, Gyihova ɛbɔ yɛ ɛwɔkɛ kɛ ‘debie gyɛne biala ɛnrɛhola ɛnrɛhwe yɛ ɛnrɛvi ye ɛlɔlɛ ne anwo.’​—Kenga Wulomuma 8:​38, 39.

SUKOA DƆƆNWO

4. Nwu Gyihova kpalɛ

Kɛzi ɔwɔ kɛ ɛnwu Gyihova kpalɛ kolaa na bɛazɔne wɔ ɛ? Ɔwɔ kɛ ɛnwu ye kpalɛ amaa wɔahulo ye na wɔanyia ɛhulolɛ kɛ ɛbayɛ mɔɔ sɔ ɔ nye la. Ye VIDIO ne na nea kɛzi Baebolo sukoavoma mɔɔ wɔ ewiade amuala ɛyɛ zɔ la. Akee bɛzuzu kpuya ɛhye anwo.

VIDIO: Egyakɛ Ɛdudulɛ Mɔɔ Kɔwie Ɛzɔnenlɛ Nu La (3:56)

• Wɔ vidio ne anu, duzu a boale menli bie mɔ ɔmaanle bɛzieziele bɛ nwo bɛmaanle ɛzɔnenlɛ a?

Kenga Wulomuma 12:​2, na akee bɛzuzu kpuya ɛhye mɔ anwo:

• Wɔ adwenle nu yɛ wɔ kesee wɔ mɔɔ Baebolo ne kilehile la anwo anzɛɛ ɛngola ɛnnwu ye saa mɔɔ Gyihova Alasevolɛ kilehile la le nɔhalɛ ɔ?

• Saa ye zɔhane a, ɛnee duzu a ɛbahola wɔayɛ ye wɔ nwo a?

5. Di ninyɛne mɔɔ kola si ɛzɔnenlɛ nwo adenle la anwo gyima

Saa yɛsi kpɔkɛ kɛ yɛbayila yɛ nwo zo yɛamaa Gyihova na bɛazɔne yɛ a, yɛ muala yɛyia nwolɛ ngyegyelɛ. Amaa wɔanwu nwolɛ neazo la, ye VIDIO ne, na akee bɛzuzu kpuya ɛhye mɔ anwo.

VIDIO: Ɛlɔlɛ Mɔɔ Yɛlɛ Yɛmaa Gyihova La Maa Yɛdi Ngyegyelɛ Nwo Gyima (5:22)

• Wɔ vidio ne anu, ngyegyelɛ boni mɔ a ɛnee ɔwɔ kɛ Narangerel di nwolɛ gyima amaa yeazonle Gyihova a?

• Kɛzi ɛlɔlɛ mɔɔ ɔlɛ ɔmaa Gyihova la boale ye maanle ɔlile ngyegyelɛ ne mɔ anwo gyima ɛ?

Kenga Mrɛlɛbulɛ 29:​25 yɛɛ 2 Timote 1:​7, na akee bɛzuzu kpuya ɛhye anwo:

• Duzu a maa yɛnyia akɛnrasesebɛ yɛfa yɛdi ngyegyelɛ nwo gyima a?

6. Nyia anwodozo kɛ Gyihova baboa wɔ

Gyihova baboa wɔ yeamaa wɔayɛ mɔɔ sɔ ɔ nye la. Ye VIDIO ne, na akee bɛzuzu kpuya ɛhye mɔ anwo.

VIDIO: Gyihova Nyamenle Baboa Wɔ (2:50)

• Wɔ vidio ne anu, duzu a zile Baebolo sukoavo ne adenle kɛ ɔbazɔne a?

• Duzu a ɔzukoale mɔɔ boale ye ɔmaanle ɔnyianle anwodozo kpole wɔ Gyihova anu a?

Kenga Ayezaya 41:​10, 13, na akee bɛzuzu kpuya ɛhye anwo:

• Duzu ati a ɛdie ɛdi kɛ ɛbahola wɔali ɛ nwo zo ɛyilalɛ nwo ɛwɔkɛ ne azo a?

7. Nyia Gyihova ɛlɔlɛ ne anwo anyezɔlɛ kpole

Saa ɛdwenle kɛzi Gyihova kulo wɔ kpole la anwo kpalɛ a, ɛbanyia nwolɛ anyezɔlɛ kpole na wɔanyia ɛhulolɛ kpole kɛ ɛbazonle ye dahuu. Kenga Edwɛne 40:​5, na akee bɛzuzu kpuya ɛhye anwo:

• Gyihova nyilalɛ ne mɔ boni a ɛ nye die nwolɛ kpalɛ a?

Ɛnee ngapezonli Gyɛlɛmaya kulo Gyihova nee ye edwɛkɛ ne, na ɔ nye liele nwo kpole kɛ Gyihova duma la ɔ nwo zo la. Ɔhanle kɛ: ‘Wɔ edwɛkɛ ne yɛle anyelielɛ nee fɛlɛkolilɛ wɔ me ahonle nu, ɔluakɛ bɛfa wɔ duma bɛfɛlɛ me, O Gyihova, Nyamenle.” (Gyɛlɛmaya 15:​16) Bua kpuya ɛhye mɔ:

• Duzu ati a ɔle nwolɛ adenle titili kɛ ɛbayɛ Gyihova Alasevolɛ ne mɔ ko a?

• Ɛkulo kɛ bɛsɔne wɔ kɛ Gyihova Alasevolɛ ne mɔ ko ɔ?

• Debie si wɔ adenle kɛ ɛbayɛ zɔ ɔ?

• Ɛnea a duzu a ɔwɔ kɛ ɛyɛ amaa wɔafɛta kɛ bɛsɔne wɔ a?

EDWƐKƐ TITILI

Ɔlua Gyihova moalɛ zo ɛbahola wɔali debie biala mɔɔ si wɔ ɛzɔnenlɛ nwo adenle la anwo gyima.

Ndinu

• Baebolo ne anwo ndelebɛbo nyɛ a ɔwɔ kɛ ɛnyia kolaa na bɛazɔne wɔ a?

• Nzenzaleɛ boni mɔ a bie ɔwɔ kɛ ɛyɛ kolaa na bɛazɔne wɔ a?

• Duzu ati a ɔnle kɛ ɛmaa ɛzulolɛ twe wɔ sia a?

KPONDƐ DƆƆNWO

Nea debie mɔɔ ɔwɔ kɛ ɛgyinla zo ɛsi kpɔkɛ kɛ ɛmaa bɛazɔne wɔ la.

“Wɔziezie Ɛ Nwo Kɛ Ɛmaa Bɛazɔne Wɔ Ɔ?” (Ɛzinzalɛ Arane, March 2020)

Sukoa kɛzi ɛbahola wɔali ngyegyelɛ fɔɔnwo bie mɔ mɔɔ bahola azi wɔ adenle la anwo gyima la.

“Duzu A Si Me Ɛzɔnenlɛ Nwo Adenle A?” (Ɛzinzalɛ Arane, March 2019)

Nea kɛzi nrenyia bie holale lile ngyegyelɛ titili bie mɔ anwo gyima amaa yeazɔne la.

Duzu Ati A Ɛlɛtwehwe Ɛ Bo Aze Kɛ Ɛbazɔne A? (1:10)

Alimoa ne, nrenyia bie mɔɔ bɛfɛlɛ ye Ataa la hwehwenle ɔ bo aze kɛ ɔbazɔne. Nea mɔɔ akee maanle ɔholale ɔyɛle deɛ zɔhane mɔɔ anwo hyia la.

Asoo Mefɛta Ɛhye Amgba? (7:21)