Maa Ɛ Nye Ɛlie Edwɛkɛhanlɛ Gyima Ne Anwo

1. Kɛzi menli dɔɔnwo mɔɔ wɔ ewiade ne anu la bu yɛ edwɛkɛhanlɛ gyima ne ɛ?

¹ Menli dɔɔnwo mɔɔ wɔ Seetan ewiade ne anu la bu yɛ edwɛkɛhanlɛ gyima ne kɛ ɔle “debie funli.” (1 Kɔl. 1:18-21) Saa yɛannea boɛ a, adwenle ɛhye mɔɔ ɛndenrɛ la bamaa yɛ sa nu ado na yɛ mɔdenlebɔlɛ aha aze. (Mrɛ. 24:10; Aye. 5:20) Ninyɛne boni mɔ ati a ɔwɔ kɛ yɛmaa nwolɛ adenle mɔɔ yɛnyia kɛ yɛle Gyihova Alasevolɛ la sonle bolɛ maa yɛ a?—Aye. 43:10.

2. Kɛmɔti a yɛkola yɛka kɛ ɛzonlenlɛ gyima ne le gyima nwuanzanwuanza ɛ?

² Gyima Nwuanzanwuanza: Ɛzoanvolɛ Pɔɔlo hilehilele nu kɛ ɛzonlenlɛ gyima ne le gyima nwuanzanwuanza, na ɔhanle gyima mɔɔ yɛyɛ yɛmaa Nyamenle la anwo edwɛkɛ kɛ ɔle ɛsɔfoma gyima. (Wulo. 15:15, 16) Kɛzi ɛzonlenlɛ gyima ne le gyima nwuanzanwuanza ɛ? Saa yɛfa yɛ nwo yɛwula nu a ɔmaa yɛyɛ Gyihova “egyinli nu gyimayɛvoma” yɛɛ ‘Nyamenle ne mɔɔ anwo te’ la agɔnwo mɔ, na ɔboa ɔmaa ye duma nwo te. (1 Kɔl. 3:9; 1 Pita 1:15) Gyihova bu yɛ edwɛkɛhanlɛ ne kɛ ɔle “ayɛlɛyelɛ” afɔlebɔlɛ, yemɔti ɛzonlenlɛ gyima ne le yɛ ɛzonlenlɛ ne foa mɔɔ anwo hyia.—Hib. 13:15.

3. Duzu a maa edwɛkpa ne nolobɔlɛ yɛ enililɛ kpole a?

³ Edwɛkpa ne nolobɔlɛ le enililɛ kpole mɔɔ menli ekyi bie ɛnyia a. Anrɛɛ anwumabɔvolɛ ne mɔ bava anyelielɛ ayɛ gyima ɛhye na kpolerazulɛ ɛnle nwolɛ kɛ anrɛɛ bɛbayɛ ye kɛnlɛma kpalɛ. (1 Pita 1:12) Noko akee, Gyihova ɛkpa yɛmɛ alesama mɔɔ yɛtɔ sinli, na yɛle “mbuakɛ” la, na yeva nwolɛ adenle kɛnlɛma ɛhye yemaa yɛ!—2 Kɔl. 4:7.

4. Kɛ ɔkɛyɛ na yɛahile kɛ yɛ nye die yɛ ɛzonlenlɛ gyima ne anwo ɛ?

⁴ Debie Mɔɔ Hyia: Kɛmɔ yɛ nye die nwolɛ adenle ɛhye anwo la ati, yɛbu ɛzonlenlɛ gyima ne kɛ ninyɛne “mɔɔ le kpalɛ” anzɛɛ hyia kpalɛ wɔ yɛ ɛbɛlabɔlɛ nu la anu ko. (Fel. 1:10) Ɛhye ati, ɔwɔ kɛ yɛnyia mekɛ dapɛne biala yɛfa yɛyɛ bie. Sonla mɔɔ ze edwɛne to mɔɔ anye die nwolɛ adenle mɔɔ yenyia kɛ ɔ nee menli mɔɔ bɛlie duma wɔ ewiade kɛ bɛze edwɛne to babɔ nu ado edwɛne la baziezie ɔ nwo kpalɛ amaa edwɛne ko biala mɔɔ ɔbado la, na yeanlea kɛ ye mɔdenlebɔlɛ ne bahɔ ɔ nyunlu. Zɔhane ala a, yɛsiezie yɛ nwo kolaa na yɛahɔ daselɛlilɛ a, amaa yɛahola ‘yɛahilehile nɔhalɛ edwɛkɛ ne kpalɛ’ na yɛanlea kɛ kɛzi ‘yɛkilehile’ la banyia anyuhɔlɛ.—2 Tem. 2:15; 4:2.

5. Nwane mɔ a anye die yɛ ɛzonlenlɛ gyima ne anwo a?

⁵ Mmadi edwɛkɛ ɛtane mɔɔ menli dɔɔnwo ka la anzi ɛmaa ɛ sa nu to. Kakye kɛ menli dɔɔnwo tɛbɔ yɛ azɛlɛsinli ne anu mɔɔ anye die nwo kɛ yɛkɛkpɔla bɛ a. Noko akee, tɛ menli nyunlu ɛlolɛ a yɛkpondɛ a. Mɔɔ hyia kpalɛ la a le kɛzi Gyihova te nganeɛ nee kɛzi ɔ nye die mɔdenle kpole mɔɔ yɛlɛbɔ anwo kpalɛ la.—Aye. 52:7.